I Kor 5:7 - Sơ̆p Hlabơar Nơ̆r 'Bok Kei-Dei

⁷ Iĕm athei hŭt đĭ tơdrong yoch wă kơ jing thoi 'bĕng tơpŭng 'nao tam mă pơjrâu 'buih, yua kơ 'Bok Kei-Dei pơklaih đĭ boih tơdrong yoch iĕm. Yêsu Sư thoi triu đe 'bet sa pơm Giĕng Năm Brih wă 'blŏk hơdơ̆r kơ tơdrong 'Bok Kei-Dei pơklaih đơ̆ng dêh Êyiptơ, na Yêsu boih pơklaih bơ̆n.

I Kor 5:7 ပူးပေါင်းရင်းမြစ်များ

Le 12:15

Lăm tơpơh năr athei sa 'bĕng ưh kơ đei 'buih pông Lăm năr blŭng-a, athei iŏk hŭt lê̆ 'buih đơ̆ng lăm hnam lu iĕm; tơdah bơngai bu sa 'bĕng đei păng 'buih pông đơ̆ng năr blŭng-a mă truh tơ năr tơpơh, lei đe gô puh tơweh bơngai 'noh đơ̆ng lu bơngai Isơrael.

Mathiơ 13:33

Yêsu oei bơtho pơtih gia kơ lu sư dơ̆ng: “Tơdrong 'Bok Kei-Dei pơgơ̆r kon bơngai thoi lĕ kơ 'buih pông. Minh 'nu drŏ-kăn iŏk 'buih pông tŏ sĕt bơlŭ păng tơpŭng mi minh kơthŭng na tơpŭng noh kư̆m pông pơđĭ kơ minh kơthŭng noh mơ̆n.”

Markôs 14:12

Đe juăt kơ pơm giĕng sa 'Bĕng Mi Ưh Kơ Đei 'Buih Pông kơplah tơhngam năr. Na năr mă mônh lăm giĕng noh đe kư̆m juăt kơ 'bet sa triu kơ Năr Giĕng Năm Brih. Na trŏ kơ năr noh lu bơngai pơhrăm păng Yêsu jet Sư: “Ơ 'Bok Thây, Ih wă kơ nhôn hơmet kơ Ih tơmam sa Giĕng Năm Brih tơ yơ?”

Yo 1:29

Năr đơ̆ng rŏng dơning dơ̆ng, Yôhan 'bôh Yêsu thar năm tơ sư, na Yôhan khan kơ đe: “Iĕm lăng bĕ, 'Bok to 'noh boih Kon Triu 'Bok Kei-Dei, 'Bok 'noh boih pơklaih yoch bơngai jơ̆p-jang kơ teh đak.

Yo 1:36

Na lu sư 'bôh Yêsu yak brih lu sư. Na Yôhan khan: “Sư 'noh boih Kon Triu 'Bok Kei-Dei”

Yo 19:14

Năr noh lăp 'năr wă suăn dơ̆ng, năr đe oei hơmet wă pơm Giĕng Năm Brih, Pilat khan kơ lu Juđê: “Âu 'Bok Pơtao iĕm.”

Rom 3:25

'Bok Kei-Dei Sư sek tơlang kiơ̆ tơdrong tơpăt ngăl, na lu bơngai yoch Sư wă phak tơpă. Mă-lei Sư oei 'mêm kơ kon bơngai, na ăn Kon pôm Sư Yêsu lôch tang kon bơngai tơ 'long pơglang, wă huai iŏk lu bơngai yoch, wă kơ lu bơngai yoch noh lui kơ Kon Sư, gơnang kơ Kon Sư, na 'Bok Kei-Dei jô̆ lu sư jing bơngai 'lơ̆ng rơgoh, Sư huay pă jô̆ yo boih. Kơplah Yêsu tam mă lôch tang sơ̆, đei mơ̆n lu bơngai lui kơ 'Bok Kei-Dei, gơnang kơ 'Bok Kei-Dei, mă-lei Sư huay kơ jô̆ yo ôh dôm tơdrong yoch lu sư, yua kơ Sư wă ăn Yêsu lôch tang lu sư ning-mônh. Tơdrong Sư ăn Kon Sư Yêsu lôch tang kon bơngai noh, Sư wă kơ kon bơngai băt kơ Sư sek tơlang kon bơngai tơpăt.

I Kor 10:17

Lăp minh pôm 'bĕng mi noh đĕch, mă-lei đei lơ bơngai sa, 'noh pơtih gia kơ lu bơ̆n bơngai lơlap lơlang pơgơ̆p jing dang minh 'nu bơngai minh jơhngơ̆m minh đon hăm Yêsu Krist.

Êphêsô 4:22

Iĕm athei lê̆ tơdrong so, tơdrong mă iĕm juăt kơ pơm sơ̆. Pơm thoi noh sơ̆ rai đunh rai răm yua kơ 'maih pơm lơ tơdrong kơnê̆.

Tơdrông Tơ'bôh 5:12

Đĭ-đăng kơ lu sư hơri minh nơ̆r hơdai. Tơdrong lu sư hơri ei thoi âu: “Ih Kon Triu mă đe pơlôch, Ih mơsêh mơyang, Ih mơdrŏng tih hơgei tôm tơdrong păng pran tih hloh kơ đĭ-đăng, na trŏ kơ nhôn lui yom păng ư-ang Ih tơpă.”