JOHAN 17:21 - Bawm Common Language Bible Version

²¹ An ektê hen pumkhat an si khonâk ding hen thla ka cham. Pa, nang keimah lakah na um mi leh kei nangmah lakah ka um hâwi hen, annih khawm kanmah lakah an umnâk ding hen; nangnih kei na ka fial ti laikulh nih an lung khonâk ding hen.

JOHAN 17:21 ပူးပေါင်းရင်းမြစ်များ

JEREMIA 32:39

Dam sungah tumnâk pakhat cho ka pêk na lai le; zeiliau zawng ah an hawng ka zah ding hen, anmah leh an thlâk tla ṭhatnâk ding hen.

ZEPHANIAH 3:9

“Churawhchun, phun tla lakah minung tla chu an umdân ka dangtir lai le, pathian dang sawnhlo hen keimah cho an hawng ka sawnh lai rawh. An ektê hen an hawng ka lung hep lai rawh.

ZEKARIA 14:9

Churawhchun, LALPA chu tual pumpi tlûnah lal asi lai le, mikip nih amah chu an sawnh lai le, a min an theih dân â bang rang lai.

MARK 3:24

Ram khawm mah leh mah a do chun, chu ram chu a dîr kho lai lo.

JOHAN 10:16

Chun, hi dawrâ kulh ah mi lo hi dawrâ dang ka nei; annih khawm ka hawngpi na ding asi, ka aw an ngâ lai; chuvachun rual khat hen an um lai le, vêngtu pakhat hen.

JOHAN 10:30

Kei leh Pa chu pumkhat kan si,” ti hen a sâng.

JOHAN 10:38

Sikhawmsele, ṭuan kasi chun, kei hawng ka lunglo khawm ule, rianṭuan tla hi lung u; Pa keimah lakah a um ti leh kei Pa lakah ka um ti nan theih hen leh nan theihthiam khonâk ding hen,” a ti le, a sâng.

JOHAN 11:42

Ka thu na ka ngâi piak kumza ti ka theih asi; sikhawmsele, mi zapi hêl buk dîr mi tla ruangah chun chu chu ka sim asi, nangnih na ka fial ti an lung khonâk ding hen,” a ti.

JOHAN 13:32

Pathian nih amah lakah chun anih chu a chawnglawmh lai, a chawnglawmh sawm lai.

JOHAN 13:35

Nanna dâwt chun, mi zawzawng nih ka ṭhiruai tla nan si ti chu lak chun an theih na lai,” a ti.

JOHAN 17:11

Chun, kei lam chu laikulh ah ka um lai lo rawh, hi bang tla lam chu laikulh ah an um, kei na sinah ka hawng awt rawh. Pa Thenhlimh, nangnih kei na ka pêk mi tla hi na min hen hum rawh, pumkhat ansi khonâk ding hen, kanmah pumkhat kan si hâwi hen.

JOHAN 17:18

Nangnih laikulh ah na ka fial hâwi khan, kei khawm nih annih chu laikulh ah ka fial na hi.

JOHAN 17:20

“Hi bang tla rang cho hin ngiar piak kasi lo, an thu ruangah kei hawng ka zumh ding mi tla rang khawm ah ngiar piak kasi.

JOHAN 17:25

Pa rep tak, laikulh nih chun an theih lo le, kei lam nih chun ka nan theih; hi bang tla khawm nih hin nangnih kei na ka fial ti an theih rawh.

JOHAN 17:3

Hi hi zungzâl nungnâk asi, nang Pathian tak cho leh na fial mi Jisu Krist theih hi.

JOHAN 17:8

Nangnih thu na ka pêk mi tla kha an sinah ka pêk rawh ruangah; chubang chu an tawng le, na sinah thawk hen suak kasi ti dik tak hen an theih rawh, nangnih na ka fial ti khawm an lung rawh.

JOHAN 3:17

Laikulh mawhtir ding hen Pathian nih a Fapa laikulh ah a fial lo, laikulh amah ruangah ruangsuah hen an um khonâk ding hen a fial dauh asi.

JOHAN 5:23

mi zawzawng nih Pa an zah hâwi hen, Fapa khawm an zahnâk ding hen. Âuzawng Fapa zahlo chu, Pa a fialtu khawm zahlo asi.

THILTI 2:46

Chun, nisiar thinlung munkhat hen Pathian Biakin ah chun ṭhanem ngâi tak hen an um tâwn le, an in lei tla khawm ah sang an phel le, lâwptlo leh lungâwi tak hen buh an ei tâwn le,

THILTI 4:32

Chun, a lungtu mi zapi tla chu thinlung munkhat leh dawnruatnâk munkhat hen an um; an lakah pakhat khawm nih an thil neih, “Ka tâ bîk asi,” an ti lo; thil zawzawng anna bâwm ver tâwn.

ROM 12:5

chu hâwi ber hen, kannih tam tak sikhawmsele, Krist lakah chun taksa pumkhat kan si le, pakhat khat hen a ṭeng tawnh chiau kan si.

1 KORIN 1:10

Chun, unau le tla, nan ektê hen thu bang cho nan sim hen, nan lakah ṭhennâk rêng a um lonâk ding hen, thinlung munkhat leh dawnruatnâk munkhat hen nanna tlâi thlir khonâk ding hen kan Lalpa Jisu Krist min hen ka nan ngiar na.

1 KORIN 12:12

Taksa hi pumkhat asi, ṭeng tam tak a nei le, taksa ṭeng tla zawzawng chu tam khawmsele taksa pumkhat an si le, Krist chu chu hâwi ber chu asi.

1 KORIN 6:17

Lalpa lakah a pêk mi lam chu amah hen Thlarau pumkhat an si.

GALATIA 3:28

Chunah chun Juda mi a um kho lo le, Greek mi khawm a um kho ber lo, chunah chun to-aw a um kho lo le, to-aw lo khawm a um kho ber lo, chunah chun mipa leh nunau khawm a um kho ber lo; Krist Jisu lakah nan ektê hen pakhat nan si ruangah.

PHILIPI 1:27

Zeikhawm si sele, nan umdân chu Krist Thâwngthâng Ṭha hen a êp ta seh, chun, nanmah tla an veh na khawmsele, nan sinah um lo khawmsele thlarau munkhat ah dîr thlir hen thinlung munkhat ah Thâwngthâng Ṭha lungnâk thu chu ṭanh leh ṭuan dut hen,

1 JOHAN 1:3

Churuangah kan muh hen kan theih mi chu kan simh na bâk asi, nannih khawm nih Pa leh Fapa Jisu Krist kawmhnâk ah kanna khat khonâk ding hen.

1 JOHAN 5:7

Theihpitu chu pathum an um,