II Kor 3:1 - Sơ̆p Hlabơar Nơ̆r 'Bok Kei-Dei

¹ Nhôn pơma thoi noh, nhôn wă kơ iĕm băt kơ nhôn pơm 'bok bơtho iĕm hă? Ưh ôh. Nhôn ưh kơ kăl kơthơ đe chih tơbăt kơ iĕm, kơthơ iĕm chih tơbăt kơ đe khan nhôn 'bok bơtho iĕm ôh. Lu bơngai nai sư wă thoi noh tơpă, mă-lei lu nhôn ưh ôh.

II Kor 3:1 ပူးပေါင်းရင်းမြစ်များ

Jang 18:27

Apôlê kư̆m wă năm tơ dêh char Grĕk mơ̆n. Na lu bơngai lui tơ Pơlei Êphêsô tơgŭm sư chih kơ sư kơthơ wă chĕp ba ăn kơ lu buăl lui tơ dêh char Grĕk, apinh lu bơngai lui ei sơng iŏk sư. Lăp Apôlê truh tơ char Grĕk boih, Apôlê bơtho tơgŭm tơpă kơ lu bơngai 'Bok Kei-Dei mơnat ăn lui kơ Yêsu boih.

Rom 16:1

Âu duch nă bơ̆n yă Phêbê wă năm ngôi hơpong tơ iĕm. Sư bơngai jang lăm hnam 'Bok Kei-Dei tơ Pơlei Sankrê. Sư bơngai 'lơ̆ng, na inh apinh iĕm sơng iŏk sư mă trŏ 'biơ̆ hŏ, yua kơ sư kư̆m hơdai bơngai lui kơ Kră Yang Yêsu Krist thoi bơ̆n. Păng inh wă kơ iĕm tơgŭm sư tôm tơmam sư kăl yua, yua kơ sư bơngai tơgŭm đe dêh sơ̆, truh tơ inh sư kư̆m tơgŭm mơ̆n.

I Kor 10:33

Gah inh ling-lang pơm 'lơ̆ng tơpăt wă kơ đĭ-đăng bơngai lăp đon kơ inh lăm tôm tơdrong. Inh ưh kơ wă tơchĕng tơgŭm gah akâu inh kơdih ôh, inh wă tơgŭm pơyua lu bôl buăl wă kơ lơ bơngai lui kơ Yêsu Krist na klaih đơ̆ng tơdrong yoch.

I Kor 16:3

Lăp inh truh tơ iĕm, na lu bơngai mă iĕm rơih đơ̆ng lăm lu iĕm 'noh, inh wă wơh lu sư năm ăn tơmam đơ̆ng iĕm pơyơ̆r tơgŭm ăn kơ lu bơngai lui tơ Pơlei Jêrusalem. Inh kư̆m wă chih kơthơ mơ̆n wă ăn kơ lu sư chĕp ba kơ lu kră bơngai lui tơ Pơlei Jêrusalem wă kơ lu sư băt.

I Kor 3:10

'Bok Kei-Dei mơnat kơ inh, ăn kơ inh hơgei gơh pơm hnam. Inh man anih hnam 'lơ̆ng boih, na đei bơngai nai pơm hnam 'bơ̆t ei. Mă-lei bơngai bu mă pơm hnam 'bơ̆t ei athei pơm mă 'lơ̆ng.

I Kor 4:15

Mă iĕm đei mơjĭt-rơbâu 'nu thây bơtho iĕm tơdrong Yêsu Krist, mă-lei iĕm ưh kơ đei 'bă nai ôh, yua kơ inh pơm 'bă pơjing iĕm lui kơ Yêsu Krist păng yua kơ inh bơtho iĕm tơdrong 'nao 'lơ̆ng blŭng-a sơ̆.

II Kor 10:12

Lu bơngai noh 'bơ̆r lu sư kơdih đĕch khan trŏ kơ lu sư pơm jơ̆ng 'bang Yêsu Krist. Nhôn ưh kơ pơ̆n pơm thoi noh ôh, nhôn gô mơ̆ng kơ 'Bok Kei-Dei ăn. Lu bơngai noh lu sư ưh kơ hlôh, na lu sư tah akâu kơdih pơm jơ̆ng 'bang Yêsu.

II Kor 10:18

Ưh kơ sĭ Kră Yang lăp đon kơ bơngai mă pơang akâu kơdih ôh, Sư lăp đon kơ bơngai bu mă Sư 'bôh pơm 'lơ̆ng pơm trŏ.

II Kor 10:8

Inh kư̆m dang pơang akâu kơdih, yua kơ tơdrong âu trŏ kơ tơdrong jang inh wă bơtho tơgŭm iĕm, mă-lei inh ưh kơ đei khan wă pơrăm iĕm ôh; păng inh ưh kơ mơlâu yua kơ trŏ tơdrong jang inh thoi noh tơpă.

II Kor 12:11

Kơlih kơ iĕm rai wă hiơt kơ inh bơngai mă pơm jơ̆ng 'bang Yêsu Krist, na inh đei pơma pơang kơ iĕm thoi noh, dang bơngai wơnh, dang bơngai kư̆ kă. Lu bơngai noh chă pơpơm jơ̆ng 'bang Yêsu Krist, lu sư khan lu sư bơngai hơgei dêh mă-lei inh ưh kơ thuơ, mă khan inh bơngai kơtul.

II Kor 12:19

Iĕm tơchĕng nhôn chih đơ̆ng tơm hmơm hei, truh tơ dang ei âu, iĕm tơchĕng nhôn chih athei iĕm pơma sek tơlang tơdrong nhôn hă? Ưh ôh. Tơdrong sek tơlang, bơ̆n gô mơ̆ng kơ 'Bok Kei-Dei sek tơlang đĕch păng gô mơ̆ng kơ Yêsu Krist đĕch tơgŭm nhôn pơma. Ơ 'nhŏng oh mă nhôn 'mêm kơeng, dôm tơdrong nhôn chih bơtho iĕm noh hei ưh kơ sĭ nhôn hil kơ iĕm ôh, nhôn wă kơ iĕm lui kơjăp.

II Kor 2:17

Nhôn ưh kơ sĭ pơm thoi lơ 'nu bơngai bơtho hơlĕnh tơdrong 'Bok Kei-Dei wă kơ gơh iŏk sa tơmam đe ôh. Nhôn bơngai 'Bok Kei-Dei wơh jang tơdrong Sư, na nhôn bơtho tơdrong Sư tơpăt ngăl ling-lang yua kơ Sư băt tôm tơdrong. Na nhôn gơnang kơ Yêsu Krist tơgŭm nhôn bơtho.

II Kor 5:12

Nhôn pơma thoi noh ưh kơ sĭ nhôn wă pơang kơ iĕm ôh, nhôn pơma wă kơ iĕm hiôk 'bôh nhôn pơm trŏ. Thoi noh na mưh đe jô̆ kơ nhôn khan bơngai pơang, iĕm gơh tơl tơwih kơ lu sư, lu sư wih trŏ kơ bơngai pơang dơ̆ng, yua kơ dôm tơdrong lu sư pơma pơang 'bơ̆t anăp đe ngăl, ưh kơ đei tơpăt ôh.