1 Pita 1:10 - Ka Lamana'a Monoꞌi Lu Mu Tifiꞌehina Ka Yabe

¹⁰ Ana lubuto bise'namofi kumu ya'ma koyapa mono ka lu huto hi'ahana bona'i enali kehelilune lite sa sa hi'ahana yabe. To ananamomu'i Hu'mau lenalitoga lenehe'mose'na lepilube lite ya'mu ka hapa'aguti lite kaga li huto huto hite melete mine'ahana.

1 Pita 1:10 ပူးပေါင်းရင်းမြစ်များ

Matiu 13:17

Nani ma'naka luto lu nolepube. Koyapa'i babu lu huto huto bona'i hiti to komopa'anigu bati hina bona'magi ya'ma yatai lenali bu neganana bu galune lite hi'ahanaya enali bu mege'ahana yabe. To lenali yatai nekehelina kaga kehelilune lite hi'ahanaya mekeheli'ahana yabe.

Matiu 26:24

Mono kagu koyapa'i kaga lu yege hose bomagi nani ya'ma Kokulumaguti limi'ohuna Bo fililuna'mu fayahi ge'ahana kaga ninalo nani filinogo'ni pa salina'mu yabe. Ya hu'ehinaya ai nayato lito fateha'nimagi epilina bose. Ke. Ana bo lesa'a gofana lino. Ito'afu ana bo meketatitaya bati huto minatita'mu yabe.

Luku 10:24

To hena'mube? Enali koyapa lu huto huto bona'i hiti to gihiti bona'i enali kumu lu nolepube. Lenali bu gela to lenekesagu kehelila nehanana ana huto lekesagu kehelila to lubutiguti bu galune lite helebe helebe hanaya enali mekehelila to bu megalana suhi habe lu'ehina.

Luku 24:44

Ya huloto ai ma luto lu epi'ehina: Koyapa'i nani lenali hiti nohuto'ni alu lepi'ohuna yabe. Asaga kaga nani kumu lite Mosehi bukugufi to lu huto huto bomagi bukugufi to nama li'ahana bukugufi koyapa'i fayahi ge'ahana asaga ya'mana kagauba legeya'a mana'a huto hilibe luto lu lepi'ohuna yabe.

Yoni 5:39

Lenali mono bukugu fayahi keye'ahanamofihi mino kosaba hilana limilibe lite ana fayahi loko luku hite asaga kaga go'ehina bu gelata nehabe. To ya'mana fayahuba nani hapa'ni kumu lu huto huto lu lepilata nohibe.

Yoni 7:52

Ya luto ligo enali loka he'ahana: Kai hiti Galili bomo nohapihe? Mono ka leka so bati huto bu gobo, kaga lu hokolo hulata bo Galili metogati huto mehilina'mu yabe.

Aposolo 10:43

Asaga'i kaga lu yege hose bomagi Yesu ai kumu kaga ma lite li'ahana. Enali aitoga komopa'ani malalanamagihi foipana'ani ai gi'alo linogoti li he'mi epalalibe.

Aposolo 17:11

Enali Yuta bona'i Belia hepalugu enegekesa hokolo nehanamagi hetofana hite koyone hi'ahana. To luga'a Yuta bona'i Tesalonika nehanamagi suhi lite memine'ahana. Enali Belia bona'magi ka'atiti keheli bati hite laga'ani epesigo asaga yupahi mono buku'ani hiti lite e'ehite Polugo Silasiugo faga lila'ifi ma'naka lila'ifi lite leka so bati hite bu golata hi'ahana.

Aposolo 28:23

To enali kana mone melelete ana kana'alo babu bona'i ete Polu nohina nonugu li nupa hi'ahana. Etehi hapi fito Polu kaga hapa hapa'a lu epiba lu epiba huto nohigo buto yege limi foloto sinihi gi'ehina. To ai ana huto Hu'mamofihi Kapo'amu kaga'a le'mo bati huto lu epi'ehina. To ai kaga koyapa'i lu huto huse bomagi hiti to Moseu hiti fayahi keye'ahanamofihi lu yege ho epi'ehina. To ya'ma kaga'atu enele'mo amuya moloto komopa'ani li keta mehuse hinogo Yesutoga komopa'ani emite minalabe luto lu'ehina yabe.

Aposolo 7:52

Koyapa'i kaga lu yege hose bo minana mone kiyi'afihi le'mo sibina mehi'ahana ni'ibe? Lamana bo'a, Yesu yabe, alinamofihi kaga'a lu yege hete koyapa'i e'ahana bo enoho fili su he'ahabe. To yatai halune'mu hana bomagi enayanugu lenali malago ya'mana bo aho fili'ahabe.

Hibulu 11:13

Bona'i ya hana'amagi keheli ule'ale hite minete filite bi'ahana'a enali Hu'mau lu molo'ehinamofihi ana'ina enele'mo keta mehuse'namofihi legeya'a ya'ma mele'isi meli'ahana, fa'mene foto'i ni'igo be gelete ka'a lite kehelite li pili kete mine'ahana. Ya hite minete, hapa'ani ma lite keheli'ahana: Lali fa'mene metoga minoto bonoho bona to ka'i logo lili bona tegi huto nohune lite keheli'ahana.

Hibulu 11:40

Henabe luto meli'ahana? Hapa'a ma huto ni'ibe. Hu'mau ai lalitoga ana'ina be ligito ni'ina'a molo letalube luto lu kehelito mino'ehina yamofihi enali kohe tete bati hite minalana'a ya'asigo meni'ibe. Alihi ya'ma lali hiti buto mino hepito bebe senogo minaluta nasana ya'ma li huto hilabe luto lu epolo'ehinamo ni'ibe.

1 Pita 1:11

Enali ya'ma huto hilina kana'a sa sa hi'ahana, Hu'mau ya'ma Kilisitohi ho lifilina kana henaki yupahi huto huse kanagu huto hilibe lite sa sa hi'ahana. To Kilisitohi meha'a yauba komopa'anigu molo epalago enali ya'ma lenali kanagu yabe lite keheli'ahabe. Lenali kanagu Kilisitou huto huloto yalo keke'i luse'namofihi gupisalo tito fililina yalo ho tito sekele mamu'a lilina'mu yabe lite keheli'ahabe.

1 Pita 1:13

Ya'mu komopatini li hokolo hite lenegekesa kehelilo. Kaba hu bati hite minete Yesu Kilisitou alihi huto hinogo ya'ma lusa gi lepalalina'a yalo'i geba hilete asaga'i keheli ule'ale hite fifa ilete minalo.