1 Pita 1:1 - Ka Lamana'a Monoꞌi Lu Mu Tifiꞌehina Ka Yabe

¹ Nani Pitaita, Yesu Kilisitohi aposolo nohuna bo, Hu'mau nele'mo eto hu'ehina. To Hu'mau lenele'mo ho ti'ehina bona'magita, lenali guna molo'ehinalo Ponitasi metoga hiti Galesia metoga hiti Kapatosia metoga hiti Esia metoga hiti Bitinia metoga hiti tili tele hite mine'ahana lenali'i fayahi ya'ma koyoto nolepube.

1 Pita 1:1 ပူးပေါင်းရင်းမြစ်များ

Matiu 10:2

Nayaha'ni su hago nigigusaga loemo leheko malago aposolo pana'magihi enigi'ani li keheli'ehina ma luto ni'ibe. Yata'a Simoni fato gi'a Pita, to Atulu ai gona'a yabe. To Yemesi Sepetihi pana'a ai Yoni gona'a hiti yabe.

Matiu 24:22

To Hu'mau ya'mana kana li hupa mone mehititaya asaga boana'i ma melugu meminatita'mu yabe. Ya hu'ehina Hu'ma ai enele'mo eto hu'ehina bona kumu'i ekesu mehalibe. Ya'mu luto ai ya'mana kana'a li hupa mone hilina'mu yabe.

Matiu 4:18

Yesu Galili nagami Hefuhi beleha'aga kapo moloto notubuto loe kogunale bu etogo'ehina. Simoni, enali Pita lite gi'a helata nehana hiti to gona'a Atulu, etali hefunugu faya gutalafa melete neha'igo bu etogo'ehina.

Luku 18:7

Ana suhi huto Hu'mau boana'a enele'mo eto hu'ehina enali asaga utehi etehi aitoga kehe ite lehe'malibe lite lilata nehana meenehe'malina ni'ifihe? Hu'mau tala tele huto enehe'malina ni'ifihe?

Yoni 7:35

Ya ligo Yuta bomagi ai loka hago ai loka hago hite ma lite li'ahana: Ai hiya'aga bu'ehinogo lali sa sa hilutaga'mu nolibe? Giliki nogo nehana metoga Yuta bo nehite Giliki bona'magihi hepato buto mono kaga enelepito bilube'mu nolifihe?

Aposolo 18:2

Ya huloto Yuta bo mone gi'a Akuila yabe ai Ponitasi hepato kete'ahana bo nohigo bu go'ehina. Ya'ma bouba liha'a Pilisila hiti Itali kegi'atoga bite nemina'inati ma'asi e'aha'ina yabe. To hena'mugope gamani bo Kolotiasiu ai gihiti bouba Yuta bona'i asaga'i Lomu hepa'i he'mite bilo luto enoho lifi he'migo etali ete neha'inalo Polu bu'ehina.

Aposolo 18:23

Analo'i nesi kana minoloto ana hepa'i he'miloto Galesia kegi'a hiti Filigia kegi'a hiti bula ola huto boana'i Yesutoga komopa'ani melete neminanamofihi enele'mo amuya molomofa'na hu'ehina yabe.

Aposolo 19:10

To ai ya huto minoto kufu loemo li he'mina kana'agu Yuta bona'ifi Giliki bona'ifi to silaga bona'i Esia melugu mine'ahanamagi Sipi Bomofihi ka'a akeheli su he'ahana yabe.

Aposolo 6:9

Ya nohigo luga'a bomagi ho tilete ai kaga'a pelesa i'ahana. Ya'mana bona'i enali Yuta bona'i fato mono ka nekehelina bo, enali fato mono'ani Lali Foyati yabe lite gi'a helata nehabe. To enali Sailini hepatoti yagi Alekasatilia yagi, to mone'amagi Silisia yagi to Esia, asaga ya'ma hepatogati ete li nupa hite nehana bomagi yabe.

Aposolo 8:4

Enali Yesutoga komopa'ani emi'ahanamagi tili tele hite bite minela minela hi'ahana hepatoga ka lamana'a lu yege he'ahana.

1 Koliti 16:19

Esia metoga Hu'mamofihi bona'amagi enali lenali kumu keke'i neli lepalago nolube. To Akuila to liha'a Pilisila etali nonugu mono kumu li nupa hilata nehana bona'magi enali Sipi Bomofi kumu yabe lite lenali kumu keke'i neli lepalago nolube.

2 Koliti 1:8

Lalalutigitabe, Esia metoga nohuto keke'i luse'namofihi lu gupisalo minomo ti'ehinamo ni'ibe. Ya'mu lenegekesu ho lalibe luto lilube kehelilo. Mone kegi'a ya'ma keta'a hiti nasana goli'a hiti nasanauba lugupisalo tiloto lele'mo ho kalina'a nohigo molo emito minalupi fililupi luto mone mekeheli'ohutamo ni'ibe.

Galesia 1:2

To nani nalalu'nigihi luga'a maga nehana'a enali hiti moneka nohutoti ya'ma Yesuhi naga'a Galesia metoga minete bi'ahana bona'i lenali fayahi ya'ma koyoto nolepunagihe.

Efeso 2:12

Ana kanagu lenali Kilisito hiti hepite memine'ahana ni'ibe. To Yuta bona'i enali fulilo meminese lenali fa'mene ino bano mine'ahana. To Hu'mau ai'a bonatoga lu molo epolo'ehina kaga alihi le'mo huto hilina ka yabe luto lu molo epolo'ehina kaga lenalitoga lu memalago lenali fegutoga bona'i fa'mene mine'ahana yabe. Lenali Hu'mamofihi mekehelise nehite ai lele'mo bati hilibe lite mekehelise minete ma melugu fa'mene sibina hite mine'ahana ni'ibe.

Efeso 2:19

Ya higo yatai lenali fegutoga bona'i fa'mene fato bona'i meneminana yabe. Lenali hiti Hu'mamofihi naga'i enali hiti Hu'mamofihi hepa'i bona'a lolo nehabe. To Hu'mamofihi yagapana'a lolo huto nehabe.

2 Timoti 1:15

Esia metoga bona'i Hu'mamofihi naga'i luga'amagi malo e'ahanamagi enali asaga'i nani kumu enekesa mekehelite aku ahe'mi nete su he'ahabe. Figelasigi hiti to Hemogenegi hiti etali ana hite he'mi nete'aha'inamofihi akeheli'ahane.

Hibulu 11:13

Bona'i ya hana'amagi keheli ule'ale hite minete filite bi'ahana'a enali Hu'mau lu molo'ehinamofihi ana'ina enele'mo keta mehuse'namofihi legeya'a ya'ma mele'isi meli'ahana, fa'mene foto'i ni'igo be gelete ka'a lite kehelite li pili kete mine'ahana. Ya hite minete, hapa'ani ma lite keheli'ahana: Lali fa'mene metoga minoto bonoho bona to ka'i logo lili bona tegi huto nohune lite keheli'ahana.

Yemesi 1:1

Nani Yemesita Hu'mamofihi koko pana'a to Sipi Bo Yesu Kilisitohi pana'amofita nani'ni fayahi nokoyobe. Lenali Isilaeli bona'magihi naga'i nayahi luga luga su hoto nigigusaga loemo leke ho malago tili tele hite bi'ahana bonatogati Yesuhi naga'a lolo hi'ahanamagihi keke'i lu epoloto ya'ma fayahi nokoyobe.

1 Pita 2:11

Nigibo nalalu'nigita, nani lenegekesa lito lu lepilugi kehelilo. Lenali Hu'mau kokulumagu nohina bomofihi naga'i nehanagi ya'mu ma metoga bonoho bo suhi hite to ka'i logo lili bo suhi hite minetetini lenugufatini laga lepesilatana nohina yauba komopatini luba li emilata nasanaya he'milo.

2 Pita 1:1

Simoni Pita nani Yesu Kilisitohi koko pana'a to aposolo nohuna bo, nani fayahi ya'ma nokoyobe. Afotifu, Hu'ma lamana hiti nohina bouba to Yesu Kilisitou lubuto bilata bouba lenele'mo bati higo lali suhi hite aitoga keheli ule'ale hilata'na mina'a suhi huto tito nohina'a bona'ise. Ya'ma koyoto nolepube.

Huto Hilina Ka 1:11

Huto higo ya'ma luto keheli'ohube: Nasana bu nogata ya'ma bukugu fayahi koyolotoka yagapana'ni li gehesa 7 kaitoga he'milago Efeso hepatoga to Semena hepa'i to Pegamuma hepa'i to Taitaila hepa'i to Satisi hepa'i to Filatelefia hepa'i to Leotisia hepatoga bilibe.