THUPHUANG 15:4 - Bawm Common Language Bible Version

⁴ Lalpa, âunih nang a nan ṭih lo lai! Na rokualnâk phuang lotu âu a um lai? Nangmah lâwng na thenhlimh asi! Na thilti rep tla chu mi kip nih an muh rawh, phun kip an hawng lai le a nan sawnh lai,” an ti.

THUPHUANG 15:4 ပူးပေါင်းရင်းမြစ်များ

SAM 105:7

LALPA chu kan Pathian asi; a thupêk chu laikulh zawzawng rangah asi.

SAM 111:9

A mi le chu a suah na, zungzâl thudântuk a siam. Thenhlimhnâk leh thiltikhonâk chu amah asi!

SAM 22:23

“Nannih to-aw tla, LALPA chu sawr u! Jakob thlâk tla, amah chu sawnh u! Israel mi tla, amah chu sawnh u.

SAM 22:27

Phun zawzawng nih LALPA chu an theihkumza lai. Laikulh mun kip ah mi chu amah leiah an hawng a hawi lai. Chi kip nih amah an sawnh lai.

SAM 22:3

Sikhawmsele, nang, Mi Thenhlimh, Israel nih a nan sawr mi laltophah ah na to.

SAM 86:9

Phun zawzawng na siam na mi chu an hawng lai le, na sinah kûn hen na rokualnâk an sawr lai.

SAM 89:7

Mi thenhlimh lâirêlnâk ah chun zah na kâi le; nangmah zah hen an ektê hen an dîr.

SAM 97:8

LALPA, na lâirêlnâk ruangah Zion ah um mi tla chu anna lâwm le, Juda khuapi tla chu anna lâwm.

SAM 99:5

LALPA kan Pathian chu sawr u; a laltophah mâika ah amah chu sawr u! Amah chu a Thenhlimh asi.

SAM 99:9

LALPA kan Pathian chu sawr u, a tlâng thenhlimh ah amah chu sawnh u! LALPA kan Pathian chu a thenhlimh asi.

ISAI 24:15

Chun, saklei mi nih amah chu an sawr lai. Tipi dungah um mi tla nih LALPA Israel Pathian chu an sawr lai.

ISAI 25:3

Phun thiltikho tak tla nih nang chu an sawr lai le; phun sual tla khuapi mi nih a nan ṭih lai.

ISAI 26:9

Zân ah chun ka thinlung zawzawng hen ka nan ngâi le, tual leh a mi tla lâi na rêl liauah a dik zia an theih ver lai.

ISAI 45:23

Ka thutiam chu a dik le, lêt asi lai lo rawh. Bir tak hen ka sinâk zawzawng hen ka tiamh mi asi; mikip hawng hen ka mâika ah anna siksidîr lai le, zumhkâi ding hen ka sinah thu anna tiam lai.

ISAI 57:15

“Kei chu Pathian thenhlimh leh sâng tak um kumza mi chu kasi. Mun sâng leh mun thenhlimh ah ka um le, sikhawmsele an lungnâk leh lungumnâk ka neitir nawlh kho na ding hen mi â nautir mi leh sual rim mi sinah khawm ka um ber.

ISAI 6:3

An ektê hen anna auh tawnh: “A thenhlimh, A thenhlimh, A thenhlimh! LALPA Zeizawng tikho chu a thenhlimh! A rokualnâk nih laikulh a khattir,” ti hen.

ISAI 60:5

Hi hi na muh lai le, lâwm hen na khat lai; Thinlung thawk ruangah na thir lai. Phun tla neihnâk chu na sinah an hawng put lai; Tipi tan hen an neih tla a hawng tlung lai.

JEREMIA 10:7

Phun zawzawng tla lalchem, âunih a nan zah lo lai? Nang chu zah tlâk na si. Phun tla lakah mifing zawzawng leh an lalchem tla lak khawm ah nang hâwi pakhat khawm an um lo.

JEREMIA 16:19

LALPA, nang chu hawng ka humtu leh chaknâk hawng ka pêktu na si; lawksawng liauah na hawng ka ṭangpi. Tual dawnghnâk thawk hen phun tla chu na sinah an hawng kal lai le, “Hawng kan thlâktu tla nih chun pathian diklo tla leh zeikhawm mang tlâklo mi milem cho lo chu zeikhawm an nei lo.

JEREMIA 5:22

Kei, LALPA kasi; zei rangah nan ka ṭih zah lo zia? Zei rangah ka mâika ah nan thir lo zia? Tipi â rînâk rangah sep ka siah le, um kumza mi ramri kanh kho lo mi asi. Tipi chu tlingtlawk khawmsele, a pîn leiah a kal kho lo; tî tlingtlawk chu a hâu a suah kho, sikhawmsele a tâwn kho lo.

HOSEA 3:5

Sikhawmsele Israel mi tla chu LALPA an Pathian leiah David thlâk lakah mi an lal hawng tik a um teh lai. Churawhchun, LALPA an ṭih lai le, a thil ṭha pêk tla anna ting lai rawh.

HABAKUK 1:12

LALPA, nang chu a tîr thawk hen Pathian na si. Nang chu zungzâl ka Pathian thenhlimh na si. LALPA, ka Pathian leh hawng ka humtu, Babulon mi tla chu hawng kan rêp ding hen na thîm le, chak tak hen na siam.

ZEKARIA 14:16

Churawhchun, Jerusalem dotu phun lakah a thibang tla chu kum siar hen LALPA Zeizawng tikho chu sawnh ding hen leh Bâsâ Kût mang ding hen chunah chun an kal lai.

ZEKARIA 2:11

Chu tikah chun phun tam tak LALPA sinah an hawng lai le, a mi tla an si lai rawh. Nan sinah a um lai le, kei khawm amah fial mi kasi ti nan theih lai rawh.

MALAKI 1:11

Laikulh khatlei dawmh thawk hen a dawng tiang khawm nih an hawng ka zah. Mun kip ah rimthâw tla an duah le, ka sinah bâwlnâk pawmtlâk an hawng ap, chu zawng nih chun an hawng ka zah asi!

1 PETER 1:16

Kei ka thenhlimh ruangah nanna thenhlimh ding asi,” ti Pathian lasui thu nih a sim ruangah.

THUPHUANG 11:15

Chun, vânmifial pasarihnâk nih chun a tâwtawrâwt chu a tum le, “Laikulh ram chu kan Lalpa leh Mesia ram a hawng si rawh, anih nih chun zungzâl hen lâi a rêl lai,” ti hen vân thawk hen aw-hâu a hawng suak.

THUPHUANG 14:7

Chun, anih nih chun, hâu fâk tak hen, “A lâirêl tik chu a tlung rawh ruangah Pathian ṭih ule, chawnglawmh u, tual leh vân, tisumsumriat leh tinungva tla siamtu chu mâimûk u,” a ti.

THUPHUANG 16:5

Chun, vânmifial tî tlûnah thuneitu nih chun, “Nang Mi Thenhlimh, a um rawh mi leh a um liau mi, na lâirêl tla chu a dik asi,

THUPHUANG 16:7

Chun, mâichâm thawk hen aw-hâu nih chun “Lalpa Pathian Zeizawng tikho, na lâirêl tla chu a dik hen â rep asi,” a ti mi ka theih.

THUPHUANG 19:2

a lâirêlnâk tla chu a dik hen â rep asi, anih nih chun nunau â zuar mi rokual tak, a hurnâk ruangah tual râwktu chu a thu a chek piak rawh, a to-aw tla a thah na mi phû chu a lam piak rawh,” a ti mi ka theih.

THUPHUANG 19:8

Puan mangṭhia chu mi thenhlimh tla thilti rep asi ruangah, puan mangṭhia thiang tak, a lek mi chu aihtir ding hen pêk asi.

THUPHUANG 3:7

“Chun, Philadelphia khua kawhmi vânmifial sinah chun rîn rawh: “Mi thenhlimh mi dik tak, David renh nei hen, âukhawm khâr lo ding hen awngtu leh âukhawm awng lo ding hen khârtu nih khan hi thu hi a sim asi.

THUPHUANG 4:8

Chun, thilnung pali nih chun thla paruk chiau an nei le, an sunglei leh lênglei mit hen a khat phak, sûn leh zân hen la sak an bâng lo; “Lalpa Pathian zeizawng tikhotu, a um rawh mi leh, a um liau mi leh a hawng um ding mi chu, a thenhlimh, a thenhlimh, a thenhlimh,” ti hen.

THUPHUANG 6:10

Annih nih chun aw-hâu fâk tak hen, “Lalpa, Zeizawng tikhotu, Mi Thenhlimh leh dik tak! Zei tiang me lâirêl lo hen tual ah an um mi tla tlûnah kan thisen suaknâk phû chu lam lo hen na um awt? ti hen an âu.

1 SAMUEL 2:2

LALPA hâwi hen mi thenhlimh âukhawm an um lo; amah banghtu leh kan Pathian hâwi hum khotu âukhawm an um lo.