1 Pita 4:11 - Ka Lamana'a Monoꞌi Lu Mu Tifiꞌehina Ka Yabe

¹¹ Luga'a enali mono ka lu huto hilanamagi Hu'mamofihi keheli lamana hilete lu epilabe. To luga'a enali bona'i enele'mo bati hilanamagihi ya'ma Hu'mau amuya epilenogo yanatu'i lolo hi epalalabe. Lenali ya suhi ma suhi lolo nehinogo Hu'mamofihi fayahuba bati huto minalibe lite kehelite ya hilabe. Yesu Kilisito ai kumu yabe luto fayaha'auba hu lamana hilibe. Yamofihi sekele mamu'a hiti fana mehena amuya'a hiti aitoga minalina'mu ya'ma minomo tito buto mino bai toto minalibe. Ma'naka.

1 Pita 4:11 ပူးပေါင်းရင်းမြစ်များ

Matiu 6:13

Kai sipi fi taga huse'nagu lele'mo memoloto foipanamofihi afo'afitogati lele'mo lubuto bibo.

Yoni 13:31

Yutasiu enalitogati leke ho limito nobigo Yesu lu epi'ehina: Yatai kana'ni huto nohigo nani Kokulumaguti limi'ehina Bomofita nani fana meha'ni ahuto hibe bu galabe. Yatai Hu'mamofihi fana meha'a nanitoga huto hulenogo bu galabe.

Aposolo 7:38

Ya'mana bouba Isilaeli bona'i ka melugu ai hiti li nupa hi'ahana. Ai tatatigi hiti to agelouba Sainai kosagu Moseu hiti kaga li'ahana yabe. Hu'mamofihi kaga'a minoba minoba huse'mofihi liloto ya'ma lalitoga lu limi'ehina bo nohibe.

Romu 11:36

Ya hu'ehina'mu asaga me'i hiti kokuluma'i hiti to ana'ina asaga'i ai'ago ni'ina'mu to ai'ago kaba huto nominabe. Ya mehu'ehitita asaga'na fenene hitita'mu yabe. Ya'mu Hu'mamofitoga gepohi luto asaga yupahi mino lito buto fokehi sipi'a lino. Ma'naka.

Romu 12:3

To Hu'mau nele'mo hetofa hu'ehina bo noho lifi'ehigo nani ma kaga mone lu nolepube. Hu'mau keheli ule'ale huse'i fato fato'i guna ito lepi'ehina. Ya'mu lenali lenugufatini limo titi mehilo. Lenalitini be ligite kehelinogo mone'a hiti metilo. Hu'mau mono ka limi'ehinamofihi keheliya ite minete hapatini le'mo eto eto hite minalabe.

Romu 16:27

Hu'mau ai'asigo Sipi Bo nohibe. Ai'asigo keheli bati huse bo nohinagi yege filo. To Yesu Kilisito kumu yabe luto sipi lenegelo bite gi'a liyafa hinogo hofa teno. Ma'naka.

Romu 3:2

O'yo, bati hu'ehibe. Hena'mube? Hu'mau yata'a kaga'a Yuta bonatoga molo epolo'ehina. Yuta bona'magi Hu'mamofihi hapa'a akehelite agoya hu emi'ahana yabe.

1 Koliti 10:31

Nani lenali kalo nona'a ma luto nolube. Lenali nose'na nalune'mu nehitemo to yafi nagami'i nalune'mu to silaga'na hilune'mu Hu'mamofihi gi'a huto huto hilibe lite ya suhi lolo hilabe.

1 Koliti 12:4

To mono kamofihi amuya'a fato fato'mofihi ni'inaya Sikalafu'i moneko'uba ana amuya'a limilata nohibe.

1 Koliti 3:10

Hu'mau lili'na nimi'ehina'mu luto nani nohi gise'namofihi lamana'a ufe'ye yafa lukesa lito fi'ohuna. To anamofihi gupisalo bona'i luga'amagi molo emite nohi gilata nehabe. Lukesa fugo mino'ehina ya'ma Yesu Kilisito yabe. Ya'ma li sigito mone fato lukesa aku'i filana'a meni'ibe. Yana'mu nohi neginamagi keheli fe lite minete kaba hite gilabe.

1 Koliti 6:20

Hu'mau lenali mina'a fi lepolo'ehinamo ni'igo lenali lenugufamofihi ai'asigo ni'ibe. Ya hu'ehina'mu lenugufauba Hu'mamofihi gi'a fi hele hu eteno.

2 Koliti 2:17

Lali bona'i luga'amagi hite melete nehana'a nehana ya suhi lolo hulata menohune. Bona'i luga'a asagatoga Hu'mamofihi ka'amu kehelilago kefahi li huto hu epilina nasana lolo hulago foya'a li etelata nehanaya lali ya'ma komopati lamana hinogo minaluta Hu'mamofihi bulo buto Kilisitotoga i hepiloto mono ka'a lulata nohune.

2 Koliti 9:13

Lenali Kilisitohi ka lamana'a kehelilete li pili kete lite neminana yamofihi hapa'a to lenali Yelusale hepatoga mono ka keheli'ahana bona'i to lenalalutigihi luga'a asaga'i enali hiti lenipagu bati hinogo kehelite babu lite enehe'melata nehanamofihi hapa'a huto hilenogo Hu'mamofihi fayahi mino baga ito minalibe lite le'mo ho tilune'mu habe.

Efeso 1:19

To aitoga agoya hu emi'ohutana bona'magita lalitoga ai amuya'a sipina'auba foya lilata nohina kehelilabe luto, Hu'mamofitoga loka nohobe.

Efeso 4:29

Huli ka mone lenabagaguti mone melilo. Kaga lamana'a lite ai he'menogo ai he'menogo hilana kapomo sa hi lepalalana ka linogo enali katini kehelilana bona'i luga'a keheli bati hinogo enele'mo bati hilanagihe.

Efeso 5:20

Ya nehite Sipi Boti Yesu Kilisito gi'a liyafa hite kana'amu kana'amu silaga'namu Hu'ma afotifihi fokehi hete minalo.

Efeso 6:10

Lu su hoto lilube. Hu'mamofitoga bite i ke'menogo ai amuyana'a napa huto lenalitoga ni'inogo yanamofihi komopa'agu mine lite tite ule'ale hilo.

Filipai 1:11

To ana kanagu Yesu Kilisitou lenehe'menogo komopatini bati bati hite minelenogo bona'magi bu lenegete yege nofune lite Hu'mamofihi fokeha'a lilana'mu yabe.

Filipai 2:11

To enabagaguti enabagaguti ya'ma Yesu Kilisitohi ai Sipi Boti nohibe lite nelite kululu kululu tite halana yanauba tito minoto afo'afu Hu'mamofihi gelo bise'na lolo huto minalibe.

Kolose 4:6

To lenali kaga nelanaya ka laga'a hiti fulu'a hiti lite neminenogomo enali ka kehelilabe. To enali mone kaga lenoloka nehenogomo ka'anilo nona'a bati hite aku'i lu epilabe lite kehelilo.

1 Tesalonika 2:4

Hu'mau bu logoto laga besigo ya'ma hetofa kaga'ni keheli fotogo hu'ohuto lu lepilabe luto lele'mo eto hulago ya'ma ana ka nolune. Bona'i luga'amagi kehelite linogo bati hilibe luto meni'ibe. Hu'mau ai komopatigu bu go fulu tise bouba keheli'ehinogo lamana hilibe luto nolune.

1 Timoti 1:17

Yana'mu amuya gihiti Bo, mefililatanamofihi bu megolatanamofihi Hu'mamofihi moneko'i ai gi'a li saga hinogo ai fana meha'auba minoloto mino lito tito minalibe. Ma'naka.

1 Timoti 6:16

Ai'asigo filise'na'a meni'ibe. Ai'a fana mehena'alo minoto lito nohina ya'ma lali fa'mene buto bu nehetise'a meni'ibe. Bo moneko'uba ai gufa'a bu mego'ehinamo ni'inagi to bo moneko'uba be megalube'mu hibe. Keke boke ka lu emilata nohuta amuya to usisi kito minolata nohuta amuya aitoga mineno. Ma'naka.

Taitasi 2:1

Kaiya ya'ma mono ka lamana'amofihi komopa'agutiko bona'magihi lu enelepilata bati huto lu epibo.

Taitasi 2:15

Kaga ya'ma lu nokumuna yamofihi lu enelepilata huto minobo. To bona'i enali kai kumu fa'mene bo nohibe lite li lalagi Hu'mau amuya'a hiti molo keto'ehina bo'amaka enegekesa lito sibina nehinogomo ka epekito enele'mo bebe soto hubo. To bati nehinogo kai bebe sose ka lu epito komopa'anigu enele'mo amuya molobo. To kai kumu kehelinogo notinogomo kebe meligino.

Hibulu 13:7

Yata'a kaba botini Hu'mamofihi ka'a lu lepilata hi'ahana enali kumu beto hite minalabe. Ya nehite mono'mofihi kapo'alo nebite fili'ahana'a enali enigiyaka'a bu goya ite minete enalitoga enemege'i melete keheli ule'ale hise'namofihi komopa'agu ya hite minelete lenekesa kehelilo.

Hibulu 5:12

Lenali kana'a yatama mono ka kehelite biba biba hite minatita luga'a fi lehe tete giyaka giyaka lite li epitita bati hitine. To ya'amagihi lenali mono'mofihi hapi fise'na'alo ya'ma aku'i lu lepilatanamofitoga mine mele'ahabe. Lenali komopatinimofihi nose'na amuya'a hiti menalana'a hite minalana legegeto nehabe.

Yemesi 1:19

Komopa'ni nolepuna nalalu'nigita, lenali ya'ma kaga'ni kehelilo. Lenali Hu'mamofihi ka'a mele'isi nekehelite fulu hite kaga lite lenita bilina nasana'mu kaga mele'isi melilo.

Yemesi 1:26

Luga'amagi enali Hu'mamofihi amuya'a kehelito nominone lite lilana'a ya bona'magi enabaga'ani kaba mehilana yamofihi bona'i ya'amagi mono ka nolupihe lite faga heletuya'a lilune'mu nehabe.

1 Pita 2:12

Ya nehite Hu'mamofihi mekeheli'ahana bona'magihi komopa'ani legi mehinogo mino eto hite minalo. Ya hite nehinogo Hu'mamofihi mekeheli'ahana bona'magi kohe tete lenali kumu foipana lilata nehana bona'i nehabe lite lenifisa ite aku alihi to lenali bite folagaha'anigu minenogo to hapatini bati hinogo enali bu negenogo yata'a kehelise'na'ani he'mite lenali kumu Hu'mamofihi fokeha'a lilabe. Yesu Kilisitou nehetilina kanagu ya hilana'mu yabe.

1 Pita 2:5

Ya lite nehite lenali ana suhi hite mino lito minolata nohina efahi lolo hi su helete aitoga molo emite mine lite bite tilo. Tite Hu'mamofihi Sikalafu'amofihi mono noha'amofihi gise efapo lolo hilabe. Ya hilete ana nonugu mamufa gi emilata bona'i eto eto hite lolo hilabe. Hu'mamofihi Sikalafu'mofihi nasana kuguhi koyo emilenogo Yesu Kilisitotoga nebinogo keheli laga hilibe.

1 Pita 4:10

Lenali Hu'mamofihi ka'amofihi kehelite lenele'mo bati huse'namofihi amuya fato fato'mofihi guna molo lepolo'ehinamo yanatu foya'a lelite nebinogo bona'i luga'amagihi enele'mo bati hilana yanauba Hu'mamofitogati amuya'a lepilenogo yanatu'i ana hi epalalabe.

1 Pita 4:16

To mone kegi'a moneuba ai Kilisitohi bona'a nehana'mu yabe luto naga'i emilenogomo ya'ma ya hu'ehina'mu kehelinogo buya'a hiti lolo mehilibe. To Kilisitohi gi'a kehelito minoto Hu'mamofihi foke ka lu emilibe.

1 Pita 5:11

Yamofihi amuya'a ya'ma aitogago mele'ahana yamofihi minoto mino lito buto minalibe. Lama'naka.

Yute 1:25

Sipi Boti Yesu Kilisito kumu yabe luto lubuto bilina bo Hu'mamofihi aitoga sekele mamu'a hiti fana mehena to amuyana'a hiti to kaba hulata amuya'a, koyapa kana'a mino'ehina to yatai hiti ana huto li'ehina to mino lito buto mino bai toto minalina'mu yabe. Lama'naka.