Êsai 62:12 - Sơ̆p Hlabơar Nơ̆r 'Bok Kei-Dei

¹² Đe gô krao lu sư Kon Pơlei Rơgoh. Kon pơlei mă Kră Yang huai iŏk; gah ih đe gô krao kơ ih pơlei tih đe chơchă, pơlei mă ưh pă hŭt lê̆ juơ dơ̆ng.

Êsai 62:12 ပူးပေါင်းရင်းမြစ်များ

Horiso 107:2

Ăn kơ lu bơngai mă Kră Yang huai iŏk boih. Lu bơngai mă đei dŏng pơklaih đơ̆ng ti lu bơngai ayăt pơjuă, pơma bĕ thoi âu;

Le 19:6

Gah lu iĕm jing teh đak 'bok soi păng adrĕch adrung kon pơlei 'lơ̆ng rơgoh Inh, noh boih nơ̆r ih gô pơma hăm kon pơlei Isơrael.

Êsai 1:27

Kră Yang gô sek tơlang nhôn hăm tơdrong tơpăt, na huai iŏk lu bơngai lăm pơlei tơbral hăm tơdrong 'lơ̆ng tơpăt Sư.

Êsai 35:8

Tơ noh gô đei minh pôm trong glung tih. Minh pôm trong đe krao trong 'Lơ̆ng Rơgoh. Bơngai 'mê̆-'mach ưh kơ gơh năm trong noh. Mă-lei 'măn lu bơngai kiơ̆ Kră Yang năm trong noh. Mă khan đơ̆ng kơ hlôh kơwao kư̆m huay kơ jrok.

Êsai 35:9

Tơ trong noh ưh kơ đei dăm-brang, ưh kơ đei minh pôm sem bri ayơ mă krưp năm rok trong noh; ưh kơ đei bu 'bôh sư tơ noh. Mă-lei lu bơngai mă huai iŏk bơih gô yak năm trong noh.

Êsai 4:3

Lu bơngai oei arih lăm pơlei Siôn, lu bơngai oei oei arih lăm pơlei Jêrusalem gô krao lu sư bơngai rơgoh wă khan đĭ-đăng lu bơngai đei chih jô̆ oei arih lăm Jêrusalem.

Êsai 41:17

Lu bơngai dơnuh păng lu bơngai kơ'bah tơmam chơchă đak. Mă-lei ưh kơ đei, hơpiĕt đĭ kro yua kơ rơhing dêh, Inh bơih Kră Yang gô tơl nơ̆r lu sư, Inh bơih Kră Yang 'Bok Kei-Dei Isơrael ưh kơ achăng tŭk lu sư ôh.

Êsai 42:16

Inh gô chông lu bơngai măt tol rok trong lu sư ưh kơ biơh năm, dui lu sư rok trong iĕ mă lu sư ưh tam juăt; inh gô tơplih măng mu jing hơdah 'bơ̆t anăp lu sư, Inh gô pơm kơ teh jrŭ đơng jing dơnă. Tơpă inh gô pơm lu tơdrong noh păng ưh kơ achăng tŭk lu sư ôh.

Êsai 51:10

Hăm trŏ kơ Ih Tơ'ngla mă pơm kơ đak dơsĭ, păng đak sơlŭng jrŭ tih hrơ̆, pơm ăn kơ đak dơsĭ jrŭ jing trong, wă ăn kơ kon pơlei mă Ih dŏng pơklaih năm rok trong noh?

Êsai 52:3

Kră Yang khan thoi âu; lu iĕm tĕch bơih mă-lei ưh kơ đei jên; na kư̆m gô huai iŏk iĕm dơ̆ng ưh kơ đei hăm jên kăk ôh.

Êsai 60:21

Na đĭ-đăng kon pơlei ih gô jing 'lơ̆ng tơpăt; lu sư gô đei dêh char 'nâu ling-lang; Lu sư bơih bluh tơmơ̆ng đơ̆ng Inh pơtăm, đơ̆ng ti Inh pơm wă kơ Inh đei ư-ang.

Êsai 62:2

Lu teh đak gô 'bôh tơdrong 'lơ̆ng ih. Lu pơtao gô 'bôh tơdrong ư-ang ih. Đe gô krao ih anăn 'nao đơ̆ng 'bơ̆r Kră Yang krao ăn.

Êsai 62:4

Đe ưh pă krao ih Kră Yang hŭt lê̆ dơ̆ng bơih dah ưh pă krao ih teh lê̆ bri juơ dơ̆ng bơih. Mă-lei đe gô krao ih Inh chơt hiôk hăm ih păng krao teh đak ih đei pơkong thoi ŭnh om bơih. Yua kơ Kră Yang chơt hiôk ih păng teh ih gô đei klo.

Êsai 63:18

Kon pơlei 'lơ̆ng rơgoh Kră Yang 'nao đei anih 'nâu ưh tăm mă đunh; mă-lei bơngai ayăt kơ nhôn pơjuă lê̆ bơih anih 'lơ̆ng rơgoh Ih.

Êsai 65:1

Lu bơngai mă ưh kơlah krao apinh Inh, na Inh pơdah akâu kơ lu sư bơih. Lu bơngai mă ưh kơlah chơchă Inh na tơ'bơ̆p Inh bơih. Inh khan hăm minh adrĕch adrung kon pơlei nai ưh kơ đei krao chă anăn Inh: “Inh tơ âu, Inh tơ âu!”

Mathiơ 16:18

Ơ Pêtrôs, Inh wă khan kơ ih, ih thoi lĕ kơ tơmo kŭk; kơpal tơmo kŭk noh boih Inh wă pơm hnam Inh, hnam noh wă khan lu bơngai lui kơ Inh. Na dôm lu yang kơnê̆ ưh kơ kĕ blah lu bơngai lui noh ôh.

Mathiơ 28:20

Bơtho kơ lu sư pơm kiơ̆ tôm tơdrong Inh đei pơkă kơ lu iĕm. Inh oei hơdai hăm lu iĕm ling-lang truh năr tôch ning-mônh.”

Luka 19:10

Inh Kon Bơngai jur tơ ala teh âu wă chă lu bơngai mă kuơ̆l kơ trong wă pơklaih yoch sư.”

Yo 10:16

Inh đei mơ̆n triu khŭl nai, mă-lei ưh kơ trŏ khŭl Juđê âu ôh. Na Inh athei iŏk triu khŭl nai ei. Lu triu ei gô lui kơ Inh păng băt kơ 'bơ̆r Inh pơma mơ̆n. Na triu ei păng triu tơpôl âu lu sư gô jing minh tơpôl lơ kiơ̆ minh 'nu Inh wei-lăng.

Yo 4:23

Ning-mônh, kư̆m thoi dang ei mơ̆n, lu bơngai mă kơkuh kơ 'Bă bơ̆n 'Bok Kei-Dei mă trŏ ưh kơ sĭ sư kơkuh păng jơ̆ng dah păng ti sư đĕch ôh. Sư kơkuh lăm jơhngơ̆m đon sư. Sư kơkuh mă tơpă na 'Bok Kei-Dei lăp đon kơ lu bơngai mă kơkuh kơ Sư thoi noh.

Both 26:19

Sư kư̆m khan ăn kơ iĕm tơdrong ư-ang păng tơdrong pơyom hloh kơ đĭ-đăng adrĕch adrung mă Sư đei pơjing păng iĕm jing minh adrĕch 'lơ̆ng rơgoh ăn kơ Kră Yang 'Bok Kei-Dei iĕm, kư̆m thoi Sư đei khan boih.

Both 28:9

Tơdah iĕm wei răk dôm nơ̆r tơtă Kră Yang 'Bok Kei-Dei iĕm păng yak năm kiơ̆ trong Sư, na Kră Yang gô ăn kơ iĕm jing minh adrĕch adrung 'lơ̆ng rơgoh ăn kơ Sư kư̆m thoi Sư pơkă boih kơ iĕm.

Both 7:6

Yua kơ iĕm jing minh adrĕch 'lơ̆ng rơgoh ăn kơ Kră Yang 'Bok Kei-Dei iĕm; Sư rơih iŏk iĕm đơ̆ng lu adrĕch kơpal teh đak âu. Wă kơ iĕm jing kon pơlei pơla Sư.

Hêbrơ 13:5

Iĕm 'nĕ ham kơ mŭk tơmam ala teh, iĕm đei dôm yơ, iĕm hiôk-hiăi dôm noh. Yua kơ 'Bok Kei-Dei khan boih, Sư khan: “Inh ưh kơ đei layơ achăng lê̆ iĕm ôh.”

I Pet 2:9

Mă-lei gah bơ̆n, Sư rơih iŏk bơ̆n wă kơ bơ̆n jing adrĕch adrung Sư, bơ̆n kư̆m thoi lu bơngai soi kơ 'Bok Kei-Dei Pơtao bơ̆n, bơ̆n dang pơlei pơla Sư, teh đak Sư boih. Sư ăn kơ bơ̆n jing kon Sư wă kơ bơ̆n ră roi kơ đe dôm tơdrong 'lơ̆ng Sư pơm. Sư boih krao iŏk bơ̆n đơ̆ng anih măng mu oei tơ anih hơdah Sư dang ei.

Tơdrông Tơ'bôh 5:9

Na lu đe ei hơri minh tơdrong 'nao thoi âu: “Pôm Ih đĕch trŏ kơ hek lăng hla bơar đe pơklep noh yua kơ Ih lôch tang kon bơngai, păng pham Ih lĕch sĕch Ih huŏng huai iŏk kon bơngai brŏk tơ 'Bok Kei-Dei đơ̆ng rim dêh char, rim adrĕch adrung, rim khŭl bơngai, rim kơ nơ̆r pơma.