Filìbàyns 1:27 - The New Testament in the Babanki language

²⁷ Ko a fʉ no te ghò, ghə̀ŋ tsi ando ntɨm ə jùŋ ə Klistò ə kəŋ ndi mà sətsen vi tèbe vi ə yen ghə̀ŋ, kò zhʉ byìʼì ghə̀ŋ a zhʉ a ma ko diʼ, mà ə kɨ la ghə̀ŋ ə ko kwitə fa kiʼi kwoʼtə ə mùʼ, tsi to a kənyʉ̀ kə mùʼ, shyèʼ no nə̀ kədyoʼkə be soynə ə ghaʼa əbyɨmə yì a ntɨm ə jùŋ ə ziʼi.

Filìbàyns 1:27 ပူးပေါင်းရင်းမြစ်များ

Matìyò 12:25

Yesò kɨ kwoʼtə vəwenə mù gàʼ à vəwenə la, “No loʼ kò a viʼi vi kiʼ kəngə̀sə̀ à vəwenə a ntìntìn be soynə təwen tə vəwenə mu loʼ ayi a fəŋ. A be ndiʼ viʼi ntə̀ʼ ko kò viʼi ngwaʼa ngə̀ŋ ko a vəwenə kiʼ kəngə̀sə̀ à vəwenə a ntìntìn be soynə təwen tə vəwenə mu ntə̀ʼ ayì ko ngwaʼa ngə̀ŋ ayi ne fəŋ.

Shwèʼ 2:46

Vəwenə vi zhùŋtə̀ à ngə̀ŋ Nyìngòŋ tò mətsì ntsèm. Vəwenə nè fʉ̀, və sə jèʼè zhɨ tò à ngə̀ŋ a ngə̀ŋ be saŋlə̀ a kənyʉ̀ kə mùʼ,

Shwèʼ 24:24

Mətsi nè chò nshəʼ alə̀, Felik vì wenə̀ wì wen Dlusila, a ndìʼ wu Jus ə tɨm la və dyʉ̀ ə̀ dzàŋ Bol ghə̀ vì. Bol nè vì, vəwenə mù sə zhʉtə̀ ando Bol ngàʼà byìʼì byɨmə à viʼi kiʼì a Yesò Klistò.

Shwèʼ 4:32

Viʼi və byɨməvə no vətsèm sə̀ diʼ tò a kənyʉ̀ kə mùʼ. No wìʼ muʼ nko gàʼà la kəfo kikə kiʼ tò yì. No məndo nlyɨ̀ kəfo ghə̀ gə̀tə̀ kù vəlèmə̀ və wen.

Lumans 1:16

Ma diʼ nə̀ saŋlə byìʼì ntɨm ə jùŋ a ghèn ando ghə̀ diʼi kədyòʼ ki a Nyìngòŋ ə̀ bwòŋsə viʼi və byɨməvə tsu no və tsèm. Ghə̀ bwoŋsə viʼi və byɨməvə, zìtə̀ nə̀ viʼi Jus a ambì, kùmtə̀ nə̀ viʼi ətɨm.

Lumans 1:5

Nyìngòŋ ə kiʼi ətyɨm ə jùŋə a mò ə ghʉ̀ mò a wù ə ntɨm la mà njèʼè shə̀ʼtə̀ ntɨm ə jùŋ kuʼsə Yesò ndi viʼi zhʉ ə byɨmə to təloʼ tə tsèm. Ghə̀ ne alə̀ chò fa a Yesò Klistò.

Lumans 1:9

Ma jɨ̀mə̀ a ghə̀ŋ to məzhʉ̀ ə ntsèm. Nyìngòŋ ghèn a ma shyèʼ a wen nə̀ ətyɨm ə ghomə no tsèm, shə̀ʼtə̀ ntɨm ə jùŋ kumə Wàyn, ghə kɨ kənyʉ̀ kenkə a ma gàʼ lə̀.

Lumans 10:8

Və nyòʼò li la, “kənyʉ̀ kə Nyìngòŋ kə boʼsə a ghə̀ŋ. Kə diʼ a ghə̀ŋ təchʉ̀ be diʼ a ghə̀ŋ a tətyɨm.” A diʼ kəwenkə a yès ə shə̀ʼtə̀ la ghə̀ŋ zhʉ ə byɨmə.

Lumans 15:16

Ghə̀ nè la mà ə̀ diʼ wù ə shwèʼè ə Yesò Klistò, shyèʼ a viʼi ətɨm. Ma shyèʼ to nə̀ pfem ə ngə̀ŋ Nyìngòŋ, shə̀ʼtə̀ ntɨm ə jùŋ Nyìngòŋ a viʼi ətɨm kə diʼ alə̀ to nə̀ kəku a Nyìngòŋ, kəzhwì kə Ŋwoʼkə shʉ̀ laynsə vəwenə, nè la Nyìngòŋ be shi kəku a kì nə̀ saŋlə ghə̀.

Lumans 15:29

Ma kɨli la ma sə nvi ghayntə ghə̀ŋ ə Yesò tsentə bwaʼsə vəghəŋ no nànto.

1 Kolìntyàns 1:10

Ma sensə ghə̀ŋ a vəlemə vwomə a zhiʼ Bobo vəghəŋ Yesò Klistò la ghə̀ŋ nti to əchʉ̀ ə mùʼ a nyʉ̀ vyi a ghə̀ŋ gàʼà ndi kə kəgəsə kə na diʼ a ghə̀ŋ a ntìntìn. Ghə̀ŋ diʼ ə mboŋsə diʼ to a kənyʉ̀ kə mùʼ, kiʼ to əkwoʼtə ə mùʼ, be ki nyʉ̀ to fa ji ə mùʼ.

1 Kolìntyàns 15:58

Ma sə gàʼà a ghə̀ŋ a vəlemə vwomə və juŋəvə la, ghə̀ŋ shɨtə ghaʼ əbyɨmə ə ghəŋə, kə ghə̀ a nə̀ʼkə̀. Ghə̀ŋ ə nghablə, shyèʼ a Bobo to məzhʉ̀ ə tsèm byìʼì ando ghə̀ŋ kɨli la shwèʼè ghəŋə a wen zizi ko ghə̀ lu ə lè to kədyàŋ.

2 Kolìntyàns 13:11

Ə mwètə̀ a vəlemə vwomə, ma sə gàʼa la, ghə̀ŋ faŋ to akàyn. Ghə̀ŋ baʼtə̀ ntsìnə̀ shəŋsə. Ghə̀ŋ shə̀tə̀ ghaʼ kənyʉ̀ kì a mà gàʼa. Ghə̀ŋ ntsi tò kənyʉ̀ kə mùʼ, tsi nə̀ mbwaʼmə ndiʼ Nyìngòŋ ghə̀ŋ a ghə̀ kòŋ viʼi be ku mbwaʼmə a ghə̀ŋ, ndiʼ wye vəwenə.

2 Kolìntyàns 4:4

Viʼi a və ko byɨmə ko zhʉ̀ kɨ kənyʉ̀ byìʼì ando Satan a ghə̀ soʼo mbyi ghèn kəŋtə li tətof tə vəwenə la kə vəwenə byɨmə. Ghə̀ nè alə̀ la kə vəwenə yen əbayn yì a ntɨm ə jùŋ Klistò a ghə̀ diʼ kənfɨsə kə Nyìngòŋ ə vi nə̀ wenə ghə̀.

2 Kolìntyàns 9:13

Əshyèʼè a ghenə a ghə̀ŋ ne lə̀ ə diʼi ətyɨm ə jùŋə ghə̀ yì a ghə̀ŋ kiʼi a viʼi, ə be diʼi mwetə la ghə̀ŋ zhʉ ntɨm ə jùŋ ə Yesò yì a ghə̀ŋ jèʼè shə̀ʼtə̀. Kənyʉ̀ na kì ə na ne, viʼi nkuʼsə Nyìngòŋ, to kədə̀ŋ.

Gàlesìyà 1:7

Ma ko gàʼà tebè la ntɨm ə jùŋə tsen be diʼ. Ma gàʼà la viʼi vətsenvə sə boŋsə sàsə̀ ətof ə ghəŋə, mwomsə ə nkwitə ntɨm ə jùŋ byìʼì ə Yesò.

Efisyàns 1:13

Nyìngòŋ ə shisə li ghə̀ŋ viʼi Efesùs ə bwòŋsə̀ ghə̀ŋ chò fa a Yesò ando ghə̀ŋ zhʉ ntɨm ə jùŋ yì a ghə̀ diʼi nəmwèʼè ə byɨmə. A ndiʼ ando ghə̀ŋ mbyɨmə, ghə̀ chʉ̀tə̀ ghə̀ŋ nə̀ Kəzhwì kə Ŋwoʼkə kì a ghə̀ ə nghʉ̀,

Efisyàns 1:15

A lə kənyʉ̀ ki a ma sə ku kəzòŋ a Nyìngòŋ, byìʼì ghə̀ŋ a mò a jɨ̀m to məzhʉ̀ ə tsèm fa chʉʼ a mà nzhʉ əbyɨmə a ghə̀ŋ kiʼi a Bobo vəghəŋ Yesò Klistò, nə̀ kòŋ yì a ghə̀ŋ kiʼi a viʼi Nyìngòŋ no vətsèm.

Efisyàns 4:1

Ma sensə ghə̀ŋ byìʼì shwèʼ a ghenə a Bobo ne li a vəghəŋ la, ghə̀ŋ ntsi ntsìnə̀sə, a ji yi a Nyìngòŋ ə kəŋ ando ghə̀ dzàŋ shisə ghə̀ŋ fa mbyi. Ghə̀ŋ kɨli la ma diʼ alə̀, diʼ wù ə nfɨŋ byìʼì shwèʼ yì a ma ne a Bobo.

Filìbàyns 1:5

Ma kù kəzòŋ alə̀ byìʼì ando ghə̀ŋ gyàmtə̀ li mò ə shə̀ʼtə̀ ntɨm ə jùŋ ghèn ə zìtə̀ fa kətsi yi a ghə̀ŋ zhʉ ntɨm na ghèn ə zàʼa fa layn.

Filìbàyns 2:12

Luwen a vəlèmə̀ və kòŋ ə̀ mò, ando ghə̀ŋ tə zhʉ gɨ̀ ghom, ando mà ndiʼ vəghəŋ, kə a mbòŋsə̀ bòŋə̀ no nkàyn la ghə̀ŋ ntùʼtə̀ zhʉ gɨ̀ ghom ando mà ko bè diʼ vəghəŋ. Ghə̀ŋ myetə nè əshyèʼ yi a ghə̀ faŋə̀ nə̀ gumlə ghə bènə̀ fwàyn ə Nyìngòŋ ndi Nyìngòŋ myetə li bwoŋsə̀ ghə̀ŋ.

Filìbàyns 2:24

Mà choʼsə̀ à Bobo la kəghaf kə ko be a dyə̀fə ə nkàntə̀ mò vi ə̀ yèn ghə̀ŋ.

Filìbàyns 3:18

Ando ma ngaʼa li a ghə̀ŋ to ghaynə ghayn ə be sə gyisə gàʼà luwèn nə̀ məshɨ à mo ashɨ la viʼi no vəghoʼ a ma tə ngaʼa ghə̀ŋ byìʼì ji a vəwenə ətsi ədiʼ la vəwenə diʼ viʼi ə kəbàyn ziʼi yi a ghə̀ gaʼa byìʼì əpfʉ Klistò a kəntò.

Filìbàyns 3:20

Alì fà vəghəŋ, vəghəŋ ə kɨ la ə̀ loʼ ə vəghəŋ ə diʼ akàŋ. Adìʼ fa tsu a vəghəŋ ə kə̀ʼtə̀ mbwòŋsə̀ vəghəŋ ə Bobo Yesò Klistò.

Filìbàyns 4:1

Vəlèmə vwomə mà gàʼà à ghə̀ŋ a la, mà kòŋə̀ ghə̀ŋ no nkàyn be kòŋə̀ əyen ghə̀ŋ. Ghə̀ŋ ə nè mà saŋlə̀ no nkàyn. Ghə̀ŋ dìʼ əmoʼtə shyèʼ ə̀ mò. Mà kuʼsə̀ əwen ə ghomə byìʼì ghə̀ŋ. Vəlèmə vwomə ma kòŋ Luwen ghə̀ŋ diʼi tɨmə tò a ghə̀ŋ əbyɨmə a Bobo.

Kòlòsyàns 1:10

Kenkə a ne ghə̀ŋ əntsi ntsìnə̀ yì a Bobo kəŋ, a diʼ yi a ghə̀ ne nsaŋlə to jisə tsèm, ntsìnə̀ na ghèn ne la ghə̀ŋ ne tənki tə shwèʼè tə jùŋ tə tò tətsèm be tuʼtə kɨ wen ə dyʉ̀ nə̀ mbì.

Kòlòsyàns 1:4

Yès ə ku kəzòŋ a Nyìngòŋ byìʼì ando yès əzhʉ li la ghə̀ŋ byɨmə li a Yesò Klistò be sə kòŋ viʼi Nyìngòŋ no və tsèm.

1 Tèsàlonyà 3:6

Timotì bwensə li vi luwen ə shə̀ʼtə̀ ntɨmə ə jùŋ a yes la ghə̀ŋ bo choʼsə to Yesò, be kòŋ viʼi vətsenvə. Ghə̀ be ə gàʼ la ghə̀ŋ kwòʼtə̀ yes no zhʉ̀ko, a ghə̀ŋ saŋlə to alə, kòŋ ə yen yes tamə ando yo wen ə kòŋ ə yen ghə̀ŋ.

1 Tèsàlonyà 4:1

Vəlemə, à le faŋ nyʉ̀ venə ndi mà gàʼ mwetə a ghə̀ŋ. Yes əziʼi li ghə̀ŋ, ghə̀ŋ sə ə kɨ ji yì a ghə̀ŋ diʼ ə nə̀ tsi fa tsu ə nè Nyìngòŋ ə saŋlə, a diʼ nyʉ̀ mu ghə̀ŋ sə nè. Yes ə sensə ghə̀ŋ luwen no nànto, a kədyòʼ Bobo Yesò la ghə̀ŋ be nè chò no fa li.

1 Timotì 1:11

Ənyʉ̀ a venə ə diʼ a ntìntìn ntɨm ə jùŋ yi a Nyìngòŋ ku la mà shə̀ʼtə̀. A diʼ Nyìngòŋ kaynə yì a viʼi ə kuʼsə.

1 Timotì 1:19

Shɨtə ghaʼ əbyɨmə ə wu à Yesò Klistò, ə nkiʼ kwoʼtə ə laynə ghə̀. Viʼi vətsenvə tensə li ə ne kənyʉ̀ ki a kwòʼtə ə laynə ghə̀ a ghenə ə diʼi, ə maʼa əbyɨmə ə vəwenə.

2 Timotì 4:7

Ma shwèʼè li nkwʉʼ tò no a nkàyn. Ma shwèʼ li ə zaʼa a kəlyɨŋ yi a və kəŋ, bè shɨtə ghaʼ əbyɨmə ə ghomə.

Taytùs 2:10

Gaʼa à əkòs avenə la kə vəwenə a ntsoŋə fà vətì və shwèʼ və vəwenə, alì la vəwenə diʼ ə mbòŋsə̀ dìʼì à vətì və shyèʼ və vəwenə la vəwenə kwʉʼʉ̀ li ə və nchoʼsə̀ vəwenə ndi və nyenə la əziʼi Nyìngòŋ ə mbwòŋsə̀ vəghəŋ ə bòŋə̀ tò a jisə sə̀tsèm.

Filimùyn 1:5

Ma nə̀ ku kəzòŋ a Nyìngòŋ byìʼì ando ma zhʉ li jì yì a wù byɨmə a Bobo vəghəŋ Yesò fa tsù ə bè sə kòŋə̀ viʼi Nyìngòŋ no və tsèm.

Jems 3:18

Viʼi a və kòŋə̀ mbwaʼmə̀, ə ghʉ mbwaʼmə̀. Nakènkə nè viʼi tsi ntsìnə̀ ə jùŋ.

2 Bità 3:11

Ando və diʼ lu nyʉʼ əfo a venə no ə tsèm a ji na ghèn lə̀, ghə̀ŋ lə diʼ ə ntsì ale? Ghə̀ŋ diʼ ku təwen təŋtə a Nyìngòŋ ə be ntsi ntsìnə̀ laynə.

2 Bità 3:14

Kə le diʼ a doŋ shom sə jùŋsə la, ando ghə̀ŋ kəʼtə kətsi na kì, ghə̀ŋ mwòmsə̀ no nə̀ kədyoʼkə ə ndiʼ nə̀ laynə, ko ghə̀ a nkiʼi ə mbyɨ ashɨ Nyìngòŋ, be tsi nə̀ mbwaʼmə.

Ŋwàʼlə̀ Jud 1:3

Ma tə ə kòŋ ə nyòʼò a ghə̀ŋ, a doŋ shomsə jùŋ sə kumə ando Nyìngòŋ ə tsèntə bwòŋsə̀ vəghəŋ vətsèm, ali ə yen la kə bòŋ la mà zaŋsə nyòʼ ə tyɨftə ghə̀ŋ la ghə̀ŋ nè shwèʼè no nə̀ kədyoʼkə ə ghaʼ əbyɨmə yi a viʼi Nyìngòŋ ə kiʼi. Əbyɨmə ghenə diʼ to əmùʼ, mu Nyìngòŋ nku li a viʼi wen to ghayn əmùʼ.