Êsêkiên 13:20 - Sơ̆p Hlabơar Nơ̆r 'Bok Kei-Dei

²⁰ Thoi noh na 'nâu nơ̆r Kră Yang Tih Hloh khan: Inh blah plơ̆ lu bơngai chă tơwir hơlĕnh wă chă lua rôp bơhngol bơngai nhen thoi chă lua rôp sem; Inh gô hek lê̆ che tơwir đơ̆ng ti lu iĕm, păng plôh achăng lê̆ bơhngol mă lu iĕm đei rôp thoi sem.

Êsêkiên 13:20 ပူးပေါင်းရင်းမြစ်များ

Êsêkiên 13:18

Na khan kơ lu sư: ‘'Nâu nơ̆r Kră Yang Tih Hloh khan: Răm-'băm kơ lu drŏ-kăn mă kơ̆t che tơwir rơhưch tơ ti păng pơm khăn che tôm tĕch să iĕ gom tơ kơ̆l đe wă chă rôp bơhngol. Lu iĕm wă chă rôp bơhngol kon pơlei Inh, mă-lei wă rong bơhngol iĕm hiôk hă?

Êsêkiên 13:19

Lu iĕm pơm pơ'mê̆ kơ Inh lăm lu kon pơlei Inh, wă kơ đei minh chup 'ba tơ'bâu păng minh tơpei 'bĕng, pơma hơlĕnh kơ kon pơlei Inh, lu sư mơ̆ng kiơ̆ nơ̆r hơlĕnh lu iĕm, na pơlôch bơngai mă ưh kơ trŏ kơ lôch, păng rong bơngai mă ưh kơ trŏ wă rong arih.

Êsêkiên 13:21

Inh gô iŏk hek lê̆ che gom lu iĕm, na pơklaih kon pơlei Inh đơ̆ng tơpang ti lu iĕm, lu sư ưh pă jing tơmam lăm tơpang ti lu iĕm, chă lua rôp dơ̆ng, na lu iĕm gô băt Inh boih Kră Yang.