ZEPHANIAH 3:5 - Bawm Common Language Bible Version

⁵ Sikhawmsele LALPA chu khuapi sungah a um ko le, thildik a ti le, thil diklo chu a ti dahlo. Zîng siar hen a mi le tla sinah thildik a ti, sikhawmsele chunah mireplo tla nih thil diklo an ti kumza.

ZEPHANIAH 3:5 ပူးပေါင်းရင်းမြစ်များ

GENESIS 18:25

Sual nei lo mi chu sual nei mi hen bang cho hen na thah rîlmâl lai lo. Chu chu ti kho asi lo! Na thah duh rerêng lai lo. Na hei ti bâk chun, sual nei lo mi chu sual nei mi tla hen munkhat hen rêp an si awt, chu hâwi chu ti kho asi lo. Tual tlûn zawzawngah lâirêltu nih rep tak hen ti ding asi ruangah,” a ti.

JOB LASUIBU 34:10

Nannih theihthiamtu tla, ka thu ngâi u! Pathian zeizawng tikho nih thilsual a ti lai ma?

JOB LASUIBU 7:18

Zîng siar hen na zauhdik le, zeiliau zawng ah na nik.

JOB LASUIBU 8:3

Pathian nih diknâk chu a lêt dahloh. Thil dik ti ding hen khawm a lêt dahlo.

SAM 145:17

LALPA chu a thilti zawzawngah â rep le, a thilti zawzawngah khua a ruat.

SAM 37:6

Na repnâk, chu nî sunh chir liau hâwi hen a chêutir lai.

SAM 92:15

Hi nih hin hawng kan kilkâwitu nih chun diklonâk a nei lo mi leh LALPA chu mirep asi ti a langhtir.

ISAI 12:6

Zion ah um mi zawzawng chu âu hen la sak na seh! Israel Pathian thenhlimh chu a rokual le, a mi tla sinah a um,” ti hen.

ISAI 28:19

Zîng siar hen a nan vuak lemang na lai. A sûn a zân hen nan tuar lai. Pathian thawk hen thuchah thar kip nih ṭihnungkâi thar a hawng tlungtir lai.

ISAI 33:2

LALPA, kan lakah khua ruat. Nangmah lakah lungumnâk kan nei. Nisiar hen hawng kan vêng le, lawksawng ni ah hawng kan hum.

ISAI 45:21

Lâirêlnâkah hawng ule, nan thunawk hawng put u; a dotu ding mi tla chu thu a deih tawnh na seh. Tuan liau khawm ah thil a hawng tlung ding mi simkantu âu a um? Kei, LALPA a mi tla ruangsuahtu kasi lo ma? Pathian dang a um lo.

ISAI 50:4

Mi chaklo tla chu ka chaktir khonâk ding hen LALPA zahkâi nih sim ding mi chu a hawng ka sîntir. Zîng siar hen hawng ka sîntir mi lakah ngâi ding hen thinlung thawknâk hawng ka pêk.

JEREMIA 3:3

Churuangah asi, ruah sûrlo hen fûr a tla lonâk chu. Nang chu nunau â zuar mi na bangh le; ningzaknâk na nei lo.

JEREMIA 6:15

Hi bang thil nâwmtâm an ti ruangah an ning a zak ma? Zak lo e, an ning a zak rîlmâl lo; zei hâwi ningzak a kâi ti khawm an theih lo. Churuangah midang an tlû mi hâwi hen an tlû lai le; anmah ka rêp na tikah an dawnghnâk asi lai rawh. Kei, LALPA nih ka sim asi,” a ti.

JEREMIA 8:12

Ka mi tla, hi bang thil fihnungkâi nan ti ruangah nan ning a zak ma? Zak lo, na ning zak lo thlo; ningzak khawm nan theih lo! Churuangah midang an tlû mi hâwi hen nan tlû bâk lai, ka nan rêp na tikah nan dawnghnâk asi lai rawh. Kei, LALPA, nih ka sim asi.

LUNGFÂKNÂK 3:23

Zînglei hâwi hen a thar le, nî suak ding mi theih chia hâwi asi.

EZEKIEL 18:25

“Sikhawmsele, nannih nih, ‘LALPA thilti a diklo,’ nan ti. Nannih Israel mi tla ka thu ngâi u. Kei nih thil ka ti mi chu diklo hen nan ruat mu? A diklo mi chu nanmah umdân kha asi.

EZEKIEL 48:35

Chu khuapi kulh a ektê a sâu lei sîr li fawnh hen feet 30,240 asi. Chu khuapi min chu tu thawk hen “LALPA Hinah A um!” ti asi kumza ding asi.

HOSEA 14:9

Hinah rîn mi tla hi fing tak hen theihthiam mi nih chun thinlung ah kil na seh. LALPA lampi tla chu a dik le, mirep tla nih chu chu an zûl le, an nung. Sikhawinsele misual tla nih an siarlo ruangah an bah le, an tlû.

HOSEA 6:5

Churuangah asi ka khuavâng tla chu rêpnâk ding thuchah leh siatnâk lâirêl ding hen ka hawng fialnâk chu. Nan lakah ka duh mi chu fiang tak leh langker hen ka duh:

MIKAH 3:11

Khuapi sungah lâirêltu tla nih nawhnâk ruangah lâi an rêl le, bâwlpu tla nih a man duh hen dân thu tla an sim, chubang zawng tla nih, ‘LALPA kan sinah a um’ an ti ver. “Kan lakah nganfâk zeikhawm a tlung lai lo. Kan sinah LALPA a um,” an ti.

MIKAH 7:9

LALPA lakah thilsual kan ti, churuang chun a thinthawk kar vial chu kanna dawnh rarâm ding asi. Sikhawmsele a dawnghnâk ah chun hawng kan hum lai le, kan lakah thil diklo tla dik hen a hawng diktir lai. Chêu lakah hawng kan kalpi lai le; ruang hawng kan suah mi muh ding hen kan nung lai.

HABAKUK 1:3

Hi hâwi lawksawngnâk muh ding hen zei rangah na hawng ka siam, hi bang hâwi thil diklo ti hi zeitin na zauh kho zia? Siatnâk leh râwknâk nih hawng ka kulh dak le, mun kip ah a sualnâk leh donâk a um.

ZEPHANIAH 2:1

Zak theihlo phun,

ZEPHANIAH 3:13

Israel a thibang tla nih chun âu sin khawm ah thil diklo ti hen âwkrâwl thu an sim lai lo le, perpet ding an tum lai lo. Sul-le-lam tluang leh him tak hen an um lai le, âukhawm ṭih an nei lai lo,” a ti.

ZEPHANIAH 3:15

LALPA nih an rêp na mi a dawngtir rawh, nan mêlma tla khawm a kiangtir ver rawh. LALPA, Israel Pathian chu nan sinah a um le, tu chun zeikhawm ṭih ding a um lo rawh.

ZEPHANIAH 3:17

LALPA, nan Pathian chu nan sinah a um le; a thiltikhonâk nih nehnâk an pêk na. LALPA chu nan lakah â lâwm lai le, amah dâwtnâk ah nunchan thar a nan pêk na lai. Nan tlûnah la sak hen â lâwm lai.

ZEKARIA 2:5

LALPA nih, chu khuapi chu vêng ding hen amah ngelchel chu kulh dak hen mei kulh vâm hâwi hen humtu si hen, a rokualnâk zawzawng hen ka um awt ti hen a tiamh,” a ti.

ZEKARIA 9:9

Zion mi tla, a lâwm u, a lâwm u! Jerusalem mi tla, lâwm hen âu u! Zauhnik! Nan lal chu nan sinah neh hen leh nehtu si hen a hawng kal le, nâu tak hen sanatung fa tlûnah â chuan.

LUK 12:2

Langlo ding hen thuh zeikhawm a um lo; theihlo ding hen pheh zeikhawm a um lo.

ROM 2:5

Thinlung lianhnâk leh thinlung khauhnâk nan nei. Churuangah Pathian thinrunhnâk leh lâirêlnâk dik tak a hawng lang tik Ni ah chun nanmah rêpnâk lian dauh nan siam asi.

ROM 3:26

Tu liauah a rep zia a zauhtirnâk ding ah asi amah ngelchel chu mirep asi khonâk ding hen leh Jisu lungtu vial mawhtirlotu asi khonâk ding hen.

1 KORIN 4:5

Chun, a hun lânah hin zeikhawm nik lah u, Lalpa a hawng kal lânlo chu. Anih nih chun mûi thil thup tla chu chêu ah a hawng suah lai le, thinlung ah tum mi khawm chu a hawng langh lai; chu tikah chun mikip nih Pathian lakah chun mah ting tâwk ah sawr an lawh chiau lai rawh.

DEUTERONOMY 23:14

Nan riakmun chu thiang tak hen kilkâwi ule, LALPA nan Pathian chu nan riakmun ah nanmah an zauhkhenh na ding hen leh nan mêlma tla an nehtir na ding hen a um ruangah. LALPA nih dunglei an sît na ding hen thil diklo zeikhawm ti lah u.

DEUTERONOMY 32:4

“LALPA chu nangmah vêngtu chak tak asi, a lampi zawzawngah rangtling leh rep tak asi; Na Pathian chu zumh a kâi hen a dik asi; A dik mi leh a ṭha mi vial a ti.

1 PETER 1:17

Chun, thliar leh dang nei lo hen, mikip an rianṭuan hâwi chiau hen lâirêl piaktu chu Pa ti hen nan auh chun hi tual ah nan um kar vial amah zah tak hen um u.