I Kor 7:5 - Sơ̆p Hlabơar Nơ̆r 'Bok Kei-Dei

⁵ Ưh kơ gơh sơ-ih băl ôh, mă-lei dah klo akăn biĕm pôm đon wă krao khan kơ Kră Yang tơdrong kiơ kiơ na biĕm wă pơdơh kơ tơdrong tơngôi noh, kư̆m bưh mơ̆n. Mă-lei tôch kơ năr biĕm pơkă krao khan noh boih, na biĕm tơngôi băl thoi đêl dơ̆ng, hli kơnh yang Satan pơhlŭ biĕm ngôi pơyô kư̆ kă yua kơ iĕm ưh kơ kĕ gơ̆t.

I Kor 7:5 ပူးပေါင်းရင်းမြစ်များ

Le 19:15

Na sư khan kơ kon pơlei: Lăm năr mă pêng lu iĕm athei kơchăng, 'nĕ năm jê̆ bơngai drŏ-kăn ôh.

Le 21:10

Tơdah tơ'ngla sư đei iŏk oei kơ bơngai drŏ-kăn nai na gah akăn sư blŭng-a sư ưh kơ gơh tơjur hơtŭch, lê̆ tơmam sa, hơbĕn ao păng tơdrong 'mêm băl klo kăn.

Jôel 2:16

Krao akŭm bĕ kon pơlei pơla, pơm rơgoh bĕ lu khŭl bơngai akŭm. Athei krao lu kră pơlei năm tơ noh, athei akŭm lu hơ'lơ̆p, păng lu nge mă oei mŏm! Ăn klo hle sư lĕch bĕ đơ̆ng anih 'bĭch sư, păng ăn akăn hơlai 'nao sư lĕch bĕ đơ̆ng anih sư.

Sa 7:3

păng pơma hăm lu 'bok soi lăm hnam akŭm 'Bok Kei-Dei păng hăm lu 'bok khan lê̆ adrol thoi âu: “Inh hăm pă nhơ̆m hmoi păng ngôi adrô̆ lăm khei pơđăm thoi inh ngăl juăt kơ đei pơm boih lăm lơ sơnăm noh sơ̆?”

Mathiơ 17:21

Na gah tơdrong yang kơnê̆ thoi âu, dah bơ̆n ưh kơ krao khan kơ Kră Yang 'Bok Kei-Dei hơdrol păng ưh kơ ơ̆t kơ por, mă bơ̆n pơpuh lap đĕch, sư ưh kơ chu kơdâu ôh.

Mathiơ 19:11

Yêsu khan dơ̆ng kơ lu sư: “Đĭ-đăng bơngai ngôi hơdrô̆ kư̆m ưh kơ trŏ ôh. Tơdrong 'noh gô mơ̆ng kơ 'Bok Kei-Dei đĕch.

Mathiơ 4:10

Yêsu khan: “Ơ Satan, kơdâu kơ e bĕ. Đe chih tơ lăm sơ̆p hla bơar 'Bok Kei-Dei sơ̆ thoi âu: ‘Bơ̆n athei kơkuh kơ Kră Yang bơ̆n 'Bok Kei-Dei đĕch. 'Bok Kei-Dei ưh kơ wă kơ bơ̆n kơkuh kơ yang nai ôh.’ ”

I Kor 7:4

Gah tơdrong 'noh akăn sư ưh kơ gơh pơm yŏng kơdih ôh, athei gô mơ̆ng kơ klo sư wă. Klo sư kư̆m lei-lăi mơ̆n, gô mơ̆ng kơ akăn sư wă.

I Tes 3:5

Yua kơ iĕm đei tơdrong đe areh kơ iĕm tơpă, na inh pă kĕ ĕnh, na wơh Timôthê năm tơ iĕm ki, wă kơ sư jet iĕm, wă kơ băt iĕm oei lui kơjăp kơ Kră Yang Yêsu dah ưh. Inh hli dêh kơ yang Satan pơhlŭ iĕm achăng lê̆ tơdrong lui bơ̆n. Yua kơ đêl nhôn mah bơtho gleh tơpă tă ưh kơ yua kiơ, inh 'mêm dêh.