I Kor 12:10 - Sơ̆p Hlabơar Nơ̆r 'Bok Kei-Dei

¹⁰ Sư ăn kơ bơngai âu gơh pơm tơdrong mơsêh; Sư ăn kơ bơngai to gơh pơtruh nơ̆r 'Bok Kei-Dei. Sư kư̆m ăn kơ bơngai mơ'nah băt kơnăl kơ bơngai bu pơma yua kơ Yang Bơhngol 'Lơ̆ng tơgŭm, bơngai bu ưh. Sư kư̆m đei ăn kơ bơngai mơ'nah gơh pơma nơ̆r hlĭch mă ưh kơ tam băt đơ̆ng sơ̆; Sư kư̆m ăn kơ bơngai nai gơh hlôh nơ̆r 'noh wă kơ tơblơ̆ ăn kơ đe.

I Kor 12:10 ပူးပေါင်းရင်းမြစ်များ

Jôel 2:28

Năr ei kơnh Inh gô tuh ăn Yang Bơhngol 'Lơ̆ng Inh kơ đĭ-đăng kon bơngai. Lu kon drŏ-nglo kon drŏ-kăn gô pơma khan lê̆ adrol; dôm lu kră iĕm gô hơpo 'bôh, păng dôm lu kon hơ'lơ̆p iĕm gô 'bôh tơdrong tơ'bôh đơ̆ng Kră Yang.

Markôs 16:17

Lu bơngai mă lui gô đei tơdrong mơsêh lu sư gơh pơm: Lu sư gơnang kơ Inh gơh pơpuh yang kơnê̆; lu sư gơh pơma hloi nơ̆r đe;

Markôs 16:20

Klaih kơ noh lu bơngai pơhrăm păng Sư năm chă bơtho jơ̆p-jang. Kră Yang Yêsu kư̆m tơgŭm lu sư jang gơh pơm tôm tơdrong mơsêh wă kơ đe băt kơ lu sư bơtho tơdrong 'Bok Kei-Dei tơpă.

Luka 24:49

Inh gô ăn kơ iĕm Yang Bơhngol 'Lơ̆ng kư̆m thoi lĕ 'Bă Inh pơkă wă ăn kơ iĕm mơ̆n. Mă-lei iĕm athei oei tơ Pơlei Jêrusalem khŏm khŏm tơ̆p mă 'bôh Yang Bơhngol 'Lơ̆ng đơ̆ng plĕnh jur tơ iĕm 'mơ̆i, na iĕm jing pran hăm nuih tơpă chă bơtho đe.”

Yo 14:12

Inh khan kơ iĕm tơpă, bơngai bu lui kơ Inh, bơngai 'noh gô pơm dôm tơdrong Inh pơm mơ̆n. Păng sư gô pơm tơdrong tih hloh kơ Inh dơ̆ng mơ̆n, kơlih kơ Inh wă wih tơ 'Bă Inh boih.

Yo 16:13

Mă-lei lăp Yang Bơhngol 'Lơ̆ng mă tơbăt ăn kơ iĕm tơdrong 'Bok Kei-Dei ei truh, Sư bơtho ăn kơ iĕm tôm tơdrong 'Bok Kei-Dei. Sư ưh kơ bơtho tơdrong Sư kơdih ôh, Sư bơtho iĕm dôm tơdrong Sư kơtơ̆ng đơ̆ng 'Bă Inh. Sư kư̆m bơtho gah tơdrong ning-mônh mơ̆n.

Jang 1:8

Mă-lei lăp Yang Bơhngol 'Lơ̆ng jur oei păng iĕm, iĕm gô đei jơhngơ̆m pran năm bơtho tơdrong Inh tơ Pơlei Jêrusalem, jơ̆p kơ dêh char Juđê păng dêh Samari, đơ̆ng noh jơ̆p kơ teh đak.”

Jang 11:27

Hơtai ei đei lu bơngai đơ̆ng Pơlei Jêrusalem năm tơ Pơlei Antiôs. Lu sư bơngai pơtruh nơ̆r 'Bok Kei-Dei.

Jang 11:28

Lăm lu sư ei đei minh 'nu bơngai anăn sư Abus. Lăp lu bơngai ei oei akŭm, Abus iung pơma. Na Yang Bơhngol 'Lơ̆ng ăn kơ sư khan lê̆ hơdrol gô đei tơdrong pơngot rơwĕt jơ̆p kơ teh đak. Na kơplah pơtao Klôt pơgơ̆r, kư̆m đei tơdrong pơngot rơwĕt.

Jang 19:6

Pôl pel kơ̆l lu sư, na Yang Bơhngol 'Lơ̆ng jur oei hăm lu sư. Lu sư pơma hloi nơ̆r hlĭch păng bơtho tơdrong 'Bok Kei-Dei.

Jang 5:3

Mă-lei Pêtrôs khan: “Ơ Anania, lơliơ yang Satan pơhlŭ ih na ih hơlĕnh kơ Yang Bơhngol 'Lơ̆ng? Ih iŏk 'măn lê̆ jên mir ih minh pah mă-lei nơ̆r ih khan ăn đĭ hloi. Mă-lei nhôn ưh kơ đei pơgŏ ih ôh yua kơ mir noh mir ih kơdih, jên noh kư̆m lei-lăi mơ̆n. Kơlih kơ kiơ ih pơm tơdrong kơnê̆ thoi noh? Mă noh kơ sĭ ih hơlĕnh kơ bơngai ôh, ih hơlĕnh kơ 'Bok Kei-Dei đĕch mă tơpă 'noh.”

Rom 12:6

Na 'Bok Kei-Dei ăn kơ bơ̆n phara tơdrong hơgei, mơ'nah sư hơgei pơm kiơ, gơh jang tơdrong kiơ, na bơ̆n athei jang kiơ̆ kơ Sư ăn noh. Dah Sư ăn kơ bơ̆n hơgei gơh tơbăt kơ đe tơdrong Sư, bơ̆n kư̆ kơ jang tơdrong noh. Bơ̆n gơh dang yơ bơ̆n jang dang noh.

Rom 15:19

Păng dôm tơdrong inh gơh pơm noh đơ̆ng Yang Bơhngol 'Lơ̆ng tơgŭm, mă tơdrong mơsêh, mă tơdrong nai. Thoi noh na inh adrin bơtho tơdrong Yêsu Krist jơ̆p-jang đơ̆ng Pơlei Jêrusalem truh tơ dêh Iliria boih.

I Kor 11:4

Na dah drŏ-nglo bu krao khan dah bơtho tơdrong 'Bok Kei-Dei kơplah iĕm oei akŭm, dah sư yơ̆l môk dah yơ̆l kiơ kiơ lei bơngai 'noh dang sư wă pơ'brơh kơ kơ̆l sư kơdih.

I Kor 13:8

Bơngai bu 'mêm kơ 'Bok Kei-Dei hăm bôl buăl sư, sư 'mêm tơpă ling-lang ưh kơ layơ tôch. Mă-lei gah tơdrong pơtruh nơ̆r 'Bok Kei-Dei, ning-mônh gô tôch, yua kơ dang ei 'Bok Kei-Dei ăn lu bơngai pơtruh nơ̆r Sư, mă-lei ning-mônh ưh pă kăl boih. Ahrei âu Sư ăn kơ lu mơ'nah gơh pơma nơ̆r hlĭch mă đe ưh kơ hlôh wă ư-ang kơ 'Bok Kei-Dei, mă-lei ning-mônh ưh pă yua boih. Dang ei ahrei âu Sư ăn kơ lu mơ'nah gơh hlôh wao tơdrong Sư nhên wă kơ gơh bơtho đe, mă-lei ning-mônh ưh pă kăl boih.

I Kor 14:13

Thoi noh na bơngai mă Yang Bơhngol 'Lơ̆ng tơgŭm sư gơh pơma nơ̆r hlĭch ư-ang kơ 'Bok Kei-Dei 'noh, sư athei krao khan apinh 'Bok Kei-Dei tơgŭm sư hơgei hlôh tôm tơdrong sư pơma nơ̆r hlĭch 'noh 'mơ̆i, na sư gơh tơblang ăn kơ lu bơngai lui.

I Kor 14:39

Ơ 'nhŏng oh, iĕm athei krao khan apinh 'Bok Kei-Dei ăn kơ iĕm gơh pơtruh nơ̆r Sư ling-lang. Tơdrong lu bôl pơma nơ̆r hlĭch noh iĕm 'nĕ mah khă sư dêh hŏ.

Galati 3:5

Inh wă jet iĕm dơ̆ng: 'Bok Kei-Dei ăn kơ iĕm Yang Bơhngol 'Lơ̆ng păng ăn kơ iĕm gơh pơm tơdrong mơsêh, yua kơ iĕm kiơ̆ tơdrong juăt Môis, dah yua kơ iĕm gơnang kơ Yêsu Krist?

I Tes 5:20

'Nĕ che bơle lu bơngai pơtruh nơ̆r 'Bok Kei-Dei, lu bơngai mă khan lê̆ hơdrol.

Hêbrơ 2:4

'Bok Kei-Dei ăn kơ lu bơngai noh gơh pơm lơ tơdrong mơsêh wă tơbăt kơ bơ̆n tơdrong noh sĭt tơpă. Păng Sư ăn kơ lu bơngai lui, Yang Bơhngol 'Lơ̆ng hơgei gơh pơm lơ tơdrong nai dơ̆ng, mă Sư ăn pơm kiơ̆ thoi Sư lăp đon.

I Yo 4:1

Ơ lu 'nhŏng oh mă juăt păng inh, iĕm 'nĕ lui kơ đĭ-đăng bơngai mă khan sư đei Yang Bơhngol 'Lơ̆ng pơma hơgei. Iĕm athei jet pơlong lăng sư 'mơ̆i wă kơ băt sư đei Yang Bơhngol 'Lơ̆ng đơ̆ng 'Bok Kei-Dei, dah yang nai đĕch ăn kơ sư pơma. Kơlih kơ đei lơ bơngai jơ̆p kơ teh đak chă bơtho, sư khan sư pơtruh nơ̆r sư kơtơ̆ng đơ̆ng 'Bok Kei-Dei sơmă sư hơlĕnh đĕch.

Tơdrông Tơ'bôh 2:2

‘Inh băt mơ̆n tơdrong lui iĕm, Inh băt mơ̆n iĕm jang gleh, Inh băt mơ̆n đe areh kơ iĕm, iĕm oei lui kơjăp. Inh băt mơ̆n iĕm kuă kơ lu bơngai kơnê̆ oei hơdai iĕm. Lu sư hơlĕnh khan sư pơm jơ̆ng 'bang Inh mă-lei iĕm pơlong lăng lu sư boih, na iĕm băt boih kơ sư bơngai hơlĕnh.