Galati 6:13 - Sơ̆p Hlabơar Nơ̆r 'Bok Kei-Dei

¹³ Lu bơngai wă pơgŏ iĕm noh, sư kăt tơdra akar sư kơdih mơ̆n mă-lei sư ưh kơ kiơ̆ tơdrong juăt Môis tơpă ôh. Lu sư wă kơ iĕm kăt tơdra akar iĕm kơdih đĕch păng sư wă pơma pơang kơ đe khan sư bơtho lơ bơngai chu kăt tơdra akar tơpă.

Galati 6:13 ပူးပေါင်းရင်းမြစ်များ

Mathiơ 23:15

“Ơ lu thây bơtho đe Juđê păng lu bơngai kiơ̆ tơdrong Pharisi, ning-mônh iĕm pơmat-tat dêh, yua kơ iĕm bơngai 'bơ̆r đak klak ŭnh. Iĕm kư̆ kơ năm bơtho jơ̆p-jang kơ teh đak, tơ minh 'nu bơngai kư̆m năm bơtho, mă tơdrong bơtho, iĕm ưh kơ bơtho sư pơm 'lơ̆ng ôh, rai pơm kơnê̆ hloh kơ iĕm dơ̆ng.

Mathiơ 23:23

“Ơ lu thây bơtho đe Juđê păng lu bơngai kiơ̆ tơdrong Pharisi, ning-mônh iĕm pơmat-tat dêh, yua kơ iĕm bơngai 'bơ̆r đak klak ŭnh. Iĕm pơm hăt hot tĕch lu tơmam hơi thoi lĕ kơ hla lŭng-hŭng, hla gơsơ̆m, hla ĕch, hla hla-kat, iŏk jên noh pơm pơyơ̆r kơ 'Bok Kei-Dei minh lăm mơjĭt. Mă-lei dôm tơdrong juăt 'Bok Kei-Dei mă kăl hloh thoi lĕ kơ pơm 'lơ̆ng kơ đe, athei 'mêm kơ 'Bok Kei-Dei hăm bôl buăl, tơdrong lui kơ 'Bok Kei-Dei, dôm tơdrong noh iĕm pơhơi ưh kơ wă pơm. Mă tơdrong iĕm pơyơ̆r tơmam hơi noh kư̆m trŏ mơ̆n, mă-lei ưh kơ dang bơ̆n kiơ̆ tơdrong juăt noh hei.

Mathiơ 23:3

Iĕm athei pơm kiơ̆ thoi sư bơtho păng rok dôm tơdrong sư pơkă. Mă-lei iĕm 'nĕ kiơ̆ thoi tơdrong arih lu sư. Tơdrong lu sư bơtho 'lơ̆ng ră, mă-lei lu sư ưh kơ kiơ̆ tơdrong 'lơ̆ng noh ôh.

Luka 5:38

Tơ̆ng bu wă tring sư athei tring mong sik 'nao tơ kơdŭng akar 'nao, yua kơ kơdŭng akar 'nao 'noh kơjăp.

I Kor 3:21

Thoi noh na iĕm 'nĕ pơang tơdrong hơgei kon bơngai ala teh âu, yua kơ 'Bok Kei-Dei ăn kơ iĕm đei tôm tơdrong mah ngăl boih.

I Kor 5:6

Tơdrong iĕm pơang akâu kơdih ưh kơ 'lơ̆ng ôh. Iĕm ưh kơ băt ôh hă, tơdrong yoch thoi lĕ kơ 'buih pông? Bơ̆n pơjrâu kơ bre sư 'bĕng tơpŭng lăp tŏ sĕt đĕch mă-lei sư pông đĭ kơ 'bĕng tơpŭng.

II Kor 11:18

Dang ei đei lơ bơngai pơma pơang akâu kơdih kiơ̆ thoi lu bơngai ưh kơ lui, na inh kư̆m wă pơma rok lu sư 'biơ̆.

Philip 3:3

Lu bơ̆n âu boih kiơ̆ kơ tơdrong 'Bok Kei-Dei pơkă tơpă. Mă-lei bơ̆n ưh kơ kăl kơ tơdrong kăt tơdra akar chă pơpơm kơdih păng ti thoi noh ôh. Bơ̆n kăl kơ Yang Bơhngol 'Lơ̆ng đĕch; bơ̆n athei gơnang kơ Sư wă kơ bơ̆n gơh kiơ̆ 'Bok Kei-Dei trŏ thoi Sư wă. Tơdrong kăt tơdra akar chă pơm kơdih păng ti đĕch na bơ̆n 'nĕ kơ kiơ̆ ôh hli kơ bơ̆n gơnang kơ tơdrong bơ̆n pơm kơdih, bơ̆n athei gơnang kơ Yêsu Krist đĕch.

II Pet 2:19

'Bok bơtho hơlĕnh pơdăr noh, lu sư khan wă ăn kơ lu bơngai noh rơngei, mă-lei tă kơ lu sư dơ̆ng jing đĭch, yua kơ lu sư ưh kơ kĕ gơ̆t kơ tơdrong pơm yoch, jing wă pơrăm akâu kơdih. Tơdrong kiơ bơ̆n ưh kơ kĕ pơgơ̆t, tơdrong noh bơ̆n oei đĭch.