Êsai 65:15 - Sơ̆p Hlabơar Nơ̆r 'Bok Kei-Dei

¹⁵ Lu bơngai mă Inh rơih iŏk gô yua anăn iĕm wă hiap pơtê̆ kơ đe. Kră Yang gô pơlôch iĕm; Mă-lei Kră Yang gô iŏk anăn plơ̆ng krao tơplih ăn kơ lu đĭch đam Sư.

Êsai 65:15 ပူးပေါင်းရင်းမြစ်များ

Horiso 102:8

Prăt năr lu bơngai ayăt pơ'brơh kơ inh; Lu bơngai pơrăm inh yua anăn inh blei hiap.

Tơdrông Pơđơk 10:7

Tơdrong 'blŏk kơ lu bơngai tơpăt noh pŭn hiôk, Mă-lei anăn lu bơngai kơnê̆ ôm hach.

Êsai 62:2

Lu teh đak gô 'bôh tơdrong 'lơ̆ng ih. Lu pơtao gô 'bôh tơdrong ư-ang ih. Đe gô krao ih anăn 'nao đơ̆ng 'bơ̆r Kră Yang krao ăn.

Êsai 65:12

Na Inh hơgăt ăn kơ lu iĕm lôch kơ đao gưm, păng đĭ-đăng lu iĕm gô kŭp kơ̆l ăn kơ đe pơlôch; Yua kơ Inh krao bơih lu iĕm ưh kơ tơl; Inh đei khan lu iĕm ưh kơ 'maih mơ̆ng, lu iĕm đei pơm bơih tơdrong kơnê̆ 'bơ̆t anăp Inh, păng rơih iŏk tơdrong Inh ưh kơ lăp đon.”

Êsai 65:22

Lu sư ưh kơ đei man hnam ăn kơ lu bơngai nai oei thoi sơ̆; ưh kơ đei pơtăm hơmu ăn kơ bơngai nai sa thoi sơ̆; sơnăm kon pơlei Inh arih gô nhen thoi dôm sơnăm 'long arih, lu bơngai mă Inh rơih iŏk gô đei yua đơ̆ng tơdrong jang lu sư kơdih.

Êsai 65:9

Inh gô ăn đei kon sâu lĕch đơ̆ng Jakôp, păng minh 'nu đơ̆ng Juđa gơh đei iŏk lu kông Inh; Lu bơngai mă Inh rơih iŏk gô đei dêh char noh, lu đĭch đam Inh gô oei tơ noh.

Êsai 66:15

Lăng to, Kră Yang gô truh hăm ŭnh păng gre aseh Sư nhen thoi kial hơbŭt, wă pơm tơwih tơdrong ơh blĕk Sư hăm tơdrong hil mĭl, păng tơdrong Sư chrih nhen thoi pla ŭnh khơ̆ng.

Je 24:9

Inh gô pơm ăn kơ đĭ-đăng dêh char lăm teh đak lăng 'brơ̆ krưp kơ lu sư. Lăng lu sư đei đe blei hiap, đe pơ'brơh, đe pơjăm pơjuă, tơ jơ̆p lăm dêh char mă Inh đei pơpuh lu sư tơ noh.

Je 25:18

Pơlei tih Jêrusalem păng lu pơlei lăm char Juđa, ăn kơ lu pơtao lu yŏng pơgơ̆r, pơm ăn kơ lu sư răm jing rơ̆m rĕk, đe pơjăm đe blei hiap, đe lăng lu sư 'brơ̆ krưp thoi hrei 'nâu.

Je 26:6

na Inh gô pơm ăn kơ hnam akŭm âu thoi Inh đei pơm boih kơ pơlei Silô, na đĭ-đăng dêh char lăm teh gô hiap pơlei Inh âu.

Je 29:18

Inh gô ăn đao gưm, pơngot rơwĕt păng jĭ hơbuh druh pơrăm lu sư, đe gô puh lê̆ lu sư tơ to tơ âu. Tơ jơ̆p-jang kơ dêh char lăm teh đak âu, lăng krưp, lu sư pŭ hơngiap đe blei hiap, đe che bơle, đe pơjăm pơjuă lu sư tơ rim adrĕch adrung mă Inh đei pơpuh lê̆ lu sư tơ noh.”

Je 29:22

Đĭ-đăng bơngai Juđa pơm bơnă lăm char Babilôn gô iŏk yua anăn 'bar 'nu bơngai 'nâu hiap tơhuăi, thoi âu: “Apinh Kră Yang ăn kơ iĕm kư̆m thoi Sêđekia păng Ahap, mă pơtao Babilôn đei phang lăm ŭnh,’

Je 42:18

'Nâu Kră Yang Tih Hloh, 'Bok Kei-Dei Isơrael khan: “Thoi Inh tuh boih tơdrong Inh hil mĭl tơ lăm lu kon pơlei lăm Jêrusalem thoi yơ, Inh gô tuh tơdrong Inh hil mĭl tơ lu bơngai bu mă năm oei tơ dêh char Êyiptơ kư̆m thoi noh. Đe gô blei hiap, đe lăng 'brơ̆, đe hiĕk achơ̆; lu iĕm ưh pă đei layơ 'bôh anih âu dơ̆ng.

Je 44:12

Inh gô pơrăm lu kon pơlei bơngai Juđa oei oei, mă năm boih tơ char Êyiptơ păng oei tơ noh; lu sư gô lôch đĭ tơ noh lu sư gô lôch kơ đao gưm pơngot rơwĕt tih, lăm dêh Êyiptơ. Lu pơm tih pơm iĕ gô lôch đĭ kơ đao gưm pơngot rơwĕt; pơm kơ đe blei hiap, che bơle hiĕk achơ̆, đe lăng 'brơ̆ krưp.

Êsêkiên 14:8

Inh gô blah plơ̆ bơngai noh, wă pơm kơ sư jing tơdra, minh tơdrong wă kơ đe đei nơ̆r hơmoch. Inh gô pơpuh lê̆ lu sư đơ̆ng kon pơlei Inh. Na lu iĕm gô băt Inh boih Kră Yang.

Sa 8:13

Ơ hnam Juđa păng hnam Isơrael! Gô đei tơdrong thoi đe hiap iĕm lăm teh đak thoi yơ, na Inh gô dŏng pơklaih lu iĕm păng lu iĕm gô đei tơdrong pŭn hiôk thoi noh. Lu iĕm 'nĕ kơ hli mă-lei ti iĕm athei pran kơtang.”

Mathiơ 21:41

Na đe khan: “Sư gô pơlôch đĭ lu bơngai pơm kơnê̆ noh, na ăn kơ bơngai nai jang dơ̆ng, na lu bơngai jang mơng đơ̆ng rŏng noh gô klah asong sư plei hơmu tơpă.”

Mathiơ 22:7

Thoi noh na 'bok pơtao ơh tơpă, sư wơh lu linh sư năm pơlôch đĭ-đăng lu bơngai mă pơlôch lu bơngai jang kơ sư ei păng soh rông chhông hnam kon pơlei pơla lu sư.

Jang 11:26

Lăp sư chă 'bôh boih, sư anhăk ba Sôl tơ Pơlei Antiôs. Kơplah minh sơnăm bre sư bơtho lu bơngai lui tơ Pơlei Antiôs. Bre sư bơtho tơdrong 'Bok Kei-Dei na lơ bơngai năm mơ̆ng. Tơ ei đe anăn lu bơngai lui, bơngai Krist. Đơ̆ng sơ̆ đe ưh kơ anăn thoi noh ôh.

Rom 9:26

Mă tơ yơ yơ đe jô̆ lu sư khan ưh kơ trŏ kơ kon Inh, tơ noh đe gô jô̆ kơ lu sư kon Inh mơ̆n; yua kơ Inh Yang, 'Bă lu sư mă arih ling-lang.”

I Tes 2:16

Lu bơngai Juđê găn nhôn bơtho tơdrong 'Bok Kei-Dei kơ bơngai ưh kơ khŭl lu sư. Mă-lei nhôn oei bơtho mơ̆n. Lu sư ưh kơ wă bơngai khŭl nai thoi iĕm klaih đơ̆ng tơdrong yoch. Lu sư pơm thoi noh lu sư yoch tơpă hloi. Lu sư ling-lang pơm yoch thoi noh. Ning-mônh 'Bok Kei-Dei gô phak lu sư tơpă.

Tơdrông Tơ'bôh 2:17

‘Bơngai bu đei đon, mơ̆ng bĕ dôm tơdrong Yang Bơhngol 'Lơ̆ng pơma kơ rim hnam akŭm 'Bok Kei-Dei. Tơdrong tơblah păng yang kơnê̆ jei bu, Inh gô ăn kơ bơngai noh 'bĕng mana mă kon bơngai tơ ala teh ưh tam đei sa ôh păng Inh gô pôk anăn sư 'nao, anăn 'nao noh Inh chih tơ tơmo kok lat, na ăn kơ sư. Anăn noh lu đe nai ưh kơ băt ôh, pôm sư kơdih đĕch băt.’ ”