I Kor 14:3 - Sơ̆p Hlabơar Nơ̆r 'Bok Kei-Dei

³ Mă-lei gah lu bơngai mă pơtruh nơ̆r 'Bok Kei-Dei, sư bơtho tơblơ̆ tơblang kơ kon bơngai bơ̆n wă kơ hlôh na jing lui kơjăp hiôk huay pă ơh sơ'ngon.

I Kor 14:3 ပူးပေါင်းရင်းမြစ်များ

Luka 3:18

Kơplah Yôhan oei bơtho tơdrong 'nao 'lơ̆ng kơ lu kon pơlei pơla, sư kư̆m đei bơtho khan lơ tơdrong nai mơ̆n.

Jang 13:15

Đang kơ đe đŏk hla bơar tơdrong juăt 'Bok Kei-Dei pơkă păng tơdrong bơngai pơtruh nơ̆r 'Bok Kei-Dei boih, na lu kră wei-lăng lăm hnam akŭm lu đe Juđê khan kơ bre sư: “Ơ bre 'nhŏng oh, tơdah biĕm đei tơdrong wă bơtho kơ kon pơlei pơla, bơtho bĕ.”

Jang 14:22

Tơ rim pơlei ei bre sư bơtho khan kơ lu bơngai lui, wă kơ lu sư lui mă kơjăp. Bre sư khan bơ̆n athei đei lơ tơdrong pơmat-tat adrol 'mơ̆i na gơh mơ̆t tơ dêh char 'Bok Kei-Dei.

Jang 15:32

Đơ̆ng sơ̆ bre Juđa păng Silas bơngai pơtruh nơ̆r 'Bok Kei-Dei. Bre sư bơtho kư̆m đunh mơ̆n wă kơ lu sư chơt hiôk lăm tơdrong 'Bok Kei-Dei, wă kơ lu sư lui mă kơjăp.

Jang 4:36

Đei minh 'nu bơngai anăn sư Yôsep mă-lei lu bơngai jơ̆ng 'bang Yêsu anăn sư 'Barna'ba wă khan bơngai pơlung đe, pơhiôk jơhngơ̆m đe. Sư adrĕch adrung Lêwi sơ̆ mă-lei mĕ sư tơpŭ tơ dêh Chiprơ.

Jang 9:31

Yua kơ Sôl lui boih na lu bơngai lui kơ Yêsu oei jơ̆p-jang dêh Juđê păng dêh Galilê, dêh Samri hiôk-hian huay pă đei tơdrong truh tơ lu sư. Lu sư kư̆m rai đunh rai pran. Lu sư lui tơpă kơ Kră Yang păng Yang Bơhngol 'Lơ̆ng tơgŭm lu sư ling-lang, na lu sư rai đunh rai lơ.

Rom 12:8

Dah Sư ăn kơ bơ̆n hơgei gah tơdrong gơh pơlung đe lui kơjăp, bơ̆n kư̆m adrin gah tơdrong pơlung đe lui kơjăp. Sư wă kơ bơ̆n hơlăng kơ bơngai dơnuh tơmam, bơ̆n kư̆m adrin jang kiơ̆ thoi noh. Dah Sư ăn kơ bơ̆n wei-lăng đe, bơ̆n adrin wei-lăng đe. Dah Sư wă kơ bơ̆n tơgŭm lu bơngai pơmat-tat, bơ̆n athei tơgŭm lu bơngai pơmat-tat noh tơpă păng ăn kơ jơhngơ̆m bơ̆n pơm hiôk kơ lu sư.

Rom 14:19

Yua kơ thoi noh na bơ̆n athei adrin 'biơ̆ tơdrong pơm hiôk kơ bôl buăl hăm 'nhŏng oh bơ̆n kơdih, rai băt tơgŭm băl lui kơjăp.

Rom 15:2

Đĭ-đăng kơ bơ̆n athei tơchĕng kiơ̆ kơ bôl lăp đon, tơgŭm sư gơh lui kơjăp,

I Kor 10:23

Đe khan: “Bơngai lui gơh pơm tôm tơdrong kư̆m bưh, ưh kơ đei kơ̆m ôh.” Mă-lei kư̆m đei tơdrong ưh kơ pơyua kơ bôl buăl wă kơ sư kiơ̆ kơ 'Bok Kei-Dei.

I Kor 14:12

Yua kơ thoi noh na inh wă khan kơ iĕm thoi âu: Iĕm wă tơpă mơ̆n kơ Yang Bơhngol 'Lơ̆ng tơgŭm iĕm hơgei tôm tơdrong, mă-lei iĕm athei apinh tơdrong hơgei gơh tơgŭm kơ bơ̆n bơngai lui.

I Kor 14:17

Tơdrong bơ̆n krao khan bơnê kơ 'Bok Kei-Dei thoi noh 'lơ̆ng ră mơ̆n, mă-lei ưh kơ yua kơ bôl.

I Kor 14:26

Ơ 'nhŏng oh, iĕm băt tơdrong inh pơma hei thoi noh boih, na iĕm wă pơđâu băl thoi yơ dơ̆ng gah tơdrong iĕm wă akŭm? Kơplah iĕm akŭm, bơngai âu sư wă hơri bơnê kơ 'Bok Kei-Dei, bơngai noh sư wă bơtho, bơngai to sư wă pơtruh nơ̆r đơ̆ng 'Bok Kei-Dei, bơngai nai wă pơma nơ̆r hlĭch ư-ang kơ 'Bok Kei-Dei, bơngai nai dơ̆ng wă tơblơ̆ tơdrong pơma nơ̆r hlĭch. Mă-lei dôm tơdrong iĕm pơm noh inh athei iĕm pơm mă trŏ wă atŏk jơhngơ̆m bôl buăl bơngai lui.

I Kor 14:31

Lu iĕm bơngai mă 'Bok Kei-Dei rơih wă pơtruh nơ̆r Sư kơ bôl buăl, đĭ-đăng kơ iĕm gơh bơtho mơ̆n, mă-lei iĕm athei iung pơma bơlơh băl mơ-minh 'nu, thoi noh na đĭ-đăng kơ bôl gơh băt nhên tơdrong 'Bok Kei-Dei na jing hiôk chơt.

I Kor 8:1

Gah tơdrong sa tơmam đe sơmah kơ yang, iĕm khan iĕm băt tôm boih gah tơdrong noh. Mă-lei inh khan kơ iĕm, bơngai bu pơm sa pơjĭp tơmam đe sơmah kơ yang 'bơ̆t anăp đe 'nhŏng oh sư 'nao lui, lu bơngai 'noh sư ưh kơ hlôh tôm ôh gah tơdrong sa tơmam đe sơmah. Sư wă pơang akâu sư kơdih đĕch khan hlôh tôm boih. Dah sư tơchĕng mơnat kơ bôl sư 'nao lui ưh tam băt tôm tơdrong lei sư ưh kơ sa ôh tơmam đe sơmah noh, wă kơ bôl sư huay kơ jrok.

II Kor 1:4

Sư pơlung bơ̆n pơmat-tat wă kơ bơ̆n gơh pơlung lu bôl bơ̆n mă đei tơdrong pơmat-tat. 'Bok Kei-Dei pơlung bơ̆n thoi yơ, bơ̆n pơlung bôl thoi noh.

II Kor 2:7

Thoi noh dang ei bơ̆n 'nĕ pă jô̆ yo kơ sư, iĕm athei dah pơlung sư đĕch hli kơ sư sơ'ngon rai dêh.

Êphêsô 4:29

Iĕm 'nĕ kơ pơma kơnê̆, athei pơma mă 'lơ̆ng tơgŭm pơyua lu bơngai mă mơ̆ng iĕm.

Êphêsô 6:22

Thoi noh na inh wơh sư năm tơ iĕm wă kơ iĕm băt kơ nhôn oei 'lơ̆ng akâu păng wă kơ sư pơlung iĕm hiôk kơ jơhngơ̆m kơtơ̆ng tơdrong nhôn thoi yơ.

Kôlôsê 4:8

Inh wơh sư năm tơ iĕm wă kơ iĕm băt kơ nhôn oei 'lơ̆ng akâu, hăm wă kơ sư pơma pơlung iĕm, wă kơ iĕm hiôk kơ jơhngơ̆m 'biơ̆.

I Tes 2:11

Nhôn mơnat đĭ-đăng kơ lu iĕm kư̆m dang 'bă bơ̆n kơdih mơnat kơ bơ̆n mơ̆n.

I Tes 2:3

Nhôn bơtho iĕm ưh kơ sĭ bơtho tơdrong mă ưh kơ sĭt ôh. Nhôn bơtho tơdrong sĭt tơpă. Nhôn năm tơ iĕm nhôn ưh kơ pơm kư̆ kă ôh. Nhôn ưh kơ wă chă tơdrong hơlĕnh kơ iĕm ôh.

I Tes 4:1

Ơ 'nhŏng oh, âu dơ̆ng: Hơtai ki nhôn bơtho iĕm khan bơ̆n athei kiơ̆ tôm tơdrong 'Bok Kei-Dei wă kơ Sư lăp đon. Mă-lei dang ei iĕm kư̆m kiơ̆ thoi noh boih. Bơ̆n 'nhŏng oh yua kơ bơ̆n lui kơ Kră Yang Yêsu, na nhôn bơtho khan kơ iĕm, wă kơ iĕm pơm kiơ̆ tôm tơdrong 'Bok Kei-Dei khŏm khŏm, na tơdrong lui bơ̆n rai đunh rai kơjăp.

I Tes 4:18

Kơlih kơ thoi noh tơdrong âu gô đei tơpă, na dang ei dôm lu bơ̆n oei arih iŏk dôm lu nơ̆r âu tơguăt kơdih lăm đon bĕ păng pơlung dih băl wă kơ chơt hiôk.

II Tes 3:12

Kră Yang Yêsu Krist wă kơ nhôn bơtho pơkă ăn kơ lu bơngai alah kơ jang thoi âu: Sư athei jang sa 'me klak akâu kơdih 'nĕ pă nŏng kơ chă ngôi.

I Tim 1:4

Ih athei lu sư hŭt lê̆ tơdrong roi kư̆ kă gah adrĕch adrung yă 'bok so sơ̆. Kơlih kơ sư bơtho tơdrong 'noh na lu sư pơjah ling-lang. Lu tơdrong 'noh ưh kơ yua wă tơgŭm bơ̆n ôh. Bơ̆n chu lui kơ Sư mă tơpă na bơ̆n gơh jang tơdrong Sư.

I Tim 4:13

Inh wă kơ ih pơm thoi âu khŏm khŏm tơ̆p mă inh truh tơ ih tơ âu: Lăm iĕm akŭm dih băl ih kư̆ kơ đŏk sơ̆p hla bơar 'Bok Kei-Dei, ih kư̆ kơ bơtho tơdrong 'Bok Kei-Dei đĕch.

I Tim 6:2

Đei bơngai đĭch păng yŏng, bre sư jing 'nhŏng oh yua kơ bre sư lui kơ Kră Yang boih, na bơngai đĭch ei athei lui yom kơ yŏng sư, sư jang kơ yŏng sư 'lơ̆ng hloh kơ sư tam mă lui sơ̆. 'Noh yua kơ sư đei đon 'mêm tơpă kơ yŏng sư, yua kơ yŏng sư bôl bơngai lui. Ih athei bơtho kơ đe dôm tơdrong inh ată wă kơ đe pơm kiơ̆.

Tit 1:9

sư bơtho tơdrong 'Bok Kei-Dei 'blep trŏ nơ̆r 'Bok Kei-Dei tơpă. Thoi noh đe anăn sư gơh bơtho trŏ tơdrong 'Bok Kei-Dei păng sư gơh pơjah pơjăng păng lu bơngai mă ưh kơ lui ayăt tơdrong sư bơtho.

Tit 2:15

Dôm tơdrong inh bơtho ih âu ih bơtho ăn kơ đe dơ̆ng hŏ. Păng ih pơlung lu sư lui mă kơjăp. Ih khă lu sư 'nĕ pă pơm yoch. Ih tơbăt ăn kơ lu sư dôm tơdrong ih bơtho đơ̆ng nơ̆r 'Bok Kei-Dei, na ih athei đĭ-đăng kơ lu sư pơm kiơ̆ tơdrong ih bơtho noh.

Tit 2:6

Bơtho lu bơngai drŏ-nglo oei moh 'nĕ kơ pơm kư̆ kă.

Tit 2:9

Gah bơngai đĭch, lu bơngai khŭl iĕm lu mơ'nah đĭch đe, sư athei lui yom kơ yŏng tơ'ngla sư, bơ̆jang mă 'lơ̆ng wă kơ yŏng sư lăp đon, 'nĕ hil tơplơ̆ kơ yŏng sư. Păng 'nĕ kơ tơtông tơmam yŏng sư. Sư athei pơm 'lơ̆ng tơpăt păng yŏng tơ'ngla sư ling-lang, na lu bơngai ưh kơ lui, sư 'bôh lu bơngai mă đĭch đe, lui pơm 'lơ̆ng thoi noh, na sư khan tơdrong bơ̆n bơtho tơdrong 'Bok Kei-Dei 'lơ̆ng tơpă, tơdrong 'Bok Kei-Dei wă pơklaih đĭ-đăng bơngai đơ̆ng tơdrong yoch.

Hêbrơ 10:25

Bơ̆n 'nĕ kơ lê̆ tơdrong akŭm, thoi lu đe mơ'nah mă lê̆ dang ei. Yua kơ dang ei wă jê̆ truh khei năr Yêsu Krist wă jur boih, na bơ̆n athei adrin pơlung băl gah tơdrong 'noh rai dêh.

Hêbrơ 13:22

Ơ 'nhŏng oh, apinh iĕm mơ̆ng 'biơ̆ dôm tơdrong inh chih bơtho iĕm lăm kơthơ âu hŏ, inh chih kư̆m ưh kơ lơ ôh tŏ sĕt đĕch.

Hêbrơ 3:13

Kơplah ahrei brei drâu oei tam mơ̆n, na rim năr iĕm athei pơlung dih băl, wă kơ đĭ-đăng kơ iĕm huay kơ lui kơ đe pơhlŭ pơlung iĕm pơm yoch jing arăng kơ̆l.

I Pet 5:12

Silas 'nhŏng oh bơ̆n bơngai lui, inh lăng sư lui kơjăp tơpă, na kơthơ âu sư chih tơgŭm inh. Nhi chih minh 'bar nơ̆r wă tơbăt kơ iĕm tơdrong bơ̆n lui âu, tơdrong 'Bok Kei-Dei 'mêm mơnat kơ bơ̆n tơpă, na apinh iĕm lui kơjăp bĕ tơdrong noh.

Ju 1:20

Ơ lu 'nhŏng oh mă inh 'mêm kơeng, inh wă kơ iĕm rai đunh rai lui kơjăp dôm tơdrong 'Bok Kei-Dei, tơdrong mă 'lơ̆ng tơpăt. Iĕm athei gơnang kơ Yang Bơhngol 'Lơ̆ng tơgŭm iĕm krao khan.