ISAI 50:1 - Bawm Common Language Bible Version

¹ LALPA nih, “Mi nih a nupi a mâk mi hâwi hen ka mi tla hi kaltir ving ding hen ma nan ruat? Asi chun, mâknâk lasui zeiah a um? Mi nih a fa tla sal ah a zuar ving na mi hâwi hen sal ah an zuar ving na hen ma nan ka ruat? Silo, nan sual ruangah sal ah put hen nan um mi asi; thilsual nan ti ruangah nar hen nan um mi asi.

ISAI 50:1 ပူးပေါင်းရင်းမြစ်များ

1 Lal 21:25

(Ahab hâwi hen sualnâk lakah pumpêk tlaktu âukhawm an um lo; chu zawng fawrhtu chu a nupi Jezebel asi.

2 Lal 17:17

Chu lunglotu pathian sinah an fanu leh an fapa tla bâwlnâk ah mang hen an ap rawh, dâwithiam leh chamchawh thiam sinah krai anna khâi, LALPA mitmuh hen thil diklo ti ding hen anna pumpêk tlak le, LALPA thin an thawktir.

2 Lal 4:1

Khuavâng murui lakah mi numei pakhat chu Elisa sinah a va kal le, a sinah, “Pu, ka pasal chu a thi rawh, na theih rawh hâwi hen anih chu Pathian ṭih mi asi le, sikhawmsele, lei a batnâk ruangah mi nih ka fapa panih hi lei ruangrûl ah sal ah an ruai awt,” a ti.

NEHEMIAH 5:5

Kannih khawm kan hâwi Juda tla hen phun khat kan si dangâiah. Kannih fa tla khawm anmah fa tla hâwi hen an ṭha bâk lo ma? Kan fa tla chu sal ah kan siam ver na awt rawh. Kan fanu zei mi châng chu sal ah kan zuar ving na rawh. Kan phâisen leh kan grep dûm tla hawng kan lâk piak ving rawh ruangah a ti dân kan thiamlo rawh,” an ti.

ESTHER 7:4

Kei leh ka mi tla chu thah ding hen zuar asi rawh. Sal ah zuar mi ngâk hen a fâk dauh rawh, chu thu ruangah nangmah nawktir lo hen dâisip hen um ka tum le, sikhawmsele veih dep ding leh mih dep ding kan si ruangah dâisip hen um kho asi lo!” a ti.

SAM 44:12

A man tâwmtê hen na mi tla chu na zuar na, man tâwmtê ding cho ah na ruat na hâwi hen.

EXODUS 21:7

“Mi nih a fanu sal ah a zuar chun, mipa sal si mi tla hâwi hen a suak ding si loh.

ISAI 1:28

Sikhawmsele, a lakah sualtu leh heltu tla chu a veih na lai le; amah kaltâktu zawng chu a thah na lai.

ISAI 27:8

LALPA nih a mi tla chu sal ah kaltir na hen a rêp na. Saklei mi thli ṭhalo hen a put ving na.

ISAI 43:27

A tîrah mi a nan thlâk natu khawm an sual; an rui natu khawm ka lakah thilsual an ti.

ISAI 46:8

“Nannih misual tla, hi hi theih u; ka thilti tla dawn u.

ISAI 52:3

LALPA Zahkâi nih a mi le tla sinah, “Sal nan si liau khawm ah nanmah ruangah tangka pêk asi lo hâwi hen nan suak liau khawm ah pêk asi lai lo.

ISAI 54:6

Israel, nang chu seino nungâk a pasal nih a kaltâk le thungâi a lungfâk mi hâwi na si. Sikhawmsele, LALPA nih a nan kawh nawlh le, na sinah:

ISAI 54:7

“Sâwtlotê kar chu ka nan mâk le; dâwtnâk fâk tak hen ka nan lâk nawlh lai.

ISAI 58:1

LALPA nih, “A fâk kho rirî hen âu le, ka mi Israel tla an sual thu simh na.

ISAI 64:6

Kan ektê hen misual kan si; kan thilti ṭha chem khawm a nâwm mi hep asi. Kan sual ruangah thingnah a uai mi thli nih a sêm ving mi hâwi kan si.

JEREMIA 3:1

LALPA nih, “Mi nih nupi a mâk hen, amah a kaltâk nûnah midang nupi asi rawh chun a lâk nawlh kho lai lo rawh. Chu nih chun ram chu a nawmh dep lai. Sikhawmsele, Israel, duh mi tam tak na nei le, tuah ka sinah hawng kîr ding na duh!

JEREMIA 3:8

Israel chu hawng ka hawitâk hen nunau â zuar mi asi rawh ruangah ka mâk le, ka nar ving mi Juda khawm nih a muh. Sikhawmsele Juda, Israel zumhkâilo unaunu nih a ṭih lo thlo. Amah khawm â zuar le,

JEREMIA 4:18

Juda, nangmah umdân leh thil na ti mi hen, nangmah tlûnah hi hi na tlungtir mi asi. Na sualnâk nih hi tuarnâk hi a umtir hen na thinlung a sunh asi.

HOSEA 4:5

Sûn leh zân hen mi nan râwk le, khuavâng tla khawm nannih ngâk hen an ṭha khun lêm lo. Israel, nan nu ka veih awt.

LEVITICUS 25:39

Nanmah Israel mi nan kiangkam ah um mi, a pâm tuk ah nan sal ah â rawnh chun, sal hâwi hen rian nan ṭuantir ding asi lo.

MATHAI 18:25

Chun, pêk ding a nei lo ruangah a pu nih chun amah hen a nupi hen, a fa tla hen, a neih zawzawng zuar hen rulh ding thu a pêk.

DEUTERONOMY 32:30

Zei ruangah minung pakhat nih minung sâng khat a neh na hen, Minung panih nih sâng râ an neh na zia? LALPA an Pathian nih a kaltâk na le; an Pathian chak nih anmah rangah a pêk na ruangah asi.