I Pet 5:10 - Sơ̆p Hlabơar Nơ̆r 'Bok Kei-Dei

¹⁰ Mă-lei 'Bok Kei-Dei krao iŏk bơ̆n Sư wă kơ bơ̆n oei hiôk hăm Sư ling-lang yua kơ bơ̆n lui kơ Yêsu Krist, na Sư ăn kơ bơ̆n pơmat tŏ sĕt đĕch ưh kơ đunh, Sư gô pơm kơ bơ̆n lui kơjăp jing bơngai tơpăt lăm tôm tơdrong. Yua kơ Sư mơnat na Sư tơgŭm bơ̆n tôm tơdrong thoi noh.

I Pet 5:10 ပူးပေါင်းရင်းမြစ်များ

Horiso 119:28

Inh lĕch đak măt nhơ̆m hmoi, yua kơ sơ'ngon. Apinh Ih ăn kơ inh đei jơhngơ̆m pran kiơ̆ kơ nơ̆r Ih.

Horiso 138:7

Mă inh oei lăm pơmat-tat, Ih wei tơdrong arih inh, Ih yơ̆r ti tơblah plơ̆ kơ tơdrong mă lu ayăt hil kơ inh, ti 'ma Ih dŏng pơklaih inh.

Horiso 86:15

Mă-lei, ơ Kră Yang! Ih boih Kră Yang 'Bok Kei-Dei mă 'mêm băt mơnat. Hiơ̆ kơ hil, 'bĕnh kơ tơdrong 'mêm păng tơdrong tơpăt sĭt.

Horiso 86:5

Ơ Kră Yang! Ih 'lơ̆ng tơpăt băt mơnat ăn. Ih 'bĕnh kơ 'mêm mơnat rơkah rơkai kơ đĭ-đăng lu bơngai mă krao chă Ih.

Sa 10:12

Inh gô ăn kơ lu sư pran kơtang lăm Kră Yang păng Lu sư yak năm lăm anăn Kră Yang.” Kră Yang khan thoi noh.

Sa 10:6

Inh gô ăn kơ hnam Juđa jing pran păng dŏng pơklaih hnam Jôsep. Inh chông tơwih lu sư brŏk, yua kơ 'mêm mơnat kơ lu sư, lăng lu sư thoi Inh ưh tam layơ achăng lê̆ lu sư, yua kơ Inh Kră Yang lu sư, Inh gô tơl tơwih nơ̆r lu sư krao apinh.

Luka 22:32

Mă-lei Inh krao khan kơ 'Bok Kei-Dei wă kơ Sư tơgŭm ih huay kơ tŭk lê̆ tơdrong lui ih. Na lăp ih kơnăl tơdrong ih wă sơngah kơ Inh noh kơnh, na ih athei pơlung lu 'nhŏng oh ih âu wă kơ lu sư kư̆m lui kơjăp dơ̆ng.”

Rom 15:13

Yua kơ bơ̆n gơnang kơ 'Bok Kei-Dei tơpă, na bơ̆n băt chang gô tôm tơdrong 'Bok Kei-Dei wă ăn kơ bơ̆n. Na inh apinh Sư ăn kơ chăl arih iĕm hiôk hơiă, hiôk-hian yua kơ iĕm lui kơ Sư, na Yang Bơhngol 'Lơ̆ng tơgŭm iĕm băt kơ tơdrong chang gô noh.

Rom 15:5

'Bok Kei-Dei ăn kơ bơ̆n đei đon lui kơjăp păng ăn kơ bơ̆n oei hiôk, na inh apinh Sư ăn kơ iĕm oei hiôk gơh găt dih băl, kư̆m thoi Yêsu Krist bơngai gơh găt păng bơ̆n.

Rom 16:25

Bơnê kơ 'Bok Kei-Dei, Sư boih gơh tơgŭm iĕm lui kơjăp, inh bơtho iĕm tơdrong 'nao 'lơ̆ng Yêsu Krist wă kơ iĕm băt Sư gơh ăn kơ iĕm lui kơjăp. Tơdrong Yêsu Krist âu lu kră sơ̆ ưh tam kơtơ̆ng ôh.

Rom 9:11

Kơplah yă Rê'bêka tam mă tơpŭ kơ bre noh sơ̆, 'Bok Kei-Dei khan lê̆ kơ yă bơ̆n noh sơ̆ thoi âu: “Ning-mônh ih gô tơpŭ 'bar 'nu kon drŏ-nglo kơmar. 'Nhŏng sư gô pơm iĕ kơ oh sư.” 'Bok Kei-Dei khan thoi noh, ưh kơ sĭ yua kơ bre 'nhŏng oh pơm 'lơ̆ng pơm kơnê̆ ôh. Kơplah noh bre ei, mĕ bre sư ưh tam mă tơpŭ ôh. 'Bok Kei-Dei pơkă lê̆ hơdrol pơrơ̆ng wă rơih iŏk oh sư pơm tih kơ 'nhŏng sư.

Rom 9:24

Lu bơngai noh wă khan lu bơ̆n âu boih Sư rơih iŏk. Ưh kơ sĭ Sư rơih iŏk pôm lu bơngai Isơrael đĕch ôh, Sư rơih iŏk lu bơngai nai hai.

I Kor 1:10

Ơ 'nhŏng oh, inh wă bơtho iĕm thoi âu: Đĭ-đăng kơ bơ̆n minh khŭl lui kơ Kră Yang Yêsu Krist, bơ̆n athei tơguăt băl minh jơhngơ̆m, pơm pôm 'bơ̆r đon mă hơnơ̆ng wă kơ bơ̆n huay kơ tơklah băl.

I Kor 1:9

'Bok Kei-Dei ling-lang pơm trŏ thoi Sư pơkă, na Sư gô tơgŭm iĕm tơpă păng Sư boih rơih iŏk iĕm pơgơ̆p hăm Kon Sư Yêsu Krist Kră Yang bơ̆n.

II Kor 13:11

Ơ lu 'nhŏng oh, dôm tơdrong inh chă chih kơ iĕm dôm noh boih. Oei kơ iĕm mă 'lơ̆ng. Adrin pơm 'lơ̆ng, mơ̆ng dôm tơdrong inh pơma, băt chu dih băl, oei sa hiôk chơt; thoi noh na 'Bok Kei-Dei mă 'mêm mơnat kơ kon bơngai hăm ăn kon bơngai hiôk-hian, Sư gô oei hơdai iĕm.

II Kor 4:17

Nhôn iŏk tơdrong pơmat-tat dang ei kư̆m bưh, sư hơiơch 'biơ̆, nhôn hăt kơ chă tơdrong arih ling-lang ning-mônh ei kăl hloh.

Philip 4:13

Inh kĕ iŏk dôm tơdrong 'noh yua kơ inh gơnang kơ Yêsu Krist na Sư ăn kơ inh kĕ iŏk dôm tơdrong 'noh. Tơ̆ng ưh, inh ưh kơ kĕ ôh.

Kôlôsê 2:7

Sư pơm tơm kơ bơ̆n na iĕm athei gơnang kơ Sư mă tơpă wă kơ lui kơjăp kiơ̆ thoi đe bơtho iĕm sơ̆, na tơdrong lui iĕm rai đunh rai wơ̆. Mă tôm tơdrong kiơ kiơ athei bơnê kơ 'Bok Kei-Dei ngăl.

I Tes 2:12

Thoi noh na nhôn pơlung iĕm wă kơ iĕm pơm kiơ̆ kơ 'Bok Kei-Dei wă. 'Bok Kei-Dei iŏk iĕm wă ăn kơ iĕm mơ̆t tơ dêh char 'lơ̆ng rŏ Sư ning-mônh.

II Tes 2:14

'Bok Kei-Dei ăn kơ nhôn bơtho kơ iĕm tơdrong 'nao 'lơ̆ng wă krao iŏk lu iĕm. Sư wă kơ iĕm oei hơdai hăm Kră Yang bơ̆n Yêsu Krist ning-mônh hiôk hơiă tơpă.

II Tes 2:17

Nhôn krao khan apinh Sư ăn kơ jơhngơ̆m iĕm hiôk chơt ling-lang păng ăn kơ iĕm nuih pran gơh pơm tôm tơdrong 'lơ̆ng tơpăt, nơ̆r pơma kư̆m athei pơma ling-lang mă tơpăt.

II Tes 3:3

Kră Yang bơ̆n pơm trŏ thoi Sư pơkă tơpă. Sư tơgŭm iĕm ling-lang. Sư ăn kơ iĕm lui kơ Sư kơjăp, Sư kuă ăn yang Satan pơrăm iĕm.

I Tim 6:12

Pơtih gia lu bơngai kơdâu pơjei, bơngai bu mă kơdâu adrin tơpă jei sư, bơngai 'noh sư gô đei apah. Mă ih kư̆m lei-lăi athei adrin mă tơpă, lui mă kơjăp na jei ih, na ih gô đei iŏk tơdrong arih tơ plĕnh ling-lang. Hơtai ih lui tơm hmơm sơ̆, đe krao khan kơ ih đang boih, na ih pơma 'bơ̆t anăp đe tơpôl lơ khan ih wă tơpă lui kơ Yêsu Krist. Đơ̆ng noh sơ̆ boih 'Bok Kei-Dei ăn kơ ih arih ling-lang.

II Tim 1:9

'Bok Kei-Dei pơklaih bơ̆n đơ̆ng tơdrong yoch. Sư krao iŏk bơ̆n wă kơ bơ̆n jing kon 'lơ̆ng tơpăt Sư. Sư krao bơ̆n ưh kơ sĭ bơ̆n pơm tơdrong 'lơ̆ng na Sư krao ôh, Sư krao bơ̆n yua kơ Sư 'mêm mơnat kơ bơ̆n. Đơ̆ng blŭng-a sơ̆ Sư tam mă pơjing plĕnh păng teh, đơ̆ng noh boih Sư 'mêm mơnat kơ bơ̆n wă ăn Yêsu Krist pơklaih bơ̆n.

II Tim 2:10

Inh đei tơdrong pơmat ling-lang, mă-lei inh oei adrin khŏm khŏm. Inh bơtho lu bơngai 'Bok Kei-Dei rơih wă kơ lu sư lui kơ Kră Yang Yêsu Krist, na 'Bok Kei-Dei gô pơklaih sư đơ̆ng tơdrong yoch păng atŏk sư oei hơdai păng Sư ling-lang ning-mônh.

Hêbrơ 9:15

Thoi noh bơ̆n băt lăp pôm Yêsu đĕch boih gơh pơm 'long sơlam kơ bơ̆n kiơ̆ tơdrong pơgơ̆p 'nao, wă kơ đĭ-đăng lu bơ̆n bơngai mă 'Bok Kei-Dei krao iŏk, gô đei tơdrong Sư pơkă wă ăn kơ bơ̆n ning-mônh ei. Dôm lu bơngai noh gơh klaih đơ̆ng tơdrong yoch đêl kiơ̆ tơdrong pơgơ̆p so, yua kơ Yêsu lôch huai iŏk sư.

I Pet 1:15

Sư krao iĕm wă kơ iĕm jing kon Sư, na iĕm athei pơm 'lơ̆ng tơpăt tôm tơdrong thoi Sư,

I Pet 4:10

'Bok Kei-Dei ăn kơ lu bơngai lui bơ̆n tôm tơdrong hơgei phara, na bơ̆n athei jang kiơ̆ kơ Sư ăn kơ bơ̆n hơgei noh, wă kơ bơ̆n gơh tơgŭm băl.

I Pet 4:11

Dah Sư ăn kơ bơ̆n hơgei bơtho đe tơdrong Sư, bơ̆n athei adrin bơtho tơbăt kơ đe tơdrong Sư tơpă. Dah Sư ăn kơ bơ̆n hơgei gah tơdrong tơgŭm đe, bơ̆n athei gơnang kơ Sư tơpă, na bơ̆n gơh jang tơdrong tơgŭm đe. Thoi noh na đe băt kơ tơdrong jang bơ̆n, na ư-ang 'Bok Kei-Dei păng đe gô băt kơ bơ̆n đơ̆ng Yêsu Krist tơgŭm, yua kơ Sư mơsêh mơyang pơgơ̆r tôm tơdrong ưh kơ layơ tôch. A-men.

II Pet 1:3

Yua kơ Sư Yang, Sư mơsêh tơpă, na Sư ăn kơ bơ̆n tôm tơdrong gơh arih, gơh pơm 'lơ̆ng tơpăt thoi Sư. 'Noh yua kơ Sư krao, na bơ̆n băt kơ Sư. Bơ̆n 'bôh Sư mơsêh păng 'lơ̆ng tơpăt na bơ̆n băt kơ kiơ̆ Sư.

I Yo 2:25

Thoi noh bơ̆n gô arih ling-lang, kư̆m thoi Yêsu Krist pơkă sơ̆.

Ju 1:24

Bơnê kơ 'Bok Kei-Dei, pôm Sư đĕch kĕ wei-lăng iĕm, huay ăn kơ iĕm lê̆ Sư, wă kơ iĕm dơ̆ng 'bơ̆t anăp Sư ning-mônh iĕm 'bôh Sư mơsêh mơyang, iĕm hiôk hơiă huay kơ hli kơ Sư, yua kơ iĕm ưh kơ đei tơdrong yoch.