II Pot 21:16 - Sơ̆p Hlabơar Nơ̆r 'Bok Kei-Dei

¹⁶ Hloh kơ noh dơ̆ng, Manase kư̆m pơlôch lơ bơngai ưh kơ đei yoch dĭng mah pham 'bĕnh-'bang kơ pơlei Jêrusalem, đơ̆ng pah âu truh tơ pah to, 'nguaih kơ tơdrong pơm kơ lu bơngai Juđa pơm yoch păng pơm kơnê̆ 'bơ̆t anăp Kră Yang hai dơ̆ng.

II Pot 21:16 ပူးပေါင်းရင်းမြစ်များ

II Pot 21:11

“Manase, pơtao đe Juđa hlôi pơm tơdrong yoch kơnê̆ krưp 'nâu păng pơm tơdrong kơnê̆ hloh kơ đĭ-đăng lu bơngai Amôrit hlôi pơm adrol kơ sư păng sư pơm kơ lu bơngai Isơrael pơm yoch kơkuh kơ lu rup yang đêl sư pơm.

II Pot 21:15

Yua kơ lu sư pơm bơih tơdrong kơnê̆ 'bơ̆t anăp Inh, tơblĕk inh đơ̆ng năr yă 'bok lu sư lĕch đơ̆ng dêh Êyiptơ truh tơ dang ei.”

II Pot 21:2

Sư pơm kơnê̆ 'bơ̆t anăp Kră Yang, păng kơkuh tơdrong 'mê̆-'mach kiơ̆ thoi lu adrĕch adrung mă Kră Yang hlôi puh tơweh lê̆ đơ̆ng lu bơngai Isơrael.

II Pot 21:7

Sư dan rup Asêra mă sư đei pơm lăm hnam akŭm mă Kră Yang đei khan bơih kơ Đawit păng Sôlômôn, kon drŏ-nglo sư, noh: “Lăm hnam akŭm 'nâu păng lăm Pơlei Jêrusalem; pơlei mă Inh hlôi rơih lăm lu khŭl Isơrael Inh gô ăn anăn Inh oei lăm noh, ling-lang khŏm khŏm.

II Pot 3:3

Mă khan lei ră, sư kư̆m hưch hanh kiơ̆ tơdrong yoch Jêrôbôam, kon drŏ-nglo Nêbat, noh jơ̆ yoch mă hlôi pơm ăn kơ lu bơngai Isơrael pơm yoch. Sư ưh kơ chu achăng lê̆.

II Ho 33:9

Mă-lei Manase pơhlŭ bơngai Juđa păng kon pơlei Jêrusalem dĭng mah lu sư pơm yoch kơnê̆ hloh kơ lu bơngai adrĕch mă Kră Yang pơrăm pơlôch đĭ 'bơ̆t anăp lu bơngai Isơrael.

Le 32:21

Môis khan kơ Arôn: Kon pơlei đei pơm kiơ kơ ih na dĭng ih mah pơm ăn kơ kon pơlei pơla pơm yoch tih krưp thoi noh.

Tơdrông Pơđơk 6:16

Đei tơdrâu tơdrong mă Kră Yang areh, Tơpơh tơdrong Kră Yang lăng krưp dêh.

Tơdrông Pơđơk 6:17

Măt lăng pơang, Hơpiĕt hơlĕnh pơdăr; Ti 'bet pơlôch bơngai ưh kơ đei yoch;

Je 15:4

Inh gô pơm ăn kơ lu sư jing bơngai đĭ-đăng kơ dêh char lăm teh âu lăng krưp, yua kơ tơdrong yoch Manase, kon drŏ-nglo Hesekia pơtao đe Juđa, đei pơm yoch boih tơ lăm pơlei Jêrusalem.

Je 19:4

Yua kơ lu sư achăng lê̆ Inh boih, pơm ăn kơ anih 'nâu jing 'mê̆-'mach, hăm tơdrong lu sư soh nhang pơyơ̆r tơmam soi 'buh kơ lu yang nai, mă lu sư, đe yă 'bok lu sư, lu pơtao đe Juđa tam lah băt, pơm kơ anih 'nâu 'bĕnh kơ pham lu bơngai ưh kơ yoch.

Je 2:34

Tơ tơdrơi ao lu iĕm đei 'bôh boih pham lu bơngai dơnuh hin ưh kơ yoch, Mă iĕm ưh kơ đei rôp lu sư teh 'măng wă mơ̆t tơtông, Mă khan đei hĭ tơdrong noh bưh.

Je 32:31

“Iŏk đơ̆ng năr đe pơdơ̆ng sư sơ̆ khơ̆ dang ei pơlei tih âu tơblĕk wă kơ Inh hil, dĭng Inh mah pơrăm lê̆ sư đơ̆ng anăp Inh.

Je 7:6

Tơdah iĕm huay kơ pơjuă pơđep lu bơngai tơmoi, lu bơngai mơti, lu drŏ-kăn adro păng huay kơ pơlôch tuh pham lăm anih âu păng kư̆m huay kơ kiơ̆ kơkuh kơ yang nai wă pơrăm kơ iĕm kơdih,

Êsêkiên 22:2

“Ơ kon bơngai, hăm trŏ ih wă sek tơlang, sek tơlang pơlei pơlôch tuh pham noh ưh? Athei ăn kơ lu sư băt tôm yoch kơnê̆ krưp sư.

Êsêkiên 22:4

Ih pơm yoch boih tuh pham pơlôch đe păng pơm lu rup yang pơ'mê̆ kơdih akâu. Thoi noh năr ih wă truh boih păng sơnăm ih jê̆ tôch boih. Lei na Inh pơm kơ ih mơlâu kơ lu kon pơlei đe che bơle tơ jơ̆p dêh char.

Êsêkiên 23:45

Mă-lei dôm lu bơngai tơpăt gô sek tơlang tơdrong lu sư pơm pơyô kư̆ kă păng tuh pham pơlôch đe, tơpă lu sư pơm pơyô kư̆ kă păng tuh pham pơlôch đe.”

Êsêkiên 9:9

Kră Yang tơl inh: “Tơdrong yoch lăm adrĕch Isơrael păng Juđa tih dêh tơpă; teh 'bĕnh kơ pham pơlôch băl, lăm pơlei 'bĕnh kơ tơdrong kơnê̆ pơrăm băl. Lu sư khan: ‘Kră Yang achăng lê̆ boih teh âu, Kră Yang ưh kơ 'bôh.’

Jo 35:33

Lu iĕm 'nĕ kơ pơm kơnê̆ 'mê̆-'mach kơ teh iĕm wă oei; yua kơ đơ̆ng pham pơm mơgrĭ kơ teh đak; ưh kơ đei kiơ mă gơh pơm kơ teh rơgoh dơ̆ng dah đei bơngai tuh pham pơlôch đe, lăp minh tơdrong đĕch pơm mơgrĭ kơ teh, mưh ưh kơ pơlôch plơ̆ sư tuh pham lei ưh kơ gơh huai iŏk teh noh ôh.

Mathiơ 27:6

Lu 'bok soi dônh jên noh păng khan: “Jên âu jên pơda, dah kiơ̆ kơ tơdrong juăt bơ̆n đơ̆ng sơ̆ ưh kơ gơh pơyơ̆r kơ 'Bok Kei-Dei ôh.”

Luka 13:34

“Ơ lu bơngai Pơlei Jêrusalem, iĕm pơlôch kơ kiơ lu bơngai 'Bok Kei-Dei wơh pơtruh nơ̆r Sư kơ iĕm, iĕm iŏk tơmo klơ̆m pơlôch lu sư? Inh lung iĕm năm akŭm tơ Inh lơ wơ̆t boih ră, dang iĕr krao kon sư wă krôp ră, mă-lei iĕm kuă kơ năm.

Hêbrơ 11:37

Lu mơ'nah đe klơ̆m sư păng tơmo, mơ'nah đe ot kơtĕch akâu sư păng juơ, mơ'nah đe koh pơlôch păng đao. Lu mơ'nah jơ̆l kơ dơnuh hin chă hrŭk hrăi ao pơm păng akar triu, akar bơbe. Lu sư dơnuh tơpă mă-lei đe oei areh kơ lu sư, pơm kơnê̆ kơ lu sư 'mơ̆i.