Jop 14:12 - Sơ̆p Hlabơar Nơ̆r 'Bok Kei-Dei

¹² Kon bơngai lôch bơih ưh pă arih dơ̆ng. Dĭng truh tơ plĕnh teh ưh pă đei kon bơngai kư̆m tam mă iung arih 'mơ̆i. Ưh kơ đei bu mă gơh râu tơiung sư đơ̆ng lôch.

Jop 14:12 ပူးပေါင်းရင်းမြစ်များ

Jop 3:13

Dah inh lôch dang ei inh 'bĭch hiôk bơih, inh tep păng pơdơh hiôk.

Jop 30:23

Inh băt tơpă Ih wă ba inh tơ tơdrong lôch. Anih pơkă wă 'măn kơ lu bơngai arih.

Jop 7:21

Yua kơ kiơ Ih ưh kơ mơnat ăn tơdrong yoch inh păng huay pă jô̆ tơdrong yoch inh. Ưh pă đunh bơih inh gô 'bĭch lăm 'mui teh; Ih gô chơchă inh, mă-lei pă đei inh bơih.”

Jop 7:9

Thoi hơmơ̆l păr đông hiong đĭ. Thoi noh mơ̆n kon bơngai jur năm tơ pơlei lôch ưh pă gơh brŏk dơ̆ng.

Horiso 102:26

Lu plĕnh teh gô hiong răm mă-lei Ih oei oei ling-lang; Plĕnh teh gô so thoi ao tai; Ih gô tơplih plĕnh teh thoi tơplih ao păng lu sư jing hŭt lê̆.

Horiso 90:5

Ih pơm kơ lu sư hoch kiơ̆ đak lơ̆p ro. Thoi kơ tep lôch. Lu sư thoi hla 'nhĕt chăt hơdrih pơgê hrôih.

Bôk Bơthô 11:8

Dah bơngai arih sot 'bôh hơdah đunh sơnăm, lei athei chơt hiôk bĕ tôm dôm lu sơnăm noh; mă-lei athei 'blŏk gô đei năr măng mu kơnê̆ păng gô đei lơ tơdrong tơ anăp bơ̆n ưh tam băt hơđăl thoi yơ tơpă.

Bôk Bơthô 12:5

Kơplah kon bơngai hli kơ lu anih kơjung păng hli krưp tơ rok trong pơlei tih kơplah 'long Almon đei bluh pơkao păng lep mơmŏ trăp trĭn păng kon bơngai ưh pă đei hơpơi kiơ dơ̆ng kơplah kon bơngai brŏk tơ anih sư oei ling-lang ling-lang tơ noh păng bơngai nhơ̆m hmoi kơ bơngai lôch tơ rok trong pơlei tih.

Êsai 26:19

Lu bơngai lôch lăm Ih gô iung arih, akâu akar lôch bơih lu sư gô iung dơ̆ng. Ơ lu bơngai lăm 'mui teh iung bĕ, hiôk chơt hơri bĕ. Đak ngom Ih nhen đak ngom pơgê hrôih, teh gô tơpŭ tơlĕch lu bơngai đơ̆ng lôch bơih.

Êsai 51:6

Ngơk lăng bĕ tơ kơpal plĕnh păng kŭp lăng bĕ tơ ala teh; lu plĕnh đông hiong thoi 'nhui ŭnh, teh gô so hiah nhen thoi ao, lu kon pơlei oei arih kơpal teh gô lôch thoi roi, mă-lei tơdrong dŏng pơklaih Inh oei ling-lang. Tơdrong 'lơ̆ng tơpăt Inh ưh kơ đei layơ hiong tôch ôh.

Êsai 65:17

Âu Inh gô pơjing plĕnh 'nao teh 'nao; Dôm tơdrong adrol sơ̆ ưh pă đei 'blŏk dơ̆ng bơih, kư̆m ưh pă đei bu tơchĕng dơ̆ng bơih lăm kơ̆l 'ngok.

Êsai 66:22

Kră Yang khan: “Nhen thoi plĕnh 'nao teh 'nao mă inh pơjing gô oei kơjăp ling-lang 'bơ̆t anăp Inh thoi noh mơ̆n lu kon sâu iĕm păng anăn lu iĕm kư̆m oei kơjăp.

Da 12:2

Lơ bơngai tep lăm teh gô iung hơđơ̆r, lu mơ'nah đei tơdrong arih ling-lang, lu mơ'nah gô pŭ iŏk tơdrong mơlâu păng pơmat-tat ling-lang.

Mathiơ 24:35

Plĕnh teh gô hiong tôch đĭ, mă-lei dôm tơdrong Inh pơma ưh kơ đei layơ hiong tôch ôh, gô 'bôh tơpă.

Jang 3:21

Dang ei Yêsu oei tơ plĕnh truh tơ năr tôch kơnh. Sư wă jur tơ teh dơ̆ng na Sư gô pơm ming tôm tơdrong 'nao 'lơ̆ng dơ̆ng, kư̆m thoi 'Bok Kei-Dei ăn lu bơngai khan lê̆ hơdrol sơ̆.

Rom 8:20

Sơ̆ 'Bok Kei-Dei lăng dôm tơmam Sư pơjing, Sư lăp đon dêh. Mă-lei dang ei Sư ăn kơ dôm lu tơmam Sư pơjing noh pơmat-tat yua kơ kon bơngai pơm yoch, ưh kơ sĭ yua kơ tơmam noh pơm yoch ôh. Dang ei Sư oei ăn kơ lu tơmam Sư pơjing noh pơmat-tat, ning-mônh Sư ăn hiôk 'lơ̆ng tơpă.

Êphêsô 5:14

Tơdrong noh thoi đe juăt kơ khan: “Ơ bơngai tep dang lĕ kơ lôch, iung bĕ, na 'Bok Krist gô pơchrang hơdah ăn kơ iĕm.”

II Pet 3:7

Mă dang ei Sư kư̆m pơkă khan wă pơrăm plĕnh pơrăm teh đak wă soh păng ŭnh. Truh năr Sư sek tơlang ning-mônh Sư pơrăm tơpă mơ̆n păng phak dôm lu bơngai mă ưh kơ lui kơ Sư lăm noh.

Tơdrông Tơ'bôh 20:11

Inh kư̆m 'bôh minh pôm tang-dŏ tih krưp kok 'lơ̆ng păng 'bôh minh 'nu 'Bok oei kơpal tang-dŏ noh. Kơplah noh plĕnh păng teh hiong hiach đĭ, dang sư hli tơrơ kơ 'Bok noh jing ưh pă đei plĕnh păng teh tơ yơ.

Tơdrông Tơ'bôh 21:1

Đơ̆ng noh inh đei 'bôh plĕnh păng teh 'nao, yua kơ plĕnh păng teh adrol sơ̆ tôch boih. Mă đak dơsĭ kư̆m pă đei boih.