Loma 9:30 - Loina Nuahuana

³⁰ Bewa 'oinega tasanapu 'abehega taudi tomiya ganamuli geya sitohotoho ma Yehoba 'i'ahwa dumwaluwedi, ma hesi 'idi hemisa tuwa 'oinega 'i'ahwa dumwaluwediya.

Loma 9:30 ပူးပေါင်းရင်းမြစ်များ

Loma 10:10

Weyahina 'atedega tahemiseya eeta Yehoba 'i'ahwa dumwaluwegita. Ta wete tahetohepwaila weyahina, ma 'i'etolemegita.

Loma 10:20

Ma Aiseya Yehoba 'ina gwaeina wete 'igwae waiwaiya, 'igwaeya, “Tomotaiyedi taudi geya si'ebesegau, nuwana sihesilalegau, 'oidiya yalatuwa, ma ba'idagwao 'ahe'iya'iyaguwa.”

Loma 10:6

Ma bewa tutaina tauda 'ida hemisa 'abehega Yehoba tauna 'i'abi 'ehaugita, ma tauna weyahina Yehoba 'ina Buki 'oina 'ihepwaila, 'igwaeya, “Geya sowana 'eta taiya 'oimiyega 'inuwatuhu ma 'igwae, ‘Taiya nata 'ihane Galewa?’” Bewa gwaeina 'ana sanapu 'abehega, “Taiya nata Keliso 'itoeyama.”

Loma 3:5

Ma 'eguma 'ida mumuga galana 'oinega Yehoba mumugana bwebwe'ana 'imasaleha bwaibwaina, to'aha nata tagwaene? Bo nata tagwae, “Yehoba yo, 'ima mumuga galana weyahina sahena 'uloiloinaemai.” Moisa bewa yahegwaegwae besobeso tuwa gide tupwadi tomota sigwaegwae 'esa.

Loma 4:13

Ma Yehoba Ebalahamo 'igwae hemisaeya 'abehega tauna ma'ina susuwao bale'u mabwaiyana 'abwa siloinae. Ta 'ina gwae hemisa bewa geya 'abehega Ebalahamo 'ina guibiga loina weyahina, ma hesi 'ina hemisa weyahina, 'oinega Yehoba 'i'ahwa bwebwe'aneya.

Loma 4:22

Bewa 'oinega Ebalahamo 'ina hemisa weyahina Yehoba 'i'ahwa dumwaluweya.

Loma 4:9

Ta yaliyayaina weyahina Debida 'igwae nugeteya, togidega tauda meYudiya 'wapida si'upweya taudamo weyahida. Geya taudamo. Taudi geya meYudiya mahetedao ta'ewa. Yehoba 'ina Buki 'ihepwaila pwaiya beno, “Ebalahamo 'ina hemisega 'ahwa bwebwe'ana 'ilobeya.”

Loma 5:1

Coinega bewa tuta 'ida hemisega Yehoba 'i'ahwa bwebwe'anegita ta Yehobaina mahetedai ta'ahwa 'iya'iyagu, beno 'ida Bada Yesu Keliso 'oinega.

Loma 9:14

Cabwa to'aha hede nata tagwaene Yehoba 'ina paihowa bewa gidemusa, galana bo geya? Geya galana!

Loma 9:31

Ma Isileliyedi hesiyage si'ai'aipate ma 'abehega loina 'ana muliya 'oinega Yehoba 'i'ahwa dumwaluwedi, ta si'aipate 'asaya.

Galetiya 2:16

eeta tasanapuya 'abehega Yehoba sowasowana mabwaiyada 'i'ahwa bwebwe'anegita geya Mosese 'ina loina 'ana hematamatana 'oinega, ma hesi Yesu Keliso 'ana hemisa 'oinega. Weyahina tauda 'ida hemisa Yesu Keliso 'oina talaguya ma 'oinega Yehoba 'i'ahwa bwebwe'anegita. Ma hesi 'ida hemisa geya Mosese 'ina loina 'ana hematamatana 'oina talagulagu, weyahina Yehoba geya 'eta tomota 'i'ahwa'ahwa bwebwe'ane Mosese 'ina loina 'ana hematamatana 'oinega.

Galetiya 3:24

Cana 'ita gide loinaina 'i'itayahigita ta 'ana siga Keliso 'ilatuwa, eeta 'eguma tahemisa Keliso 'oina, nata Yehoba 'i'ahwa bwebwe'anegita.

Galetiya 3:8

Mwalo hene Yehoba Ebalahamo 'ihegwaeya, 'igwae, “Cowa 'oiguwega 'abwa taudi hali 'asa tomotaedi 'idi 'ebe yaliyaya siloba.” Ma Yehoba 'ina gwae bewa Buki He'asisi 'alona 'ihepwaila nugeteya, 'asa ganamuli baibaiwadi 'adi 'abihebwebwe'ana weyahina, 'eguma Yehoba 'oina sihemisa.

Galetiya 5:5

Weyahina tauda Yehoba tahemisaeya ma 'abehega 'i'ahwa bwebwe'anegita. Bewa 'ida nuwatuhuyahina Yaluyaluwa Tabuna 'oinega, eeta tauna weyahina tayamwayamwa.

Epeso 2:12

Wanuwatuhuyahi 'abehega tutaina mwalo Keliso 'oinega wamiya wasiya, ma Isileli 'ina 'ebeloina 'oinega wamiya ganamuliya, ma ginaula bwebwe'adi Yehoba 'igwae hemisaeya Buki He'asisi 'alona geya 'eta to'aha 'omi weyahimi 'i'inana, 'oinega geya'abwa 'eta to'aha bwebwe'ana 'abwa walobaloba ma 'abehega tauna weyahina wada hemisa, geya wete 'imi Yehobamo tutaina bale'uwa wamiyamiya.

Pilipai 3:9

ma wete nuwanuwagu Keliso mahetegu 'amiya, geya 'abehega taugu 'igu mumuga dumwadumwalunega, bo Mosese 'ina loinao 'oidiyega, ta hesi hemisa Keliso 'oina weyahina, beno 'ida mumuga dumwadumwaluna Yehoba 'i'ebwaegita 'ida hemisa Keliso 'oina weyahina.

1 Timoti 6:11

Timoti, 'owa hesi Yehoba 'ina topaihowa, 'oinega bewa mumugaina 'oinega 'u'itayahigo, ma mumuga dumwaluna 'umuliye, bewa gide 'eda'eda bwebwe'ana ma hemisa ma helau ma 'alama'i'ita ma wete hohobiga.

Ibeliu 11:7

Nowa wete Yehoba 'ihe'iteya 'abehega to'aha 'abwa 'ilatu 'oidiya, 'oinega Nowaina 'imatauta ma 'ina hemisega 'ina waga sanina 'aki 'igoheya, 'itagiya, ta tauna ma'ina susuwao 'i'abihetediya. Nage 'oina 'ihe'itaeya 'abehega tomota mabwaiyadi togala, ma tauna loheya dumwaluna 'ina hemisa weyahina.

1 Pita 4:3

Mwalo 'imi mumuga galana gidemusa taudi tomiya ganamuli, ma mumugaedi bewa walogwahatedi, gidemusa sogala ma nuwa'ubuna ma bwasi waiwaidi 'adi numa yauyaule, ma he'iya'iyagu paihowa galadi weyahidi, ma wete hemisa 'abo'abodi hali ginaulao 'oidiya.