Êsai 38:12 - Sơ̆p Hlabơar Nơ̆r 'Bok Kei-Dei

¹² Hnam inh đe yuih, pôk lê̆ ataih đơ̆ng inh, thoi đe pôk anih bơsŭn lu bơngai wei triu, inh lôm chăl arih inh nhen bơngai tanh brai. Kră Yang kăt lê̆ inh đơ̆ng hơtơ̆ng wai, Kră Yang pơtôch lê̆ tơdrong arih inh đơ̆ng kơ năr truh kơmăng!

Êsai 38:12 ပူးပေါင်းရင်းမြစ်များ

Jop 14:2

Chăl arih kon bơngai thoi pơkao, pơgê tơlang kơsơ̆ jô kro, Sư hloh hlôi thoi ngôi, ưh kơ dơ̆ng.

Jop 17:1

Tơdrong arih inh wă tôch; khei năr inh wă jê̆ truh; Bơsat oei gô inh.

Jop 4:20

Lăm minh pơgê kơsơ̆ đe pơrăm sư hĕch hoch. Lôch hiong hlŏng hloi ưh kơ đei bu băt dơ̆ng.

Jop 6:9

Kuă kơ kiơ Kră Yang lăp đon pơjuă bơhlơ̆r inh. Rŏ kơ Sư yua ti Sư chơ̆ng kơtĕch lê̆ chăl arih inh.

Horiso 102:11

Khei năr inh oei arih nhen thoi yơ̆p wă kơsơ̆ măng. Inh jô kro thoi 'nhĕt,

Horiso 119:23

Yŏng pơgơ̆r oei pơđâu chă wă pơm kơ inh; Mă-lei đĭch đam Ih gô tơchĕng kơ khôi juăt Ih.

Horiso 31:22

Lăm năr chhŭr nuih inh khan thoi âu: “Đe tơweh inh ataih boih đơ̆ng anăp Ih.” Mă-lei Ih mơ̆ng nơ̆r inh krao apinh. Kơplah inh krao Ih dŏng pơklaih.

Horiso 73:14

Prăt năr inh đei gleh truh, rim pơgê inh đei phak pơjĭ.

Horiso 90:5

Ih pơm kơ lu sư hoch kiơ̆ đak lơ̆p ro. Thoi kơ tep lôch. Lu sư thoi hla 'nhĕt chăt hơdrih pơgê hrôih.

Êsai 1:8

Adruh Siôn ưh pă đei bu oei tơ noh, thoi đe tŭk lê̆ pơk mir hơmu, thoi pơk mir mơkai, thoi pơlei đe wang.

Êsai 13:20

Pơlei noh ưh kơ đei bơngai bu oei dơ̆ng, đơ̆ng chăl nai truh tơ chăl ninh. Lu bơngai Arâp ưh pă pơdơ̆ng hnam khăn 'bĭch tơ noh, lu bơngai wei triu kư̆m ưh pă chĭt triu lu sư tơ noh dơ̆ng.

II Kor 5:1

Akâu bơ̆n tơ ala teh âu thoi lĕ kơ hnam oei. Tơ̆ng bơ̆n băt kơ hnam bơ̆n oei noh răm boih, bơ̆n gô đei hnam 'nao tơ plĕnh ti kơjăp hloh, ưh kơ layơ răm dơ̆ng. Hnam noh đơ̆ng tơ'ngla 'Bok Kei-Dei pơm kơ bơ̆n, ưh kơ sĭ đơ̆ng ti kon bơngai pơm ôh.

II Kor 5:4

Nhôn hăt kơ jah đei akâu 'nao, yua kơ akâu so ưh kơ hiôk ôh pơmat-tat ling-lang; mă nhôn kư̆m ưh kơ sĭ kuă kơ akâu bơ̆n ôh, mă nhôn wă kơ jah đei akâu 'nao hrŭk pơđom hloi. 'Noh na nhôn đei akâu 'nao ling-lang hloi.

Hêbrơ 1:12

Mă-lei Ih gơh pơih tŭk thoi đe kuă kơ hrŭk hơbĕn ao so boih. Ih tơplih plĕnh teh 'nao kư̆m lei-lăi thoi đe tơplih hrŭk hơbĕn ao 'nao; Mă sơnăm Ih hơnơ̆ng lei-lăi ưh kơ layơ tôch.”

Ya 4:14

Mă-lei iĕm ưh kơ băt kơ năr dơning iĕm thoi yơ, băt kơ iĕm oei arih băt kơ thoi yơ. Tơdrong arih bơ̆n thoi lĕ kơ tŭk, dang ei bơ̆n oei 'bôh sư gom kông, pă 'biơ̆ kơ 'noh ưh pă 'bôh kiơ dơ̆ng.