I Kor 5:11 - Sơ̆p Hlabơar Nơ̆r 'Bok Kei-Dei

¹¹ Kơthơ inh chih kơ iĕm ki, inh khă kuă ăn iĕm tơbôl păng bơngai mă lui ră, mă sư ưh kơ kiơ̆ tơdrong lui tơpă. Sư oei pơm pơyô kư̆ kă, sư oei 'nhĕng kơ mŭk tơmam đe, sư kơkuh kơ rup yang, sư oei hiĕk achơ̆ kơ đe ling-lang, sư oei et sik suai, sư oei tơtông mŭk tơmam đe; dôm lu bơngai thoi noh inh kuă ăn iĕm tơbôl păng kuă ăn sŏng sa hơdai.

I Kor 5:11 ပူးပေါင်းရင်းမြစ်များ

Horiso 10:3

Yua kơ lu bơngai kơnê̆ pơư kơdih kơ tơdrong lu sư 'maih wă; Lu bơngai ham kơ tơmam, achăng lê̆ păng pơjăm Kră Yang.

Horiso 101:5

Inh gô ngăn hreh kơ lu đe mă pơma roi 'bơm lu rông 'bôt. Gah lu bơngai đei măt pơrŏ păng jơhngơ̆m pơang, Inh ưh kơ lăp ôh.

Êsêkiên 22:12

Lăm ih đei bơngai iŏk sa pơgâm wă pơm tơdrong đei tuh pham, ăn đe tŏk iŏk đei iŏk lơi adrol păng iŏk jên kon lơ dêh; ih pơjuă sa lu bơngai jê̆ ih păng ih hiơt kơ Inh, Kră Yang khan thoi noh.

Mathiơ 18:17

Dah sư ưh tam mă chu kơ lu bơngai kơdranh pơma lei iĕm khan kơ lu bơngai mă akŭm lăm hnam 'Bok Kei-Dei. Dah sư oei sơngah ưh kơ chu kơ lu bơngai akŭm lăm hnam 'Bok Kei-Dei lei iĕm lăng sư thoi bơngai tơmoi khŭl nai păng thoi bơngai iŏk jên thuê̆ đĕch.

Mathiơ 23:25

“Ơ lu thây bơtho đe Juđê păng lu bơngai kiơ̆ tơdrong Pharisi, ning-mônh iĕm pơmat-tat dêh, yua kơ iĕm bơngai 'bơ̆r đak klak ŭnh. Iĕm hăt hot kơ ôp pơnhan hăm kơchŏk hơdrol kơ sŏng sa, khan trŏ tơdrong juăt 'Bok Kei-Dei, mă-lei tơmam sa iĕm lăm pơnhan hăm kơchŏk đak iĕm noh iĕm tơgar iŏk đơ̆ng đe.

Luka 18:11

Na 'bok bơngai Pharisi ei dơ̆ng dơ'nhơ̆ng ngoi tơ plĕnh krao khan lăm to khan: ‘Ơ 'Bok Kei-Dei, inh bơnê kơ Ih yua kơ inh ưh kơ sĭ bơngai thoi đe nai ôh. Inh ưh kơ sĭ bơngai ưh kơ tơpăt, chă pơgâm sa đe ôh. Inh ưh kơ ngôi kư̆ kă ôh. Inh kư̆m ưh kơ sĭ thoi lĕ bơngai chă iŏk jên thuê̆ 'noh ôh.

Luka 21:34

“Na kơplah iĕm oei arih dang ei, iĕm athei kơchăng kơdih 'nĕ kơ nŏng kơ et sik, hli kơ suai. Păng 'nĕ pă hăt kơ tơdrong ala teh, hli kơ năr noh truh kơplah iĕm ưh kơ kơchăng, tabơla haih pă tam thoi bơngai 'leh 'năk. Na tơdrong noh wă truh tơ jơ̆p-jang teh đak ning-mônh kư̆m thoi noh mơ̆n.

Jang 1:15

Kơplah noh sơ̆, minh năr ei đei dang lăp minh-hrĕng 'bar-jĭt 'nu bơngai akŭm dih băl, Pêtrôs iung 'bơ̆t tŏk-bŏk bôl sư khan hloi:

Jang 9:17

Anania năm tơ Sôl, sư pel kơ̆l Sôl khan hloi: “Ơ 'nhŏng, Kră Yang Yêsu mă ih tơ'bơ̆p tơ trong hăm mơsêh mơyang Sư, Sư wơh inh năm tơ ih wă ăn kơ ih gơh 'bôh hơdah thoi đêl păng ăn kơ ih 'bĕnh kơ Yang Bơhngol 'Lơ̆ng.”

Rom 13:13

Bơ̆n athei pơm mă 'lơ̆ng thoi bơngai jang kơ'năr, 'nĕ pă et sik suai hli kơ pơm kư̆ kă; drŏ-nglo drŏ-kăn kư̆m 'nĕ kơ ngôi kư̆ kă; 'nĕ pơjah pơjăng păng đe, 'nĕ kơ 'nhĕng đe.

Rom 16:17

Ơ 'nhŏng oh, iĕm athei kơchăng hli kơ iĕm lui jrok kiơ̆ lu bơngai lui ưh kơ tat, hli kơ iĕm achăng lê̆ tơdrong lui tơpăt mă đe juăt kơ bơtho; na iĕm athei weh 'biơ̆ đơ̆ng lu sư. Lu sư wă pơrăm lu bơngai lui bơ̆n, chă pơjah pơjăng păng bơ̆n.

I Kor 10:14

Yua kơ thoi noh na ơ lu 'nhŏng oh mă inh 'mêm kơeng, iĕm athei tŭk lê̆ đĭ dôm tơdrong yang kơnê̆ hŏ, 'nĕ pă kiơ̆ sư.

I Kor 11:21

Iĕm oei sŏng sa, iĕm ưh kơ sŏng sa hơdai ôh, iĕm sŏng sa tơmam iĕm kơdih đĕch, ưh kơ asong lu bôl dơnuh ôh. Thoi noh lu mơ'nah sŏng sa ră ưh kơ mah, oei pơngot plơ̆ng đĕch; na lu iĕm mơ'nah sa et rơkah rơkai tơpă truh kơ iĕm mah suai.

I Kor 6:10

lu bơngai tơtông, lu bơngai 'nhĕng kơ mŭk tơmam đe, lu bơngai et sik suai, lu bơngai oei hiĕk achơ̆ kơ đe, iĕm 'nĕ ngêh lu sư gơh tŏk oei tơ dêh char 'Bok Kei-Dei ôh.

I Kor 6:6

na iĕm ling-lang mă nŏng kơ chă lu kră ưh kơ lui sek ăn tơdrong iĕm?

I Kor 6:9

Iĕm ưh kơ băt ôh hă lu bơngai pơm kơnê̆ ưh kơ gơh tŏk oei tơ dêh char 'Bok Kei-Dei ôh? Lu bơngai ngôi pơyô kư̆ kă, lu bơngai kơkuh kơ rup yang, lu bơngai plah klo kăn đe, lu bơngai tơduă drŏ-nglo tơngơ̆r băl,

I Kor 7:12

'Noh đơ̆ng nơ̆r Kră Yang Yêsu Krist pơma sơ̆. Na dang ei inh wă bơtho iĕm dơ̆ng thoi âu: Dah drŏ-nglo bơngai lui oei kơ drŏ-kăn ưh kơ lui, na akăn sư wă oei kơ sư khŏm khŏm kư̆m bưh mơ̆n, 'nĕ kơ achăng tŭk sư ôh.

I Kor 7:15

Mă-lei klo dah akăn mă ưh kơ lui wă achăng klo dah akăn sư mă lui, lê̆ sư achăng kư̆m bưh ưh kơ kơ̆m ôh. 'Bok Kei-Dei krao bơ̆n lui kơ Sư, Sư wă kơ bơ̆n pơma pơlung băl mă 'lơ̆ng, ưh kơ sĭ Sư wă kơ bơ̆n hang nuih ôh.

I Kor 8:11

Pơtih gia dah sư pơm kiơ̆ kơ iĕm thoi noh boih, inh hli kơ lu sư hơwơ̆l jing ưh pă băt kiơ̆ tơdrong lui thoi yơ, na jing achăng lê̆ tơdrong lui sư hloi. Sư bôl bơ̆n, bơngai lui thoi bơ̆n, Yêsu Krist lôch tang sư tơ 'long pơglang boih ră, mă-lei iĕm wă pơm pơ'brơh kơ sư jing răm.

Galati 2:12

Sơ̆ Pêtrôs năm hơpong tơ pơlei nhôn Antiôs, sư kư̆m sŏng sa hơdai lu bơngai nai mă ưh kơ khŭl sư mơ̆n. Na đei minh năr ei Yakơ wơh buăl sư năm tơ nhôn. Lăp lu nhôn wă sŏng sa, na Pêtrôs ưh kơ pơ̆n sŏng sa hơdai hăm lu bơngai mă ưh kơ khŭl sư, yua kơ sư hli kơ buăl sư mă 'nao truh noh hil kơ sư. Lu bơngai noh athei đĭ-đăng lu bơngai lui kơ Yêsu kăt tơdra akar păng ưh kơ ăn lu bơngai Juđê sŏng sa hơdai lu bơngai mă ưh kơ khŭl sư.

Êphêsô 5:18

Bơ̆n 'nĕ kơ et sik suai hli kơ bơ̆n jing bơngai kư̆ kă; bơ̆n athei ăn kơ Yang Bơhngol 'Lơ̆ng pơgơ̆r bơ̆n lăm tôm tơdrong.

Êphêsô 5:5

Dôm lu bơngai đi, lu bơngai pơm pơyô kư̆ kă, lu bơngai hưch hanh lơ tơdrong, bơ̆n băt boih lu bơngai oei pơm thoi noh ưh kơ gơh oei hơdai Yêsu Krist hăm 'Bok Kei-Dei kơplah Sư pơgơ̆r pơm Pơtao ning-mônh ôh. Lu bơngai thoi noh lu sư dang bơngai kơkuh kơ yang nai đĕch, lu sư tơchĕng tơdrong noh hloh loi kơ tơdrong 'Bok Kei-Dei.

Kôlôsê 3:5

Kơlih kơ thoi noh bơ̆n athei lê̆ đĭ dôm tơdrong yoch thoi kơ pơm pơyô kư̆ kă, pơm tơdrong kơnê̆ 'mê̆-'mach, hưch hanh kơ tơmam âu tơmam to, hưch hanh lơ tơdrong. Lu bơngai thoi noh mă sư khan sư lui kơ 'Bok Kei-Dei, dang sư kơkuh kơ yang nai đĕch, lu sư tơchĕng tơdrong noh hloh loi kơ tơdrong 'Bok Kei-Dei.

II Tes 3:14

Dah bơngai bu ưh kơ chu dôm nơ̆r nhôn chih bơtho lăm kơthơ âu, iĕm tơ'bôh akâu sư kơ lu bơngai lui păng 'nĕ pă pơm buăl hăm sư wă kơ sư mơlâu.

II Tes 3:6

Ơ lu 'nhŏng oh, Kră Yang bơ̆n Yêsu Krist wă kơ nhôn bơtho iĕm thoi âu: Iĕm athei weh ataih đơ̆ng lu 'nhŏng oh lui mơ̆n mă sư alah kơ jang. Nhôn kư̆m bơtho sư mơ̆n ki, athei sư jang pơnam 'nĕ kơ alah. Mă-lei dang ei sư oei alah 'mơ̆i.

I Tim 3:3

Sư ưh kơ lah suai sik păng ưh kơ tôn teh đe. Sư bơngai dim khôn tơpă ưh kơ wă pơjah pơjăng păng đe. Sư ưh kơ hăt sa jên lơ ôh.

I Tim 6:5

Đon lu sư jing ưh pă 'lơ̆ng boih, na lu sư pơjah pơjăng ling-lang. Lu sư ưh kơ hlôh tơdrong 'Bok Kei-Dei. Lu sư ưh kơ lui mă-lei lu sư pơma dih băl khan: “Bơ̆n pơm thoi bơngai lui, đơ̆ng noh na bơ̆n chă bơtho pơgŏ đe na gơh mơdrŏng.”

II Yo 1:10

Bơngai bu năm ngôi hơpong tơ iĕm, na sư bơtho iĕm ưh kơ trŏ thoi Yêsu Krist bơtho, bơngai 'noh iĕm 'nĕ kơ sơng iŏk sư mơ̆t tơ hnam iĕm. Păng lăp sư wă brŏk iĕm 'nĕ khan kơ sư khan: Yak mă 'lơ̆ng kơ ih.

Tơdrông Tơ'bôh 2:14

Mă-lei Inh ưh kơ lăp đon kơ iĕm 'bar pêng tơdrong âu: Yua kơ đei lăm lu iĕm mơ'nah kiơ̆ tơdrong 'bok 'Balam. 'Bok 'Balam sơ̆ sư pơchŭt 'bok 'Balăk pơhlŭ lu bơngai Isơrael sa tơmam đe soi sơmah kơ rup yang păng wă kơ lu sư pơm pơyô kư̆ kă.

Tơdrông Tơ'bôh 2:20

Mă-lei minh tơdrong âu Inh ưh kơ lăp đon kơ iĕm, minh tơdrong iĕm kuă kơ pơpuh yă Jesebel bơngai kơnê̆ dêh. Sư khan sư bơngai pơtruh nơ̆r 'Bok Kei-Dei, mă-lei sư oei pơhlŭ lu đĭch đam Inh pơm pơyô ngôi kư̆ kă, sa tơmam đe soi sơmah kơ rup yang.

Tơdrông Tơ'bôh 21:8

Gah lu bơngai lêl, lu bơngai achăng tŭk tơdrong lui, lu bơngai pơm kơnê̆, lu bơngai pơlôch đe, lu bơngai pơm pơyô kư̆ kă, lu bơngai pơm pơjâu chă sol đe, lu bơngai kơkuh kơ yang nai, lu bơngai hơlĕnh pơdăr đon đe, đĭ lu bơngai thoi noh gô huŏng tơ dơnâu ŭnh tŏ hang hơt, 'noh tơdrong lôch mă 'bar.”

Tơdrông Tơ'bôh 22:15

Lu bơngai pơm kơnê̆, lu bơngai pơm pơjâu chă sol đe, lu bơngai pơm pơyô kư̆ kă, lu bơngai pơlôch đe, lu bơngai kơkuh kơ yang nai păng dôm lu bơngai mă hơlĕnh kơ đe ưh kơ gơh mơ̆t ôh.