JOSUA 24:20 - Bawm Common Language Bible Version

²⁰ Ramdang mi pathian sawnh ding hen amah nan thlawrhthlâu chun a nan do na lai le, a nan rêp na lai, a lânah ṭha ngâi khawmsele a nan veih hep na lai,” a ti.

JOSUA 24:20 ပူးပေါင်းရင်းမြစ်များ

1 CHRONICLES 28:8

“Churuangah tuah ka mi tla, LALPA kan Pathian mâika ah leh Israel mi zapi mâika hin, LALPA kan Pathian nih thu hawng kan pêk mi chu thiamthih tak hen zûl ding hen kan fawrh na asi; chu tikah hi ram ṭha tak hi nanna ting kumza lai le, thlâk hawng um ding mi tla khawm nih nan sin thawk hen anna ting vima lai,” a ti.

1 CHRONICLES 28:9

Churawhchun, Solomon sinah, “Ka fapa, na pa Pathian chu thinlung lungkhat leh duhnâk nei hen a rianṭuan ding hen kan simh asi. Anih nih kan thinlung dawn leh kan duh mi zawzawng a theih hep. A sinah na kal chun a nan pawm lai. Sikhawmsele na hertâk chun a nan kaltâk pawt lai.

2 CHRONICLES 15:2

a sinah, “Lalchem Asa, nang leh Juda leh Benjamin mi zawzawng nih ka thu ngâi u, a lakah nan um kar zawng chu nan sinah LALPA a um. Amah nan hâwl chun nan tawng lai le, sikhawmsele nan her tâk chun anih khawm nih an kaltâk na lai.

Ezra lasuibu 8:22

Kawrsen rang tlûnah chuan mi murui kan kalnâk ah hawng kan vêng ding hen lal deih ding ka ningzak; a sinah kan Pathian nih amah rinhsanhtu âuzawng mal a sâwm na le, amah lawmhtirlotu leh hawitâktu lam chu âuzawng a rêp na ti hen ka simh rawh ruangah.

SAM 89:31

ka sîntir na nâk an sunhsak lo hen ka thupêk tla an kil lo chun,

ISAI 1:28

Sikhawmsele, a lakah sualtu leh heltu tla chu a veih na lai le; amah kaltâktu zawng chu a thah na lai.

ISAI 63:10

sikhawmsele a lakah an hel le, a ngaih an siatir. Churawhchun, LALPA chu an mêlma ah â chang le, a do na rawh.

JEREMIA 17:13

LALPA, nang chu Israel lungumnâk na si le; nang rangah an kaltâktu zawng chu ningzak saih hen an um lai. Nang, LALPA tinungva thar a nan kaltâk ruangah phildip lakah min rîn hâwi hen an vei lai.

EZEKIEL 18:24

“Sikhawmsele, mirep nih thil ṭha ti a bâng hen, thilsual ti a dawmh sele, misual nih an ti mi thil fihnungkâi ti sele, a nung lai ma? Nung lai lo! A thil ṭha ti tla zeikhawm theih piak asi lai lo. Zumh a kâilonâk leh a sualnâk ruangah a thi lai.

THILTI 7:42

Chun, Pathian nih a hawitâk na le, vân ah ârfi tla mâi an mûk khonâk ding hen annih tla chu a hawitâk na rawh, khuavâng lasuibu ah: ‘Israel phun le tla, ramkaro ah khan kum sâwmli karah sa thah hen leh ran thah hen kei nan hawng ka sawnh mazei?

DEUTERONOMY 4:25

“Chu ram ah chun sâwt tak nan um hen, fa tla, tu tla nan nei khawm ah zei lem banghpi khawm nan rangah siam hen sual lah u. Hi bang hi LALPA mitmuh hen sual asi le, a thinrunh tirnâk asi.

DEUTERONOMY 4:26

Theihpitu ding ah tusûn ni ah hin nanmah ruangah tual leh vân ka auh asi, ka thu nan ngâilo asi chun chu ram ah mi chu nan vei dep sawm lai. Jordan Va kanh hen nan va umnâk ding ram ah chun tam nan um sâwt lai lo. Nan vei dep lai.

HEBRAI 10:38

Sikhawmsele, ka mirep chu lungnâk hen a nung lai, dunglei ah a kîr lam chun amah lakah lâwmnâk rêng ka nei lai loh,” a ti.

JOSUA 24:21

Mi zapi nih Josua sinah, “Silo! LALPA rian kan ṭuan awt,” an ti.

1 SAMUEL 12:15

Sikhawmsele LALPA thu chu nan ngâi duh lo hen a thupêk tla nan zûl lo chun nan lalchem leh nanmah tlûnah Pathian a lungsi lai lo.

1 SAMUEL 12:25

Sikhawmsele, sualnâk nan ti kumza chun nan lalchem leh nanmah hen nan vei lai,” a ti.