I Ho 25:1 - Sơ̆p Hlabơar Nơ̆r 'Bok Kei-Dei

¹ Đawit păng lu yŏng pơgơ̆r linh 'măn lê̆ pha mơ'nah lu kon sâu Asap, Hêman păng Jêđuthun wă bơ̆jang, reh brŏ dung, tĭng-nĭng hăm preh chhar wă pơma khan lê̆ adrol. 'Nâu anăn lu bơngai bơ̆jang.

I Ho 25:1 ပူးပေါင်းရင်းမြစ်များ

I Pot 10:12

Pơtao yua 'long kơte pơm jrăng tơm Hnam Kră Yang păng hnam pơtao, păng lu brŏ dung, tĭng-nĭng ăn kơ lu bơngai hơri. Đơ̆ng năr noh truh dang ei ưh kơ đei bu chơ ba 'long kơte lơ dang noh.

II Pot 3:15

Mă-lei dang ei, ba kơ inh minh 'nu bơngai gơh reh brŏ dung bĕ:” Kơplah bơngai ei oei reh brŏ dung na tơdrong mơsêh Kră Yang jur oei hơdai hăm Êlisê.

I Ho 12:28

Kŭm đei Sađok, bơngai drŏ-nglo hơ'lơ̆p nuih pran kơtang păng hăm sư đei 'bar-jĭt 'bar 'nu bơngai pơgơ̆r đơ̆ng hnam 'bă sư.

I Ho 13:8

Pơtao Đawit păng đĭ-đăng bơngai Isơrael đĭ jơhngơ̆m chơt hiôk 'bơ̆t anăp Kră Yang 'Bok Kei-Dei, hơri, reh brŏ, ot brŏ, teh hơgơ̆r iĕ, preh chhar păng hlôm keng hiôk chơt.

I Ho 15:28

Na đĭ-đăng bơngai Isơrael năm tung Hom Pơgơ̆p Kră Yang hăm nơ̆r jreo tơkĕch hiôk chơt, kơtơ̆ng jơwa hlôm keng păng jơwa tơgiĕp preh chhar reh tĭng-nĭng păng brŏ dung.

I Ho 23:2

Sư krao akŭm đĭ lu kră pơgơ̆r bơngai Isơrael, lu 'bok soi păng bơngai Lêwi.

I Ho 25:2

Gah kon drŏ-nglo Asap, đei Sakur, Jôsep, Nêthania păng Asarêla. Kon drŏ-nglo Asap bơ̆jang ala Asap wei-lăng sư pơma khan lê̆ adrol mơ̆ng kiơ̆ kơ pơtao pơgơ̆r.

I Ho 25:3

Gah kon drŏ-nglo Jêđuthun đei Gêđalia, Sêri, Jêsaia, Simêi, Hasabia păng Matithia, lu sư tơdrâu 'nu bơ̆jang ala kơ 'bă lu sư wei-lăng, krao Jêđuthun, yua brŏ dung na pơma khan lê̆ adrol bơyong bơnê păng hơri ư-ang kơ Kră Yang.

I Ho 25:9

Lăm adrĕch adrung Asap hlang lăng mă minh trŏ kơ Jôsep kon drŏ-nglo sư hăm lu 'nhŏng oh sư. Đĭ-đăng mơjĭt-'bar 'nu. Hlang lăng mă 'bar trŏ kơ Gêđalia 'nhŏng oh păng kon drŏ-nglo sư, đĭ-đăng đei mơjĭt-'bar 'nu.

I Ho 6:16

Kon drŏ-nglo Lêwi noh: Gersôm, Kôhat, păng Mêrari.

I Ho 6:33

'Nâu lu bơngai bơ̆jang hơdai hăm kon drŏ-nglo lu sư: Lăm kon sâu Kôhat: Đei Hêman bơngai gơh hơri, kon drŏ-nglo Jôel, Jôel kon drŏ-nglo Samuel,

I Ho 6:39

Asap, 'nhŏng oh Hêman, bơ̆jang gah 'ma kơ sư. Asap kon drŏ-nglo Bêrekia, Bêrekia kon drŏ-nglo Simêa,

I Ho 6:44

Đơ̆ng lu kon sâu Mêrari, 'nhŏng oh lu sư, bơ̆jang gah 'ngiĕo kơ sư noh: Êthan kon drŏ-nglo Kisi, Kisi kon drŏ-nglo Apđi, Apđi kon drŏ-nglo Maluk,

I Ho 9:33

'Nâu lu bơngai hơri, lu yŏng kơdră lăm adrĕch bơngai Lêwi lu sư oei rim anih lăm anih akŭm, yua kơ lu sư bơ̆jang măng păng năr na pơdơh tơdrong jang nai.

II Ho 23:1

Lăm sơnăm mă tơpơh, Jêhôiada iung đei jơhngơ̆m nuih pran, pơgơ̆p hơdai hăm lu yŏng pơgơ̆r minh-hrĕng 'nu linh, noh Asaria kon drŏ-nglo Jêrôham, Ismael kon drŏ-nglo Jêhôhanan, Asaria kon drŏ-nglo Ôbet, Maaseia kon drŏ-nglo Ađaia păng Êlisaphat kon drŏ-nglo Sikri.

II Ho 23:13

Sư 'bôh pơtao dơ̆ng jê̆ jrăng 'bơ̆t trong wă mơ̆t; lu yŏng linh păng lu bơngai hlôm keng dơ̆ng jê̆ pơtao; đĭ-đăng kon pơlei oei lăm char chơt hiôk 'nă hal hlôm keng, kư̆m đei lu bơngai hơri pơtơm pôk pơư reh brŏ, na kơkuh bơnê ư-ang kơ pơtao. Athalia hơloh hek ao sư kơdih na ôr re khan: Blah blơ̆, blơ̆ boih.

II Ho 23:18

Jêhôiada jao kơ lu 'bok soi bơngai Lêwi wei-lăng hnam akŭm Kră Yang, wă pơyơ̆r tơmam soi 'buh kơ Kră Yang, rok thoi lăm sơ̆p hla bơar Khôi Juăt Môis đei chih boih, hơdai hăm hơri ư-ang chơt hiôk kiơ̆ kơ Đawit đei pơkă boih.

II Ho 23:9

Jêhôiada 'bok soi đei asong ăn kơ lu yŏng pơgơ̆r minh-hrĕng 'nu linh chĕp tơju, khêl tih iĕ đơ̆ng Đawit tah lê̆ lăm hnam Kră Yang 'Bok Kei-Dei.

II Ho 29:13

đơ̆ng adrĕch Êlisaphan đei: Simri păng Jêuel, đơ̆ng adrĕch Asap đei: Sachari păng Matania.

II Ho 29:14

Đơ̆ng adrĕch Hêman đei: Jêhiel păng Simei; đơ̆ng adrĕch Jêđuthun đei: Sêmaia păng Usiel.

II Ho 31:2

Hesekia klah asong lu 'bok soi păng lu bơngai Lêwi, kiơ̆ kơ khŭl tơdrong jang lu sư, wă pơyơ̆r tơmam soi 'buh păng tơmam soi pơyơ̆r kơ 'blŏk bơnê, wă kơkuh bơnê păng hơri ư-ang tơ anih lu 'măng jang cham Hnam Kră Yang.

II Ho 34:12

Lu bơngai thơ̆ noh jang đĭ jơhngơ̆m. Lu kai wei-lăng lu thơ̆ noh Jahat, Ôbađia, bơngai Lêwi adrĕch Mêrari; Sachari păng Mêsulam đơ̆ng lăm adrĕch Kôhat. Kŭm đei lu bơngai Lêwi nai hai, lu bơngai gơh reh brŏ hơgei.

II Ho 35:15

Lu bơngai hơri, kon sâu Asap; Hêman păng Jêđuthun, 'bok 'bôh lê̆ adrol pơtao, kư̆m oei dơ̆ng lăm anih lu sư kơdih, kiơ̆ thoi tơdrong juăt Đawit tơtă; lu bơngai gak wei 'măng jang kư̆m ngôi tơ rim 'măng, ưh kơ weh đơ̆ng tơdrong jang sư kơdih, yua kơ 'nhŏng oh lu sư bơngai Lêwi đei hơmet ăn boih tơmam sa kơ lu sư.

II Ho 5:12

Lu bơngai Lêwi hơri, noh Asap, Hêman păng Jêđuthun, lu kon drŏ-nglo sư lu 'nhŏng oh sư hrŭk hơbĕn ao che 'bui se rơmuăn, preh chhar, reh brŏ dung, tĭng-nĭng đĭ-đăng lu sư dơ̆ng gah hơlĕch kơ chơnang soi hơdai hăm minh-hrĕng 'bar-jĭt 'nu 'bok soi hlôm keng.

II Ho 8:14

Kiơ̆ thoi Đawit 'bă sư, tơtă, sư asong tơdrong jang ăn kơ lu 'bok soi kiơ̆ kơ tơdrong jang khŭl lu sư, jao kơ khŭl bơngai Lêwi hat hơri ư-ang păng bơ̆jang tơgŭm lu 'bok soi, jang kiơ̆ tơdrong jang rim năr; tơ rim kơ 'măng jang Sư kư̆m đei ăn kơ khŭl bơngai gak 'măng jang, yua kơ 'nâu nơ̆r Đawit tơtă, bơngai Kră Yang 'Bok Kei-Dei.

Esơra 2:41

Lu bơngai hơri: Adrĕch Asap, minh-hrĕng 'bar-jĭt tơhngam.

Esơra 6:18

Lu 'bok soi păng lu bơngai Lêwi kiơ̆ kơ khŭl lu sư klah asong wă bơ̆jang kơ Kră Yang 'Bok Kei-Dei tơ Pơlei Jêrusalem, kiơ̆ thoi lăm sơ̆p hla bơar Môis đei chih.

Ne 11:17

gah Matiana, kon drŏ-nglo Mika, sâu tơm Sapđi, sâu Asap, pơgơ̆r gah tơdrong jang hơri ư-ang lăm kơplah krao khan, hăm Bakbukia, bơngai mă 'bar lăm lu 'nhŏng oh sư păng Apđa kon drŏ-nglo Sumua, sâu tơm Galal, sâu Jêđuthun.

Ne 12:24

Lu kră kơdră lăm bơngai Lêwi: Đei Hasabia, Serêbia păng Jêsua kon drŏ-nglo Katmiel, hơdai hăm 'nhŏng oh lu sư dơ̆ng tơklă băl pơrĕng kiơ̆ khŭl, wă kơkuh bơnê pơm kiơ̆ thoi nơ̆r Đawit bơngai Kră Yang 'Bok Kei-Dei.

Ne 12:27

Kơplah năr pơyơ̆r dur pơlei Jêrasalem keh đang bơih, na đe năm chă lu bơngai Lêwi đơ̆ng jơ̆p kơ anih lu sư oei wă chông ba lu sư brŏk tơ Jêrusalem wă pơih et sa bơnê kơ dur pơm keh hăm tơdrong hiôk chơt, đei nơ̆r bơnê ư-ang păng hơri, reh brŏ, hlôm keng.

Horiso 81:2

Pơre bĕ tơ'nguơ̆ hơri păng teh hơgơ̆r iĕ, reh bĕ brŏ dung tơmơ̆t păng tĭng-nĭng.

Horiso 81:3

Hlôm bĕ tơgiĕp kơplah khei tơ'bang kơplah khei pơnil, tơbăt kơ lu năr giĕng tih lu bơ̆n.

Êsêkiên 40:44

Tơ cham lăm đei 'bar anih, minh gah cheng kơ 'măng jang yă-nơ̆m, tơklă tơ gah gơal păng đei minh anih dơ̆ng gah 'măng jang hơlĕch, tơklă tơ gah yă-nơ̆m.

I Sam 10:5

Đơ̆ng noh ih gô truh tơ Gibêah Elohima, jơ̆ minh pơm anih kơđông đe Philistin; kơplah ih mơ̆t bơih tơ pơlei, ih gô tơ'bơ̆p minh khŭl 'bok khan lê̆ adrol jur đơ̆ng anih kơkuh, lu sư suang reh brŏ dung teh hơgơ̆r iĕ, hlôm 'lal păng reh tĭng-nĭng năm adrol kơ ih; Lu sư gô khan lê̆ adrol.