JOHAN 5:30 - Bawm Common Language Bible Version

³⁰ “Keimah thu hen zeikhawm ka ti kho lo; Pa nih hawng ka simh hâwi vima hen lâi ka rêl tâwn, ka lâirêl chu dik tak asi, keimah thu thu hen um ka tum lo le, hawng ka fialtu duhzia hen um ka tum tâwn ruangah.

JOHAN 5:30 ပူးပေါင်းရင်းမြစ်များ

GENESIS 18:25

Sual nei lo mi chu sual nei mi hen bang cho hen na thah rîlmâl lai lo. Chu chu ti kho asi lo! Na thah duh rerêng lai lo. Na hei ti bâk chun, sual nei lo mi chu sual nei mi tla hen munkhat hen rêp an si awt, chu hâwi chu ti kho asi lo. Tual tlûn zawzawngah lâirêltu nih rep tak hen ti ding asi ruangah,” a ti.

SAM 96:13

lâirêl ding hen LALPA a hawng tik chun laikulh mi chu dik tak leh ṭha tak hen lâi a rêl piak na lai.

ISAI 28:6

Lâirêltu tla sinah chun dik tak hen theihnâk a pêk na lai le, dotu tla lakah khuapi kulh kawtkâ vêngtu tla chu râlṭhatnâk a pêk na lai.

ZEPHANIAH 3:15

LALPA nih an rêp na mi a dawngtir rawh, nan mêlma tla khawm a kiangtir ver rawh. LALPA, Israel Pathian chu nan sinah a um le, tu chun zeikhawm ṭih ding a um lo rawh.

MATHAI 26:39

Chun, tâwm hen mâi leiah a va kal le, a bawkbukhup le, “Ka Pa, tikho asi chun hi hâi nih hin hawng ka lanh seh; sikhawmsele keimah thu silo hen, nangmah thu thu si dauh seh,” ti hen thla a cham.

JOHAN 14:10

Kei Pa lakah ka um leh Pa keimah lakah a um ti na lung lo ma? Nan sinah thu ka sim mi hi, keimah phuak sawm hen ka sim lo; Pa keimah lakah a um kumza le, a thil a ti dauh tâwn asi.

JOHAN 17:4

Nangnih thil ti ding na hawng ka pêk mi kha ka ti dih le, tual ah ka nan chawnglawmh rawh.

JOHAN 18:11

Chun, Jisu nih Peter sinah, “Nâmsâu kha a kâwng ah khumh nawlh rawh; Pa nih hâi hawng ka pêk mi hi ka din lo lai ma?” a ti.

JOHAN 4:34

Chun, Jisu nih an sinah a sim le, “Hawng ka fialtu duhzia ti leh a rianṭuan dih ding hi ka buh asi.

JOHAN 5:19

Chun, Jisu nih an sinah, “Thungâi tak hen ka nan simh na, Fapa nih amah ko hen zeikhawm a ti kho lo, Pa thilti a muh mi cho lo chu; thil a ti mi hâwi zawng chu, Fapa khawm nih a ti bâk tâwn.

JOHAN 6:38

Mah duhzia ti ding hen vân thawk hen hawng ṭum kasi lo le, hawng ka fialtu duhzia ti ding hen hawng ṭum kasi dauh.

JOHAN 8:28

Chuvachun, Jisu nih, “Nannih nih Minung Fapa hi nan thlâi tikah, anih chu kasi ti leh kei nih mah thu hen zei thil khawm ka ti lo, Pa nih hawng ka simh hâwi vima hen hi bang thu hi ka sim dauh asi ti nan theih teh lai.

JOHAN 8:42

Jisu nih an sinah, “Pathian nan pa asi chun, nan hawng ka dâwt lai; Pathian sinah suak le, amah sin thawk hen hawng kal kasi; keimah thu hen hawng kal kasi lo, amah fial mi kasi dauh.

JOHAN 8:50

Sikhawmsele, mah rokualnâk hâwl kasi lo; a hâwltu leh a lâirêltu mi pakhat a um.

ROM 15:3

Krist khawm nih mah lawmhnâk a hâwl lo. “Nangmah fâitu tla fâinâk chu keimah tlûnah a tlâ,” ti rîn hâwi khan asi dauh.

ROM 2:2

Chu hâwi thil ti tâwntu tla tlûnah chun Pathian nih a lâirêlnâk chu dik tak asi vima asi ti kan theih.

ROM 2:5

Thinlung lianhnâk leh thinlung khauhnâk nan nei. Churuangah Pathian thinrunhnâk leh lâirêlnâk dik tak a hawng lang tik Ni ah chun nanmah rêpnâk lian dauh nan siam asi.