1 Kan umnâk in- hi tual ah mi kan taksa hi siat khawmsele, vân ah, in kut hen sak lo mi, zungzâl um ding mi, Pathian sinah mi in bir chu kan nei ti kan theih.
Siam hen na umnâk valei ah na kîr nawlh lânlo chu, tual nih rah suah ding hen thlan suak hen hamh tak hen rian na ṭuan ding asi. Valei thawk hen siam na si le, valei lîlâ ah na chang nawlh lai,” a ti.
Ka nungâk chu puanin an lâwm mi hâwi leh, Puan tah mi thiam an tan phak mi hâwi hen a dawng rawh. Pathian nih ka nungnâk hi a dawngtir rawh hen ka ruat.
Kannih hi tual taksa ah um mi tla hi thilrit phurh hen kan rûm tatak asi, aih lo hen um kan duh ruangah asi lo le, aih hen um kan duh ruangah asi dauh, thi kho hi nungnâk nih dawlh dak hen a um khonâk ding hen.
Churuang chem asi, hi bang thil khawm hi ka tuar mi chu; sikhawmsele ka ningzak lo; ka lung mi Pathian chu ka theih, a sinah ka kiltir mi chu, chu Ni rang ding ah chun ṭha dek hen a kil kho ti dik tak hen ka theih ber.
Sikhawmsele, Krist chu thil ṭha a um rawh mi tla lakah Bâwlpu Lalchem hâwi hen a hawng kal asi. A ṭuannâk puanin chu a rokual hen a rangtling asi (kut hen sak mi asi loh, chu chu hi laikulh siam mi lakah mi asi loh tinâk asi),
Krist chu kut hen sak mi mun thenhlimh, a tak banghtu ah chun a lût lo le; tu ah Pathian mâika ah kan ruangrûl ah dîr ding hen vân ngelchel ah a lût dauh rawh.
Churuangah, a mi tla rangah Pathian nih a siah mi malsâwmnâk rokual tak tla ting ding hen kan chuanh asi. Chu tla chu râwkkholo leh, nâwmtâm kâi lo leh nawh kholonâk mun vân ah nan rangah a nan kil piak na asi.
Kan unau tla kan zângfah ruangah thihnâk ah mi kan suak le, nungnâk ah kan lût rawh ti kan theih. Âuzawng chu hâwi ti lotu chu thihnâk ah a um kumza asi.
Duhtak tla, tuhin Pathian fa tla kan si le, zei hâwi hen kan um awt ti lam chu a lang lo rih, amah a hawng a langh tikah amah hâwi hen kan um awt ti lam chu kan theih, amah chu a umdân hâwitê hen kan muh awt.