I Kor 1:20 - Sơ̆p Hlabơar Nơ̆r 'Bok Kei-Dei

²⁰ Na tơ yơ lu bơngai đe khan 'bơ̆r đon ei? Tơ yơ bơngai đe ang khan lu sư hŏk hơgei? Tơ yơ lu bơngai mă pran kơ pơjah pơjăng lăm kon bơngai ala teh âu? 'Bok Kei-Dei jô̆ tơdrong noh boih tơdrong hơgei kon bơngai thoi lĕ kơtul.

I Kor 1:20 ပူးပေါင်းရင်းမြစ်များ

II Sam 15:31

Đe roi ăn kơ Đawit: “Ahithôphel kư̆m minh khŭl iung blah hơdai hăm Apsalôm.” Đawit krao apinh: “Ơ Kră Yang! Apinh Ih pơm ăn lu tơdrong tơchĕng Ahithôphel wă pơm jing kơtul kơwao.”

II Sam 16:23

Lăm kơplah noh đe lăng tơdrong tơchĕng Ahithôphel nhen thoi nơ̆r pơma đơ̆ng tơ'ngla Kră Yang 'Bok Kei-Dei. Lu tơdrong tơchĕng Ahithôphel, mă pơtao Đawit, păng Apsalôm, tă kơ mơ̆ng kiơ̆ nơ̆r Ahithôphel thoi noh ngăl.

II Sam 17:14

Apsalôm păng đĭ-đăng kon pơlei Isơrael tă kơ lăp ngăl khan tơdrong tơchĕng chă đon Husai, bơngai Arkit, hơgei hloh kơ tơdrong tơchĕng Ahithôphel. Yua kơ Kră Yang pơrăm lê̆ tơdrong tơchĕng gơh hơgei Ahithôphel, wă tuh tơdrong pơmat-tat ăn kơ Apsalôm.

II Sam 17:23

Ahithôphel 'bôh đe ưh kơ wă kiơ̆ tơdrong sư pơđâu, na hao hloi aseh iĕ sư brŏk tơ hnam pơlei sư kơdih tơ Gilô. Đang kơ sư hơmet dôm tơdrong jang lăm hnam dơnŏ sư keh boih, sư hrek hơlŏng kơdih lôch. Đe 'bŭ sư hơdai tơ lăm bơsat 'bă sư.

Jop 12:17

Sư rôp anhăk phak lu bơngai pơthơr pơm tơdrong kơnê̆. Pơm ăn kơ lu 'bok sek tơlang jing kơtul kơwao.

Jop 12:20

Sư ăn 'bơ̆r bơngai mă đe gơnang kơmlo, păng iŏk lê̆ tơdrong hơgei đơ̆ng lu kră.

Jop 12:24

Sư iŏk lê̆ tơdrong hơgei đơ̆ng lu yŏng kơdră lăm tơring. Pơm kơ lu sư nơnăm wơ̆l kư̆ kă chă trong ưh kơ đei thoi lăm char glă.

Êsai 33:18

Jơhngơ̆m ih gô tơchĕng kơ tơdrong hli krưp dêh: “Lu đe chă dăr oei tơ yơ bơih? Lu bơngai iŏk tơmam thuê̆ tơ yơ bơih? Lu bơngai chă jô̆ hnam gak tơ yơ bơih?”

Êsai 44:25

Inh pơm pơglăi lê̆ tơdra lu bơngai khan lê̆ adrol hơlĕnh, pơm kơ lu pơjâu jing kơwao; pơm kơ lu bơngai hlôh jing kơtul pơm tơplơ̆ tơdrong hlôh băt sư jing kơtul kơwao dơ̆ng.

Êsai 53:1

Bơngai bu lui tơdrong lu nhôn roi tơbăt bơih, păng ti Kră Yang đei pơdah ăn kơ bu bơih?

Je 10:7

Bu mă ưh kơ hli yom kơ Ih, ơ Pơtao kơ đĭ-đăng dêh char! Ih trŏ tơpă thoi noh, lăm đĭ-đăng lu bơngai hơgei rim adrĕch adrung kon bơngai, lăm jơ̆p-jang kơ dêh char, ưh kơ đei bu thoi Ih.

Mathiơ 13:22

Lu mơ'nah thoi lĕ kơ găr 'ba huŏng 'bơ̆t 'nhĕt jơla. Lu sư kơtơ̆ng đe bơtho tơdrong 'Bok Kei-Dei ră mă-lei lu sư wă tơchĕng tơdrong arih sư kăl hloh, sư wă kơ mơdrŏng; thoi noh na tơdrong 'Bok Kei-Dei ưh kơ gơh wơ̆ păng ưh kơ đei plei.

Yo 12:31

Dang ei 'Bă Inh wă sek tơlang tơ ala teh âu, Sư pơpuh yang Satan mă pơgơ̆r teh âu.

Jang 17:18

Đei lu 'bok thây bơtho tơdrong Êpikur păng lu 'bok thây bơtho tơdrong Sơtôk kư̆m pơjah păng Pôl mơ̆n. Đei bơngai mơ'nah khan kơ Pôl: “Bơngai 'bơ̆r đon kư̆ kă đĕch âu. Sư wă pơma tơdrong kiơ ră âu? Bơ̆n ưh kơ hlôh ôh iih?” Đei mơ'nah khan dơ̆ng: “Rŏ lăng sư bơtho tơdrong lu yang đe nai đĕch âu.” Lu sư pơma khan kơ Pôl thoi noh yua kơ Pôl bơtho sư gah tơdrong Yêsu lôch iung arih dơ̆ng.

Rom 1:20

Đơ̆ng Sư pơjing plĕnh teh sơ̆ khơ̆ dang ei kon bơngai băt tôm tơmam đơ̆ng 'Bok Kei-Dei ngăl. Thoi noh kon bơngai băt nhên kơ 'Bok Kei-Dei Sư Yang tơm mơsêh mơyang ưh kơ tôch. Mă-lei kon bơngai bơ̆n oei khan ưh kơ đei 'Bok Kei-Dei 'mơ̆i, kon bơngai bơ̆n hơlĕnh dêh tơpă.

Rom 1:22

Đon bơ̆n tơchĕng kơdih khan bơ̆n hơgei, mă tơpă bơ̆n kơtul dêh.

I Kor 1:19

Đe chih nơ̆r 'Bok Kei-Dei pơma sơ̆ thoi âu: “Lu bơngai hơgei inh gô pơtôch lê̆ tơdrong hơgei sư, ăn kơ lu sư jing ưh kơ hlôh; lu bơngai 'bơ̆r đon, inh gô pơtôch lê̆ tơdrong lu sư 'bơ̆r đon.”

I Kor 1:26

Ơ 'nhŏng oh, iĕm chă lăng lu bơngai mă 'Bok Kei-Dei rơih iŏk đơ̆ng lu khŭl iĕm sơ̆, sư thoi yơ? Lăm lu iĕm kư̆m hui kơ đei hŏk hơgei, hui bơngai pơm tih, hui bơngai đơ̆ng adrĕch yŏng mơng.

I Kor 1:27

Mă-lei 'Bok Kei-Dei rơih iŏk boih lu bơngai ưh kơ hơgei ala teh âu wă pơm kơ lu bơngai hơgei mơlâu; 'Bok Kei-Dei kư̆m rơih iŏk boih lu bơngai tơrăn ala teh âu wă pơm kơ lu bơngai pran kơtang mơlâu;

I Kor 1:28

păng 'Bok Kei-Dei rơih iŏk boih lu bơngai mă pă jing jat pă-tat tơdrong wă pơthuơ lu bơngai pơm tih pơm yŏng.

I Kor 11:32

'Bok Kei-Dei ăn kơ bơ̆n đei tơdrong chhŭr nuih thoi noh wă kơ bơ̆n tơbral kơdih tơdrong yoch, na Sư huay kơ phak bơ̆n hơdai lu bơngai ala teh âu ning-mônh.

I Kor 2:6

Gah lu bơngai lui kơjăp boih inh bơtho mơ̆n kiơ̆ kơ tơdrong hơgei, mă-lei ưh kơ sĭ kiơ̆ kơ tơdrong hơgei ala teh âu, dah kiơ̆ kơ lu 'bok pơgơ̆r ala teh âu ôh, yua kơ lu sư rai wă tôch boih.

I Kor 2:8

Tơdrong 'noh lu bơngai pơgơ̆r ala teh âu lu sư ưh kơ đei bu băt; dah lu sư băt sơ̆ lei lu sư ưh kơ pơ̆ng pơlôch Kră Yang mơsêh tih-tin tơ 'long pơglang ôh.

I Kor 3:18

Iĕm 'nĕ khan akâu iĕm kơdih, khan iĕm hơgei. Dah bu lăm lu iĕm tơchĕng khan sư hơgei tơdrong ala teh âu, bơngai 'noh athei hŭt lê̆ dôm tơdrong sư hơgei noh, na iŏk tơdrong hơgei 'lơ̆ng tơpăt 'Bok Kei-Dei.

I Kor 3:19

Dôm tơdrong hơgei ala teh âu 'Bok Kei-Dei lăng thoi tơdrong kơtul đĕch, kư̆m thoi sơ̆p hla bơar 'Bok Kei-Dei chih khan: “Lu bơngai 'bơ̆r đon, sư wă pơm hơgei gah tơdrong pơm kơnê̆ ră, mă-lei 'Bok Kei-Dei băt hloi.”

I Kor 6:2

Lu bơngai lui gô sek tơdrong lu bơngai ưh kơ lui ning-mônh. Dah iĕm gơh sek tơdrong bơngai ưh kơ lui ning-mônh, lei iĕm kư̆m gơh sek tơdrong buăl iĕm iĕ ioch dang ei mơ̆n.

Ya 4:4

Iĕm pơm thoi noh, thoi lĕ kơ bơngai drŏ-kăn kơđang kơ̆l ako klo sư, na jing 'mêm kơ bơngai mă ayăt kơ klo sư dơ̆ng. Iĕm ưh tam băt ôh hă, dah iĕm 'mêm kơ tơdrong ala teh iĕm dang ayăt kơ 'Bok Kei-Dei? Thoi noh bơngai bu oei 'mêm kơ tơdrong ala teh, bơngai noh ayăt kơ 'Bok Kei-Dei boih.