Taitasi 1:16 - Baibo Busansulushi Bwa Libuku Ili

¹⁶ Balaamba ayi Lesa balimwishi, sombi micito yabo ilakaka sheesho nshebaamba. Balafundoosha kumoyo alimwi tabanyumfwili Lesa, aboobo tabeeleli kucita cintu cibotu nabi comwi.

Taitasi 1:16 ပူးပေါင်းရင်းမြစ်များ

Jobo 15:16

ino mbuyani kumuntu ulensha nsoni alimwi shikubisha? Ndushinisho kumuntu kubisha kulibo anga nkunwa maanshi!

Tushimpi 30:12

“Kuli bantu balibona ayi balisalalite, sombi tabasalaliteewo, napaceyi.

Isaya 29:13

Mwaami Lesa ulaamba ayi, “Aba bantu balaba pafwaafwi anebo mukwaamba, balandemekabo pamulomo, sombi myoyo yabo ili kulaale anebo. Kupaila nkobampaila, taaku mbokubete mukwiinga baleeisha milawo ipangabo bantu anga njemilawo yakwe Lesa.

Isaya 48:1

Amukutike makani aya mwebo nobamulunyungu lwakwe Jakobo. Amukutike mwebo nomwaambwa ayi bene Isilaeli, mwebo nobamulunyungu lwakwe Juda, ee, mwebo nomusebensesha liina lya Mwaami Lesa pakushomesha cakulumbila. Amukutike mwebo nomupaila muliina lyakwe Lesa wa bene Isilaeli, sombi kuteshi mulushinisho nabi mukululama.

Isaya 58:2

Balanambila mashiku amalumwi, balaboneka anga balisunishi kwishiba nshila shangu. Balalibonesha anga ngumushobo ucita shiluleme uyo utana kufutatilaawo milawo yangu neLesa wabo. Ee, balalibonesha anga balisuminite kukonkela milawo yangu. Balaamba ayi balisuni koombolosha kululeme alimwi ayi balisunishi kwaamba ayi nsene pafwaafwi ambabo.

Isaya 59:13

Twasumina kwaamba ayi tuli baashu alimwi tatushomeki kuli ndimwe noBaami baLesa. Tulamufutatila nobaLesa besu, tulalyatililana alimwi akumubukila. Kwaamba bubeshi ncintu myoyo yesu nceyakalinga kulama kabotu.

Jelemiya 12:2

Mwakabashanga abalo bakamena, balakomena akucata shisepo. Ciindi coonse balaamba shibotu pali ndimwe, sombi myoyo yabo ili kulaale amwebo.

Jelemiya 5:2

“Nabi balaamba ayi, ‘Bweenka mbocibete lushinisho ayi Mwaami Lesa ngumuumi,’ sombi bacilumbilabo shabubeshi.”

Jelemiya 6:30

Bantu aba baleetwa ayi, ‘Silifa ikakitwe’ ceebo Mwaami Lesa wabakaka.”

Esekelo 33:31

Bantu bangu balesa kuli ndiwe bweenka mbobacita lyoonse akwikala kunembo lyako ayi bakutike maswi ako, sombi tabaciti nshoobaambila, sobwe. Balaamba ayi balashomeka kuli ndime, sombi myoyo yabo ilibo mukubilila munshila italuleme.

Shakubelenga 24:16

makani awooyo unyumfwa maswi akwe Lesa, utambula lushibo luswa kuli Lesa Wiindaawo, uyo ubona shintu anga muciloto kuswa kuli Lesa Shinkusu shoonse, uyo uwa panshi ameenso kaalasha.

Bene Loma 1:28

Ono ceebo bakakaka kunyumfwila Lesa, wakabalekabo amiyeeyo yabo ibiibi kwaamba ayi bacite shintu shilensha nsoni.

Bene Efeso 5:6

Mutaleeki muntu nabi womwi ayi amucenjeeke kwiinda mumaswi atacite ncito mukwiinga sheenka shintu ishi nsheshilengesha Lesa kuba abukali pabantu abo batamunyumfwili.

1 Timoti 1:9

Peculu lya waawo tulishi kwaamba ayi Milawo taikwe kupangilwa baluleme, sombi abo beshikwiisotoka abatanyumfwili, batasuni shabuLesa abamucita shibi, batasalalite alimwi batapaili. Nja bantu abo bacaya bamaishiwabo nabi bamanyinawabo, bacayi,

1 Timoti 5:8

Sombi na muntu umwi taasuni kucafwa bamakwabo bunene bunene bamumukowa wakwe mwiine, wakaka lushomo lwakwe alimwi uleendaawo kuluba pamuntu utashomi.

2 Timoti 3:17

Nkokwaamba ayi muntu utoosebensela Lesa abe wooyo ukonsha kucita micito ibotu ili yoonse.

Taitasi 3:1

Ibalusha bantu bako ayi banoonyumfwila bamaami abeendeleshi. Banoobakonkela akulibambila kucita milimo yoonse kabotu kabotu.

Taitasi 3:3

Ceebo nabi swebo sobeene twakalinga baluya, batanyumfwili alimwi balubite. Twakalinga basha ba lunkumbwa lwa mubili alimwi ashakulisangalasha shipusenepusene. Twakalinga kwikala mubuumi bwa miyeeyo ya lupato amunyono. Bantu bakalinga kutupatite aswebo katubapatite.

1 Joni 2:4

Uyo waamba ayi Lesa ndimwishi, sombi kaatakonkeli milawo yakwe, ngumubeshi alimwi lushinisho talubete muli nguwe.

Judi 1:4

Ndakacita boobo mukwiinga bantu bamwi batasuni kucita kuyanda kwakwe Lesa bakenjila mulikoto lyanu cabushishi. Bantu aba balafulunganya lwaanguluko ndotucite kwaamba ayi bacaninemo nshila yakunoocita shintu shilensha nsoni. Peculu lya waawo balakaka Jesu Klistu Mufundishi alimwi ngoMwaami wesu eenkabo. Shamulandu wa bantu aba shakalembwabo kale kale muMalembo akwe Lesa.

Ciyubululo 21:27

Sombi mundabala inene iyo teshi mukenjile cintu citasalalite nabi comwi, nabi bantu boonse bacita shintu shilensha nsoni nabi babeshi. Mulaakwinjilabo baabo bacite meena alembetwe mulibuku lya buumi lya Mwanaambelele.

Ciyubululo 21:8

Sombi boowa, batashomi, basuni kucita shibiibi, bacayi, bafuule, baloshi, balambila shibumbwabumbwa alimwi ababeshi boonse, musena wabo ndweenge lwa mulilo alimwi asalufa. Ulu ndolufu lwabili.”

1 Samwelo 15:22

Sombi Samwelo wakakumbula ayi, “Sa Mwaami Lesa ulisuni milambu yakutenta aimwibo kwiinda mbwaasuni kunyumfwila maswi akwe? Tau! Kunyumfwila nkubotu kwiinda kubenga mulambu alimwi kukutika nkubotu kwiinda mafuta a mbelele shisankwa.

1 Samwelo 15:24

Mpomunyaawo Saulo wakaambila Samwelo ayi, “Ncakwiila ndabiisha. Ndasotoka shakaamba Mwaami Lesa alimwi amilasho yanu. Ndakaloonda bantu, aboobo ndakabanyumfwila.