I Yo 4:21 - Sơ̆p Hlabơar Nơ̆r 'Bok Kei-Dei

²¹ Na Yêsu Krist bơtho pơkă kơ bơ̆n thoi âu: Bơngai bu 'mêm kơ 'Bok Kei-Dei, bơngai 'noh athei 'mêm mơnat kơ 'nhŏng oh sư mơ̆n.

I Yo 4:21 ပူးပေါင်းရင်းမြစ်များ

Lêwi 19:18

'Nĕ kơ pơm 'mong răk rong mong găr hăm rông 'bôt kơtum kơtŏng 'nhŏng oh ih, athei 'mêm kơ lu sư thoi ih 'mêm akâu ih kơdih, Inh boih Kră Yang.

Mathiơ 5:43

“Păng iĕm kư̆m kơtơ̆ng boih tơdrong đe bơtho sơ̆ thoi âu: ‘Athei 'mêm kơ bôl juăt, areh kơ bơngai pơm kơnê̆ kơ bơ̆n.’

Luka 10:37

Na 'bok thây ei khan: “Bơngai mă băt mơnat kơ bơngai jĭ noh yơh.” Yêsu khan kơ sư dơ̆ng: “Ih băt thoi noh boih na ih pơm kiơ̆ hloi bĕ.”

Yo 15:12

Inh pơkă ăn kơ iĕm thoi âu: Iĕm athei 'mêm mơnat dih băl kư̆m thoi Inh 'mêm mơnat kơ iĕm.

Galati 5:14

Yua kơ 'Bok Kei-Dei pơkă boih kơ bơ̆n thoi âu: “Bơ̆n athei 'mêm kơ bôl buăl thoi bơ̆n 'mêm akâu kơdih.” Bơngai bu răk tơdrong noh sư dang kiơ̆ tôm dôm tơdrong juăt 'Bok Kei-Dei pơkă.

Galati 5:6

Bu kiơ̆ Kră Yang Yêsu Krist, tơdrong kăt tơdra akar ưh kơ đei kăl kiơ ôh. Minh tơdrong lui kơ Kră Yang Yêsu Krist păng 'mêm mơnat kơ đe, noh kăl.

I Tes 4:9

Gah tơdrong 'mêm mơnat tơduă bôl bơngai lui nhôn huay kơ kăl chih roi kơ iĕm ôh, yua kơ 'Bok Kei-Dei bơtho iĕm boih tơdrong 'mêm mơnat dih băl 'noh.

I Pet 3:8

Đơ̆ng âu tơ anăp đĭ-đăng kơ bơ̆n athei pơgơ̆p băl minh jơhngơ̆m minh đon, băt 'mêm mơnat dih băl, iŏk jơhngơ̆m đon dim hơlăng băl, 'nĕ pơang băl.

I Pet 4:8

Mă loi bơ̆n 'nĕ hiơt kơ tơdrong 'mêm mơnat, dah bơ̆n 'mêm mơnat dih băl bơ̆n huay kơ jô̆ yo kơ tơdrong yoch bôl buăl ôh.

I Yo 2:7

Ơ 'nhŏng oh mă juăt păng inh, tơdrong inh chih pơkă kơ iĕm âu ưh kơ sĭ tơdrong 'nao ôh. Tơdrong âu tơdrong so mơ̆n mă đêl pơkă kơ iĕm sơ̆. Tơdrong pơkă so âu tơdrong đe bơtho iĕm boih păng iĕm kơtơ̆ng boih.

I Yo 3:11

Kư̆m thoi iĕm kơtơ̆ng đe bơtho iĕm đơ̆ng blŭng-a sơ̆ thoi âu: Bơ̆n athei 'mêm mơnat dih băl.

I Yo 3:14

Bơ̆n băt bơ̆n jăk đơ̆ng tơdrong lôch boih wă arih ling-lang kơlih kơ bơ̆n 'mêm mơnat kơ 'nhŏng oh bơ̆n. Bơngai bu ưh kơ 'mêm mơnat kơ 'nhŏng oh sư, bơngai 'noh oei kiơ̆ gah tơdrong lôch.

I Yo 3:18

Ơ lu kon hơ'lơ̆p, tơdrong 'mêm mơnat dih băl, bơ̆n ưh kơ wă 'bơ̆r bơ̆n đĕch ôh mơnat. Bơ̆n athei 'mêm mơnat dih băl păng jơhngơ̆m đon bơ̆n tơpă păng tơdŏng băl tơdrong jang.

I Yo 3:23

Tơdrong Sư wă kơ bơ̆n răk thoi âu: Bơ̆n athei lui kơ Kon Sư Yêsu Krist păng 'mêm mơnat dih băl tơduă bơ̆n, kư̆m thoi Yêsu pơkă kơ bơ̆n sơ̆.

I Yo 4:11

Ơ 'nhŏng oh mă juăt păng inh, 'Bok Kei-Dei 'mêm mơnat kơ bơ̆n dang noh, na bơ̆n athei 'mêm mơnat dih băl tơduă bơ̆n.