Yo 6:38 - Sơ̆p Hlabơar Nơ̆r 'Bok Kei-Dei

³⁸ Inh jur đơ̆ng plĕnh ưh kơ sĭ wă pơm kiơ̆ thoi Inh wă ôh. Inh jur đơ̆ng plĕnh wă pơm kiơ̆ thoi 'Bă Inh wă, kơlih Sư wơh Inh.

Yo 6:38 ပူးပေါင်းရင်းမြစ်များ

Êsai 53:10

Mă-lei Kră Yang lăp đon ăn kơ sư đe teh pơjuă păng pơjĭ. Đang kơ sư pơyơ̆r akâu jăn sư pơm tơmam soi huai iŏk đơ̆ng yoch. Sư gô 'bôh adrĕch adrung sư; lu năr sư gô rai sot kơjung, păng jơhngơ̆m đon Kră Yang wă na gơh jing đơ̆ng Sư.

Mathiơ 20:28

Kư̆m thoi Inh Kon Bơngai mơ̆n, Inh jur tơ ala teh âu ưh kơ sĭ Inh wă chă pơgŏ pơđep đe awih awăn kơ Inh ôh; Inh wă kơ tơ'ngla Inh kơdih awih awăn kơ đe păng Inh wă kơ tơ'ngla Inh kơdih lôch tang huai iŏk lơ bơngai.”

Yo 3:13

Đĭ-đăng bơngai ala teh âu, ưh tam đei bu tŏk tơ plĕnh ti boih ôh. Inh Kon Bơngai, pôm Inh đĕch đơ̆ng plĕnh ti jur tơ ala teh âu.

Yo 3:17

'Bok Kei-Dei wơh Kon Sư jur tơ ala teh âu wă pơklaih kon bơngai đơ̆ng tơdrong yoch, ưh kơ sĭ wă phak kon bơngai ôh.

Yo 3:31

“Bơngai mă jur đơ̆ng plĕnh ti, bơngai 'noh tih hloh kơ đĭ-đăng bơngai. Bơngai bu đơ̆ng ala teh âu, sư 'noh bơngai mơnglang đĕch păng sư băt pơma gah tơdrong ala teh âu đĕch. Bơngai mă jur đơ̆ng plĕnh ti 'noh tih hloh kơ đĭ-đăng bơngai tơpă.

Yo 4:34

Yêsu khan kơ lu sư: “Tơmam sa Inh jơ̆ Inh athei pơm kiơ̆ kơ 'Bok Kei-Dei wơh Inh jang mă keh tơdrong Sư. 'Noh boih tơmam sa Inh.

Yo 5:19

Yêsu khan kơ lu bơngai Juđê ei: “Inh khan kơ iĕm tơpăt, Inh Kon Sư ưh kơ gơh jang kiơ̆ kơ Inh ôh. Inh athei jang kiơ̆ kơ Sư đĕch. 'Bă Sư jang thoi yơ Kon Sư jang thoi noh mơ̆n.

Yo 5:30

“Inh ưh kơ pơm kiơ̆ thoi Inh wă ôh. Inh kơtơ̆ng 'Bă Inh pơma kơ Inh thoi yơ, Inh sek tơlang kiơ̆ thoi Sư pơma 'noh mơ̆n. Tơdrong Inh sek tơlang Inh sek tơlang mă tơpăt kiơ̆ thoi Sư, kơlih kơ Inh ưh kơ wă kiơ̆ thoi Inh kơdih, Inh athei pơm trŏ thoi 'Bă Inh mă wơh Inh wă.

Yo 6:29

Yêsu khan kơ lu sư: “'Bok Kei-Dei wă thoi âu: Sư wă kơ iĕm lui kơ Inh âu mă đơ̆ng Sư wơh.”

Yo 6:33

kơlih kơ tơmam sa đơ̆ng 'Bok Kei-Dei ei na gơh jur đơ̆ng plĕnh wă ăn kon bơngai jơ̆p kơ teh arih.”

Yo 6:42

Lu sư khan: “Bơngai âu ưh kơ trŏ Yêsu ôh hă, mă kon Yôsep? Bơ̆n băt kơ mĕ 'bă Sư. Mă-lei liơ Sư khan: ‘Inh jur đơ̆ng plĕnh?’ ”

Yo 6:57

'Bă Inh mă arih ling-lang, Sư wơh Inh na Inh oei arih yua kơ 'Bă Inh. Thoi noh mơ̆n bơngai mă sa sĕch akar Inh, sư gô oei arih yua kơ Inh.

Rom 15:3

kư̆m thoi Yêsu ưh kơ pơm kiơ̆ kơ đon Sư kơdih ôh. 'Noh kư̆m thoi đe chih roi tơdrong Sư pơma kơ 'Bok Kei-Dei sơ̆ khan: “Dôm tơdrong đe hil areh kơ Ih kư̆m hil areh kơ Inh mơ̆n.”

Êphêsô 4:9

Bơ̆n băt kơ Sư tŏk tơ plĕnh boih, bơ̆n kư̆m băt mơ̆n Sư jur sơ̆ truh tơ dêh atâu sŭng, wă khan adrol kơ Sư tŏk tơ plĕnh.

Hêbrơ 5:8

Mă khan Sư Kon 'Bok Kei-Dei, Sư kư̆m hơdai pơmat-tat, na Sư băt kơ adrin chu yom kơ 'Bok Kei-Dei.