I Kor 4:15 - Sơ̆p Hlabơar Nơ̆r 'Bok Kei-Dei

¹⁵ Mă iĕm đei mơjĭt-rơbâu 'nu thây bơtho iĕm tơdrong Yêsu Krist, mă-lei iĕm ưh kơ đei 'bă nai ôh, yua kơ inh pơm 'bă pơjing iĕm lui kơ Yêsu Krist păng yua kơ inh bơtho iĕm tơdrong 'nao 'lơ̆ng blŭng-a sơ̆.

I Kor 4:15 ပူးပေါင်းရင်းမြစ်များ

Jo 11:12

Hăm trŏ kơ inh anăp tơpŭ lu sư ưh? Na mă Ih khan kơ inh: Pŭ krôp kon pơlei wei kon pơla âu lăm jơhngơ̆m ih bĕ, thoi bơngai 'bă mă pôk kon hơ'lơ̆p sư oei mŏm, dĭng mă truh tơ dêh char mă Ih đei pơkă wă ăn kơ lu 'bok yă lu sư.

Rom 15:20

Inh bơtho tơ anih mă đe ưh tam mă kơtơ̆ng. Inh ưh kơ bơtho tơ anih đe bơtho boih ôh, kơnh dang inh pơm hnam yua đêl jrăng đe chă.

I Kor 1:30

'Bok Kei-Dei ăn kơ bơ̆n oei hơdai minh jơhngơ̆m minh đon hăm Yêsu Krist. 'Bok Kei-Dei ăn kơ Kon Sư Yêsu Krist tơbăt ăn kơ bơ̆n gơh tơchĕng hơgei gah tơdrong Sư. Yua kơ đơ̆ng Yêsu Krist na 'Bok Kei-Dei huai iŏk bơ̆n đơ̆ng tơdrong yoch, Sư jô̆ bơ̆n jing bơngai tơpăt hăm Sư păng Sư ăn kơ bơ̆n jing bơngai 'lơ̆ng.

I Kor 15:1

Ơ lu 'nhŏng oh, 'nâu inh wă tơ'blŏk ăn kơ iĕm tơdrong 'nao 'lơ̆ng mă inh đei bơtho ăn kơ lu iĕm boih, lu iĕm lui boih păng oei kơjăp lăm tơdrong lui dang ei 'noh.

I Kor 3:10

'Bok Kei-Dei mơnat kơ inh, ăn kơ inh hơgei gơh pơm hnam. Inh man anih hnam 'lơ̆ng boih, na đei bơngai nai pơm hnam 'bơ̆t ei. Mă-lei bơngai bu mă pơm hnam 'bơ̆t ei athei pơm mă 'lơ̆ng.

I Kor 3:6

Inh pơtăm găr sư boih, na Apôlê pruih đak, mă-lei 'Bok Kei-Dei ăn kơ tơmam noh gơh wơ̆ tih.

I Kor 3:8

Bre bơngai pơtăm păng pruih đak bre sư lei-lăi đĕch. 'Bok Kei-Dei apah bre sư kiơ̆ kơ tơdrong jang.

I Kor 9:12

Iĕm 'me sa lu bơngai nai mă bơtho iĕm, iĕm tơchĕng khan trŏ. Tơdrong 'noh dah nhôn truh tơ iĕm, iĕm 'me nhôn kư̆m trŏ loi mơ̆n. Mă-lei đơ̆ng sơ̆ nhôn ưh kơ đei athei iĕm 'me nhôn ôh, nhôn adrin jang sa kơdih đĕch, wă kơ iĕm huay ơh sơ'ngon kơ tơdrong nhôn bơtho iĕm gah tơdrong 'nao 'lơ̆ng Yêsu Krist.

I Kor 9:14

Kră Yang Yêsu Krist kư̆m athei bơ̆n 'me sa lu bơngai jang tơdrong 'nao 'lơ̆ng Sư mơ̆n.

I Kor 9:16

Ưh kơ sĭ inh wă kơ đe ư-ang kơ inh chă bơtho tơdrong 'nao 'lơ̆ng Sư ôh. Inh bơtho tơdrong 'nao 'lơ̆ng Sư yua kơ đơ̆ng Sư wơh inh. Dah inh ưh kơ chu chă bơtho tơdrong 'nao 'lơ̆ng Sư, inh đei tơdrong pơmat-tat dêh.

I Kor 9:18

Na iĕm hăm băt inh gô đei tơdrong apah kiơ? Inh jang bơtho tơdrong 'nao 'lơ̆ng Sư mă-lei kuă kơ iŏk sa jên đơ̆ng đe apah, dah inh iŏk trŏ ră mơ̆n. Tơdrong apah inh wă khan tơdrong inh hiôk lăm jơhngơ̆m gơh bơtho đe, đe huay kơ kăl kơ 'me sa inh.

I Kor 9:23

Inh adrin druh rim đon kon bơngai thoi noh, yua kơ wă bơtho tơdrong 'nao 'lơ̆ng Yêsu Krist kơ lu sư na bơ̆n gơh oei hơdai hăm 'Bok Kei-Dei ling-lang ning-mônh.

II Kor 4:5

Ưh kơ sĭ nhôn bơtho pơang akâu nhôn kơdih ôh. Nhôn bơtho pơang kơ đe Yêsu Krist Kră Yang bơ̆n; gah nhôn bơngai đĭch đam iĕm yua kơ tơdrong jang Yêsu Krist.

Galati 3:24

Pơtih gia kơ tơdrong juăt 'Bok Kei-Dei dang lĕ minh 'nu bơngai anhăk ba lu hơ'lơ̆p pơhrăm chư tơ hnam trưng. Na truh tơ hnam trưng boih na lu đe hơ'lơ̆p ưh pă kăl kơ bơngai năm ba boih. 'Noh kư̆m dang lĕ tơdrong juăt 'Bok Kei-Dei anhăk ba kon bơngai bơ̆n tơ Yêsu Krist, na 'Bok Kei-Dei jô̆ bơ̆n bơngai 'lơ̆ng tơpăt hăm sư yua kơ bơ̆n lui kơ Yêsu.

Galati 3:25

Na dang ei Yêsu Krist jur tơ bơ̆n boih, bơ̆n lui kơ Sư boih, na 'Bok Kei-Dei jô̆ bơ̆n bơngai 'lơ̆ng tơpăt hăm Sư, bơ̆n huay pă kăl gơnang kơ tơdrong juăt 'Bok Kei-Dei anhăk bơ̆n tơ Yêsu.

Galati 4:19

Ơ lu kon inh mă 'mêm kơeng, inh wă pơtih gia kơ minh 'nu bơngai drŏ-kăn sư wă tơpŭ kơ kon sư, sư sơ'ngon tơpă mơ̆n, yua kơ sư jĭ. Hlôi sư tơpŭ boih na sư gơh hiôk. Inh kư̆m lei-lăi thoi noh mơ̆n, kơplah iĕm 'nao wă pơtơm lui sơ̆ păng dang ei mơ̆n. Inh sơ'ngon tơpă, inh hli kơ iĕm achăng lê̆ tơdrong lui iĕm. Inh wă kơ iĕm lui kiơ̆ Yêsu Krist trŏ thoi Sư wă 'mơ̆i na inh gơh hiôk chơt.

II Tim 4:3

Ning-mônh đei lơ bơngai ưh pă wă mơ̆ng tơdrong 'Bok Kei-Dei. Đe wă kiơ̆ gah tơdrong kư̆ kă sư kơdih đĕch, na lu sư chă bơngai bơtho sư kiơ̆ kơ sư wă mơ̆ng đĕch, ưh pă kiơ̆ tơdrong 'Bok Kei-Dei dơ̆ng.

Phil 1:19

Âu hŏ, tơ̆ng ih wă kơ sư duh kơ ih, dang ei inh chih hla bơar kơ ih păng ti inh kơdih, inh wă kơ ih băt kơ inh wă duh dŏng sư tơpă. Mă-lei ih kư̆m dang bơngai hre kơ inh mơ̆n kơlih kơ ih lui kơ Yêsu Krist đơ̆ng inh bơtho.

Ya 1:18

'Bok Kei-Dei ăn kơ bơ̆n jing bơngai 'nao Sư wă kơdih đĕch, na Sư ăn kơ bơ̆n kơtơ̆ng tơdrong Sư, lu bơ̆n jing thoi 'ba hrôih kơ lu bơngai nai yua kơ bơ̆n lui hơdrol.

I Pet 1:23

Tơdrong bơ̆n tơpŭ ming 'nao ưh kơ sĭ đơ̆ng kon bơngai pơjing ôh, yua kơ kon bơngai nŏng kơ lôch; tơdrong tơpŭ ming 'nao đơ̆ng 'Bok Kei-Dei pơjing, 'Bok Kei-Dei ưh kơ layơ lôch. Sư pơjing bơ̆n jing bơngai 'nao yua kơ bơ̆n lui kơ nơ̆r Sư pơma, nơ̆r Sư ưh kơ layơ tơplih. Yua kơ nơ̆r Sư, na bơ̆n gơh arih ling-lang.