MATHAI 19:21 - Bawm Common Language Bible Version

²¹ Jisu nih a sinah, “Ṭha rangtling hen um na duh chun, kal le, na neih chu zuar le, mipâm tla sinah pêk rawh; chuvachun vân ah ro na nei lai, chun hawng le, hawng ka zûl,” a ti.

MATHAI 19:21 ပူးပေါင်းရင်းမြစ်များ

GENESIS 17:1

Abram chu kum sâwmkua leh kum kua asi liauah LALPA chu a sinah â langh le, “Kei Pathian zeizawng tikho kasi. Ka thu ngâi le, thil dik ti kumza rawh.

GENESIS 6:9

Hi hi Noa thâwngthâng chu asi. Fapa pathum- Sem, Ham leh Japhet a nei. Noa chu sualnâk a nei lo, a dam liauah amah cho mi ṭha asi. Pathian kawmh hen a um.

JOB LASUIBU 1:1

Uz ram ah minung pakhat a um le, a min chu Job asi, amah chu Pathian sawnhtu leh mi zumhkâi tak asi. Mi ṭha tak asi le, thilsual lakah â thiamthih.

SAM 37:37

Mi ṭha chu zauh le, mirep chu singsiah rawh; Remnâk duhtu nih thlâk a nei,

MATHAI 16:24

Chun, Jisu nih a ṭhiruai tla sinah, “Âuzawng hawng ka zûl a duh mi nih chun mah hamhnâk siarlo hen, a kraws put hen hawng ka zûl seh.

MATHAI 19:20

Tlangvâl nih chun a sinah, “Chubang thu zawzawng chu ka zâwt tâwn; zei ka tâng rih?” a ti.

MATHAI 19:22

Tlangvâl lam nih chun chu thu chu a theih hen ngaihsia tak hen a kal ving, sum tam tak nei mi asi ruangah.

MATHAI 19:28

Chun, Jisu nih an sinah, “Thungâi tak hen ka nan simh na, Siamtharnâk ah chun Minung Fapa a rokualnâk tophah ah a to tikah, nannih hawng ka zûltu tla hi, Israel phun leinih tla chu lâirêl hen, laltophah leinih lakah nan to bâk teh lai.

MATHAI 4:19

Chun, Jisu nih chun an sinah, “Hawng ka zûl u, chun minung tleihtu ah ka nan siam na lai,” a ti.

MATHAI 5:48

Chuvachun, nan Pa vân a mi a ṭha rangtling hâwi hen nan ṭha rangtling ding asi.

MATHAI 8:22

Sikhawmsele, anih nih chun a sinah, “Hawng ka zûl rawh; mithi nih anmah mithi chu vûi seh,” a ti.

MATHAI 9:9

Chun, Jisu chu, chu thawk hen chun a kal vima le, siah châwinâk mun ah a to mi, minung pakhat a min, Mathai a muh; chun, a sinah, “Hawng ka zûl rawh,” a ti. Chun, a thawk le, a zûl rawh.

MARK 10:21

Chun, Jisu nih amah chu a zauh le, a zângfah le, a sinah, “Kâng khat na bat rih; kal le, na neih zawzawng zuar le, mipâm tla sinah pêk rawh, chun, vân ah ro na nei lai; chun hawng kal le, hawng ka zûl,” a ti.

MARK 2:14

Chun, a kal pah hen, Levi, Alphai fapa chu siah châwinâk mun ah to mi a muh le, a sinah, “Hawng ka zûl rawh,” a ti. Chun, a thawk le, a zûl rawh.

MARK 8:34

Chun, mi zapi tla chu a ṭhiruai tla hen a kawh na le, an sinah, “Âuzawng nih hawng ka zûl a duh chun mah a pheh hen a kraws put hen hawng ka zûl seh.

LUK 12:33

Nan neih zawzawng zuar ule, mipâm tla sinah pêk u; vân ah mifîr kal lonâk ah, rûlchawn nih a râwk lonâk ah chun, tangka sâwngkhâwi li kho lo tla, neih vei kho lonâk ah nan ro khawng u.

LUK 14:33

Chu hâwi ber hen, nan lakah hin âuzawng a neih zawzawng kaltâk lo mi vial chu ka ṭhiruai asi kho lai loh,” a ti.

LUK 16:9

“Chun, ka nan simh na, sum telê hen nan rangah hâwi tla siam u; sum a veih tikah zungzâl umnâk ah chun an umtir na nâk ding hen.

LUK 18:22

Chun, Jisu nih chu chu a theih rawh chun a sinah, “Tu khawm ah kâng khat na bat; na neih zawzawng zuar le, mipâm tla sinah ṭhen, chuvachun vân ah ro na nei lai; chun, hawng kal le, hawng ka zûl,” a ti.

LUK 5:27

Chun, chu thluh rawh chun a suak le, siah châwinâk mun ah a to mi, siah khawlhtu pakhat a min, Levi a muh le; chun a sinah, “Hawng ka zûl rawh,” a ti.

LUK 6:40

Ṭhiruai chu a sîntirtu tlûnah a um lo; mikip anna sîn thluh tikah an sîntirtu hâwi hen an um lai.”

LUK 9:23

Chun, amah ber nih mi zawzawng sinah, “Âuzawng nih hawng ka zûl a duh chun, mah a pheh hen, nisiar a kraws put hen hawng ka zûl seh.

JOHAN 10:27

Ka dawrâ tla nih ka aw an theih tâwn, kei khawm nih annih chu ka theih na le, annih nih chun an hawng ka zûl tâwn;

JOHAN 12:26

Âuzawng nih ka rian a ṭuan chun hawng ka zûl seh; ka umnâk ah ka to-aw khawm a um lai. Âuzawng nih ka rian a ṭuan chun anih chu Pa nih a chawnglawmh lai.

THILTI 2:45

an ro tla, an neih tla an zuar le, an herh tâwk chiau hen an ektê sinah chun an ṭhen tâwn.

HEBRAI 10:34

Rêng a tlâ mi tla tuarnâk chu nanna ting bâk rawh; thil ṭha dauh um kumza ding mi chu nan nei ti theih hen nan thil an lâk piak na mi tla khawm lâwm tak hen nan tuar kho asi.