Mosi chu Pathian hen a tawng ding hen Sinai Tlângah a kâi. LALPA nih a sinah tlâng thawk hen a kawh le, Jakob thlâk Israel tla sinah thu sim ding mi tla a simh:
LALPA nih Mosi sinah, “Tlângah ka sinah hawng kâi le, hinah na um karah Israel mi tla sîntir na ding ah lungtlêp panih lakah dân tla rîn mi ka nan pêk lai,” a ti.
Chunah ka nan tawng lai le, Thilsiam (cherabim) panih thla panih karah mi a sinh tlûnlei thawk hen ka dân zawzawng tla Israel mi tla rangah ka nan pêk lai.
Zeiliau zawng ah hi duah mi thil ap hi Ka umnâk Puanin tualmâi ah nan hawng ap ding asi. Chunah chun ka mi tla hen kanna tawng lai le, nan sinah thu Ka sim lai.
Israel mi tla nih mun an khuarnâk kip ah Mosi nih Puanin thenhlimh chu a lâk le, riak mun thawk hen lât dauh ah a siam. LALPA umnâk Puanin ti asi ruangah âuzawng nih LALPA rangah thu deih ding duhtu zawng chu chunah kal ding asi.
chu puanzâr mâika ah chun thil ap duahnâk mâichâm a siah. LALPA nih thu a pêk hâwi hen chu tlûnah chun duahphung apnâk, eiphung apnâk hen bâwlnâk a pêk.
Ramkaro ah mi Sinai Tlângah Mosi nih Israel mi tla rangah an thil ap tla ap ding hen a simh na ni ah LALPA nih hi bang thupêk tla hi Mosi sinah a pêk mi chu asi.
Israel tla nih Aigupta an suaktâk nûnah a kum nihnâk a thla nihnâk a ni khat ni ah Sinai Ramkaro ah Pathian umnâk Puanin ah LALPA nih Mosi sinah thu a sim.
Mosi chu LALPA sawnh ding hen Puanin ah a lût liauah Thudântuk Bâwm sinh tlûnlei ah Thilsiam (cherubim) panih thla karah Pathian nih tlûnlei thawk hen a hawng sawnh mi a theih.