HOSEA 7:1 - Bawm Common Language Bible Version

¹ “Ka mi Israel tla damh na ding leh an sul-le-lam tluangtir ka duh zâwn khawm ah an sualnâk leh an ṭhatlonâk zawzawng ka muh tâwn. Pakhat leh pakhat anna perpet; in tla an siat le thil an fîr, zâwllâi ah mi an rawk.

HOSEA 7:1 ပူးပေါင်းရင်းမြစ်များ

ISAI 28:1

Israel lalram chu a vânduai rawh! A rokualnâk chu a ruitu zurî lû ah chawmpâr lallukhuh hâwi hen a nawh rawh. Anna zumhnâk lû chu rimthâw an thuh le, sikhawmsele chunah chun zurî bû hen an rîl ko.

ISAI 59:12

“LALPA, na lakah kan thilsual ti thungâi a tam. Kan sualnâk tla nih hawng kan phiar. Chubang tla lakah kan theihthiam.

ISAI 59:13

Na lakah kan hel le, kan nawng le, a nan zûl ding kan êl. Midang rangah kan nehsawh le, kâng dang leiah kan hawitâk. Kan thinlung dawn khawm a diklo rawh, kan thusim tla khawm âwkrâwl asi.

ISAI 59:14

Diknâk chu nar ving asi le, diknâk nih hawng kan naih kho lo rawh. Zapi nâwngah thudik chu a um kho lo rawh, chunah chun zumhkâinâk nih mun a tawng lo.

JEREMIA 51:9

Chunah ramdang minung um mi tla nih, ‘Babulon mi tla chu ṭangpi kan tum le, sikhawmsele a tlâi tuk rawh. Churuangah tuah kan mâk thlap lai le, in leiah kan kîr lai. Pathian nih Babulon mi tla chu a chaknâk zawzawng hen a rêp le a veih rawh,’ ” a ti.

EZEKIEL 16:46

Na unu chu Samaria, a khua tla hen marlei ah um mi asi. Na naunu chu Sodom, a khua tla hen simlei kângah um mi asi.

EZEKIEL 23:4

A upa dauh mi min chu Oholah (chu chu Samaria zauhtirnâk asi le), a ngâksia dauh mi min chu Oholibah asi, (chu nih chun Jerusalem a zauhtir.) An panih hen ka umpi na le, fa tla an ka ring piak.

EZEKIEL 24:13

Jerusalem, na hurnâk thilti nih a nan nawmh. Thiangtir ding ka nan tum khawm ah na nâwm nget rih. Ka thinthawknâk zawzawng na theih lânlo chu na thiang ding asi lo rawh.

HOSEA 10:5

Samaria khuapi ah um mi tla chu an lâu lai le, Bethel ah an ngûn chawchal lem an thlâu mi ruangah lungfâknâk an nei lai. Anmah leh milem sawnhtu bâwlpu tla nih an ṭappi lai. An ngûn milem rokual chu a vei tikah thungâi an lungfâkpi lai.

HOSEA 11:12

LALPA nih, “Israel nih an âwkrâwl thusim leh an perpetnâk nih an hawng ka kulh pang. Juda mi tla khawm nih, kei, mi zumhkâi leh Pathian thenhlimh tlûnah an hel kumza nget rih.

HOSEA 11:8

“Israel, zeitin kan mâk kho na lai? Zeitin hen kan kaltâk kho na lai? Admah ka râwk mi hâwi hen kan râwk na hen Zeboim ka ti mi hâwi hen kan tikho na lai ma? hâwi ti ding hen ka thinlung ah a um lo. Ka nan dâwt na nâk a fâk tuktarâi:

HOSEA 12:1

Israel tla nih zîngtê thawk hen zân tiang an ti mi chu thil mang tlâklo leh siatnâk asi. Zumhkâilonâk leh siatnâk thilti an lakah a pung. Asiria mi tla leh Aigupta mi tla hen saw anna leh tawnh,” a ti.

HOSEA 12:2

LALPA nih Juda le tlûnah sâwinâk a nei; Israel khawm thilsual an ti ruangah a rêp na awt. An thilti man a pêk na awt.

HOSEA 4:17

Israel mi tla chu milem thu thu hen an um mi. Anmah duhzia hen umtir na ko u.

HOSEA 4:2

Thu an tiamh le, an buar lîlâ, âwkrâwl an sim, mi an thah, an fîr, ṭângdang an pawm, buarnâk a pung, pakhat leh pakhat thahnâk a um.

HOSEA 5:1

“Nannih bâwlpu tla, hi hi ngâi u! Israel mi tla, ngâi u! Nannih lal dâwngsung si mi tla, ngâi u! Dik tak hen lâi nan rêl ding asi. Nan tlûnah lâirêlnâk a hawng tlung lai. Mizpah ah chun thang nan si le, Tabor tlâng tlûnah lên zâr mi nan si,

HOSEA 6:4

Sikhawmsele LALPA nih, “Israel leh Juda, zeitin ka nan ti na awt? Nan hawng ka dâwtnâk chu zînglei sûm a vei chawlh mi hâwi asi, damtî zînglei ah a vei mi hâwi asi.

HOSEA 7:13

“An vânduai rawh! An ka nawng le, ka lakah an hel. An vei lai, hum na ding ka duh le, sikhawmsele an ka sawnh dân a diklo.

HOSEA 8:5

Samaria khuapi mi tla nih ngûn chawchal lem an sawnh mi chu ka hua asi. An lakah thungâi ka thin a run. Milem an sawnh mi hi zeitik riamruam ah me an bâng awt?

HOSEA 8:9

Mâng ah mi sanatung ê-aw ngâilo mi hâwi hen Israel chu amah thu thu hen a um, Asiria chu ṭangpi deih ding leh phundang tla chu hum na ding deih hen a kal ving.

AMOS 3:10

LALPA nih, “Hi bang mi tla nih hin dân buar leh siat leh râwk hen thil an lâk mi tla hen an in sung tla an khattir, zumhkâi hen um ding dân khawm an theih loh.

AMOS 3:9

Aigupta leh Asdod mun ah um mi tla sinah thu sim u, “Samaria kiangkam tlângah a pûm ule, chunah dân buarnâk leh nawknâk tla chu zauh u,” a ti.

AMOS 8:14

Samaria ah mi milem sâl hen thutiamtu tla, ‘Dan pathian’ min sâl hen thutiamtu tla, ‘Bersheba pathian’ min sâl hen thutiamtu tla chu an tlû lai le, an thawk nawlh lai lo rawh,” a ti.

MIKAH 6:16

Lal Omri thilsual ti dân leh a fapa lal Ahab thilsual ti dân nan zûl ruangah chubang chu a hawng tlung lai. An thilti dân nan châwng vima ruangah siatnâk ka hawng tlungtir lai le, mikip nih an zauhnawmh na lai. Munkip mi nih an siar na lai lo rawh.

MATHAI 23:37

“Aw Jerusalem, Jerusalem! Khuavâng tla thahtu, na sinah an hawng fial mi tla lung hen thi thlo hen sehtu! Ârpinu nih a fa tla a thla tangah a khurh na hâwi hen na fa tla vei zei zat me khurh ka tum mi kha! Sikhawmsele, na duh lo.

LUK 13:34

“Aw, Jerusalem! Jerusalem! khuavâng tla thahtu, na sinah Pathian nih a hawng fial mi tla lung hen thi thlap sehtu, ârpinu nih a fa tla a thla tangah a khurh hâwi hen na fa tla vei zei zat me khurh ka tum mi kha! Sikhawmsele, na duh lo.

LUK 19:42

“Aw, nang rîlmâl nih hin tu dam liau lungngamnâk ding thu hi hawng theih râm nik le! Sikhawmsele na muh lonâk ding hen â thup dangâiah.