2 KORIN 4:5 - Bawm Common Language Bible Version

⁵ Mah thu kan sim lo le, Krist Jisu chu “Lalpa asi” ti kan sim dauh tâwn, kannih khawm Jisu ruangah nan to-aw kan si ti kan sim tâwn.

2 KORIN 4:5 ပူးပေါင်းရင်းမြစ်များ

MATHAI 23:8

Nannih lam chu ‘Sîntirtu,’ ti ding hen um lah u, an sîntir natu chu pakhat asi le, nannih vial chu unau nan si.

MATHAI 3:11

Kei lam nih chun nan rimnâk ding hen tî hen ka nan baptis na; sikhawmsele, ka dunglei ah a hawng kal ding mi chu keimah ngâk hen a rokual dauh le, a pheikawk put tlâk khawm kasi lo, anih nih chun Thlarau Thenhlimh leh mei hen a nan baptis na lai.

JOHAN 7:18

Âuzawng mah phuak sawm hen thusimtu chu, mah rokualnâk hâwltu asi; a fialtu rokualnâk hâwltu lam chu, chu chu mi dik tak asi, amah lakah chun diklonâk rerêng a um lo.

THILTI 10:36

Anih nih chun lungngamnâk Thâwngthâng Ṭha Jisu Krist kâ ah sim hen, Israel thlâk tla sinah thu a kuat le, (Jisu chu mi zawzawng Lalpa asi.)

THILTI 2:36

“Chun, Jisu nan khenhbêk mi ngelchel kha Pathian nih Lal leh Mesia si hen a siam rawh ti Israel phun kip nih theih chiau seh,” a ti.

THILTI 5:31

Amah ngelchel kha Pathian nih Ruitu leh Ruangsuahtu rangah um ding hen a vawrhlei ah a chawnglawmh rawh, Israel tla sual rimtir ding leh ngaihdam ding hen.

1 KORIN 1:23

Kannih lam nih chun Krist khenhbêknâk thu kan sim tâwn asi; chu chu Juda tla rangah chun tlûknâk, Phundang tla rangah chun âtnâk asi.

1 KORIN 12:3

Churuangah, âukhawm nih Pathian Thlarau ah thusim hen, “Jisu chu siat phurh asi,” an ti dahlo; chun âukhawm nih Thlarau Thenhlimh ah cho lo chun “Jisu chu Lalpa asi,” an ti kho dahlo ti ka nan theihtir na.

1 KORIN 15:47

Minung masa chem chu tual a mi valei hen siam asi; minung panihnâk chu vân ah mi asi.

1 KORIN 2:2

Jisu Krist, amah ngelchel khenhbêk hen a um mi thu cho lo chu nan lakah zeikhawm theih ka tum lo kha.

1 KORIN 4:15

Krist lakah chun sîntirtu sîngkhat nei khawm ule, pa lam chu tam tak nan nei lo asi; kei nih Krist Jisu ah chun Thâwngthâng Ṭha hen ka nan ring na kha.

1 KORIN 8:6

Amah sin thawk hen zeizawng a suak le, kannih khawm amah rangah um kan si; Lalpa pakhat cho Jisu Krist chu a um, amah ruangah zeizawng a um, kannih khawm amah ruang ber ah um mi kan si.

2 KORIN 1:19

Pathian Fapa Jisu Krist a thu, kei leh Silas leh Timothe nih nan lakah kan sim mi kha “Asi,” leh ‘Asi lo,” asi ṭung lêm lo, amah Pathian lakah chun, “Asi,” ti a um dauh asi.

2 KORIN 1:24

Nan lungnâk lakah lalnâk ka nei ka ti lo le, nanna lâwmnâk ṭangpitu kan si ka ti dauh asi; lungnâk ah dîr nan si dangâiah.

GALATIA 5:13

Unau tla, sal silo ding hen kawh nan si; sikhawmsele, sal nan si lonâk chu taksa rangah dêngkhâwngnâk ah mang lah ule, zângfahnâk hen rian a ṭuan piak tawnh chiau u.

PHILIPI 1:15

Zeimaw mi nih chun nahsuah leh elnâk ruang khawm ah Krist thu an phuang tâwn; zeimaw mi nih chun lâwm ruangah an phuang tâwn;

PHILIPI 2:11

Pa Pathian rokualnâk ding hen, lei kip nih, “Jisu Krist chu Lalpa asi,” ti hen, an phuang lai.

2 TIMOTHE 2:10

Churuangah, Jisu Krist lakah um mi ruangsuahnâk chu, zungzâl a rokualnâk hen an tawng kho bâk nâk ding hen, thîm tla ruang chun zeizawng ka tuar tâwn.

TITA 1:11

Chubang tla kâ chu huh piak na ding asi, lêpnâk nâwmtam duh ruangah thu sîntir lo ding mi sîntir hen, mi tla a dâwngsungkhur khur hen an râwk na tâwn.

2 PETER 2:3

Chun, sîntirtu diklo tla nih chun âwkrâwl thu hen sawlehnâk ah an mang na lai. Sikhawmsele, tuan thawk hen an rangah lâirêlnâk chu timh chia asi le, anmah tla tlâutirtu khawm a it lo asi.