NEHEMIAH 2:20 - Bawm Common Language Bible Version

²⁰ Kei nih ka sâng le, “Vân Pathian nih dingchangnâk hawng kan pêk awt. A to-aw tla kan si, sak ding kanna dawmh awt. Sikhawmsele nannih lam chu Jerusalem ah thil-le-rî ah zeikhawm thuneihnâk nan nei lo, dân lak khawm tingvo nan nei lo,” ka ti na.

NEHEMIAH 2:20 ပူးပေါင်းရင်းမြစ်များ

2 CHRONICLES 26:5

Phung leikângah ruitu Zekariah a dam kar vial chu LALPA rian zumhkâi tak hen a ṭuan le, Pathian nih mal a sâwm.

Ezra lasuibu 4:3

Zerubabel, Josua leh chi lakah lukhâi dauh tla nih an sinah, “LALPA kan Pathian Biakin sak ding hen nan hawng kan ṭangpi kan herh loh. Persia lal lianchem Kirus nih thu hawng kan pêk hâwi hen kanmah nih kan sak awt,” an ti.

NEHEMIAH 1:4

Hi bang zawng thu ka theih rawh chun ka to le, ka ṭap rawh. Ni zeimaw zat chu ka lungfâk tuk ah tî-le-râwl ka ei lo. Pathian sinah thla ka cham,

NEHEMIAH 2:4

Churawhchun, lal lianchem nih, “Zei tak me na duh?” ti hen hawng ka deih. Vân Pathian sinah thla ka cham rawh chun lal sinah,

ESTHER 4:11

“Âuzawng mipa mawh nunau mawh, lal kawhnâk umlo hen kulh sungah lûttu chu thah ding asi, chu dân chu ram ṭhen kip ah lal krai pêktu tla nih zapi tla sinah theihtir mi thu asi, chu sungah lût kho ding hen dân pakhat cho a um; lal nih a ngûn fung a leknawh mi minung cho zuah an si. Sikhawmsele lal nih hawng ka kawhnâk hen thla khat cho asi rih,” a ti.

SAM 102:17

A kaltâk mi minung tla a âwva lai le, an thlachamnâk a ngâi lai.

SAM 122:6

Jerusalem rangah remnâk um ding hen thlacham le: “Nangmah duhtu tla chu an sul-le-lam tluang kho ding hen.

SAM 20:5

Churawhchun, na nehnâk ruangah lâwm hen kan âu lai le, kan Pathian sawr hen na nehnâk kan lawmh lai. LALPA nih na deihnâk zawzawng an sâng seh.

SAM 35:27

Hawng ka muh duhtu tla chu a lâwm na seh, “LALPA chu a rokual a! A to-aw dingchangnâk ah â lâwm,” ti hen lâwm hen âu lemang na seh!

SAM 51:18

Pathian, Zion chu dâwt le, ṭangpi, Jerusalem kulh chu dirh nawlh.

EXODUS 28:29

“Aron chu Mun Thenhlimh ah a lût tikah Israel phun min rînnâk ṭângbêk â awih ding asi, chu rawh chun, Kei, LALPA nih ka mi tla chu ka theihkumza lai.

THUSIMTU 7:18

A leiluat hen um lah. Phung leikâng mi na si chun, zei leikâng zawng ah na dingchang lai.

ISAI 56:5

churawhchun na min chu ka Biakin ah leh ka mi tla sinah fapa leh fanu na nei mi ngâk hen theihkumza asi lai. Zeiliau khawm ah philh na si lai lo,” a ti.

LEVITICUS 2:2

Aron thlâk bâwlpu tla sinah a pêk lai. Bâwlpu nih sangvut zapei khat leh rimthâw leh sariak tla chu a lâk lai le, a ektê hen LALPA sinah thil ap singsiahnâk ding ah mâichâm ah a duah lai. Chu eiphung bâwlnâk rim nih chun LALPA a lawmhtir.

LEVITICUS 24:7

Tlar kip ah rimthâw telh le, LALPA sinah eiphung thil ap sang ruangrûl ah siding hen.

ZEKARIA 6:14

Chu lallukhuh LALPA Biakin ah mi chu Heldai, Tobijah, Jedaiah, leh Josiah zah an kâi mi theihkumzanâk asi lai,” a ti.

NUMBER 10:10

Nanna lâwm zâwn khawm ah nan Thla Thar Kût leh nan phung kût ni khua ah nan tum ding asi, duahphung thil ap liauah leh kawmhnâk thil ap liau khawm ah. Churawhchun, Kei, LALPA nan Pathian nih kan ṭangpi na lai,” a ti.

THILTI 10:31

‘Kornelia, na thlachamnâk kha theih hen a um rawh, mi sinah na thilpêk tla khawm kha Pathian nih a theihkumza.

THILTI 10:4

Chun, Kornelia nih chun anih chu a zauh ko le, a ṭih, “Pu, zei mesi?” a ti. Chun, anih nih chun a sinah, “Na thlachamnâk leh na thilthawt pêk tla kha ka theihkumza ding hen Pathian mâika ah a tlung rawh.

THILTI 8:21

Hi bang thu lakah hin na tel bâk lo, tingvo khawm na nei lo; na thinlung Pathian ngaih hen â rep lo.