I Kor 6:11 - Sơ̆p Hlabơar Nơ̆r 'Bok Kei-Dei

¹¹ Lu iĕm mơ'nah pơm thoi noh tơpă mơ̆n sơ̆, mă-lei dang ei 'Bok Kei-Dei ôp rơgoh tơdrong yoch iĕm boih, iĕm jing kon Sư 'lơ̆ng tơpăt boih, Sư jô̆ iĕm bơngai 'lơ̆ng yua kơ Kră Yang Yêsu Krist păng Yang Bơhngol 'Lơ̆ng 'Bok Kei-Dei tơgŭm bơ̆n.

I Kor 6:11 ပူးပေါင်းရင်းမြစ်များ

Horiso 51:2

Apinh Ih ôp rơgoh đĭ dôm tơdrong kơnê̆ inh, Păng ăn kơ inh 'lơ̆ng rơgoh đơ̆ng yoch.

Horiso 51:7

Apinh Ih iŏk hla bơngăl sut rơgoh yoch inh, na inh gô 'lơ̆ng, Apinh ôp inh, na inh gô jing kok hloh kơ prĕl.

Tơdrông Pơđơk 30:12

Đei bơngai mơ'nah tơchĕng khan lu sư rơgoh 'lơ̆ng. Mă-lei tam đei ôp mơgrĭ lu sư.

Êsai 1:16

Hum hơrao bĕ mă rơgoh! 'Bơ̆t anăp Inh lu iĕm athei hŭt lê̆ đĭ dôm tơdrong kơnê̆. 'Nĕ pă pơm tơdrong kơnê̆ dơ̆ng.

Êsai 45:25

Lăm Kră Yang đĭ-đăng kon sâu Isơrael gô đei 'lơ̆ng tơpăt păng bơnê ư-ang kơ Kră Yang.

Êsai 53:11

Đơ̆ng rŏng kơ bơhngol sư đei tơdrong pơmat-tat. Sư anih 'bôh hơdah. Đơ̆ng tơdrong sư hlôh băt sư gô hiôk. Đĭch đam Inh 'lơ̆ng tơpăt noh, Sư ăn đei lơ bơngai 'lơ̆ng tơpăt đơ̆ng sư pŭ iŏk tơdrong yoch lu sư.

Je 4:14

Ơ kon pơlei Jêrusalem ôp mă rơgoh bĕ jơhngơ̆m kơnê̆ iĕm, wă kơ iĕm gơh đei dŏng pơklaih. Lu iĕm răk mong tơdrong kơnê̆ tơ lăm jơhngơ̆m lu iĕm dĭng dang yơ?

Êsêkiên 36:25

Inh gô ruh đak rơgoh hlăng tơ lu iĕm, lu iĕm gô; rơgoh lu iĕm gô rơgoh đĭ đơ̆ng dôm tơdrong kơnê̆ 'mê̆-'mach păng rơgoh đơ̆ng tơdrong kơkuh kơ rup yang lu iĕm.

Lêwi 14:48

Mă-lei đơ̆ng rŏng kơ hnam mă đei man bah ming tơdah 'bok soi wơ̆t lăng, ưh pă đei 'bôh tơdrong jĭ phơ̆k sa lanh lăm hnam, 'bok soi gô khan hnam noh rơgoh, yua kơ tơdrong jĭ phơ̆k klaih bơih.

Lêwi 8:6

Môis chông ba Arôn păng lu kon drŏ-nglo sư năm jê̆ păng iŏk đak pơ'nhao ăn kơ lu sư.

Mathiơ 20:4

Na 'bok tơ'ngla mir hơmu ei khan: ‘Iĕm hăm wă năm jang kơ inh, inh apah trŏ?’

Luka 18:14

Na Yêsu khan dơ̆ng: “Inh khan kơ iĕm tơpă, lăp bơngai mă iŏk jên thuê̆ noh brŏk tơ hnam, 'Bok Kei-Dei jô̆ sư klaih đơ̆ng tơdrong yoch boih. Bơngai Pharisi noh 'Bok Kei-Dei ưh kơ jô̆ kơ sư khan klaih đơ̆ng tơdrong yoch ôh, yua kơ bơngai bu pơang akâu kơdih, sư ei gô mơlâu; bơngai bu pơma sơdrĭ tơ ala kơ 'Bok Kei-Dei, na sư 'nei boih 'Bok Kei-Dei 'brơ̆k mơnat tơiung sư.”

Yo 13:10

Yêsu khan: “Bơngai bu hum boih, bơngai 'noh sư rơgoh đĭ boih. Sư ưh pă kăl ôp ti 'nhao muh măt sư dơ̆ng ôh. Sư kăl pôm ôp jơ̆ng sư đĕch. Đĭ-đăng kơ iĕm rơgoh ngăl boih, pă minh 'nu ưh kơ rơgoh.”

Yo 13:8

Pêtrôs khan: “Inh ưh kơ hơnhŏ Ih ôp jơ̆ng inh na inh ưh kơ layơ ăn Ih ôp jơ̆ng ôh.” Yêsu khan: “Dah Inh ưh kơ ôp jơ̆ng ih, lei ih ưh pă pơm jơ̆ng 'bang Inh boih.”

Yo 5:4

yua kơ phŏ phŏ đei linh jang 'lơ̆ng 'Bok Kei-Dei jur tơ đak dơnâu ei, wă pơm kơ đak dơnâu ei tơglăk. Na bơngai bu mă hơbĕch dah kơtah lăm dơnâu ei hơdrol kơ đe, sư noh klaih hloi kơ jĭ sư.

Jang 13:39

Bơ̆n kiơ̆ tơdrong juăt Môis đĕch, bơ̆n ưh kơ gơh klaih đơ̆ng tơdrong yoch. Mă-lei dah bơ̆n lui kơ Yêsu, bơ̆n gơh klaih đĭ đơ̆ng tơdrong yoch bơ̆n.

Jang 22:16

Na dang ei ih gô kiơ? Ih iung wăi, năm iŏk 'batem, krao khan kơ Yêsu wă kơ ih klaih đơ̆ng tơdrong yoch.’

Jang 26:18

Inh gô wơh ih wă kơ pơlar măt lu bơngai tơmoi wă kơ lu sư gơh 'bôh Tơdrong 'Nao 'Lơ̆ng, wă kơ lu sư gơh jăk đơ̆ng măng mu, na oei lăm hơdah, wă kơ sư jăk đơ̆ng yang Satan, na năm tơ 'Bok Kei-Dei. 'Bok Kei-Dei gô pơklaih lu sư đơ̆ng dôm tơdrong yoch hăm jô̆ lu sư jing bơngai 'lơ̆ng tơpăt thoi đĭ-đăng lu bơngai lui kơ Inh.’

Rom 3:24

Mă-lei 'Bok Kei-Dei oei 'mêm kơ kon bơngai jô̆ kon bơngai jing 'lơ̆ng hăm Sư. Sư mơnat ăn đĕch. Yua kơ Sư mơnat na Sư ăn Yêsu Krist huai iŏk bơ̆n.

Rom 4:5

Bơ̆n bơngai yoch mă-lei dah bơ̆n lui păng gơnang kơ Sư tơpă, Sư kư̆m jô̆ bơ̆n bơngai 'lơ̆ng tơpăt. Mă-lei noh ưh kơ sĭ Sư apah yua kơ bơ̆n kiơ̆ dôm tơdrong juăt Sư pơkă ôh, Sư mơnat yua kơ bơ̆n lui păng gơnang kơ Sư.

Rom 5:1

Bơ̆n lui păng gơnang kơ 'Bok Kei-Dei thoi noh, na Sư jô̆ bơ̆n jing 'lơ̆ng tơpăt; yua kơ Kră Yang bơ̆n Yêsu Krist na bơ̆n gơh oei hiôk hăm 'Bok Kei-Dei.

Rom 5:9

Na dang ei 'Bok Kei-Dei jô̆ bơ̆n jing bơngai 'lơ̆ng boih yua kơ đei Yêsu Krist lôch tang bơ̆n. 'Noh bơ̆n băt kơ Sư dŏng pơklaih bơ̆n đơ̆ng tơdrong 'Bok Kei-Dei wă phak.

Rom 8:30

Lu bơngai thoi noh 'Bok Kei-Dei rơih iŏk, Sư jô̆ lu bơngai thoi noh bơngai tơpăt hăm Sư. Lu bơngai noh 'Bok Kei-Dei jô̆ jing kon Sư, gô oei hăm Sư hiôk jơnap.

Rom 8:33

Bơ̆n tơ'ngla 'Bok Kei-Dei rơih iŏk jô̆ bơ̆n jing bơngai 'lơ̆ng hăm Sư boih, thoi yơ đe gơh jô̆ kơ bơ̆n bơngai yoch hăm 'Bok Kei-Dei?

I Kor 1:2

chih hơpong kơ lu 'nhŏng oh bơngai lui tơ pơlei iĕm Kôrintô. 'Bok Kei-Dei rơih iŏk iĕm jing kon Sư, iĕm jing bơngai tơpăt yua kơ iĕm lui kơ Yêsu Krist, noh kư̆m thoi lĕ đĭ-đăng bơngai mă krao khan kơ Yŏng bơ̆n Yêsu Krist jơ̆p kơ anih; Sư Kră Yang đĭ-đăng kơ bơ̆n.

I Kor 1:30

'Bok Kei-Dei ăn kơ bơ̆n oei hơdai minh jơhngơ̆m minh đon hăm Yêsu Krist. 'Bok Kei-Dei ăn kơ Kon Sư Yêsu Krist tơbăt ăn kơ bơ̆n gơh tơchĕng hơgei gah tơdrong Sư. Yua kơ đơ̆ng Yêsu Krist na 'Bok Kei-Dei huai iŏk bơ̆n đơ̆ng tơdrong yoch, Sư jô̆ bơ̆n jing bơngai tơpăt hăm Sư păng Sư ăn kơ bơ̆n jing bơngai 'lơ̆ng.

I Kor 12:2

Iĕm kư̆m băt mơ̆n hơtai iĕm tam mă lui kơ 'Bok Kei-Dei sơ̆, iĕm ling-lang gô mơ̆ng kơ đe dui ba iĕm kơkuh kơ rup yang mă ưh kơ gơh pơma.

Galati 2:16

Mă-lei nhôn lui kơ Yêsu boih, nhôn băt kơdih 'Bok Kei-Dei jô̆ lu nhôn 'lơ̆ng tơpăt hăm Sư noh yua kơ nhôn lui păng gơnang kơ Yêsu Krist, ưh kơ sĭ yua kơ nhôn lui kiơ̆ tơdrong juăt Môis khŏm khŏm na 'Bok Kei-Dei jô̆ bơ̆n 'lơ̆ng tơpăt hăm Sư ôh. Dang ei nhôn lui boih kơ Yêsu Krist, na mă 'Bok Kei-Dei jô̆ nhôn bơngai 'lơ̆ng tơpăt hăm Sư. Ưh kơ đei bu 'Bok Kei-Dei wă jô̆ sư 'lơ̆ng tơpăt, dah sư oei gơnang kơ akâu sư kơdih wă kiơ̆ tơdrong juăt Môis.

Galati 3:11

Thoi âu dơ̆ng, bơ̆n băt boih dôm lu bơngai mă gơnang kơ akâu sư kơdih pơm kiơ̆ tơdrong juăt Môis, lu sư 'noh 'Bok Kei-Dei ưh kơ jô̆ lu sư bơngai 'lơ̆ng ôh. Bơ̆n băt thoi noh boih yua kơ sơ̆p hla bơar 'Bok Kei-Dei khan boih thoi âu: “Bơngai bu lui păng gơnang kơ 'Bok Kei-Dei, 'Bok Kei-Dei jô̆ sư bơngai 'lơ̆ng tơpăt ăn kơ sư arih ling-lang.”

Galati 3:24

Pơtih gia kơ tơdrong juăt 'Bok Kei-Dei dang lĕ minh 'nu bơngai anhăk ba lu hơ'lơ̆p pơhrăm chư tơ hnam trưng. Na truh tơ hnam trưng boih na lu đe hơ'lơ̆p ưh pă kăl kơ bơngai năm ba boih. 'Noh kư̆m dang lĕ tơdrong juăt 'Bok Kei-Dei anhăk ba kon bơngai bơ̆n tơ Yêsu Krist, na 'Bok Kei-Dei jô̆ bơ̆n bơngai 'lơ̆ng tơpăt hăm sư yua kơ bơ̆n lui kơ Yêsu.

Galati 3:8

'Bok Kei-Dei băt hơdrol đơ̆ng sơ̆ boih gah tơdrong lu bơngai mă lui kơ Sư, mă bơngai Juđê, mă bơngai khŭl nai, Sư jô̆ 'lơ̆ng tơpăt ngăl. Kơlih kơ thoi noh na Sư roi tơdrong 'nao 'lơ̆ng noh hơdrol kơ Abraham sơ̆ thoi âu: “Ơ Abraham, yua kơ ih, na Inh wă tơgŭm tôm kơ khŭl bơngai oei tơ ala teh.”

Êphêsô 5:26

wă kơ bơ̆n rơgoh đĭ kơ dôm tơdrong yoch, na pơyơ̆r bơ̆n ăn kơ 'Bok Kei-Dei wei-lăng, yua kơ bơ̆n lui kơ nơ̆r Sư bơtho, truh kơ bơ̆n iŏk 'batem tơmôch akâu bơ̆n tơ lăm đak, dang wă khan tơhoch tŭk tơdrong mơgrĭ boih iŏk tơdrong rơgoh.

Êphêsô 5:8

Yua kơ dang ei iĕm ưh pă oei lăm măng mu thoi lu bơngai noh boih, iĕm oei lăm hơdah Kră Yang Yêsu Krist pơchrang ăn. Thoi noh na iĕm athei oei kiơ̆ kơ tơdrong hơdah Sư noh.

II Tes 2:13

Ơ lu 'nhŏng oh, gah iĕm Kră Yang Yêsu Krist 'mêm mơnat kơ iĕm tơpă. 'Bok Kei-Dei wă kơ nhôn ling-lang krao khan bơnê kơ Sư kơlih kơ Sư rơih iŏk iĕm đơ̆ng blŭng-a sơ̆ wă kơ iĕm klaih đơ̆ng tơdrong yoch păng wă kơ Yang Bơhngol 'Lơ̆ng ăn kơ iĕm jing bơngai 'lơ̆ng tơpăt wă jang tơdrong Sư; păng Sư ăn kơ iĕm lui kơ tơdrong Kră Yang Yêsu Krist.

Hêbrơ 10:22

Thoi noh bĕ bơ̆n năm jê̆ 'Bok Kei-Dei. Bơ̆n athei iŏk đon tơpăt, lui kơ Sư sơng iŏk bơ̆n mă tơpă, na jơhngơ̆m bơ̆n huay kơ tơchĕng kơnê̆, yua kơ bơ̆n đei pham Yêsu soi kơ bơ̆n boih. Sư dang tơtreh pham Sư tơ lăm jơhngơ̆m bơ̆n, bơ̆n jing bơngai rơgoh 'lơ̆ng boih; păng pơthim kơ năr bơ̆n iŏk 'batem dang bơ̆n hum đak hlăng 'lơ̆ng tăm.

Hêbrơ 10:29

Tơpă, iĕm tơchĕng lăng tơdrong lu bơngai mă pơjuă kơtĭt Kon pôm 'Bok Kei-Dei păng lăng pham Kon Sư đêl pơm kơ sư rơgoh, mă sư pơm pơhơi thoi ưh kơ yua. Păng Yang Bơhngol 'Lơ̆ng bơtho tơgŭm bơ̆n tôm tơdrong 'lơ̆ng mă sư pơjăm ngôi. Iĕm tơchĕng lăng bơngai noh hăm trŏ kơ phak? Phak tih tơpă ưh kơ băt tih dang yơ.

Hêbrơ 2:11

Yêsu pơklaih bơ̆n đơ̆ng tơdrong yoch păng pơyơ̆r bơ̆n kơ 'Bok Kei-Dei yua kơ Sư lăng bơ̆n thoi 'nhŏng oh pôm mĕ 'bă tơpă, 'Bă tơm bơ̆n lăp minh 'nu đĕch, Sư mă oei tơ plĕnh ti. Mă bơngai thoi bơ̆n, Sư kư̆m lăp đon kơ anăn bơ̆n 'nhŏng oh Sư.

I Pet 1:2

'Bă tơm bơ̆n 'Bok Kei-Dei băt kơ iĕm đơ̆ng blŭng-a sơ̆ boih, na Sư rơih iŏk iĕm jing kon Sư. Na Yang Bơhngol 'Lơ̆ng ăn kơ iĕm jing bơngai 'lơ̆ng tơpăt wă kơ iĕm lui yom kơ Yêsu Krist, na yua kơ pham Yêsu Krist iĕm klaih đơ̆ng tôm tơdrong yoch iĕm. Inh krao khan apinh Sư wei-lăng iĕm tôm tơdrong wă kơ Sư ăn kơ iĕm hiôk-hian ling-lang.

I Pet 1:22

Bơ̆n chu lui kơ tơdrong 'Bok Kei-Dei boih, bơ̆n băt kơ lê̆ đĭ dôm tơdrong yoch, băt 'mêm mơnat kơ bôl buăl 'nhŏng oh bơngai lui. Bơ̆n athei iŏk tơdrong 'mêm mơnat dih băl ling-lang khŏm khŏm hăm đĭ jơhngơ̆m.

I Pet 3:21

Dang ei kư̆m lei-lăi thoi noh, bơ̆n gơnang kơ Yêsu Krist iung arih đơ̆ng lôch păng bơ̆n iŏk 'batem tơ đak wă kơ klaih đơ̆ng tơdrong phak. Ưh kơ sĭ bơ̆n iŏk 'batem wă ôp 'nhao rơgoh akâu bơ̆n mơgrĭ ôh. Bơ̆n iŏk 'batem wă pơtih gia kơ tơdrong bơ̆n apinh 'Bok Kei-Dei ăn kơ bơ̆n lê̆ đĭ tơdrong yoch jing bơngai 'lơ̆ng.

I Yo 2:12

Ơ lu kon hơ'lơ̆p, inh chih ăn kơ iĕm kơthơ âu kơlih kơ iĕm klaih đơ̆ng tơdrong yoch yua kơ Yêsu lôch tang bơ̆n.

Tơdrông Tơ'bôh 1:5

Yêsu Krist, Sư pơma tơpăt ling-lang, Sư iung arih đơ̆ng lôch adrol kơ đe, Sư pơgơ̆r đĭ-đăng lu 'bok pơtao oei tơ teh âu; na inh apinh Sư wei-lăng iĕm lăm tôm tơdrong wă kơ iĕm hiôk-hian ling-lang. Yêsu Krist 'mêm kơ bơ̆n tơpă na Sư pơklaih bơ̆n đơ̆ng tơdrong yoch hăm pham Sư.

Tơdrông Tơ'bôh 7:14

Na inh tơl sư thoi âu: “Ơ 'bok, ih băt boih tơdrong 'noh.” Na sư roi kơ inh thoi âu: “Lu bơngai 'noh sơ̆ lu sư đei tơdrong truh đe pơm kơnê̆ kơ lu sư dêh, lu sư adrin lui truh lôch. Lu sư pih ao tơ pham Kon Triu, kok 'lơ̆ng boih.