I Pet 1:5 - Sơ̆p Hlabơar Nơ̆r 'Bok Kei-Dei

⁵ Yua kơ bơ̆n lui păng gơnang kơ Sư tơpă, na 'Bok Kei-Dei tơ'ngla mă mơsêh mơyang, Sư wei-lăng lu bơ̆n ling-lang truh tơ năr Sư wă ăn kơ bơ̆n tôm tơdrong mă Sư đei hơmet lê̆ boih tơ năr tôch noh kơnh.

I Pet 1:5 ပူးပေါင်းရင်းမြစ်များ

Jop 19:25

Mă-lei inh băt sĭt Tơ'ngla Dŏng Pơklaih inh oei arih, Sư gô iung dơ̆ng lăm năr tôch kơnh wă pơma dŏng inh kơpal teh.

Horiso 37:28

Kră Yang lăp đon kơ tơdrong tơpăt, Ưh kơ đei achăng lê̆ lu bơngai 'lơ̆ng rơgoh Sư; Lu sư đei Kră Yang wei-lăng ling-lang: Mă-lei gah lu adrĕch adrung bơngai kơnê̆ gô răm đĭ.

Tơdrông Pơđơk 2:8

Sư wei-lăng trong lu bơngai tơpăt, Sư bơwei trong lu bơngai hli yom kơ Sư.

Êsai 45:17

Mă-lei bơngai Isơrael, Kră Yang gô dŏng pơklaih. Hăm tơdrong dŏng pơklaih ling-lang ưh kơ đei layơ tôch. Lu iĕm huay pă mơlâu dah rŭng răng dơ̆ng bơih truh tơ đĭ chăl khŏm khŏm.

Êsai 51:6

Ngơk lăng bĕ tơ kơpal plĕnh păng kŭp lăng bĕ tơ ala teh; lu plĕnh đông hiong thoi 'nhui ŭnh, teh gô so hiah nhen thoi ao, lu kon pơlei oei arih kơpal teh gô lôch thoi roi, mă-lei tơdrong dŏng pơklaih Inh oei ling-lang. Tơdrong 'lơ̆ng tơpăt Inh ưh kơ đei layơ hiong tôch ôh.

Êsai 54:17

Mă dôm tơmam tơblah sư pơm wă pơrăm Ih gô ưh kơ kĕ păng dôm nơ̆r lu bơngai pơma jâu ih gô glăi đĭ. Noh bơih tơdrong Inh ăn kơ lu đĭch đam Kră Yang, păng tơdrong lăng pơsĭt đơ̆ng Inh ăn, Kră Yang khan thoi noh.

Êsai 66:22

Kră Yang khan: “Nhen thoi plĕnh 'nao teh 'nao mă inh pơjing gô oei kơjăp ling-lang 'bơ̆t anăp Inh thoi noh mơ̆n lu kon sâu iĕm păng anăn lu iĕm kư̆m oei kơjăp.

Je 23:4

Inh gô chă lu bơngai wei rong lu sư; lu sư ưh pă hli kơ kiơ dơ̆ng păng ưh kơ đei hiong minh pôm ayơ,” noh Kră Yang khan.

Je 32:40

Inh gô pơgơ̆p hăm lu sư ling-lang hlŏng hloi; Inh ưh pă wă lê̆, dah lu sư ưh pă ăn pŭn hiôk kơ lu sư; Inh kư̆m wă pơm ăn kơ jơhngơ̆m lu sư băt hli yom kơ Inh, wă kơ lu sư ưh pă achăng lê̆ Inh.

Yo 12:48

Bơngai bu ưh kơ lui kơ Inh, 'Bok Kei-Dei gô phak sư năr tôch ning-mônh, yua kơ sư ưh kơ răk dôm nơ̆r Inh bơtho.

Yo 17:15

Inh ưh kơ apinh Ih iŏk lu sư đơ̆ng ala teh âu ôh, Inh apinh Ih wei-lăng lu sư mă kơjăp wă kơ lu sư hlôi đơ̆ng yang kơnê̆ Satan.

Yo 4:14

Bơngai bu nhă đak đơ̆ng Inh ăn, kơnh sư huay pă rơhing boih. Đak mă Inh ăn kơ sư thoi lĕ đak mơlĕch, sư ro jur suŏn lăm to bơngai mă nhă 'noh, pơm kơ bơngai noh gơh arih ling-lang.”

Yo 5:24

Inh khan kơ iĕm tơpă, bơngai bu mơ̆ng Inh bơtho păng lui hloi kơ 'Bok Kei-Dei mă wơh Inh, bơngai 'noh ning-mônh sư gô oei hơdai hăm 'Bok Kei-Dei arih ling-lang păng Inh huay pă sek tơlang tơdrong sư boih. Sơ̆ sư kiơ̆ tơdrong lôch mă-lei dang ei sư kiơ̆ tơdrong arih.

Rom 11:20

Iĕm khan thoi noh trŏ mơ̆n mă-lei yua kơ kiơ 'Bok Kei-Dei chre hŭt dơng noh? Yua kơ sư ưh kơ chu lui. Na iĕm kư̆m lei-lăi, yua kơ iĕm lui na Sư klop tơ noh. 'Noh na iĕm 'nĕ pơang kơ đe, kơnh 'Bok Kei-Dei chre hŭt iĕm dơ̆ng.

Rom 8:18

Mă bơ̆n đei tơdrong gleh truh pơmat-tat dang ei, mă-lei inh băt tơpă ning-mônh bơ̆n gô oei hơdai hăm 'Bok Kei-Dei hiôk dêh; na mă bơ̆n pơmat-tat, bơ̆n kư̆m pơm hiôk thoi lĕ kơ năr jơhngơ̆m bơ̆n hiôk, yua kơ ning-mônh bơ̆n gô hiôk tơpă.

I Kor 1:21

'Bok Kei-Dei hơgei tơpă, na Sư ưh kơ wă kơ kon bơngai bơ̆n chă Sư kiơ̆ kơ đon kon bơngai bơ̆n tơchĕng ôh. 'Bok Kei-Dei Sư lăp đon gah tơdrong dŏng pơklaih dôm lu bơngai mă lui kơ Yêsu lôch tang bơ̆n tơ 'long pơglang. Mă-lei lu bơngai mă ưh kơ lui, lu sư tơchĕng tơdrong bơ̆n bơtho 'noh nhen lĕ tơdrong kơtul đĕch.

II Kor 1:24

Mă-lei ưh kơ sĭ nhôn wă pơgŏ pơđep tơdrong lui iĕm ôh. Kơlih kơ nhôn 'bôh iĕm lui kơjăp, na nhôn wă jang hơdai iĕm, wă kơ iĕm chơt.

Galati 2:20

Inh dang lĕ lôch hơdai hăm Yêsu Krist tơ 'long pơglang sơ̆ boih yua kơ akâu inh kơdih ưh kơ gơh pơm minh tơdrong kiơ ôh. Na dang ei inh ưh pă gơnang kơ akâu inh kơdih boih, inh gơnang kơ Yêsu Krist mă arih lăm akâu inh, lê̆ kơ Sư chă dui ba inh kiơ̆ kơ tơdrong Sư wă. Inh gơnang kơ Sư yua kơ Sư Kon 'Bok Kei-Dei tơpă, Sư 'mêm mơnat kơ inh mah ăn akâu Sư kơdih lôch tang inh.

Êphêsô 2:8

Bơ̆n klaih đơ̆ng tơdrong yoch oei hiôk hăm 'Bok Kei-Dei, yua kơ 'Bok Kei-Dei 'mêm mơnat kơ bơ̆n na Sư pơklaih, yua kơ bơ̆n lui păng gơnang kơ Yêsu tơpă na Sư mơnat. Ưh kơ sĭ bơ̆n gơh klaih kơdih ôh, mă-lei tơdrong noh Sư ăn đĕch.

Êphêsô 3:17

Păng inh kư̆m apinh Yêsu Krist mơ̆t oei lăm jơhngơ̆m iĕm yua kơ iĕm lui kơ Sư. Păng inh apinh Sư ăn kơ iĕm đei đon 'mêm mơnat kơ bôl buăl lăm tôm tơdrong,

Philip 1:6

'Bok Kei-Dei jô̆ iĕm jing bơngai 'lơ̆ng boih, na inh băt tơpă Sư gô tơgŭm iĕm ling-lang truh tơ năr Yêsu Krist jur ning-mônh.

Philip 4:7

Thoi noh na 'Bok Kei-Dei ăn kơ iĕm hiôk huay kơ tơchĕng lơ tơdrong păng huay kơ tơchĕng kơ tơdrong hli, yua kơ iĕm lui gơnang boih kơ Yêsu Krist. Tơ̆ng bơ̆n gơnang kơ đon bơ̆n tơchĕng kơdih đĕch bơ̆n ưh kơ hiôk ôh.

II Tim 3:15

Đơ̆ng ih oei iĕ sơ̆ ih pơhrăm sơ̆p hla bơar tơdrong 'Bok Kei-Dei. Sơ̆p hla bơar Sư boih ăn kơ bơ̆n băt tơdrong Sư pơklaih bơ̆n đơ̆ng tơdrong yoch yua kơ bơ̆n lui kơ Kră Yang Yêsu Krist.

Tit 2:13

kơplah bơ̆n chang gô Kră Yang Yêsu Krist mă tih hloh. Sư boih 'Bok Dŏng Pơklaih bơ̆n, Sư wă jur tơ ala teh dơ̆ng. Năr ei kơnh bơ̆n gô 'bôh Sư hlĭch tơpă, akâu Sư 'bak 'lơ̆ng rŏ hloh kơ đĭ-đăng bơngai ala teh, na jơhngơ̆m bơ̆n hiôk chơt păng Sư.

Hêbrơ 6:12

Nhôn ưh kơ wă kơ iĕm alah ôh; nhôn wă kơ iĕm adrin lui kiơ̆ mă trŏ thoi lu đe kră sơ̆, lu sư lui khŏm khŏm tơpă, na 'Bok Kei-Dei ăn tơpă tôm tơdrong mă Sư đêl pơkă.

Hêbrơ 9:28

Kư̆m thoi noh Yêsu jur lôch minh 'măng noh sơ̆ wă pơrăm tôm tơdrong yoch hloi. Mă pă 'măng Sư jur Sư ưh pă pơrăm tơdrong yoch boih, Sư jur wă iŏk dôm lu bơngai mă oei chang gô Sư dang ei.

I Pet 1:13

Thoi noh na iĕm athei pơgơ̆t 'biơ̆ jơhngơ̆m iĕm hăm kơchăng hli kơ pơm yoch; păng athei tơchĕng ling-lang gah tơdrong Yêsu Krist wă ăn kơ iĕm tơdrong hiôk jơnap lăm năr Sư jur kơnh păng iĕm athei lui kơ tơdrong Sư wă ăn noh.

I Pet 4:13

Na iĕm athei gơ̆t lê̆ tơdrong sơ'ngon, iŏk tơdrong hiôk chơt đĕch, yua kơ Yêsu Krist sơ̆ Sư kư̆m đei tơdrong gleh truh boih. Na bơ̆n dang ei kư̆m đei tơdrong truh thoi noh mơ̆n. Thoi noh na truh năr bơ̆n tơ'bơ̆p Yêsu Krist mơsêh mơyang jur ning-mônh bơ̆n gô hiôk chơt hăm Sư.

I Pet 5:1

Yua kơ thoi noh na dang ei inh wă bơtho 'biơ̆ lu bơngai pơm kră wei-lăng lu bơngai lui, yua kơ inh trŏ tơdrong jang noh păng 'bôh tơdrong Yêsu Krist gleh pơmat krưp tơpă. Thoi noh truh năr Yêsu Krist jur ning-mônh 'Bok Kei-Dei gô atŏk inh oei hơdai hăm Yêsu hiôk jơnap na inh wă pơma kơ iĕm thoi âu:

II Pet 1:3

Yua kơ Sư Yang, Sư mơsêh tơpă, na Sư ăn kơ bơ̆n tôm tơdrong gơh arih, gơh pơm 'lơ̆ng tơpăt thoi Sư. 'Noh yua kơ Sư krao, na bơ̆n băt kơ Sư. Bơ̆n 'bôh Sư mơsêh păng 'lơ̆ng tơpăt na bơ̆n băt kơ kiơ̆ Sư.

I Yo 3:2

Ơ lu bôl buăl mă juăt păng inh tơpă, dang ei bơ̆n kon 'Bok Kei-Dei, sơmă bơ̆n ưh tam băt bơ̆n gô jing thoi yơ ning-mônh. Mă-lei bơ̆n băt tơdrong âu tơpă: Lăp Yêsu Krist jur tơ ala teh âu ning-mônh, bơ̆n gô jing thoi Sư, kơlih kơ bơ̆n gô 'bôh Sư tơpă.

Ju 1:1

Inh Jut, oh Yakơ, hăm đĭch đam Yêsu Krist, chih hơpong kơ lu bơngai mă 'Bă tơm bơ̆n 'Bok Kei-Dei 'mêm rơih iŏk sư boih, wă khan lu bơngai mă Yêsu Krist wei-lăng.

Ju 1:24

Bơnê kơ 'Bok Kei-Dei, pôm Sư đĕch kĕ wei-lăng iĕm, huay ăn kơ iĕm lê̆ Sư, wă kơ iĕm dơ̆ng 'bơ̆t anăp Sư ning-mônh iĕm 'bôh Sư mơsêh mơyang, iĕm hiôk hơiă huay kơ hli kơ Sư, yua kơ iĕm ưh kơ đei tơdrong yoch.

I Sam 2:9

Sư wei-lăng jơ̆ng lu bơngai kiơ̆ Sư tơpăt; Mă-lei lu bơngai kơnê̆ sư gô tơlơ̆ lê̆ lăm măng mu. Kon bơngai ưh kơ kĕ ôh yua tơdrong pran kơdih.