II Ho 5:11 - Sơ̆p Hlabơar Nơ̆r 'Bok Kei-Dei

¹¹ Lu 'bok soi kơdŭn lĕch đơ̆ng anih 'Lơ̆ng rơgoh, đĭ-đăng lu 'bok soi lu sư athei hơmet kơdih rơgoh, mă khan lu sư khŭl ayơ.

II Ho 5:11 ပူးပေါင်းရင်းမြစ်များ

I Ho 15:14

Na lu 'bok soi păng bơngai Lêwi hơmet akâu kơdih 'lơ̆ng rơgoh na tung ba Hom Pơgơ̆p Kră Yang 'Bok Kei-Dei Isơrael.

II Ho 29:15

Lu sư akŭm lu 'nhŏng oh lu sư păng hơmet kơdih akâu rơgoh, na pơm kiơ̆ thoi pơtao đei bơtho khan kiơ̆ kơ nơ̆r Kră Yang hơmet rơgoh hnam Kră Yang.

II Ho 29:34

Mă-lei lu 'bok soi lu sư tŏ sĕt dêh ưh kơ kĕ kơ tam lŏng đĭ akar kon sem tơmam soi 'buh ôh; na đei lu 'nhŏng oh sư bơngai Lêwi hơmet akâu lu sư rơgoh kư̆m wang tơgŭm tơdrong jang noh dĭng truh keh, yua kơ lu bơngai Lêwi đĭ jơhngơ̆m pơyơ̆r akâu lu Sư hloh kơ lu 'bok soi.

II Ho 29:5

Sư khan: “Ơ bơngai Lêwi, mơ̆ng inh bĕ! Hơmet bĕ akâu iĕm kơdih rơgoh păng năm hơmet hnam Kră Yang 'Bok Kei-Dei 'bok lu iĕm mă rơgoh păng hơmet hŭt lê̆ bĕ đĭ dôm tơmam kơnê̆ 'mê̆ brư̆ đơ̆ng hnam 'lơ̆ng rơgoh.

II Ho 30:15

Lăm năr mơjĭt-puăn khei 'bar, đe 'bet triu pơm giĕng Năm Brih; gah lu 'bok soi păng bơngai Lêwi 'bôh mơlâu, na hơmet akâu kơdih rơgoh păng chĕp lu kon sem pơm tơmam soi 'buh tơ Hnam Kră Yang.

II Ho 35:4

Hơmet bĕ lu iĕm kơdih kiơ̆ kơ adrĕch 'bok lu iĕm, kiơ̆ kơ khŭl lu iĕm, kiơ̆ mă Đawit pơtao Isơrael păng Sôlômôn kon drŏ-nglo sư đei chih tơtă boih.

II Ho 35:6

'Bet triu pơm tơmam soi Năm Brih athei hơmet akâu iĕm rơgoh, hơmet 'nhĕm triu ăn kơ lu 'nhŏng oh iĕm wă pơm kiơ̆ trŏ thoi nơ̆r Kră Yang đei yua Môis khan tơbăt.

II Ho 5:12

Lu bơngai Lêwi hơri, noh Asap, Hêman păng Jêđuthun, lu kon drŏ-nglo sư lu 'nhŏng oh sư hrŭk hơbĕn ao che 'bui se rơmuăn, preh chhar, reh brŏ dung, tĭng-nĭng đĭ-đăng lu sư dơ̆ng gah hơlĕch kơ chơnang soi hơdai hăm minh-hrĕng 'bar-jĭt 'nu 'bok soi hlôm keng.

Jop 1:5

Đơ̆ng rŏng kơ dôm năr et sa đang bơih, Jop wơh krao lu kon sư brŏk wă pơm giĕng ôp 'nhao rơgoh. Sư iung đơ̆ng hrôih, wă pơyơ̆r tơmam soi 'buh tôm kơ lu kon sư; sư tơchĕng khan: “Băt lu kon inh pơm yoch păng băt lăm jơhngơ̆m lu sư blei hiap Kră Yang 'Bok Kei-Dei.” Jop juăt kơ pơm thoi noh.

Le 19:10

Kră Yang khan kơ Môis: Ih năm bĕ tơ kon pơlei, Isơrael athei kon pơlei hơmet akâu kơdih mă 'lơ̆ng rơgoh năr 'nâu păng năr dơning, athei lu sư pih ao tai.