II Pet 2:2 - Sơ̆p Hlabơar Nơ̆r 'Bok Kei-Dei

² Mă-lei kư̆m đei lơ bơngai lui, kiơ̆ sư pơm tơdrong yoch kư̆ kă; kơlih kơ thoi noh na lu bơngai mă ưh kơ lui pơjăm tơdrong 'lơ̆ng tơpăt 'Bok Kei-Dei.

II Pet 2:2 ပူးပေါင်းရင်းမြစ်များ

Bl 19:5

Lu sư krao Lot na apinh: “Bre tơmoi mă kơsơ̆ 'nâu hei mơ̆t tơ hnam ih dang ei bre sư tơ yơ? Tơlĕch bre sư tơ âu, wă kơ lu nhôn ngôi hăm bre sư.”

Horiso 18:21

Yua kơ inh wei răk kiơ̆ trong Kră Yang, Ưh kơ đei pơm kơnê̆ achăng lê̆ Kră Yang 'Bok Kei-Dei inh.

Êsai 35:8

Tơ noh gô đei minh pôm trong glung tih. Minh pôm trong đe krao trong 'Lơ̆ng Rơgoh. Bơngai 'mê̆-'mach ưh kơ gơh năm trong noh. Mă-lei 'măn lu bơngai kiơ̆ Kră Yang năm trong noh. Mă khan đơ̆ng kơ hlôh kơwao kư̆m huay kơ jrok.

Je 6:16

Kră Yang khan: “Dơ̆ng bĕ tơ rok trong na răp lăng; Chă jet trong so, trong ayơ 'lơ̆ng yak kiơ̆ bĕ trong noh, Na chă ăn kơ bơhngol lu iĕm pơdơh hiôk.” Mă-lei lu sư khan: “Lu nhôn ưh kơ yak kiơ̆ ôh trong noh.”

Mathiơ 22:16

Lu sư wơh buăl lu sư năm hơdai khŭl pơtao Hêrôt năm jet Yêsu thoi âu: “Ơ 'Bok Thây, nhôn băt kơ Ih bơngai tơpăt, Ih ưh kơ hli kơ bu ôh. Ih lăng lu bơngai pơm tih, lu bơngai iĕ lei-lăi ngăl păng bơtho tơdrong 'Bok Kei-Dei tơpăt ling-lang.

Mathiơ 24:24

yua kơ năr noh kơnh đei lơ bơngai pơm Krist, đei lơ bơngai khan sư bơngai pơtruh nơ̆r 'Bok Kei-Dei. Lu sư kư̆m gơh pơm tơdrong mơsêh wă kơ lu bơngai mă 'Bok Kei-Dei rơih boih lui kơ lu sư pơhlŭ.

Mathiơ 7:14

Trong 'măng mơ̆t tơ anih arih ling-lang iĕ păng anat kơ yak tơpă, na hui bơngai 'bôh 'măng iĕ noh.

Markôs 12:14

Lu sư roi kơ Yêsu: “Ơ 'Bok Thây, nhôn băt kơ Ih bơngai tơpăt, Ih ưh kơ hli kơ bu ôh. Ih lăng lu bơngai pơm tih, lu bơngai iĕ lei-lăi ngăl păng bơtho tơdrong 'Bok Kei-Dei tơpăt ling-lang. Na nhôn apinh Ih khan kơ nhôn, kiơ̆ kơ tơdrong juăt bơ̆n bơngai Juđê, bơ̆n hăm gơh ăn jên thuê̆ kơ Sêsar pơtao đe Rôm dah ưh?”

Markôs 13:22

yua kơ năr noh kơnh đei lơ bơngai pơm Krist, đei lơ bơngai khan sư bơngai pơtruh nơ̆r 'Bok Kei-Dei. Lu sư kư̆m gơh pơm tơdrong mơsêh wă kơ lu bơngai mă 'Bok Kei-Dei rơih boih lui kơ lu sư pơhlŭ ră.

Yo 14:6

Yêsu khan: “Inh boih trong iĕm năm tŏk tơ 'Bă Inh, hăm Inh boih tơhlôh ăn kơ iĕm tôm tơdrong Sư păng Inh gơh ăn kơ kon bơngai arih. Bơngai bu ưh kơ năm trong Inh, bơngai 'noh ưh kơ truh tơ 'Bă Inh ôh.

Jang 14:2

Lu bơngai Juđê mơ'nah ưh kơ wă lui kơ Yêsu. Sư pơhlŭ lu bơngai nai mă ưh kơ khŭl sư wă kơ sư areh kơ lu bơngai lui kơ Yêsu.

Jang 16:17

Adruh ei năm kiơ̆ nhôn đe Pôl, sư pơma 'bơ̆r re khan: “Lu bơngai âu jang tơdrong 'Bok Kei-Dei Kră Yang tih hloh. Lu sư bơtho ăn kơ iĕm tơdrong 'Bok Kei-Dei wă pơklaih iĕm đơ̆ng tơdrong yoch.”

Jang 18:26

Apôlê năm tơ Pơlei Êphêsô bơtho tơ hnam akŭm bơngai Juđê. Sư bơtho kư̆m nuih tơpă mơ̆n. Lăp Prisil păng Akila mơ̆ng sư bơtho bre sư anhăk ba sư truh tơ hnam bre sư. Bre sư bơtho ăn kơ Apôlê tơdrong 'Bok Kei-Dei wă kơ sư hlôh băt tôm 'biơ̆.

Jang 19:9

Mă-lei lu mơ'nah ưh kơ chu lui. Na lu sư pơma kơnê̆ gah tơdrong Kră Yang Yêsu 'bơ̆t anăp lu bơngai akŭm. Na Pôl đơ̆ng lu sư năm akŭm tơ nai. Lu bơngai lui kư̆m akŭm kiơ̆ Pôl mơ̆n. Na rim năr sư bơtho păng pơjah tơ hnam trưng Tiranơ.

Jang 22:4

Sơ̆ inh areh kơ lu bơngai lui kơ Yêsu, truh tơ inh rôp pơlôch lu sư. Inh rôp lu bơngai kiơ̆ Yêsu mă drŏ-nglo mă drŏ-kăn, tah hloi lu sư tơ hnam phak.

Jang 24:14

Mă-lei pôm lu tơdrong âu inh pơm tơpă: Đơ̆ng sơ̆ lu 'bok kơdră nhôn lui kơkuh kơ 'Bok Kei-Dei. Inh kư̆m lui kơ 'Bok Kei-Dei mơ̆n kiơ̆ kơ Tơdrong 'Nao 'Lơ̆ng Sư. Lu bơngai Juđê khan tơdrong 'noh ưh kơ trŏ kơ tơpă ôh. Mă-lei inh lui kơ đĭ-đăng dôm tơdrong chih lăm sơ̆p hla bơar tơdrong juăt Môis hăm lu bơngai pơtruh nơ̆r 'Bok Kei-Dei sơ̆.

Rom 2:24

Tơdrong noh 'blep thoi sơ̆p hla bơar 'Bok Kei-Dei sơ̆ khan thoi âu: “Lu bơngai tơmoi nai pơjăm 'Bok Kei-Dei yua kơ lu bơngai Juđê ưh kơ kiơ̆ tơdrong juăt 'Bok Kei-Dei pơkă.”

I Tim 5:14

Yua kơ thoi noh na inh wă kơ bơngai drŏ-kăn adro oei moh iŏk klo na sư tơpŭ kon wei-lăng hnam dơnŏ sư kơdih wă kơ đe mă ưh kơ lui huay pă che bơle kơ bơ̆n dơ̆ng.

Tit 2:5

Lu sư bơtho lu drŏ-kăn oei moh 'nĕ pơm đon kư̆ kă athei tơchĕng đon 'lơ̆ng tơpăt ling-lang păng athei tơchĕng tơdrong bơ̆jang lăm hnam dơnŏ sư kơdih. Jơhngơ̆m sư athei 'lơ̆ng păng klo sư, lui yom kơ klo sư păng pơm jơhngơ̆m 'lơ̆ng hăm lu bôl buăl mơ̆n. Sư athei răk đon thoi âu mă tơpă na lu bơngai ưh tam mă lui, sư huay kơ bâu roi tơdrong 'Bok Kei-Dei.

Tit 2:8

Dah ih bơtho trŏ đe ưh kơ gơh bâu roi ih ôh. Thoi noh na lu bơngai mă ayăt kơ bơ̆n, sư wă bâu roi pơjăm bơ̆n ră mă sư ưh kơ pơ̆n kơlih kơ bơ̆n tơpăt. Dah sư bâu roi bơ̆n mă bơ̆n ưh kơ đei pơm tơdrong yoch kiơ, noh sư mơlâu kơ đe hơ'măng.

I Pet 2:12

Bơ̆n athei oei sa pơm mă 'lơ̆ng 'bơ̆t anăp lu bơngai ưh kơ lui, na lu bơngai mă jô̆ kơ bơ̆n khan bơngai kơnê̆ sư kơnăl kơ bơ̆n bơngai 'lơ̆ng, noh na sư gô ư-ang kơ 'Bok Kei-Dei kơplah năr 'Bok Kei-Dei tơbăt kơ đon sư.

II Pet 2:12

Lu bơngai noh, lu sư thoi sem brem mă ưh kơ gơh tơchĕng, sư hơ̆r kơ wă pơm kiơ sư pơm hloi. Mĕ 'bă sem brem noh pơjing sư sơ̆ lăp pơjing ăn kơ đe rôp 'buh sa đĕch. Lu bơngai mă pơma kơnê̆ kơ đe kư̆m thoi noh, lu sư ưh kơ hlôh na lu sư gô răm thoi sem brem noh tơpă.

II Pet 2:15

Lu sư lê̆ trong tơpăt, jing hơwơ̆l rok kiơ̆ trong 'Balam kon Bêhôr. 'Balam ham kơ jên dêh, na sư pơm tơdrong ưh kơ 'lơ̆ng.

II Pet 2:18

Lu sư nŏng kơ chă pơlung đe, 'bơ̆r lu sư pơma pơrŏ pơlung lu bơngai 'nao lui, 'nao achăng lê̆ buăl sư pơm yoch, jing kiơ̆ thoi lu bơngai pơlung noh, pơm kư̆ kă thoi đêl dơ̆ng.

II Pet 2:21

Dah sư ưh tam kơtơ̆ng đe bơtho tơdrong 'Bok Kei-Dei, noh pha. 'Nâu sư băt boih mă sư achăng lê̆ tơdrong 'lơ̆ng tơpăt 'Bok Kei-Dei.

II Pet 2:7

Pơlei noh 'Bok Kei-Dei pơklaih pôm 'bok Lot, yua kơ 'bok Lot bơngai 'lơ̆ng tơpăt; 'bok Lot 'bôh kon pơlei pơla pơm kơnê̆ kư̆ kă, sư sơ'ngon dêh.

Ju 1:10

Na lu bơngai mă wă pơhlŭ iĕm noh, dôm tơdrong lu sư jơ̆l ưh kơ hlôh na lu sư pơma kơnê̆ thoi noh. Lu sư hưch hanh pơm kư̆ kă thoi sem brem ưh kơ băt mơlâu; tơdrong noh sư hlôh, tơdrong noh lu sư hăt dêh. Kơlih kơ lu sư pơm thoi noh, ning-mônh lu sư wă răm.

Ju 1:15

wă sek tơlang đĭ-đăng bơngai păng phak dôm lu bơngai pơm kơnê̆, yua kơ dôm tơdrong kơnê̆ noh lu sư đêl pơm tơpă. Păng Sư wă phak lu bơngai yoch pơma kơnê̆ kơ Sư.”

Ju 1:4

Lu bơngai mă wă pơhlŭ pơlung iĕm noh, lu sư pơm thoi bơngai lui. Lu sư mơ̆t akŭm hơdai iĕm, pơm chur oei tơ tŏk-bŏk lu iĕm. Lu bơngai thoi noh 'Bok Kei-Dei khan wă phak đơ̆ng sơ̆ 'mơ̆i. Lu sư bơngai kơnê̆ tơpă, lu sư khan kơlih kơ 'Bok Kei-Dei mơnat kơ tơdrong yoch bơ̆n, na bơ̆n pơm yoch kiơ kư̆m bưh, pơm tơdrong kơnê̆ kư̆ kă kư̆m bưh. Yŏng Tơ'ngla bơ̆n Yêsu Krist, mă lu sư kư̆m ưh kơ lui yom mơ̆n.

Ju 1:7

Kư̆m thoi noh mơ̆n lu kon Pơlei Sôđôm hăm Pơlei Gômôrơ hăm đĭ tơring lu sư kiơ̆ ei sơ̆, lu sư pơm kơnê̆ kư̆ kă. Lu bơngai drŏ-nglo pơm kư̆ kă tơduă lu sư drŏ-nglo. Na 'Bok Kei-Dei soh rông chhông hnam lu sư păng phak pơmat lu sư hăm ŭnh ling-lang măng năr pă pơdơh. 'Bok Kei-Dei tơ'bôh kơ bơ̆n tơdrong thoi noh, Sư wă kơ bơ̆n hli kuă kơ pơm thoi lu bơngai 'noh.

Tơdrông Tơ'bôh 12:9

Na đe tơhuŏng sư păng đĭ lu linh sư tơ teh. Prao noh boih 'bih so sơ̆ mă đe anăn yŏng yang sơmăt păng yang Satan. Sư pơhlŭ đe jơ̆p kơ teh đak. Đe blah tơhuŏng sư păng lu linh sư đơ̆ng plĕnh tơ teh.

Tơdrông Tơ'bôh 13:14

Sem ei pơm tơ'bôh kơ đe tơdrong hlĭch kiơ̆ sem mă mônh ăn, thoi noh na sư pơhlŭ lu kon pơlei pơla oei tơ ala teh âu pơm minh pôm rup sem mă mônh, sem mă đei rơka đêl đe 'bet mă oei arih.

Tơdrông Tơ'bôh 13:8

Đĭ-đăng bơngai jơ̆p kơ teh đak gô kơkuh kơ sem ei. Pôm lu bơngai mă Kon Triu 'Bok Kei-Dei chih anăn lu sư tơ hla bơar Sư đĕch, ưh kơ chu kơkuh kơ sem ei. Kon Triu noh boih lôch tang kon bơngai. Na tơdrong Sư chih anăn lu bơngai mă Sư ăn arih, Sư chih adrol kơ 'Bok Kei-Dei pơjing plĕnh teh sơ̆ hloi boih.