1 KORIN 5:1 - Bawm Common Language Bible Version

¹ Nan lakah pung le lêngnâk a um ti thu a thang chiam asi. Chu hâwi pung le lêngnâk chu Phundang tla lak khawm ah a um lo mi, nan lakah mi pakhat nih a nu-ei a umpi kha.

1 KORIN 5:1 ပူးပေါင်းရင်းမြစ်များ

GENESIS 35:22

Jakob chu chu ram ah a um liau chun, Reuben nih a pa nupisûn Bilhah chu a ihpi le, Jakob nih a theih le, thungâi a thinthawk. Jakob nih fapa leinih a nei.

GENESIS 37:2

hi bang tla hi Jakob dâwngsung thâwngthâng asi: Josef chu kum leisarih asi ah a û le hen, dawrâ leh kêl an zauhkhenh, chu a unau tla chu a pa nupisûn Zilpah leh Bilhah nih an ring mi fa tla an si. Josef nih a unau tla thâwngthâng chu a pa sinah a sia leikâng hen a sim.

GENESIS 49:4

Nang chu tîlian hâu hâwi na si, Sikhawmsele, mi herh chem chu na si lai lo, Ka nupisûn na ihpi ruangah leh ka ihkhun na nawmh ruangah.

2 SAMUEL 16:22

Churawhchun, lal in tlûnah puan an zâr le, âuzawng muh hen Absalom chu in sungah a lût le, a pa nupisûn tla chu a ihpi na rawh.

2 SAMUEL 20:3

David chu Jerusalem a tlung rawh chun lal in ngâktu ding ah a mâk na mi a nupisûn parâ a kawh na le, vêngtu an rangah siah hen an thil herh tla a pêk na. Sikhawmsele an sinah a it a zâu lo. An dam kar zawzawng chu numei hâwi hen a siah na ko.

1 CHRONICLES 5:1

Hi bang tla hi Jakob fapa lakah upachem mi Reuben thlâk tla an si: (a pa nupisûn lakah mi pakhat a ihpi ruangah a fa tîr sinâk a thlâu le, fa tîr sinâk chu Josef rangah pêk asi.

JEREMIA 2:33

Duh mi tla zûl chu zei hâwi asi, na theihthiam asi. Nunau sual chem khawm nih nangmah lakah theihthiamnâk a nei kho.

EZEKIEL 16:47

An umdân zûl hen thil fihnungkâi an ti mi châwng chu na duh zia asi mu? Silo, sâwtlotê ah thil zeizawng na ti mi lakah na umdân chu anmah umdân ngâk hen a ṭhalo dauh.

EZEKIEL 22:10

A zeimaw mi nih an pa nupi an ihpi. A zeimaw mi nih thi an nei liauah tleihrêm hen an ihpi na.

LEVITICUS 18:8

Na pa nupi tla âu hen khawm ihpi hen na pa rangah mualphoh lah.

LEVITICUS 20:11

Mi nih a pa nupi a ihpi chun a pa a mualphoh asi, nunau leh mipa an panih hen thah na ding asi, anmah thihnâk chu anmah mawh asi.

AMOS 2:7

Mi chaklo leh ṭangpi nei lo chu an lamhbêk na le, mipâm tla lampi ah mi chu an tul ving na. Mi nih an pa fa hen an salnu chu an ihpi le, ka min thenhlimh an nawmh.

THILTI 15:20

ruk sawnhnâk thil nâwmtâm ei tla, pungnâk tla, sa rawm dît hen thah leh thisen ei tla bângtâk ding hen an sinah lasui kuat sele ka ti asi.

THILTI 15:29

Ruk sawnhnâk sa ei tla, thisen ei tla, pungnâk tla bângtâk ule kan ti; hi bang hi nan bâng chun nan rangah a ṭha lai. Dam hen um u,” ti hen.

1 KORIN 1:11

Ka unau le tla, nan thu chu nan lakah êlnâk tla a um ti hen Kloi dâwngsung tla nih an ka simh asi.

1 KORIN 5:11

Tu lam chun âuzawng unau min put ṭung hen pung-le-lêng mang mi mawh, mi duhlei mawh, ruk sawnh mi mawh, mi fâi mang mawh, zûrît mang mawh, lêp mang mawh hawng sele kawmh lo ding hen nan sinah ka rîn asi; chu hâwi mi sinah chun ei khawm ei lo ding hen.

1 KORIN 6:13

“Ei ding tla chu paw rangah asi, paw chu ei ding tla rangah asi. Sikhawmsele, Pathian nih a tlâutir vevê lai. Chun, taksa hi pung le lêngnâk asi lo le, Lalpa rangah asi dauh; Lalpa khawm taksa rangah asi.

1 KORIN 6:18

Pung le lêngnâk hi tektâk u. Minung thil tisual zeizawng hi taksa lênglei ah asi; pung-le-lêng mang chu amah taksa tlûnah thilsual a ti asi.

1 KORIN 6:9

Asi chun, mirep lo tla nih chun Pathian Ram an luah lai loh ti nan theih lo masi? Perpet hen um lah u; pung-le-lêng mang tla mawh, ruk sawnh tla mawh, ṭângdang pawmtâktu tla mawh, mi hur tla mawh, tawkua hur tla mawh,

2 KORIN 12:21

ka hawng kal tikah ka Pathian nih nan lakah a hawng ka mualphoh nawlh hen, a lân thilsual titu tla lakah thil nâwmtâm ti tla, a duh mi tla, hur tla ching hen rim lo mi, mi tam tak tla chu ka ṭappi na lai ti ka ṭih asi.

2 KORIN 2:5

Sikhawmsele, âuzawng nih mi a ngaihsiattir chun keimah nan hawng ka ngaihsiattir lo le, ka ti tuk lonâk ding hen, nan ektê hen, asi lo leh, nan lakah mi zeimaw mi an ngaihsiattir na chiam asi.

2 KORIN 7:12

Chun nan sinah rîn khawmsele a sualtu ruangah khan ka rîn lo le, a sual tuartu ruangah ka rîn lêm lo, kan tlûnah ṭhanemsemsê nan ngâi zia Pathian mitmuh ah nan sinah theihtir hen a um khonâk ding hen ka rîn mi asi dauh.

GALATIA 5:19

Chun, taksa thilti tla chu a lang fiang asi; chubang chu hi hi asi:

EPHESI 5:3

Sikhawmsele, mi thenhlimh tla nan si ruangah duhnâk leh nâwmtâmnâk zawzawng, hamkahnâk chu nan lakah sim hen khawm um lah seh;

DEUTERONOMY 22:30

“A pa nupi tla lakah a zei mi tal a pung hen a pa rangah ningzak a saih ding asi lo.

DEUTERONOMY 27:20

“ ‘A pa nupi tla lakah a zei mi tal pung hen a pa rangah mualphohtu chu Pathian siat a tlûnah um seh,’ an ti lai. “Mî zapi zawzawng tla nih, ‘Amen!’ ti hen an sâng lai.

KOLOSA 3:5

Chun, nan taksa ṭeng tual a um tla hi thah u, duhnâk, nâwmtâmnâk, hurnâk, duhnâk sual, duhlei hamkah tla hi, hamkahnâk hi ruksawnhnâk asi;

1 THESALONIKA 4:7

Pathian nih nâwmtâm ding hen a kan kawh lo le, thenhlimh ding hen hawng kan kawh dauh asi.

THUPHUANG 2:21

Chun, a sual rimnâk ding tik ka ruat piak le, sikhawmsele, a hurnâk sual chu a rim duh lo.

THUPHUANG 21:8

Sikhawmsele, mi zer tla, lunglo tla, mi lêmtu tla, mi thahtu tla, mi hur tla, dâwithiam tla, milem sawnhtu tla leh âwkrâwl simtu tla tingvo mun chu mei leh kât hen a kâng mi zur asi, chu chu thih nihnâk chu asi.

1 SAMUEL 2:24

Ka fa le, lêt u! Pathian mipi tla nih thilsual ah an ruat mi chu hi bang hi asi!