I Sam 12:3 - Sơ̆p Hlabơar Nơ̆r 'Bok Kei-Dei

³ Âu inh dơ̆ng 'bơ̆t anăp lu iĕm, 'bơ̆t anăp Kră Yang păng 'bơ̆t anăp pơtao mă Kră Yang đei tuh đak rơmă pơk pơm pơtao, wă kơ lu iĕm roi pơdah ăn. Inh hăm đei rôp rơmo bu ưh? Hăm rôp aseh đe bu ưh? Inh hăm hơlĕnh đe bu ưh? Pơm kơnê̆ tôn teh đe bu ưh? Inh hăm pơgâm sa đe wă bơbĭt lê̆ măt đe lăm dôm tơdrong jang kiơ ưh? Tơdah đei pơm thoi noh, gô pơdrâu đĭ kơ iĕm.

I Sam 12:3 ပူးပေါင်းရင်းမြစ်များ

II Sam 22:22

Inh wei răk kiơ̆ trong Kră Yang bơtho. Ưh kơ đei pơm kơnê̆ achăng lê̆ Kră Yang 'Bok Kei-Dei inh.

Ne 5:11

Inh apinh lu iĕm năr âu hloi, athei pơdrâu bĕ kơ lu sư chŭn mir, pơgar hơmu, pơgar ôliwơ păng hnam lu sư, kư̆m pơdrâu minh lăm mơjĭt gah jên, phe 'ba, sik păng đak rơmă, mă lu iĕm đei pơgŏ đơ̆ng lu sư.

Horiso 15:5

Sư ăn kơ đe iŏk mưng jên mă-lei huay kơ chă lơi, Ưh kơ wă iŏk sa pơgâm, wă pơrăm lu bơngai tơpăt. Bơngai bu mă pơm thoi noh ưh kơ hli tơtơ̆.

Le 20:17

'Nĕ 'nhĕng kơ hnam đe, kư̆m lê̆ kơ 'nhĕng akăn đe, dah đĭch đam drŏ-nglo, drŏ-kăn, rơmo, aseh, dah mŭk tơmam đe.

Le 22:4

Dah tơmam mă bơngai tơtông kah đei iŏk, rơmo, aseh, dah triu, oei 'bôh arih lăm tơpang ti sư, lei bơngai tơtông khŏm duh hơgăt 'bar.

Le 23:8

Ih 'nĕ kơ iŏk sa pơgâm mŭk tơmam đe, yua kơ iŏk sa pơgâm pơm bơbôl kơ măt bơngai hlôh wao păng bơ̆ đŏng tơdrong bơngai tơpăt.

Tơdrông Pơđơk 15:27

Bơngai ham pơm kơ hnam dơnŏ sư chhŭr nuih, Mă-lei bơngai đei areh kơ sa pơgâm gơh arih.

Lêwi 6:4

Layơ mă đei glăi, pơm yoch boih, na sư athei pơdrâu tơmam đêl sư tơtông, dah đêl sư tơgar iŏk, dah đe jao kơ sư, dah tơmam đe hiong đêl sư dônh.

Lêwi 6:5

Dah tơmam đêl sư pơkăm pơkă hơlĕnh, sư athei pơdrâu mă tôm 'blep. Đơ̆ng noh sư athei 'mong dơ̆ng minh lăm pơđăm, kiơ̆ kơ tơdrong gĭt sư, ăn kơ tơ'ngla tơmam noh lăm năr mă sư pơyơ̆r tơmam soi huai đơ̆ng yoch sư pơm.

Jo 16:15

Môis blĕk dêh krao apinh Kră Yang thoi âu: Ih lê̆ pă iŏk dôm tơmam lu sư pơyơ̆r; inh ưh kơ đei rôp iŏk minh pôm kon aseh iĕ đơ̆ng lu sư ôh păng inh kư̆m ưh kơ đei pơrăm bu lăm lu sư.

Mathiơ 22:21

Lu sư khan: “'Noh rup Sêsar păng anăn Sêsar mơ̆n.” Thoi noh na Yêsu khan: “Jên âu rup Sêsar tơpă na bơ̆n athei thuê̆ kơ sư yua kơ sư pơgơ̆r. Tơmam 'Bok Kei-Dei bơ̆n athei pơyơ̆r kơ 'Bok Kei-Dei yua kơ Sư tơgŭm ăn kơ bơ̆n.”

Luka 19:8

Na Sachê iung khan kơ Kră Yang Yêsu: “Ơ 'Bok, dôm mŭk tơmam inh âu, inh wă asong kơ lu bơngai dơnuh hin minh puăt. Păng lu bơngai mă inh pơgŏ iŏk jên, tơmam sư, inh gô tơwih ăn kơ sư lơ hloh kơ đêl inh iŏk, puăn hơtăl.”

Jang 20:33

Inh ưh kơ 'nhĕng jên đe dah hơbĕn ao đe ôh.

II Kor 12:14

Na 'măng mă pêng âu inh wă năm tơ iĕm, mă inh năm inh ưh kơ năm pơgleh iĕm athei iĕm 'me inh, dah iŏk jên tơmam iĕm ôh; inh năm tơ iĕm, inh wă ngôi hơpong păng iĕm. Ưh kơ sĭ kon 'me 'bă ôh, 'bă 'me kon.

Both 16:19

'Nĕ kơ pơm glăi kơ tơdrong tơpăt; 'nĕ kơ mơ̆t minh pah; 'nĕ kơ sa tơmam đe răt apah, yua kơ tơmam đe răt apah noh pơm ăn kơ lu bơngai rơngei măt tol păng gơwĕch lê̆ nơ̆r bơngai tơpăt.

I Tes 2:10

Hơtai ki iĕm kư̆m 'bôh dôm tơdrong nhôn pơm 'lơ̆ng tơpăt kơ lu iĕm bơngai lui kơ Yêsu. Nhôn ưh kơ pơm kơnê̆ ôh. 'Bok Kei-Dei Sư kư̆m 'bôh thoi noh mơ̆n.

I Tes 2:5

Iĕm kư̆m băt mơ̆n nhôn năm tơ iĕm ki nhôn bơtho kiơ̆ tơdrong tơpăt. Nhôn năm tơ iĕm ưh kơ sĭ nhôn wă pơlung iŏk jên iĕm ôh. 'Bok Kei-Dei kư̆m băt kơ nhôn ưh kơ pơm thoi noh mơ̆n. Nhôn năm tơ iĕm wă bơtho iĕm tơdrong 'nao 'lơ̆ng Sư đĕch.

I Pet 5:2

Iĕm athei wei-lăng kơ lu bơngai mă 'Bok Kei-Dei pơjao kơ iĕm mă 'lơ̆ng, thoi tơ'ngla triu wei-lăng triu sư. Iĕm jang 'nĕ gô đe bơtho, gô đe khan, iĕm athei jang kơdih mă tơnăp kiơ̆ thoi 'Bok Kei-Dei lăp đon; 'nĕ kơ jang pơtrŏ wă kơ gơh sa jên đĕch ôh, athei tơgŭm lu sư mă tơpă.

I Sam 10:1

Samuel iŏk minh gĕl getchai iĕ mong đak rơmă 'bâu phu, na tuh tơ kơ̆l Sôl, đơ̆ng noh chŭm sư păng khan: 'Nâu Kră Yang tuh đak rơmă 'bâu phu kơ ih wă kơ ih pơgơ̆r kon pơlei Sư.

I Sam 12:4

Lu sư tơl: Ih ưh kơ đei hơlĕnh lu nhôn ôh, ưh kơ đei tôn teh lu nhôn păng ưh kơ đei iŏk sa pơgâm đơ̆ng ti đe bu ôh.

I Sam 12:5

Sư khan dơ̆ng: Kră Yang pơm kơdranh kơ iĕm; bơngai mă Sư tuh đak rơmă kư̆m pơm kơdranh kơ iĕm ưh kơ đei 'bôh kiơ lăm ti inh. Lu sư tơl: Hơpơi kơ Kră Yang pơm kơdranh kơ bơ̆n.

I Sam 2:35

Na inh gô rơih chă kơ Inh kơdih minh 'nu 'bok soi tơnăp tơpăt, bơngai noh gô pơm lăp kơ jơhngơ̆m Inh; Inh gô ăn kơ sư đei minh adrĕch 'lơ̆ng tơpăt wă kơ pơm 'bok soi ling-lang hloi hăm bơngai mă Inh đei hling đak pơgang 'bâu phu.

I Sam 24:11

Ơ 'bă! Lăng bĕ tơdrơi ao ih mă inh oei chĕp lăm tơpang ti inh; ih 'bôh inh lăp kăt iŏk tơdrơi ao ih mă-lei inh ưh kơ pơlôch ih, băt boih inh ưh kơ đei pơm tơdrong yoch kiơ hăm ih. Mă-lei gah ih, chă wă pơlôch inh.

I Sam 24:6

Sư khan kơ lu bơngai kiơ̆ sư: Hơpơi kơ Kră Yang phak inh tơdah inh pơm yoch hăm yŏng tơ'ngla inh, bơngai mă chu tuh đak rơmă đơ̆ng Kră Yang, yua kơ sư jơ̆ bơngai chu tuh đak rơmă đơ̆ng Kră Yang.

I Sam 24:7

Đawit khă lu bơngai kiơ̆ sư, 'nĕ kơ pơm kơ akâu Sôl, Sôl iung lĕch đơ̆ng hơgơp tơmo na yak rok trong năm tơ nai.

I Sam 26:11

Mă-lei Kră Yang wei inh, ưh kơ ăn tơpang ti inh pơlôch bơngai mă đơ̆ng Kră Yang tuh ăn đak rơmă! Inh apinh ih iŏk tơpu hăm get đak đơ̆ng kơ̆l giơng sư hăm get đak sư, đơ̆ng noh ba weh.

I Sam 26:9

Mă-lei Đawit khan kơ Abisai: 'Nĕ kơ pơlôch sư, kơnh ih đei tơdrong glăi, yua kơ sư bơngai mă đơ̆ng Kră Yang 'Bok Kei-Dei tuh ăn đak rơmă.