1 KORIN 2:1 - Bawm Common Language Bible Version

¹ Chun, unau le tla, kei lam chu Pathian thu thup ka nan simh na ding hen nan sinah ka hawng liau khan thusim rokual leh finghnâk rokual ka mang lo.

1 KORIN 2:1 ပူးပေါင်းရင်းမြစ်များ

EXODUS 4:10

Sikhawmsele, Mosi nih, “Silo, LALPA, hawng ka fial lah. Thusim thiam mi ka silo, na hawng ka sawnhnâk thawk hen khawm mi hawlh ring thiam ka silo. Mi hawlh ring thiamlo tak kasi, ka hawlh a fûm hen ka hawlh a hak,” a ti.

ISAI 8:20

Nannih nih, “LALPA nih a nan sîntir na mi hi ngâi u! Mithi sawnh thiam thu ngâi lah, a nan simh na mi thu chu nan rangah zeikhawm a ṭhatnâk a um lai loh,” ti hen nan sâng ding asi.

THILTI 20:21

Juda tla leh Greek tla sinah khawm Pathian leiah thinlung lêttirnâk thu leh kan Lalpa Jisu Krist leiah lungnâk thu ka theihtir tâwn kha.

THILTI 22:18

chun, ‘A nam le, Jerusalem khua mi suak rawh, ka thâwngthâng na sim ding mi chu an lung awtlo hi,’ a hawng ka ti liau ka muh.

ROM 16:18

Chu hâwi mi tla nih chun kan Lalpa Krist rian an ṭuan lo le, anmah paw rian an ṭuan dauh tâwn; an kâ ṭhatnâk leh an hawlh thiamnâk hen mi fing lo tla thinlung an perpet tâwn.

ROM 16:25

Ka Thâwngthâng Ṭha leh Jisu Krist thusim hâwi hen, thuthup phuangnâk hâwi hen, chu thuthup chu zungzâl thawk hen â thup tâwn.

1 KORIN 1:17

Krist nih chun baptis ding hen a hawng ka fial lo, Thâwngthâng Ṭha sim ding hen a hawng ka fial dauh asi; thufing sim lo hen, chu hâwi asi lo chun Krist kraws chu zeikhawm lo hen ka umtir lebang lai.

1 KORIN 1:6

chu hâwi hen Krist thu ka theihtir mi chu nanmah lakah birhtir hen a um kha.

1 KORIN 2:13

Minung finghnâk thu leikâng ah sîntirnâk sim lo hen, Thlarau sîntirnâk thu a sim dauh hen, Thlarau lei thu tla chu thlarau lei mi tla sinah simhfiang hen, chubang thu hawng kan pêk mi tla khawm chu kan sim tâwn.

1 KORIN 2:4

Chun, nan lungnâk chu minung finghnâk ah ngauh lo hen, Pathian thiltikhonâk ah ngauh hen a um dauhnâk ding hen,

1 KORIN 2:7

Pathian finghnâk thuthup chu ka sim dauh tâwn asi, finghnâk â thup mi, kan rokualnâk ding ah Pathian nih laikulh um lânah a ruatkan rawh mi chu.

2 KORIN 10:10

A lasuikuat tla chu a rit hen a khauh le, a taksa lei lam chu a nêmno le, a hawlh khawm sik a kâi asi,” an ti dangâiah.

2 KORIN 11:6

Thusim leikângah lam chun hawlh mangdân thiam lah khawmsele theihnâk ah chun chu hâwi kasi lo; zeizawng ah mi zawzawng lakah nanmah leiah kan langhtir kha.

1 TIMOTHE 1:11

âwkrâwl a siatsirhtu tla, sawrtlâk Pathian Thâwngthâng Ṭha rokual sîntirnâk dik ka sinah kiltir mi hâwi silo hen, thil dang a um mi tla zawzawng rangah siam asi.

2 TIMOTHE 1:8

Chun, kan Lalpa thu theihtirnâk chu zahpi lah le, kei, amah mi rêngtlâ khawm hi hawng ka zahpi ber lah. Thâwngthâng Ṭha ruangah hamh hi Pathian thiltikhonâk hâwi vima hen, hawng ka tuarpi lehlam rawh.

1 JOHAN 4:14

Chun, Pa nih a Fapa chu laikulh ruangsuahtu ding hen a hawng fial asi ti kan muh le, midang tla khawm kan theihtir na asi.

THUPHUANG 1:2

chu Johan nih chun Pathian thu leh Jisu Krist theihtirnâk thu leh a thilmuh tla chu a theihtir.

THUPHUANG 1:9

Kei, Johan nan unaupa. Jisu ah hamhnâk tla, a ram leh a tuarnâk ah an bâwmpi natu hi, Pathian thu ruang leh Jisu theihtirnâk thu ruangah Patmos tikulh ti mi ah chun siah hen ka um le,

THUPHUANG 19:10

Chun, amah chu sawnh ding hen a kebul ah ka kûn le, sikhawmsele, anih nih ka sinah, “Kha hâwi hen ti lah, kei chu nangmah unau leh Jisu thusim zâwttu tla hâwi hen to-aw kasi, Pathian lam sawnh rawh,’ a ti. Jisu nih thudik a sim mi chu khuavâng tla lakah thaw khumh hen thu sim asi.