THUPHUANG 2:17 - Bawm Common Language Bible Version

¹⁷ “Thlarau nih kawhmi tla sinah thu a sim mi hi nâ a nei mi nih chun theih na seh! “A nehtu zawng sinah manna thuh mi chu ka pêk lai, lungvâr khawm ka pêk chiau na lai, chu lung tlûnah min thar â rîn mi hen, chu chu a tingtu cho lo nih chun âukhawm nih an theih lo, a ti” ti hen.

THUPHUANG 2:17 ပူးပေါင်းရင်းမြစ်များ

SAM 25:14

LALPA chu amah thu ngâitu rangah chun an hâwikawmh asi le, an sinah a dân thu chu a birhtir.

SAM 36:8

Na hawng kan pêk mi buh chu kan chenh le; na ṭhatnâk tiva mi na kan dintir.

EXODUS 16:33

Mosi nih Aron sinah, “Bêl lâk le, a sungah litre nih manna siah le, kan thlâk tla rangah kil ding hen LALPA mâika ah va siah,” a ti.

THUFING LASUIBU 14:10

Na lâwmnâk chu nangmah rang asi, na thinlung fâknâk khawm nangmah rang asi, âukhawm nih an ṭhenhzârpi kho ding asi lo.

THUFING LASUIBU 3:32

LALPA nih thilsual titu chu a hua le, sikhawmsele mirep tla lam chu a mi zumh an si.

ISAI 56:4

Chubang mi tla sinah LALPA nih, “Keimah na ka zah ruangah ka dinhni tla na ulh hen, keimah lawmh kâng thil na ti hen ka thudântuk zumhkâi tak hen na zûl chun,

ISAI 56:5

churawhchun na min chu ka Biakin ah leh ka mi tla sinah fapa leh fanu na nei mi ngâk hen theihkumza asi lai. Zeiliau khawm ah philh na si lai lo,” a ti.

ISAI 62:2

Jerusalem, phun tla nih na nehnâk an muh lai! An lalchem zawzawng nih na rokualnâk an muh lai. LALPA amah tak nih an phuah mi min thar hen kawh na si lai.

ISAI 65:13

Churuang chun hawng ka sawnhtu leh ka thu ngâitu tla nih chun ei ding tam tak an tawng lai le, sikhawmsele nannih lam chu sungvâng leh tîhâl hen nan um lai ti ka nan simh na. Annih chu anna lâwm lai le, sikhawmsele nannih lam chu nan ning a zak lai.

ISAI 65:15

Ka mi thîm tla nih nan min ah hawlh siatbarh tla an ti na lai. Kei, LALPA Zahkâi nih ka nan thah na awt. Sikhawmsele ka thu ngâitu tla chu min thar ka pêk na lai.

MATHAI 13:11

Chun, anih nih chun a sâng le, an sinah, “Vân Ram thuthup tla chu nannih theih lam chu siang asi, annih theih lam chu siang asi lo.

MARK 7:16

Theihnâk ding hen nâ nei nih chun theih seh,” a ti.

JOHAN 4:32

Sikhawmsele, anih nih chun an sinah, “Buh nan theihlo mi ei ding ka nei,” a ti.

1 KORIN 2:14

Laikulh mi nih chun Thlarau lei thil tla chu a lawmh tâwn lo, anih ngaih chun âtkâi an si; Thlarau ah cho theih kho mi a si ruangah a theih kho lo rerêng asi.

KOLOSA 3:3

Nan thi rawh le, nan nungnâk chu Pathian lakah Krist sinah thuh hen a um rawh ruangah.

THUPHUANG 14:3

Laltophah mâika ah leh thilnung pali tla leh upa tla mâika ah chun la thar an sak le, chu la thar chu âukhawm nih tual a mi tlanh chia tla mi nuai khat leh sîng li leh sâng li tla cho lo nih chun anna sîn kho lo.

THUPHUANG 19:16

Chun, a puan leh a kê ah min rîn, “lal tla Lal leh hotu tla Hotu,” ti hen a um.

THUPHUANG 2:11

“Thlarau nih kawhmi tla sinah thu a sim mi hi nâ a nei mi nih chun theih na seh! “A nehtu vial chu thih nihnâk nih zeitin khawm a ti lai lo, a ti” ti hen.

THUPHUANG 2:7

“Thlarau nih kawhmi tla sinah thu a sim mi hi nâ a nei mi nih chun theih na seh. “A nehtu vial sinah chun Pathian Dûm ah mi nungnâk thing rah ei ding hen thu ka pêk lai a ti,” ti hen.

THUPHUANG 3:22

“Thlarau nih kawhmi tla sinah thu a sim mi hi nâ a nei mi nih chun theih na seh, a ti” ti hen.

THUPHUANG 3:6

“Thlarau nih kawhmi tla sinah thu a sim mi hi nâ a nei mi nih chun theih na seh, a ti” ti hen.