Hibùlù 3:1 - The New Testament in the Babanki language

¹ Vəlemə vwomə və laynəvə vyi a Nyìngòŋ ə bòŋ li dzàŋ ghə̀ŋ la ghə̀ŋ ə diʼ viʼi wen, kə lə diʼi la ghə̀ŋ diʼ ə shɨtə ə ghʉ̀ kwoʼtə ə ghəŋə a Yesò. Ghə̀ diʼ wù ə ntɨm Nyìngòŋ a vəghəŋ be diʼ kətʉ pfèm a ngə̀ŋ Nyìngòŋ, gyàmtə̀ vəghəŋ no ghò na yì kumə əbyɨmə yì a vəghəŋ ə kiʼi.

Hibùlù 3:1 ပူးပေါင်းရင်းမြစ်များ

Joyn 17:3

Ə kiʼi ntsìnə̀ yì a ghə̀ ko lu mè, a diʼ la, vəwenə na kɨ wù yì a wù diʼ Nyìngòŋ mùʼ yi a ghə̀ diʼ nəmwèʼè, be kɨ Yesò Klistò yi a wù tɨmə lì.

Joyn 20:21

Yesò ə gaʼa li ə kwʉ̀ʼsə a ndzɨ̀mtə̀sə bàm wensə la, “Mbwaʼmə ndiʼ a ghə̀ŋ! Ma tɨm ghə̀ŋ ndə̀ŋndəŋ ando Tìʼ ghom tə tɨm mo.”

Joyn 20:27

Ghə̀ ngaʼa li a Tòmos la, “wʉ̀ fənyi fə kəvu ə wù akəshi ghèn. A diʼi avu ghomə lə. Naʼsə̀ vi nə̀ kəvu ə kyekə ə ghʉ̀ a mo bèm. Byɨmə, kə wù bè kwoʼtə kənyʉ̀.”

Shwèʼ 1:15

Mətsi chò tò nshə̀ʼ alə̀, viʼi və byɨməvə ə zaʼa ghɨ nə̀ məwum mbò be sə ŋwʉʼ tò kəshi kə mùʼ, Bità lù tɨmə əgàʼ à vəwenə ə̀ gàʼ la,

Lumans 11:17

Ghə̀ŋ viʼi ətɨm diʼ alə̀ to nə̀ təntam tə fəkoʼ a fə tə kuʼ, və kwàʼtə̀ vi ə zhùŋtə̀, ə sə kwi a fəkoʼ a və we. Ghə̀ŋ sə diʼ luwen, zhɨ̀ əfo ə zhɨvə vi a fəkòʼ fə zhɨtəfə na fenfə ə zhɨ̀, be boŋ kiʼi aghaŋ yi a fə kiʼi.

Lumans 15:27

Vəwenə tə kwòʼtə ə nè alə̀ to fa vəwenə a ngeŋsə, ali a diʼ to no kəshi kə vəwenə ə nè alə̀ byìʼì ando viʼi Jus tə ə gyàmtə̀ viʼi ətɨm a ntsìnə̀ kəzhwì ə vəwenə, kə sə boŋ la viʼi tɨm boŋ gyàmtə̀ viʼi Jus nə̀ əfo vi a vəwenə ə kiʼi.

Lumans 15:8

Ghə̀ŋ kɨli la Yesò ə nvi a wù ə shwèʼè a viʼi Jus ə diʼ a vəwenə la kənyʉ̀ kəwʉkə ə Nyìngòŋ ə ko nə̀ fəŋ. Ghə̀ nè alə ə lwinsə kənyʉ̀ kəghʉ kə kì a Nyìngòŋ ə ghʉ a vətìʼ və vəwenə.

Lumans 9:24

Vəghəŋ diʼ alə̀, diʼ vəghəŋ vi a ghə̀ ə dzàŋ shisə fa ntìntìn ə viʼi Jus ə be dzàŋ shisə fa ntìntìn ə viʼi ətɨm.

1 Kolìntyàns 1:2

Ma nyòʼò ŋwàʼlə̀ ghèn a ənòyn ə viʼi a və byɨmə li a Nyìngòŋ a və diʼ a ntə̀ʼ Kolìn, nə̀ viʼi a Nyìngòŋ ə tsuʼ li ə ne la vəwenə ndiʼ viʼi vəlaynəvə, diʼ mu ghə̀ lyɨ vəwenə chò fa Yesò Klistò. Ma nyòʼò a ghə̀ŋ, be nyòʼò a viʼi vətsèm no tèbe fè a vəwenə diʼ, dzàŋə zhiʼ ə Bobo vəghəŋ Yesò Klistò. Ghə̀ diʼ Bobo vəwenə be diʼ Bobo ə vəghəŋ.

1 Kolìntyàns 10:17

Kə diʼ alə̀ byìʼì ando vəghəŋ nə̀ ndiʼ tèbe və ghoʼo, və tsèntə ə zhɨ̀ to kəbayn kə mùʼ, kə diʼ la vəghəŋ ə diʼ to ə wèn ə mùʼ.

1 Kolìntyàns 9:23

Ma ne nyʉ̀ a venə no ətsèm ndiʼ ə ne la ntɨm ə jùŋ kwi dyʉ̀ ambì mà boŋ ə kiʼi mbwaʼsə yì a ghə̀ diʼi tsu.

2 Kolìntyàns 1:7

Yès ə kɨ nəmwèʼè la əbyɨmə ə ghəŋə na nto tò to. Yès ə kɨ alə̀ byìʼì ando ghə̀ŋ kwen li a ndə̀ŋndəŋ ə ngəʼ yi a yès diʼ tsu, Nyìngòŋ ə sə wye ə tyɨm ghə̀ŋ ndə̀ŋndəŋ ando ghə̀ wye ə yèsə.

2 Kolìntyàns 9:13

Əshyèʼè a ghenə a ghə̀ŋ ne lə̀ ə diʼi ətyɨm ə jùŋə ghə̀ yì a ghə̀ŋ kiʼi a viʼi, ə be diʼi mwetə la ghə̀ŋ zhʉ ntɨm ə jùŋ ə Yesò yì a ghə̀ŋ jèʼè shə̀ʼtə̀. Kənyʉ̀ na kì ə na ne, viʼi nkuʼsə Nyìngòŋ, to kədə̀ŋ.

Efisyàns 3:6

Kənyʉ̀ kə kaynəkə a kì a və ə mo fa ambì ə diʼ la, viʼi ə ətɨm vyi a və byɨmə ntɨm ə jùŋ lu tsèntə zhɨ̀ fòyn ə Nyìngòŋ wenə viʼi Islel ə be tsèntə diʼ əbàs to a ntìntìn əwèn ə mùʼ, be diʼ lù tsèntə ə kiʼi mbwaʼsə yì a Nyìngòŋ ə ghʉ li chò fa a Yesò Klistò.

Efisyàns 4:1

Ma sensə ghə̀ŋ byìʼì shwèʼ a ghenə a Bobo ne li a vəghəŋ la, ghə̀ŋ ntsi ntsìnə̀sə, a ji yi a Nyìngòŋ ə kəŋ ando ghə̀ dzàŋ shisə ghə̀ŋ fa mbyi. Ghə̀ŋ kɨli la ma diʼ alə̀, diʼ wù ə nfɨŋ byìʼì shwèʼ yì a ma ne a Bobo.

Efisyàns 4:4

Ghə̀ŋ diʼ bàs əwèn ə mùʼ, kəzhwì kə Nyìngòŋ kì a kə shwèʼè a wèn a yi ə diʼ to kə kəmùʼ, to ndə̀ŋndəŋ ando Nyìngòŋ ə ndzàŋ shisə ghə̀ŋ fa mbyi ə ne ghə̀ŋ sə ki to kənyʉ̀ kə mùʼ kɨ la ghə̀ŋ lu bwòŋ.

Filìbàyns 3:14

Mà shwèʼè dyʉ̀ tò nə̀ mbì ndi ə kiʼi zhùʼtə̀ yi a Nyìngòŋ ə dzàŋə̀ mò fa kaŋ ə chò fà Yesò Klistò.

Kòlòsyàns 1:12

ku kəzòŋ a Tìʼ ando ghə̀ ne li ghə̀ŋ, nkwʉʼʉ ə gətə əfò vì a ghə̀ ghʉ̀ a viʼi wen a kəshi kə baynə kə.

Kòlòsyàns 1:22

ali Nyìngòŋ ə sə diʼ luwen mu ghə̀ ne li ghə̀ŋ bwensə vi a wen, byìʼì əpfʉ̀ ə kətsoʼ kə wen yì a Wàyn wenə əpfʉ ndi ghə̀ŋ tɨmə ashɨ Nyìngòŋ laynə, ko ghə̀ŋ le kiʼ ə mbyɨ ə tsèn ko wu ki kənyʉ̀ a wìʼ zi ghə̀ gham wu tsu.

Kòlòsyàns 3:12

Ando ghə̀ŋ sə diʼ viʼi a Nyìngòŋ ə tsuʼ li a viʼi wen ə sə koŋə, ghə̀ŋ moʼ ntsìnə̀ ə jùŋ, tùʼmə̀ nə̀ viʼi, ə nshiʼsə təwenə təŋtə a nse, bwaʼmə, be wensə.

1 Tèsàlonyà 2:12

sensə ghə̀ŋ la ghə̀ŋ ə nkiʼ ətyɨm ə to ghə̀, tsi ntsìnə̀ yì a Nyìngòŋ ə kòŋ. Ghə̀ dzàŋ ghə̀ŋ la ghə̀ŋ vi tsèntə akəshi kə əfòyn ə wen,be nkiʼ əbayn ə ghoʼoghə.

1 Tèsàlonyà 5:27

Ma sensə ghə̀ŋ a kədyòʼ ə Bobo la ghə̀ŋ dzàŋ ŋwàʼlə̀ ghèn a viʼi və byɨməvə no və tsèm.

2 Tèsàlonyà 1:11

A le kənyʉ̀ ki a yès nə̀ jɨ̀mə̀ a ghə̀ŋ to məzhʉ̀ ə tsèm la Nyìngòŋ ə vəghəŋ nè la ghə̀ŋ ə tsi ntsìnə̀ yì a ghə̀ kwʉ̀ʼ a diʼ yi a ghə̀ dzàŋ ghə̀ŋ la ghə̀ŋ vi ə ntsi. Yès nə̀ jɨ̀mə̀ la ghə̀ ku kədyòʼ ghə̀ŋ ə nè nyʉ̀ ə jùŋ və vi a ghə̀ŋ kòŋ ə nə̀ nè ə be nè mwetə shwèʼ ə ghəŋə to nə̀ viʼi və byɨməvə.

2 Tèsàlonyà 2:14

Nyìngòŋ ə ndzàŋ li ghə̀ŋ chò fa a ntɨm ə jùŋ yi a yès ə shə̀ʼtə̀ a ghə̀ŋ ndi ghə̀ŋ vi ə boŋ kiʼ əghoʼ yì a Bobo vəghəŋ Yesò Klistò ə kiʼ.

1 Timotì 6:12

Mwòmsə̀ shwèʼ no nə̀ kədyòʼ kə ə ghaʼ byɨmə ə wu to nə̀ wìʼ yi a ghə̀ nyɨŋ kənyɨŋ ə zhɨ ndi wù lu kiʼi ntsìnə̀ yi a ghə̀ ko lu mè. Wokèn ə diʼ ntsìnə̀ yi a Nyìngòŋ ə ndzàŋ wù la wù kiʼi, ando wù ə tɨmə ashɨ viʼi ə gàʼ a ndayn la wù byɨmə li à Klistò no nə̀ ətyɨm ə wu no tsèm.

1 Timotì 6:2

Əkòs vi a və shyèʼ à viʼi, a diʼ viʼi və byɨməvə ə ko diʼ ə nchasə vəwenə byìʼì ando və tìʼ və shyèʼ a vi ə diʼ viʼi və byɨməvə to nə̀ vəwenə. Vəwenə ə diʼ ə mbòŋsə̀ shwèʼ nə̀ kədyòʼ kə byìʼì ando se a yi ə dyʉ̀ à wìʼ, a dìʼ wù ə byɨmə, vəwenə kòŋ wen. Wù dìʼ ə shɨ̀tə̀ ə ziʼi ənyʉ̀ a venə à vəwenə.

2 Timotì 1:9

Nyìngòŋ ə mbwòŋsə̀ li vəghəŋ ə ne la vəghəŋ ə ndìʼ viʼi wen. Ghə̀ nko ne alə byìʼì ando vəghəŋ ə nè kənyʉ̀ kə jùŋ kə kətsenkə à wen. Ghə̀ ne a lì tò fa wen a ngeŋ byìʼì ətyɨm ə jùŋə̀ ghə̀. Ghə̀ ghʉ̀ kənyʉ̀ a kenkə mimbu no mbyi sə zìtə̀, la ghə̀ lu ne ənyʉ̀ a venə əcho fa Yesò Klistò ə diʼ ətyɨm ə jùŋ ghə̀ ə̀ wen.

2 Timotì 2:7

Wù kwòʼtə̀ kənyʉ̀ kenkə a mà gàʼa lə, byiʼ ando Bobo a nè ə wù zhʉ kɨ ənyʉ̀ avenə no ə tsèm.

Hibùlù 10:19

Luwen a vəlemə vwomə, ando vəghəŋ kɨ nəmwèʼè la vəghəŋ lu kwen akəshi yi a kə Laynə kwʉ̀ʼʉ̀ byìʼì mənlyuŋ mə Yesò,

Hibùlù 10:21

Ando vəghəŋ ə kiʼi pfèm ngə̀ŋ Nyìngòŋ ə to, ghə̀ lyè no gho a ngə̀ŋ Nyìngòŋ,

Hibùlù 10:23

Vəghəŋ ghaʼ kənyʉ̀ ki a vəghəŋ ə kɨ la kə diʼ nəmwèʼè ə to tsu kə vəghəŋ be a nə̀ʼkə̀, byìʼì ando Nyìngòŋ ə ghʉ̀ no ghò, ghə̀ ne to ali.

Hibùlù 13:22

Vəlemə ə vwomə ma sensə la ghə̀ŋ shɨtə ghaʼ nyʉ̀ venə a mà gàʼa lə̀. Ma ko nyoʼ nyʉ̀ ə ghoʼo və.

Hibùlù 2:11

Yesò, a ghə̀ ne la viʼi ndiʼ nə̀ laynə ashɨ Nyìngòŋ wenə viʼi na venə ə tsèntə ndiʼ to vunə Nyìngòŋ. A le kənyʉ̀ ki a Yesò toŋtə vəwenə la vəlemə, ko kətʉ̀ kə wen kə lu ndiʼi.

Hibùlù 2:17

A lə kənyʉ̀ ki a kə ne ghə̀ kaʼkə sə diʼ to wìʼ to nə̀ vəghəŋ vəlemə və wen, ndi ghə̀ shɨtə kɨ ə shyèʼ to nə̀ pfèm ngə̀ŋ Nyìngòŋ ə ŋaŋtə be kusə shinsə a viʼi, shyèʼ a Nyìngòŋ ə nè la ghə̀ lyesə ku mbyɨsə viʼi.

Hibùlù 3:12

Vəlemə vwomə a byɨmə, ghə̀ŋ tuʼmə ə yen la kə wìʼ fa ghə̀ŋ a ntìntìn a ki ətyɨm ə byɨghə ə faŋ ke byɨmə ə nyɨŋ moʼtə̀ Nyìngòŋ yi a ghə̀ tsi diʼ.

Hibùlù 3:14

Vəghəŋ sətsen tɨmə to a vəghəŋ a əbyɨmə ə ti to ando vəghəŋ ə mbyɨmə fa ambì ə sə ti ə zàʼa fa kəmwètə, a ne diʼ la vəghəŋ diʼ to no vəghəŋ və Yesò nəmwèʼè.

Hibùlù 6:20

Yesò kwen li akəshi na ghèn a ambì byìʼì vəghəŋ. Ghə̀ diʼi pfèm ə ngə̀ŋ Nyìngòŋ ə ŋaŋtə to məzhʉ̀ ə tsèm to a ji yi a Mèlìkisedèk ndiʼ fa tsù.

Hibùlù 7:26

A diʼ to Yesò ə pfèm Nyìngòŋ ə ŋanŋtə yì a ghə̀ kwʉ̀ʼ li ə gyàmtə̀ vəghəŋ. Ghə̀ laynə kwʉ̀ʼ, ko ndiʼ la ghə̀ kiʼi kənyʉ̀ a və zizi və gham ə wen tsu, ko ndiʼ la ghə̀ kiʼi mbyɨ, mu Nyìngòŋ ə shisə li wen fa ntìntìn viʼi nyʉ̀ ə byɨvə ə kuʼsə ghʉ̀ wen akàŋ a kəkɨ kə ghoʼo kə.

Hibùlù 7:28

Viʼi vi a Əsoʼ ə Mosìs mbyɨmə la və wʉ̀ vəwenə a vəpfèm və ngə̀ŋ Nyìngòŋ sə ngaŋtəsə ndiʼ to viʼi to nə̀ viʼi vətsenvə, ne mbyɨ. Alì fa yi a bàm ando ghə̀ nku li əsoʼ, Nyìngòŋ ntsuʼ li Wàyn wen a ghə̀ nsə diʼ mu ghə̀ ku li mu kàyn ə ghʉ wen a pfèm ə ngə̀ŋ Nyìngòŋ ə ŋaŋtə to ghaynə mùʼ.

Hibùlù 9:11

Alì Yesò sə diʼ mù ghə̀ vi li. Ghə̀ diʼi pfèm ngə̀ŋ Nyìngòŋ ə ŋaŋtə yì a ghə̀ vi nə̀ nyʉ̀ ə jùŋə və vyi a vəghəŋ ə kiʼi luwen. Ghə̀ shwèʼè akəshi kə kwʉ̀ʼ, kuʼmə chò fəngə̀ŋ fifə a pfèm ə ngə̀ŋ Nyìngòŋ ə shwèʼè tsu. Kəshi na kì kə ə diʼ ko andiʼ la à shɨtə wìʼ, a ko diʼ no tèbe kəfo kə nse ashə.

Hibùlù 9:15

A lə kənyʉ̀ ki a Yesò diʼ wìʼ yi a ghə̀ bàtə məkàyn mə mfimə̀ ə ne la viʼi vi a Nyìngòŋ dzàŋ kiʼi mbwaʼsə yì a ghə̀ ghʉ̀ mu ghə̀ faŋ li to nəmwèʼè. Kə diʼ alə̀ byìʼì ando Yesò ə npfʉ̀ li ə bwoŋsə̀ viʼi fa mbyɨsə yi a vəwenə ne achʉʼ ə məkàyn mə mumə̀.

1 Bità 2:9

Alì, fa ghə̀ŋ, ghə̀ŋ diʼ viʼi a Nyìngòŋ ə tsuʼ li. Ghə̀ŋ diʼi a nə̀ vəpfèm və ngə̀ŋ Nyìngòŋ, shyèʼè a fòyn. Ghə̀ŋ diʼ viʼi və laynəvə mu Nyìngòŋ ə lyɨ̀ li ghə̀ŋ a viʼi wen ndiʼ ghə̀ŋ ə shə̀ʼtə̀ nyʉ̀ ə kaynəvə vi a ghə̀ nè. Ghə̀ dzàŋə li ə shisə ghə̀ŋ fa a ntìntìn kəbəŋ kəfenəkə ə kwensə ghə̀ŋ a ntìntìn əbayn ə kaynəghə ə wen.

1 Bità 3:5

A le ji yì a ki ətʉʼ mughə vyi a və ə choʼsə Nyìngòŋ ə ntsi fa tsù mu bòŋ a və lɨmə və vəwenə. Vəwenə gumlə vəlɨm və vəwenə.

1 Bità 5:1

Ma sensə vəchəʼ və ngə̀ŋ Nyìngòŋ vyi a və diʼi a ghə̀ŋ a ntìntìn la və ə shɨtə tùʼmə̀ nə̀ viʼi vyi a Nyìngòŋ ə kuli a vəwenə to nə̀ byisə. Ghə̀ŋ kɨli la nkàyntə̀ mo diʼ to no chəʼ mu ma ə yen li to ando Klistò yènə ngəʼ. Ma diʼ to a ntìntìn əbayn yi a Nyìngòŋ ə lu diʼ a tʉʼ a Yesò lu bwenə vi. Ghə̀ŋ sə tuʼmə nə̀ vəwenə, ghə̀ŋ ə diʼi la ghə̀ŋ kòŋ kənyʉ̀ kì a ghə̀ŋ nè. Kə ghə̀ŋ a nè sə və ghaʼ ghə̀ŋ ghaʼ, byìʼì ando Nyìngòŋ ə kòŋ la ghə̀ŋ ə nè a ji na ghèn. Ghə̀ŋ ə ghablə, nè shwèʼ. Kə ashɨ a ghəŋə baŋə a ko.

1 Bità 5:10

Ghə̀ŋ a nyenə ngəʼ to fəshyinə fə zhʉ̀ alə̀, ə Nyìngòŋ ə tisə ghə̀ŋ, ə ku kədyòʼ a ghə̀ŋ, a kə nè la ghə̀ŋ ə to no nànto. Ghə̀ diʼ Nyìngòŋ, kusə shinsə no nànto. A ndzàŋ wen ə dzàŋ ghə̀ŋ la ghə̀ŋ vi kwen a wen a tyi əbayn ə ghoʼoghə chò fa Yesò, a diʼ əbayn, ko andiʼ la ghə̀ lu mè.

1 Joyn 1:3

Yès ə gàʼà ənyʉ̀ a ghə̀ŋ a diʼi ənyʉ̀ a yès ə yen li ə bè zhʉ ndi vəghəŋ ə ntsèntə̀ diʼ a kənyʉ̀ kə mùʼ vəghəŋ və Tìʼ bènə̀ Wàyn wen ə Yesò Klistò.

Ŋwàʼlə̀ Jud 1:1

A nyòʼò mò Jud ə lèmə̀ Jems ə nyòʼtə̀ ŋwàʼlə̀ ghèn a ghə̀ŋ. Mà diʼ wù ə shwèʼè ə Yesò Klistò. Ma nyòʼò ŋwàʼlə̀ ghèn a ghə̀ŋ a vəlemə və jùŋ və vyi a və ndzàŋ li ə shisə, ghə̀ŋ sə tsi a tyì əkòŋ Nyìngòŋ Tìʼ, Yesò Klistò ə sə lye ghə̀ŋ.

Kəmwetə 17:14

Vəwenə ne tsèntə̀ ə sə̀ʼ əsoyn a əwen wàyn bi ənjɨ̀ yì alì wàyn bi ənjɨ̀ soyn ə̀ zhɨ̀ vəwenə byìʼàndo ghə̀ dìʼ Bobo ə̀ vəbobo, be diʼ fòyn ə̀ təfòyn tətsèm, kiʼ viʼi wen a ghə̀ ə̀ ndzàŋə̀ li ə̀ bè tsuʼ vəwenə la və nzhʉmə̀ wen.”

Kəmwetə 18:20

“Ghə̀ŋ vi a ghə̀ŋ ə tsi a kàŋ, ghə̀ŋ ə nsaŋlə̀. Ghə̀ŋ ə nsaŋlə̀ a viʼi Nyìngòŋ nə̀ viʼi ə ntɨm nə̀ nshə̀ʼtə̀sə sə̀ ghoʼkəsə byìʼàndo Nyìngòŋ ə sisə li kənyʉ̀ a ghə̀ ə̀ ne à ghə̀ŋ.”