UJeremiya 4:6 - iBhayibhili Elingcwele 1978

⁶ Misani uphawu olukhomba iZiyone, libaleke lingemi, ngoba ngiletha okubi okuvela ngasenyakatho, lokuchitheka okukhulu.

IBhayibhili Elingcwele LesiNdebele

⁶ Phakamisani uphawu lokuya eZiyoni! Balekelani ekusileni ngokuphangisa! Ngoba ngiletha umonakalo ovela enyakatho, lencithakalo embi kakhulu.”

UJeremiya 4:6 ပူးပေါင်းရင်းမြစ်များ

U-Isaya 62:10

Phumani ngamasango, lilungisele abantu indlela; candani indlela, likhuphe amatshe, liphakamisele abantu uphawu.

UJeremiya 10:22

Kulamahungahunga okuthi kukhona ukuzamazama okukhulu okusuka elizweni lasenyakatho, okuzakwenza yonke imizi yakoJuda ibe yinkangala lendawo yamakhanka.

UJeremiya 18:11

Ngakhoke tshono ebantwini bakoJuda lakwabakhileyo eJerusalema ukuthi: INkosi ithi: Khangelani, ngilibumbela okubi, ngenza amacebo ngani. Tshiyani ububi benu bonke, lilungise indlela zenu lezenzo zenu.

UJeremiya 21:7

Kuthi emva kwalokho, kutsho iNkosi, nginikele uZedekiya inkosi yakoJuda, lenceku zakhe, labantu balumuzi abasilileyo emkhuhlaneni, lempini, lendlaleni, esandleni sikaNebukadineza inkosi yaseBabiloni, lasezandleni zezitha zabo, ezandleni zalabo ababazingelayo. Uzakubabulala; kayikuba lasihawu, kayikubahawukela, kayikuba lamusa kibo.

UJeremiya 22:7

Ngizakukulethela abachithi, bonke bephethe amahloka; bazagamula izihlahla zenu zomkusu ezinhle, baziphosele emlilweni.

UJeremiya 25:9

ngizabiza izizwe zasenyakatho, kutsho iNkosi, loNebukadineza inkosi yaseBabiloni inceku yami, ngizilethe kulelilizwe lakwabakhileyo kulo, lakuzo zonke izizwe eziseduze lalo, ngibabhubhise, ngibenze babe yinto eyesabekayo, into yokuncifelwa, lehlazo elingapheliyo.

UJeremiya 4:21

Koze kube nini ngibona uphawu lwempi, ngizwe ukukhala kophondo?

UJeremiya 50:2

Memezani phakathi kwezizwe, litshumayele; misani uphawu, litshumayele, lingakufihli, lithi: IBabiloni linqotshiwe, uBali uyangekile, loMerodaki uchithiwe. Izithombe zalo ziyangisiwe, lemifanekiso yalo emibi ichithekile.

UJeremiya 50:22

Kukhona umsindo wokulwa elizweni, lokuchitheka okukhulu.

UJeremiya 51:12

Misani uphawu lwempi ngasemidulini yaseBabiloni, liqinise ukulinda, libeke abalindi, licathame, ngoba iNkosi isikumisile, futhi izakukwenza lokho ekukhulume ngabakhileyo eBabiloni.

UJeremiya 51:27

Misani uphawu lwempi emhlabeni, litshaye uphondo phakathi kwezizwe, lilungisele izizwe ukulwa leBabiloni, lilibizele imibuso ukulwa lalo, iArarati leMini leAshikenazi; lilibekele umlawuli wempi, likhuphe amabhiza abe njengomtshitshi wentethe.

UJeremiya 51:54

Zwanini, ukukhala kuvela eBabiloni, umsindo wokuchitheka okukhulu uvela elizweni lamaKaladiya.

UJeremiya 6:1

Balekani ukuze liphephe, lina bantu bakoBenjamini, liphume phakathi kweJerusalema. Khalisani uphondo eTekowa, liphakamise uphawu eBeti‐Hakeremi, ngoba ububi bubonakala ngasenyakatho lokuchitheka okukhulu.

UJeremiya 6:22

INkosi ithi: Khangela, abantu bayeza bevela elizweni elisenyakatho, isizwe esikhulu siyavuka endaweni ezikhatshana zomhlaba.

UHezekhiyeli 9:1

Ngezwa ilizwi elikhulu limemeza lisithi: Sondelani lina elibulala umuzi, lonke liphathe izikhali zenu zokuchitha.

UHezekhiyeli 9:2

Kwasekusiza amadoda ayisithupha evela ngasesangweni langaphezulu elikhangele ngasenyakatho, wonke ephethe izikhali zokubulala, ayehamba lomuntu ogqoke ilembu elihle elezinto zokubhala; angena, ema ngasealtareni lethusi.

UZefaniya 1:10

Ngalolosuku, itsho iNkosi, kuzazwakala ilizwi lokukhala ngaseSangweni leNhlanzi, lokulila esigabeni sesibili somuzi lokufohloza okukhulu kuzwakala emaqaqeni.

UZakhariya 6:6

Inqola elamabhiza amnyama iya elizweni lasenyakatho, elamabhiza amhlophe iya elizweni lasentshonalanga, lelamabhiza alamabala iya elizweni laseningizimu.