2 KORIN 8:9 - Bawm Common Language Bible Version

⁹ Kan Lalpa Jisu Krist zângfahnâk chu a pâmnâk ruangah nan hawng nei khonâk ding hen, nei khawmsele nanmah ruang takah a hawng pâm mi kha nan theih asi.

2 KORIN 8:9 ပူးပေါင်းရင်းမြစ်များ

ISAI 53:2

Thil phun tual châr lakah a ram a thlâk mi hâwi hen a to-aw ṭhang ding mi chu LALPA duhzia asi. Amah kan theih khonâk ding hen rokualnâk leh dawhnâk khawm a nei lo. Amah lakah duhrim a kâinâk khawm a um lo le amah lakah va a bek ding hen duh san ding zeikhawm a um lo.

ISAI 62:1

Jerusalem fawrhnâk thu ka sim lai le; Him tak hen a um lânlo leh a nehnâk chu Zân ah mi meifâr hâwi asi lânlo chu ka dâisip awtlo.

ISAI 65:8

LALPA nih, “Pakhat khawm nih grep ṭha tla an râwk lo, chu ngâk hen chu hen chun uain an siam. Ka mi tla chu ka veih hep na lai lo le, ka nâwl zulhtu tla chu ka hum na lai.

MATHAI 17:27

Sikhawmsele, nang rilî ah va kal le, siau va thlâk le, ngâ a hawng suak masa mi chu tleih rawh. Chun a kâ na kêu kâ hen stater khat na muh lai; chu chu lâk le, kei leh nangmah rangah an sinah pêk na, chu lo chun annih chu an lung kan sitir lo lebang lai,” a ti.

MATHAI 20:28

Minung Fapa hi mi nih rianṭuan piak ding hen a hawng lo le, rianṭuan ding leh mi tam tak tlanhnâk ding ah a nungnâk pêk ding hen a hawng dauh asi,” a ti.

MATHAI 8:20

Chun, Jisu nih a sinah, “Kâwlui tla nih kua an nei le, tlûn zuang vâ tla nih bû an nei le, Minung Fapa lam nih chun a lû ngauhnâk a nei lo,” a ti.

MARK 6:3

Hi minung hi Mari fapa Jem, Josef, Juda, Simon leh a unaupa thing hen thil siamtu kha asi lo mazei? A farnu le khawm hinah kan sinah um an si lo mazei?” an ti le, thungâi chê an ti. Chun, a tlûnah an lungsilo rawh.

LUK 16:11

Sum telê lakah men zumh nan kâilo chun âunih me sum tak chu an kiltir na lai?

LUK 2:7

Chun, a fa tîr ah mipa a ring le; chun puan hen an tuam le, khual tlungnâk in ah mun a um lo ruangah ran râwl pêknâk khêng ah an ittir.

LUK 8:3

Herod sum kiltu Chuza nupi Joana, Susana leh midang tam tak tla hen an si. Chubang tla nih chun mah neih hen an eibâr an timhtuah piak tâwn.

LUK 9:58

Chun, Jisu nih a sinah, “Kâwlui tla nih kua an nei le, chungzuang va tla nih bû an nei le, Minung Fapa lam nih chun a lû ngauhnâk a nei lo,” a ti.

JOHAN 1:10

Anih chu laikulh ah a um, laikulh amah siam asi, laikulh nih amah an theih lo.

JOHAN 1:14

Thu chu minung ah a hawng a chang le, kan lakah a um rawh. A rokual zia kan muh. Zângfahnâk leh thudik hen a khat. Hi hi rokualnâk chu asi, Pa, Fapa neihlem hâwi a sinâk chu.

JOHAN 1:17

Dân Mosi nih a pêk, zângfahnâk leh thudik Jisu Krist ruangah a hawng um.

JOHAN 12:30

Jisu nih a sâng le, “Chu aw-hâu chu ka rangah suak asi lo, nanmah rangah asi dauh.

JOHAN 16:15

Pa nih thil a nei mi zawzawng ka tâ asi; churuangah, ‘Ka tâ lakah mi a lâk lai le, nan sinah a phuang lai,’ ka ti hi.

JOHAN 17:19

Anmah ruangah na sinah ka pêk, annih khawm nangmah sinah anna pêk bâk khonâk ding hen.

ROM 11:12

Churawhchun, Juda tla sualnâk chu laikulh neihsiahnâk asi, chun an thlarau ngâkṭahnâk chu Phundang tla rangah neihsiahnâk asi. An rangtlingnâk châng chu neihsiah khunnâk si lai.

ROM 15:3

Krist khawm nih mah lawmhnâk a hâwl lo. “Nangmah fâitu tla fâinâk chu keimah tlûnah a tlâ,” ti rîn hâwi khan asi dauh.

ROM 5:8

Sikhawmsele, Pathian nih chun a kan dâwtnâk chu sawr tlâk hen a langhtir le, misual tla kan si liauah Krist kan ruangrûl ah a thi ruang khan.

ROM 8:32

A Fapa tak khawm zuah lo hen kan ektê ruangrûl ah pêktu nih chun thil zawzawng khawm a thawt hen hawng kan pêk sih awtlo masi? Pathian mi thîm tla chu âunih phiar lai?

1 KORIN 1:4

Krist Jisu zârah a zângfahnâk nan sinah pêk mi ruang khan nanmah leikâng thu ah Pathian sinah lâwmthu ka sim kumza tâwn.

1 KORIN 15:47

Minung masa chem chu tual a mi valei hen siam asi; minung panihnâk chu vân ah mi asi.

2 KORIN 13:14

Lalpa Jisu Krist zângfahnâk leh Pathian zângfahnâk leh Thlarau Thenhlimh kawmhnâk chu nan ektê sinah um seh.

2 KORIN 6:10

ngaihsia hâwi hen, sikhawmsele lâwm kumza ṭung hen, mipâm hâwi hen, sikawmsele mi tam tak neitir ṭung hen; zeikhawm nei lo hâwi hen, sikhawmsele zeizawng nei ṭung hen.

EPHESI 2:7

Chun, tik hawng tlung ding mi lakah Krist Jisu ah kan tlûnah vêl nei hen a zângfahnâk neih fâk zia chu a zauhtir kho lai.

EPHESI 3:8

Phundang tla sinah Krist neihsiahnâk sût châwklo rê thâwngthâng sim ding leh thuthup zungzâl thawk hen Pathian zeizawng siamtu lakah thuh hen a um mi zauhkhenhnâk chu zeise asi ti, mi mêchem ngâk a mê dauh sinah chu zângfahnâk chu pêk asi.

KOLOSA 1:24

Tuah ka nan tuar piak na mi lakah hin ka lâwm, Krist hamh tuar mabân chu ka taksa ruangah ka tîttak ah hin ka zulhpeh vima asi;

1 TIMOTHE 6:18

Thil ṭha ti ding hen, thil ṭha ti tam ding hen, hawk hen, midang tla vauh bâk ding hen simh na.

HEBRAI 1:2

sikhawmsele ni dawngh lei tla ah chun a Fapa mang hen kan sinah thu a sim. Chu a Fapa chu zeizawng ah rotingtu ah a siam; chu nih chun laikulh khawm hi a siam.

JEM 2:5

Unau tla, ngâinik u, Pathian nih chun hi laikulh ah mipâm tla chu lungnâk nei tam ding leh amah dâwttu tla sinah Ram a tiamh mi luahtu ding hen a thîm na asi.

THUPHUANG 2:9

Nâ hamh zia tla, na pâm zia tla ka theih le, sikhawmsele, na nei ṭung fâwn! Juda tak silo hen, Juda kan si titu, Setan murui lakah mi tla nih a nan simsâwi mi chu ka theih.

THUPHUANG 21:7

A nehtu vial nih chubang tla chu ka sinah mi a tawng lai le, anih chu ka fa asi lai.

THUPHUANG 3:18

Minei na si khonâk ding hen ka sinah mi, ngûn thenhlimh châwk ding hen ka nan simh asi. Puanvâr na aih ding hen leh na takkaro ningzakkâi tak chu khuh ding leh na mit ah buaih ding hen mit fâk turpâng tla châwk ding ka nan simh asi, na muh khonâk ding hen.