I Kor 9:8 - Sơ̆p Hlabơar Nơ̆r 'Bok Kei-Dei

⁸ Inh khan thoi noh ưh kơ sĭ inh pơma kiơ̆ kơ đon kon bơngai đĕch ôh, tơ lăm sơ̆p hla bơar tơdrong juăt Môis kư̆m bơtho khan thoi noh mơ̆n.

I Kor 9:8 ပူးပေါင်းရင်းမြစ်များ

Êsai 8:20

Kiơ̆ kơ khôi juăt păng nơ̆r tơbăt âu! Tơdah kon pơlei ưh kơ pơma thoi noh lei lu sư ưh kơ đei tơdrong hơdah ôh.

Rom 3:31

Thoi noh boih, mă-lei bơ̆n hăm wă hŭt lê̆ tơdrong juăt 'Bok Kei-Dei pơkă sơ̆? Ưh ôh, bơ̆n kư̆m oei kiơ̆ mơ̆n, bơ̆n lui kơ Yêsu 'mơ̆i na bơ̆n kĕ kiơ̆ tơdrong juăt Sư pơkă noh.

Rom 3:5

Bơ̆n 'bôh tôm tơdrong 'Bok Kei-Dei pơm 'lơ̆ng tơpăt ngăl boih, na bơ̆n 'nĕ tơchĕng khan, bơ̆n pơm kơnê̆ kư̆m bưh, wă kơ đe kơnăl kơ 'Bok Kei-Dei pơm 'lơ̆ng tơpăt păng wă kơ đe kơnăl kơ 'Bok Kei-Dei Sư ưh kơ pơm kơnê̆ thoi kon bơngai. Bơ̆n pơm kơnê̆ noh na đe gô ư-ang kơ 'Bok Kei-Dei rai tih, na dah 'Bok Kei-Dei wă phak bơ̆n ning-mônh noh Sư wă hơlĕnh đĕch yua kơ bơ̆n dang ư-ang anăn Sư kơ đe boih. Bơ̆n 'nĕ tơchĕng tơdrong noh khan trŏ, ưh ôh hŏ. Kon bơngai bơ̆n đĕch tơchĕng khan trŏ.

Rom 6:19

Tơdrong pơm đĭch noh ưh kơ sĭ iĕm jing đĭch tơpă ôh, inh pơtih gia wă kơ iĕm hlôh đĕch. Yua kơ sơ̆ iĕm dang pơjao akâu iĕm pơm kơnê̆ kư̆ kă khŏm khŏm rai tih, na dang ei iĕm pơjao akâu iĕm kơ 'Bok Kei-Dei pơm 'lơ̆ng tơpăt thoi Sư boih.

I Kor 14:34

Lăm iĕm akŭm, lu bơngai drŏ-kăn athei hreh ưh kơ gơh iung pơma. Lu bơngai lui mă akŭm jơ̆p-jang anih kư̆m pơm thoi noh mơ̆n. Lu bơngai drŏ-kăn athei lui yom kơ bơngai drŏ-nglo kư̆m thoi tơdrong 'Bok Kei-Dei pơkă.

I Kor 7:40

Mă-lei lăm đon inh tơchĕng dah sư lê̆ pă chă klo, ngôi minh 'nu đĕch noh 'lơ̆ng. Inh tơchĕng Yang Bơhngol 'Lơ̆ng kư̆m wă kơ inh bơtho iĕm thoi noh mơ̆n.

Galati 1:11

Ơ lu 'nhŏng oh, inh wă kơ iĕm hlôh tơdrong âu: Tơdrong 'nao 'lơ̆ng mă inh bơtho ăn kơ iĕm sơ̆, ưh kơ sĭ đơ̆ng kon bơngai pơjing ôh.

I Tes 2:13

Nhôn bơnê kơ 'Bok Kei-Dei yua kơ iĕm mơ̆ng nhôn bơtho tơdrong Sư na iĕm kơnăl kơ tơdrong 'Bok Kei-Dei tơpă, iĕm lui hloi. Iĕm ưh kơ đei tơchĕng khan nhôn bơtho tơdrong kon bơngai đĕch ôh. Nơ̆r 'Bok Kei-Dei boih ăn kơ bơngai bơ̆n lui kơ Sư, hăm ăn jơhngơ̆m bơ̆n pran kơtang jang kơ Sư.

I Tes 4:8

Thoi noh boih na bơngai bu mă ưh kơ chu iŏk nơ̆r nhôn bơtho âu, bơngai 'noh sư ưh kơ chu nơ̆r 'Bok Kei-Dei, yua kơ nhôn bơtho nơ̆r 'Bok Kei-Dei tơpă. 'Bok Kei-Dei ăn kơ iĕm Yang Bơhngol 'Lơ̆ng Sư, na iĕm athei pơm 'lơ̆ng tơpăt.