II Pet 3:10 - Sơ̆p Hlabơar Nơ̆r 'Bok Kei-Dei

¹⁰ Gah tơdrong Kră Yang Yêsu Krist wă jur, Sư wă jur tơpă, mă Sư wă jur thoi bơngai tơtông ưh kơ ăn đe băt. Kơplah noh kơnh plĕnh gô đôh hiong đĭ minh 'măng, re jơwa dêh, pă băt dang yơ. Ŭnh gô sa kơngla kơdơ̆r jơ̆p teh, teh jing hiong pă 'bôh kiơ. Lu sơnglŏng, khei păng đĭ dôm tơmam ala teh kư̆m lek hiong lei-lăi.

II Pet 3:10 ပူးပေါင်းရင်းမြစ်များ

Horiso 102:26

Lu plĕnh teh gô hiong răm mă-lei Ih oei oei ling-lang; Plĕnh teh gô so thoi ao tai; Ih gô tơplih plĕnh teh thoi tơplih ao păng lu sư jing hŭt lê̆.

Horiso 46:6

Kon pơlei rŭng răng, dêh char noh pơpơ̆ ying-yông. Kră Yang 'Bok Kei-Deic sơkat, teh gô lek đĭ.

Horiso 97:5

Lu kông lek hach thoi jrĕnh 'bơ̆t anăp Kră Yang, 'bơ̆t anăp Kră Yang kơ đĭ-đăng teh đak.

Êsai 2:12

Đei minh năr Kră Yang Tih Hloh pơkă bơih, đei minh năr Sư gô pơm kơ bơngai pơang, păng lu bơngai pơrŏ akâu sư kơdih, đĭ-đăng lu sư Kră Yang gô tơhuŏng lê̆.

Êsai 24:19

Plei teh pơchah hĕch hoch đĭ, teh đĭ hơđang phơ̆t, teh đĭ pơpơ̆ dêh.

Êsai 34:4

Đĭ-đăng lu măt khei sơnglŏng kơpal plĕnh gô hach lek, plĕnh gô tơlôm nhen đe lôm sơnôm hla bơar. Đĭ-đăng lu măt khei sơnglŏng sư gô hiong đĭ, nhen thoi hla hơmu hơlŭng, nhen thoi plei hơra hơlŭng huŏng đơ̆ng tơm sư.

Êsai 51:6

Ngơk lăng bĕ tơ kơpal plĕnh păng kŭp lăng bĕ tơ ala teh; lu plĕnh đông hiong thoi 'nhui ŭnh, teh gô so hiah nhen thoi ao, lu kon pơlei oei arih kơpal teh gô lôch thoi roi, mă-lei tơdrong dŏng pơklaih Inh oei ling-lang. Tơdrong 'lơ̆ng tơpăt Inh ưh kơ đei layơ hiong tôch ôh.

Jôel 1:15

Răm-'băm tơpă yua kơ năr noh! Năr Kră Yang wă phak wă jê̆ boih! Năr noh truh hăm tơdrong pơrăm đơ̆ng Kră Yang Mơsêh Mơyang.

Jôel 2:1

Hlôm bĕ keng tơ lăm pơlei Siôn, hlôm tơgiĕp krao bĕ wă kơ đe kơchăng tơ kông rơgoh Inh! Đĭ-đăng kon pơlei hli tơtơ̆ bĕ, yua kơ wă jê̆ truh năr Kră Yang wă phak. Tơpă năr Kră Yang wă jê̆ truh.

Jôel 2:31

Măt 'năr gô măng mu, măt khei gô jing thoi pham, adrol kơ năr krưp tih Kră Yang truh.

Jôel 3:14

Khŭl tơpôl lơlang, khŭl tơpôl lơlap, tơ lăm thŭng tơdrong sek tơlang, yua kơ năr Kră Yang jê̆ truh bơih tơ lăm thŭng tơdrong sek tơlang.

Am 9:13

Kră Yang khan: Năr gô truh tơ anăp kơnh lu bơngai choh rơmo gô tam lu bơngai lu bơngai yuă, lu bơngai pơjuă plei hơmu gô kiơ̆ tam lu bơngai rei adrĕch. Lu kông gô lĕch sik hơmu 'ngam păng sik hơmu gô ro đơ̆ng jơ̆p-jang lu groi kông.

Am 9:5

Yua kơ Kră Yang Tih Hloh, sư pel 'bơm teh, teh lek đĭ, đĭ-đăng kon pơlei oei lăm noh gô nhơ̆m hmoi jơ̆p kơ teh đak tŏk blai thoi đak krong Nil păng sư gô hrơ̆ thoi đak krong dêh Êyiptơ.

Mi 1:4

Lu kông gô lek hach ala jơ̆ng Sư, lu thŭng thong gô hơđang lek thoi jrĕnh dan jê̆ ŭnh, thoi đak ro jruh kơ kông krang.

Na 1:5

Lu kông pơpơ̆ 'bơ̆t anăp Sư, lu groi gô hach hiong; teh đak păng lu kon bơngai oei kơpal teh đak, đĭ-đăng kon bơngai jơ̆p kơ teh đak rŭng răng.

Malachi 4:5

'Nâu Inh gô wơh 'bok khan lê̆ adrol anăn sư Êli gô truh tơ lu iĕm adrol kơ năr tih krưp wă truh trŏ kơ năr hli tơpă đơ̆ng Kră Yang.

Mathiơ 24:35

Plĕnh teh gô hiong tôch đĭ, mă-lei dôm tơdrong Inh pơma ưh kơ đei layơ hiong tôch ôh, gô 'bôh tơpă.

Markôs 13:31

Plĕnh teh gô hiong đĭ, mă-lei dôm tơdrong Inh pơma ưh kơ đei layơ hiong tôch ôh, gô 'bôh tơpă.

Luka 12:39

Iĕm athei kơchăng hli kơ thoi bơngai âu: Bơngai âu sư ưh kơ kơchăng kơ đe wă tơtông tơmam sư. Lăp đe tơtông tơmam sư boih na sư khan: ‘Ô, ăn dah băt kơ đe wă tơtông tơmam inh măng hei, lei inh kral kơchăng kuă ăn lu sư bŏk tơnăr hnam inh ôh.’

Rom 8:20

Sơ̆ 'Bok Kei-Dei lăng dôm tơmam Sư pơjing, Sư lăp đon dêh. Mă-lei dang ei Sư ăn kơ dôm lu tơmam Sư pơjing noh pơmat-tat yua kơ kon bơngai pơm yoch, ưh kơ sĭ yua kơ tơmam noh pơm yoch ôh. Dang ei Sư oei ăn kơ lu tơmam Sư pơjing noh pơmat-tat, ning-mônh Sư ăn hiôk 'lơ̆ng tơpă.

I Kor 1:8

Sư ăn kơ iĕm oei lui kơjăp truh năr tôch, wă kơ iĕm oei 'lơ̆ng tơpăt huay kơ đei tơdrong yoch kiơ kơplah năr Kră Yang Yêsu Krist jur.

I Kor 5:5

Na bơ̆n athei pơjao kơ yang Satan ăn tơdrong gleh kơ bơngai mă pơm yoch noh, wă kơ bơngai noh tơbral kơdih tơdrong yoch wă kơ 'Bok Kei-Dei iŏk sư kơplah năr Yêsu jur ning-mônh.

II Kor 1:14

Dang ei iĕm tam mă băt nhên nhôn bơngai thoi yơ, layơ kơnh iĕm kư̆m hlôh mơ̆n. Thoi noh na mưh Kră Yang Yêsu Krist jur, iĕm hiôk yua kơ nhôn pơm 'lơ̆ng; nhôn kư̆m hiôk yua kơ iĕm lui đơ̆ng nhôn bơtho.

I Tes 5:2

Mă iĕm kư̆m băt nhên mơ̆n tơdrong ưh kơ đei bu băt Kră Yang Yêsu wă jur layơ, kư̆m thoi bơ̆n ưh kơ băt kơ bơngai wă tơtông klĕ sư wă truh măng ayơ.

I Tes 5:4

Mă-lei iĕm lui boih kơ Kră Yang, iĕm huay kơ hli lăm năr noh kơnh ôh, yua kơ iĕm huay pă oei lăm măng mu boih.

II Pet 3:11

Bơ̆n băt boih đĭ dôm tơmam gô hiong răm thoi noh tơpă, na mă dôm tơdrong kiơ bơ̆n athei adrin pơm đon 'lơ̆ng tơpăt 'biơ̆

II Pet 3:12

kơplah bơ̆n oei chang gô Sư wă pơrăm jơ̆p teh đak ei. Bơ̆n athei kiơ̆ tơdrong Sư mă tơpă, na tơdrong ei dah truh. Năr ei boih, năr 'Bok Kei-Dei wă pơrăm tih ăn ŭnh sa kơngla kơdơ̆r, plĕnh gô lek hiong đĭ, lu sơnglŏng, khei kư̆m hiong hiach pă 'bôh kiơ.

II Pet 3:7

Mă dang ei Sư kư̆m pơkă khan wă pơrăm plĕnh pơrăm teh đak wă soh păng ŭnh. Truh năr Sư sek tơlang ning-mônh Sư pơrăm tơpă mơ̆n păng phak dôm lu bơngai mă ưh kơ lui kơ Sư lăm noh.

Ju 1:6

Gah linh jang lu mơ'nah achăng lê̆ tơdrong jang đơ̆ng 'Bok Kei-Dei pơjao ăn pơgơ̆r, na jăk oei tơ nai, 'Bok Kei-Dei 'bôh, Sư rôp chô̆ phak tơ anih măng mu ling-lang truh tơ năr Sư wă sek tơlang tih-tin ning-mônh.

Tơdrông Tơ'bôh 16:15

Inh 'bôh thoi noh boih na inh kơtơ̆ng Kră Yang Yêsu Krist khan: “Inh wă jur kơplah kon bơngai ưh kơ lêng ê thoi bơngai wă năm tơtông. Hiôk dêh bu mă oei kral kơchăng păng đei hơbĕn ao hrŭk wă kơ đe huay kơ 'bôh sư hang-hông.”

Tơdrông Tơ'bôh 20:11

Inh kư̆m 'bôh minh pôm tang-dŏ tih krưp kok 'lơ̆ng păng 'bôh minh 'nu 'Bok oei kơpal tang-dŏ noh. Kơplah noh plĕnh păng teh hiong hiach đĭ, dang sư hli tơrơ kơ 'Bok noh jing ưh pă đei plĕnh păng teh tơ yơ.

Tơdrông Tơ'bôh 21:1

Đơ̆ng noh inh đei 'bôh plĕnh păng teh 'nao, yua kơ plĕnh păng teh adrol sơ̆ tôch boih. Mă đak dơsĭ kư̆m pă đei boih.

Tơdrông Tơ'bôh 3:3

Thoi noh na iĕm athei 'blŏk hơdơ̆r kơ dôm tơdrong iĕm kơtơ̆ng đe bơtho iĕm sơ̆ thoi yơ, iĕm athei pơm kiơ̆ thoi noh păng tơbral kơdih dôm tơdrong yoch mă iĕm juăt kơ pơm. Dah iĕm ưh kơ adrin pơjăng 'biơ̆, lei Inh gô năm tơ iĕm thoi bơngai tơtông kơmăng, pơm kơ iĕm đei tơdrong gleh truh kơplah iĕm ưh kơ lêng ê.

Tơdrông Tơ'bôh 6:14

Klaih kơ noh inh 'bôh plĕnh tơlôm jing ưh pă 'bôh plĕnh dơ̆ng; lu thŭng thong, kông groi, bŏl đak tih iĕ kư̆m jing ưh pă 'bôh băt tơ yơ.